Me Tiko kei Kemuni na Yalona

Kemuni na taciqu kei na ganequ, au vakavinavinakataka na madigi meu vosa vei kemuni nikua ena Siga ni Vakacecegu ni Turaga, ena koniferedi raraba ni Nona Lotu, ena draki ni Siganimate oqo. Au vakavinavinakataka na Tamada Vakalomalagi ena vuku ni isolisoli ni Luvena, ka a lako mai ena yalorawarawa ki vuravura me mai noda Dauniveivueti. Auvakavinavinaka niu kila ni mai sorovaka o Koya noda ivalavala ca ka duri mai ena Tucaketale. Ena veisiga kece au kalougata niu kila, ni baleta Nona Veisorovaki, au na rawa ni tucaketale ena dua na siga ka bula tawamudu kei na dua na matavuvale lomani.

Au kila oya mai na sala duadua e rawa kina vua e dua vei keda me kila. Na Yalo Tabu e sa tukuna mai ki na noqu vakanananu kei na lomaqu ni ra dina—e sega ni vakadua ga ia e vakawasoma. Au sa dau gadreva na drodro ni veivakacegui oya. Eda lako curuma taucoko na rarawa ka gadreva kina na veivakadeitaki ni Yalo. Au vakila oqo niu duri tu kei tamaqu ena dua na siga e valenibula. Keirau wadrava ni ceruma e vica na icegu leleka ko tinaqu—ka mai oti yani. Ni keirau raica tiko na matana, e dredre tiko ni sa biuti koya na mosi. Ni oti e vica na miniti ni gauna vagagalu, e a qai vosa taumada mai ko tamaqu. E a kaya o koya, “Sa lesu i vale e dua na goneyalewa lailai.”

A kaya vakamalua. E vaka e vakacegu tu ga o koya. E tukuna tiko o koya e dua na ka e kila tu ni dina. E qai tekivu kumuna galugalu o koya na iyaya maroroi nei Tinaqu. E lako yani ko koya ki na loma ni valenibula ka vakavinavinakataki ira yadudua na nasi kei na vuniwai ka ra veiqaravi vua ena vica na siga.

A tu vei tamaqu na veitokani ni Yalo Tabu ena gauna oya me vakila, me kila, ka cakava na ka e a cakava ena siga oya.Sa ciqoma o koya kei ira tale e so na yalayala oqo: “ka me tiko ga kei ira na nona Yalo Tabu” (D&C 20:79).

Sa noqu vakanuinui nikua meu vakalevutaka na nomuni gagadre kei na igu mo ni taura na Yalo Tabu. Nanuma, ni sai Koya na ikatolu ni Lewetolu Vakalou. Na Tamana kei na Luvena e rau taukena na yago sa vakaturi oti mai na mate. Na Yalo Tabu e tu ena ituvaki ni yalo. (Raica na V&V 130:22.) Sa nomu digidigi se mo na ciqomi Koya ka kidavaka ki lomamu kei na nomu vakasama.

Na ituvaki sa rawa kina meda ciqoma na veivakalougatataki cecere oya sa vakamatatataki ena vosa ka dau cavuti vakamacawa ka sega beka ni dau sobu sara ki lomada kei na noda vakasama. Me na talai mai na Yalo ki vei keda e dodonu meda “dau nanuma”na iVakabula ka “ka muria na nona ivakaro”(V&V 20:77).

Ena gauna oqo ni yabaki e vukei keda meda nanuma kina na isoro ni iVakabula kei na Nona cabe mai na ibulubulu ena yago ni tucaketale. E levu vei keda e raica rawa e nodra vakanananu na iyaloyalo oya.Au a duri ena dua na gauna kei na watiqu ena taudaku ni dua na ibulubulu mai Jerusalemi. E levu era vakabauta ni ibulubulu oya e a cabe mai kina na iVakabula ka a lauvako me tucaketale ka Kalou bula.

Na dauveivakasarasarataki vakarokoroko e a dusi e ligana ena siga oya ka kaya mai vei keimami, “Lako mai ka raica na ibulubulu sa lala tu.”

