E Baleta Kece ga na Tamata

Ni vakarautaki tiko na tara ni Valetatabu vakasakiti e Parisi Varanise, a yaco e dua na ka au na sega vakadua ni guilecava. Ena 2010, ni sa kune na tikiniqele me baleta na valetabu, a kerea na turaganikoro me keitou sota me rawa ni kila eso tale na ka baleta na Lotu. E dua ni ikalawa bibi ni kena rawati na veivakadonui ni taravale na sota oya. Keitou vakarautaka sara vakavinaka e dua na ivakamacala ka oka kina e vica na iyaloyalo totoka ni valetabu eso ni Yalododonu Edaidai. Na noqu vakanuinui levu duadua sai koya ni na vakauqeta na turaganikoro na totoka ni kedra irairai me tokona kina na cakacaka oqo.

E ka ni kurabui, ni tukuna na turaganikoro ni ratou na sega ni taumuria na neitou ivakamacala, eratou nanuma me ratou vakayacora ga e dua nodratou vakadidike me ratou kila saraga vakataki iratou se mataqali lotu vakacava o keda. Ena vula tarava, keitou a sureti lesu yani me keitou rogoca e dua na nona ripote e dua na lewe ni matabose ni korolevu ka dua o koya na parofesa talega ni itukutuku vakalotu. E kaya na marama oya, “Mai na veika kece, keitou vinakata me keitou kila o cei soti na lewe ni nomudou lotu. Taumada, keitou lako ki na dua nomuni soqoni ni sakaramede. Keitou dabe ena idabedabe mai muri ni valenilotu ka dikevi ira toka vakamalua na ivavakoso kei na veika era cakava tiko.Oti keitou qai laki sikovi ira na tiko volekati kemudou—o ira era vakaitikotiko volekata na nomudou valenilotu ni iteki—ka keitou taroga se mataqali tamata vakacava o kemuni na Momani.”

“Io na cava sa nomudou lewa?” Au taroga, ena yalo e nanamaki. Qai sauma mai na marama, “Keitou qai raica rawa ni Lotu i Jisu Karisito ni Yalododonu Edaidai e volekata duadua yani na Lotu taumada nei Jisu Karisito mai na veilotu kecega keitou kila.” E voleka sara meu saqata ena noqu kaya, “E sega ni dodonu vakavinaka oqori! E sega ni lotu voleka duadua oqo; sai koya na Lotu i Jisu Karisito—na Lotu vata sara ga, na Lotu dina!” Au a tarovi au kau mani cabora e dua na masu vuni ni vakavinavinaka. Qai vakasalataki keitou o turaganikoro, yavutaki ena veika eratou sa raica, eratou sega ni raica kei na nona timi e dua na ka me tarova na tara ni valetabu ena nodra vanua.

Nikua, niu vakasamataka na cakamana oya, au vakavinavinakataka nona yalomatua o turaganikoro kei na yalo ni kila na duidui. E kila o koya ni ka bibi ena kena kilai na Lotu sai koya me kua ni laurai ena irairai mai taudaku na kena veivale se na tuvai vakamatau sara mada ga ni kena cicivaki, ia mai vei ira na milioni vakamilioni na lewena, ka ra segata e veisiga yadua me ra muria na ivakaraitaki nei Jisu Karisito.

Na ivakamacala ni Lotu e rawa ni kau mai ena dua na malanivosa ena iVola i Momani ka kaya, “Ia ko ira [kena ibalebale na tisaipeli ni Turaga] era sa papitaisotaki ena yaca i Jisu, era sa vakatokai me ra lewe ni lotu i Karisito.”¹

Dua tale na kena itukutukuni, na Lotu e baleta na tamata. E baleti kemuni, na tisaipeli ni Turaga—o ira era lomana ka muri Koya kei ira era sa taura na yacana ena veiyalayalati.

A vakatauvatana na Lotu ki na dua na motoka totoka o Peresitedi Russell M. Nelson. Eda taleitaka kece ni savasava ka taliva tu noda motoka. Ia e sega ni inaki ni motoka me tu me dua na misini rairai vinaka; ia me kauti ira na tamata era tiko e loma.² Ena ivakarau vata oqori, o keda, ni da lewe ni Lotu, eda dau taleitaka ni ra savasava ka maroroi vinaka tu noda vanua ni sokalou ka da marautaka talega ni cici vinaka tu noda veiparokaramu. O ira oqo era ivakarau veitokoni walega. Na noda inaki bibi me da sureti ira na luvena tagane kei na yalewa yadua na Kalou me ra lako mai vei Karisito ka me ra tuberi ena salatu ni veiyalayalati. E sega ni dua na ka e bibi cake. Na noda cakacaka e baleti ira na tamata kei na veiyalayalati.

E sega beka ni uasivi ni yaca a soli mai ena ivakatakila ki na Lotu vakalesuimai e vauca vata na rua na tiki bibi duadua ni veiyalayalati yadua ni kosipeli? Matai na yaca Jisu Karisito. Na Lotu e Nona, kei na veivakasavasavataki ni Nona Veisorovaki kei na veiyalayalati sai koya duadua na salatu ni veivakabulai kei na bula vakacerecerei. Na ikarua ni yaca e dusi keda: na Yalododonu, se ena dua tale na kena itukutukuni, na Nona ivakadinadina ka Nona tisaipeli.

Au vulica na bibi ni noda vakanamata vei ira na tamata niu veiqaravi vakaperesitedi ni iteki mai Varanise. Ena itekivu ni noqu veiqaravi, au vakasamataka tu eso na sasaga vinaka sara me baleta na iteki: me tauyavu na tabanalevu vou, tara na veivalenilotu vou, me tara sara mada ga e dua na valetabu ena neimami vanua. Niu vagalalataki ni oti e ono na yabaki, sega saraga ni bau dua vei ira na inakinaki oqori e se rawa. A rawa me nanumi ni dua na druka levu oqo ia vakavo ga ni, ena loma ni ono na yabaki oya, sa veisau vakalailai noqu inakinaki.

Niu dabe toka mai cake ena siga meu vagalalataki kina, a luvuci au e dua na yalo vakavinavinaka levu kei na vakacegu. Au raica na matadra na drau vakadrau na lewenilotu era tikorawa. Au rawa ni nanuma lesu e dua na gauna vakayalo me baleti ira yadua.

Era tu na tagane kei na yalewa era sa mai sobu ena wai ni veipapitaisotaki, o ira au a sainitaka na imatai ni nodra ivolatara ni valetabu me rawa ni ra laki ciqoma na cakacaka vakalotu bibi ni valetabu, kei ira na itabagone kei na veiwatini au a vakatikora se vagalalataka mai na daukaulotu tudei E vuqa tale au a qarava ena gauna era donumaka tiko kina na veivakatovolei kei na dredre ena nodra bula. Au vakila na loloma qaqa vakaveitacini ena vukudra yadua. Au sa kunea na reki savasava ena noqu qaravi ira kau marautaka na nodra yalodina vakalevutaki kei na vakabauta na iVakabula.

E vakavuvulitaka o Peresitedi M. Russell Ballard, “Na ka bibi duadua ena noda itavi ena Lotu e sega ni iwiliwili e dau tukuni mai se na soqoni e yaco ia—nodra qaravi yadudua na tamata me vaka a kitaka na iVakabula—era sa laveti ka vakayaloqaqataki ka qai veisautaki.”³

Kemuni na taciqu kei na ganequ, eda sa bulabula tiko li ena kosipeli, se da vakaosoosotaki wale tikoga ena Lotu? Na ki sai koya me da muria na ivakaraitaki ni iVakabula ena ka kecega. Kevaka eda vakayacora oqori, eda na vakanamata ena nodra vakabulai na tamata yadua ka sega ena qaravi ga ni cakacaka se cicivaki na parokaramu.

O sa bau tarogi iko mada se na vakaivei kevaka e sikova yani na iVakabula na nomu tabanalevu se tabana ena Sigatabu mai qo? Na cava ena cakava o Koya? Ena leqataka beka o koya kevaka era vinaka tu na iyaloyalo se ra biu tu beka vakavinaka na idabedabe ena loma ni valenivuli? Se ena vakaraica beka o Koya e dua e rawa ni lomana, vakavulica, ka vakakalougatataka? Ena vaqara beka o Koya e dua na lewenilotu vou se dua na itokani me kidavaka, e dua beka na tauvimate e gadreva tu na vakacegu, se dua na itabagone yamekemeke ka gadreva tu me laveti ka vakayaloqaqataki.