Keimami cuva ka curu yani Keimami raica e dua na idabedabe vatu e lalaga. Ia ena noqu vakanananu e lako mai kina e dua na iyaloyalo, e dina sara ga me vaka kau raica ena siga oya.Oya na iyaloyalo kei Meri, ka ra biuta tu mai na iApositolo ena ibulubulu. Sa ikoya oyana ka e laiva vei au na Yalotabu meu raica ka rogoca tale mada ga ena noqu vakasama, ka matata me vaka niu tiko e kea:

“Ia sa tu ko Meri mai na ibulubulu e tautuba, ka tagi, ia ni sa tagi tiko, sa cuva sobu, ka rai ki loma ni bulubulu,

“A sa raica e le rua na agilosi ena isulu vulavula, a rau sa tiko, e dua ki uluna, ka dua ki yavana, ena tikina ka koto kina na yagoi Jisu.

“A rau sa kaya vua, Yalewa, ko sa tagi ena vuku ni cava? Sa kaya vei rau ko koya, Ena vuku ni ra sa kauta tani na noqu Turaga, ia ka’u sa sega ni kila na tikina era sa vakotori koya kina.

“Ni sa qai vosa vakaoqo sa vuki vakanadaku, ka raici Jisu ni sa tu, ia sa sega ni kila ni sai Jisu.

“Sa kaya vua ko Jisu, Yalewa, ko sa tagi ena vuku ni cava? ko cei ko sa vakasaqara? Sa nanuma ko koya ni sai vakatawa ni were, a sa kaya vua, Kevaka ko sa kauti koya tani, tukuna saka vei au na tikina ko sa vakotori koya kina, kau na qai laki kauti koya tani.

“Sa kaya vua ko Jisu, I Meri. Sa vuki ko koya, ka kaya vua, Raponai; a kena ibalebale, iVakavuvuli.

“Sa kaya vua ko Jisu, Kakua ni tarai au; niu sa bera ni lako cake vei Tamaqu: ia mo lako vei ira na wekaqu, ka kaya vei ira, Au sa lako cake vei koya sa Tamaqu, ka Tamamudou; vei koya sa noqu Kalou, ka nomudou Kalou” (Joni 20:11–17

Au sa masu me vakatarai vei au meu vakila eso na ka e a vakila ko Meri mai na ibulubulu kei na ka erau vakila na tisaipeli ena sala ki Emeo ni rau lako kaya tiko na iVakabula tucaketale, ka nanuma ni dua na vulagi ki Jerusalemi:

“A rau sa cikeva matua, ka kaya, Ni tikoga vei keirau, ni sa qai yakavi, a sa kala na siga. A sa curu ko koya me tiko vata kei rau.

”Ia ni ratou sa tiko sobu me ratou kana, sa taura na madrai ko koya, ka lotutaka, ka dovia, ka solia vei rau.

A sa qai lau na matadrau, a rau sa kilai koya; a sa takali ko koya mai na matadrau.

“A rau sa veikayaka vakai rau, Sa sega li ni katakata sara na yalodaru, ni datou sa veivosaki kaya e na gaunisala, ni sa vakamacalataka talega vei kedaru na iVola Tabu ko koya?” (Luke 24:29–32).

Eso na vosa oya e tokaruataki ena dua na soqoni ni sakaramede au a tiko kina ena sivia na 70 na yabaki sa oti. Ena veisiga oya, edau vakayacori na soqoni ni sakaramede ena yakavi. A sa butobuto tu e tautuba. Era lagata na ivavakoso na veivosa kilai oya. Au sa dau rogoca oti enavuqa na gauna. Ia na noqu vakanananu deivaki e baleta e dua na vakila edua na bogi vakatabakidua. E dreti au voleka ki na iVakabula. E rairai keu cavuqaqataka na veivosa ena rawa ni lesu tale mai vei keda:

E ka talei cake mai na vakananumi ni ka e yaco oya na vakananumi ni tarai ni lomada mai na Yalo Tabu kei na Nona vakadeitaka tikoga na dina.E talei cake mai na raica mai matada, se nanumi ni vosa e cavuti ka wiliki, na nanumi lesu ni vakila ka tomana na domo malumu ni Yalotabu. E vakavudua, na noqu dau vakila me vakai rau na lako tu ena gaunisala ki Emeo—me vaka na katakata malumu e loma. E vakalevu, e dau vakila ni veivakadeitaki mamada ka vadigagalu.