Na kalasi cava ena sikova o Jisu? Au na sega ni kurabui kevaka ena sikova i liu o Koya na Lalai. Ena tekiduru beka o Koya ka vosa vei ira ni ra veiraici mata toka. Ena vakaraitaka o Koya na Nona loloma vei ira, talanoa vei ira, vakacaucautaki ira ena nodra droini, ka vakadinadinataki Tamana mai Lomalagi. Na Nona itovonibula ena rawarawa, dina, ka sega lasu. E rawa beka ni da vakakina?

Au yalataka vei kemuni ni o segata mo muria na Turaga, ena sega na ka e bibi cake mai na nodra laurai na tamata e rawa ni o vukea ka vakalougatataka. Ena lotu o na vakanamata ena nodra vakavulici na tamata yadua, mo tara na yalodra. O na kauwaitaka me yaco na veika vakayalo mai na kena tuvai e dua na itaviqaravi uasivi sara, mo veiqaravi ena vukudra nomu itokani lewenilotu mai na kena toqai na lomanibai baleta na levu ni veisiko sa caka. Ena sega ni baleti iko ia ena baleti ira e da vakatoka me ra tacida ka ganeda.

Ena so na gauna eda veitalanoataka na lako i lotu Ia na Lotu e levu cake sara mai na dua na vale se dua na vanua. E tautauvata vinaka sara ga na kena dina kei na kena bulabula ena veivale carukaica ena veivanua vakayawa e vuravura kei na itikotiko liu ni Lotu mai Salt Lake City. Sa kaya na Turaga Vakataki Koya, “Ena vanua eratou soqoni kina e lewe rua se lewe tolu ena yacaqu, au na tiko ena kedratou maliwa.”⁴

Eda na kauta na Lotu vata kei keda ena vanua cava ga eda lako kina: ki cakacaka, vuli, ena vakacagicagi, ka vakauasivi ena noda veivale. Na noda tiko kei na noda veivakayarayarataki sa rawa ni rauta me tara ena vanua cava ga eda tiko kina e dua na vanua tabu.

Au nanuma e dua na veitalanoa keirau a vakayacora kei na dua na itokani ka sega ni lewena noda vakabauta. A kurabui o koya ni rogoca ni rawa vua e dua na tagane bula kilikili ena noda Lotu me ciqoma na matabete. Qai taroga o koya, “Ia e vica na matabete e tiko ena nomudou tabanalevu?”

Au sauma, “Tiko ena maliwa ni 30 kei na 40.”

Ena kurabui, e tomana o koya, “Ena neitou ivavakoso, e tikoga kina e dua na bete. Na cava sa rui levu kina na matabete dou gadreva ena mataka ni Sigatabu?”

Ni tarai au nona taro, au vakauqeti meu sauma, “Au duavata kei iko. Au sega ni vakabauta ni da gadreva na iwiliwilini matabete oya ena lotu ena Sigatabu. Ia eda gadreva dina e dua na matabete ena noda vale. Ni sega ni dua na matabete e tiko ena dua na vuvale, era na kacivi e so tale na matabete me ra vakatawa ka veiqaravi ki na matavuvale oya.”

Na noda lotu e sega ni lotu walega ni Sigatabu Ena tomani tiko ena veisiga yadua ni macawa na noda sokalou, se vanua cava ga eda tiko kina se cava ga eda cakava. Na noda itikotiko sara madaga “sa itikotiko taumada ni noda vakabauta.”⁵ E vakavuqa ena noda itikotiko eda dau masu kina, eda veivakalougatataki, eda vuli, eda vakavulica kina na vosa ni Kalou, ka da veiqaravi ena loloma savasava. Au rawa ni vakadinadinataka mai na veika au sa sotava ni noda vale sa vanua tabu e rawa ni tiko kina na Yalo—ena kena levu, ka so na gauna ena levu cake, mai na noda veivanua ni sokalou lewai.

Au vakadinadinataka ni Lotu oqo na Lotu i Jisu Karisito. Na kena igu kei na kena bula e yaco mai ena nodra ivalavala e veisiga na milioni na Nona tisaipeli era segata e veisiga yadua me ra muria Nona ivakaraitaki cecere ena nodra vukei na tani. E bula na Karisito, ka liutaka tiko o Koya na Lotu oqo. Sai Peresitedi Russell M.Nelson na parofita sa digitaka o Koya me liutaki keda ka dusimaki keda ena noda gauna. Oqo na veika au vakadinadinataka ena yaca i Jisu Karisito, emeni.