E tu vei keda na yalayala uasivi ni veitokani ni Yalo Tabu ka tu talega na idusidusi dina ni kena rawati na isolisoli oya. Na veivosa oqo ena cavuta na italai vakadonui ni Turaga ni tabaka na ligana ki uluda: “Ciqoma na Yalo Tabu.”Ena tiki ni gauna koya, sa vakadeitaki kina vei iko kei au ni na talai mai Ko Koya. Ia sa noda itavi me digitaka me dolava na lomada ka ciqoma na veiqaravi ni Yalotabu, ena bula taucoko.

E veidusimaki na ka e sotava na Parofita ko Josefa Simici. E a tekivu ka tomana nona veiqaravi ena vakatulewa ni nona vuku vakai koya e takiveiyaga me kila kina na ka me cakava E a digia me yalomalumalumu e mata ni Kalou.

E tarava, e vakatulewa o Josefa me taroga na Kalou. E masu ena vakabauta o koya me sauma mai na Kalou. Na kena isau e yaco mai ni se cauravou gone sara. Na vei itukutuku oya e yaco mai ni gadreva me kila o koya na cava e vinakata na Kalou ena kena tauyavu na Nona Lotu.Na Yalo Tabu e veivakacegui ka tuberi koya e nona bula taucoko.

A talairawarawa ki na veivakauqeti dina ga ni dredre. Me ivakaraitaki, e ciqoma na ivakaro me talai iratou na Le Tinikarua ki Igiladi ena gauna e gadrevi iratou vakalevu duadua kina. E a talai iratou yani.

E a ciqoma na veivakadodonutaki kei na veivakacegui mai na Yalotabu ena gauna e a vesu kina ka ra vakatotogani vakaca na Yalododonu. Ia e a talairawarawa ena nona gole sobu ena sala ki Carthage dina ga ni kila ni rawa ni vakaleqai.

Na Parofita o Josefa Simici e ivakaraitaki vei keda ena kena ciqoma tikoga na idusidusi kei na vakacegu mai na Yalo Tabu.

Na imatai ni digidigi e cakava me yalomalumalumu e mata ni Kalou.

Na ikarua sa ikoya me masu ena vakabauta vua na Turaga o Jisu Karisito.

Na ikatolu me talairawarawa ena ka kece. Na talairawarawa e rawa ni kena ibalebale na toso totolo. E rawa ni vakavakarau. Se e rawa ni vakaibalebale ki na wawa ena vosota me so tale na veivakauqeti.

Ka kena ikava me masu me kila na nodra gagadre kei na lomadra na tani ka mera vukei vakacava vua na Turaga. E a masu o Josefa ena vukudra na Yalododonu kune rarawa ni a tiko e valeniveivesu. Sa mai noqu na madigi meu saravi ira na parofita ni Kalou ni ra masu, kere veivakauqeti, ciqo idusidusi, ka cakacaka kina.

Au sa dau raica vakawasoma ni nodra masu e dau baleti ira na tamata ka ra lomana ka qarava. Na nodra kauwai baleti ira na tani e rairai dau dolava na lomadra mera ciqoma na veivakauqeti. E rawa ni dina oya vei kemuni.

Na veivakauqeti ena vukei keda meda qaravi ira na tani ena vuku ni Turaga. Ko ni sa raica oya ena ka ko ni sotava, me vakai au. Na noqu bisopi e a tukuna vei au ena dua na gauna—ni a sotava na watiqu e dua na dredre levu ni nona bula—“Ena veigauna au rogoca kina ni dua e gadreva na veivuke ena tabanalevu, niu dau yaco yani me veivuke, au kunea ni sa liu ki kea na watimu. E dau cakava vakacava oya?”

E vakataki ira o koya na dauveiqaravi lelevu ni matanitu ni Turaga. E vaka ni rua na ka era dau cakava. O ira na dauveiqaravi lelevu era rawata na Yalo Tabu me itokani voleka ni gauna taucoko. Ka ra sa rawata na isolisoli ni loloma cecere, sai koya na loloma savasava i Karisito. E sa tubu e lomadra na isolisoli oya ni ra vakayagataka ni veiqaravi tiko ena vuku ni Turaga.

Na sala era cakacaka vata kina na masu, na veivakauqeti, kei na lomana na Turaga ena noda veiqaravi e tukuni vinaka ena veivosa oqo:

“A ka kecega dou na kerea ena yacaqu, au na kitaka.

“Kevaka dou sa lomani au, dou talairawarawa ki na noqu ivunau.

“Ia kau na masuti Tamaqu, ena qai solia vei kemudou e dua tale na Dauveivakacegui, me tiko ga kei kemudou ka sega ni mudu;

“A Yalo Tabu sa vu ni ka dina; ko koya era sa sega ni vakabauta rawa na kai vuravura, ni ra sa sega ni raici koya se kilai koya: ia sai kemudou ga sa kilai koya: ni sa tiko vata kei kemudou ko koya ka na curumi kemudou.

“Au na sega ni laivi kemudou mo dou luveniyali: au na lako mai vei kemudou.

“Malua mada vakalailai, era na qai sega ni raici au tale na kai vuravura; ia dou sa raici au: niu sa bula, dou na bula talega.

“Ena siga koya dou na kila niu sa dua vata kei Tamaqu, ka dou sa dua vata kei au, kau sa dua vata kei kemudou.

“Ko koya sa nanuma na noqu vunau ka talairawarawa kina, sai koya oqo sa lomani au; ia ko koya sa lomani au ena lomani koya ko Tamaqu, ia kau na lomani koya, ka vakatakilai au vua” (Joni 14:14-21).

Au solia noqu ivakadinadina maroroi ni na Tamada ena tiki ni gauna oqo e kilai iko, nomu vakila, kei na nodra gagadre vakayalo ka vakayago o ira ka tu wavokiti iko.Au soli ivakadinadina ni ko Tamada kei na Luvena erau sa tala tiko mai na Yalo Tabu vei ira kece ka tu vei ira na isolisoli oya, kerea na veivakalougatataki oya, ka qara mo kilikili kaya.E sega na Tamada, ka sega na Luvena, ka sega na Yalo Tabu me usuraki Ratou mai ki na noda bula. Eda galala me da digia. E kaya na Turaga vei keda kece:

“Raica, kau sa tu e mata ni katuba, ka tukituki: kevaka sa rogoca na domoqu e dua na tamata, ka dolava na katuba, au na curu vua, ka vakayakavi vata kaya ka vakayakavi vata talega kei au ko koya.

“Au na solia vua sa gumatua sara me tiko vata kei au ena noqu itikotiko vakaturaga, me vaka kau sa gumatua, ka tiko sobu ena itikotiko vakaturaga nei Tamaqu.

“O koya sa vakadaligana, me mani rogoca sara na ka sa tukuna na Yalo Tabu”(Ai Vakatakila 3:20-22

Au masulaka ena lomaqu taucoko ni ko ni na rogoca na domo ni Yalotabu, ka sa talai ka savu yani vei kemuni. Kau sa masu moni na dolava na lomamuni mo ni ciqomi Koya. Kevaka ko ni kerea ena lomadina kei na vakabauti Jisu Karisito baleta na veivakauqeti, ko na ciqoma ena nona sala ga na Turaga kei na Nona gauna. Na Kalou e a vakayacora vua na cauravou gone o Josefa Simici. E cakava nikua vua noda parofita bula, o Peresitedi Russell M. Nelson. E sa vakatikori iko O Koya ena nodra sala na luvenamo qaravi ira ena Vukuna. Au kila oya e sega walega mai na ka au raica e mataqu ia e kaukauwa cake mai na ka e vakasolokakanataka na Yalotabu ki lomaqu.

Au sa vakila na loloma nei Tamada kei na Nona Gone ni Toko vei ira kece na luvena na Kalou e vuravura kei ira na luvena ena vuravura ni yalo. Au sa dau vakila na vakacegu kei na veidusimaki ni Yalo Tabu. Au masu me rawa vei kemuni na reki ni tiko na Yalotabu me nomu itokani tikoga. Ena yaca i Jisu Karisito, emeni.