Veivakavulici e Vale—e dua na iTavi Tabu ka Rekitaki.
Au kerea na veivuke mai lomalagi ni da saga me da dauveivakavulici Vakarisito ena noda veivale.
Keirau a susuga kei na watiqu o Julie, e ono na gone taleitaki, ia ena gauna oqo sa lala neirau sova. Sa dua na ka na noqu calata sara vakalevu na nodra dau tiko e vale na gone ena gauna taucoko. Au nanuma lesu noqu dau vuli mai vei ira ka dau vakavulici ira.
Nikua au vagoleya noqu vosa vei ira kece na itubutubu kei ira era gadreva tu me ra itubutubu. E vuqa vei kemuni ni sa susu gone tiko ena gauna oqo. Vei ira tale eso, esa voleka ni yaco mai na gauna oya. Ia vei ira tale eso, na bula vakaitubutubu ena qai yaco malua beka mai. Au masuta me da vakadinadinataka taucoko na rekitaki kei na bibi ni itavi me da vakavulica e dua na gone.1
Ni da sa itubutubu, eda vakaveikilaitaki ira na luveda vei Tamada Vakalomalagi kei na Luvena, o Jisu Karisito. Eda na vukei ira na luveda me ra cavuta na imatai ni nodra masu. Eda na tuberi ira ka tokoni ira ni ra butuka na salatu ni veiyalayalati2 ena papitaiso. Eda vakavulici ira me ra talairawarawa ki na ivakaro ni Kalou. Eda vakavulici ira me baleta na Nona ituvatuva vei ira na Luvena, ka da vukei ira me ra vakadinadinataka na vakasolokakana ni Yalo Tabu. Eda talanoataka vei ira na kedra italanoa na parofita ni gauna makawa ka vakayaloqaqataki ira me ra muri ira na bula tiko oqo. Eda masuta na nodra qaqa ka mosi vata kei ira ena nodra vakatovolei. Eda vakadinadinataka vei ira na luveda na veivakalougatataki ni valetabu, ka saga me da vakarautaki ira vakavinaka me ra veiqaravi vakadaukaulotu tudei. Eda veivakasalataki ena loloma ni ra sa na itubutubu na luveda. Ia—ena gauna oqo—ena sega ni tarovi me da nodra itubutubu tikoga. Ena sega ni mudu ni da nodra qasenivuli. Eda na sega ni vagalalataki mai na veikacvi tawamudu oqo.
Nikua me da veitalanoataka mada e vica na madigi vakasakiti e noda me da vakavulici ira kina na luveda e vale.
Veivakavulici ena Lotu Vakamatavuvale
Me da tekivu ena lotu vakamatavuvale, oqo na ka e dau vakaliuci vakabibi sara ena vale ni vakabauta au a susugi kina.Au sega ni nanuma na veilesoni e dau vakavulici ena lotu vakamatavuvale, ia au nanuma ni sega ni dau cala ena dua na macawa.3 Au kila na cava e dau bibi vei rau noqu itubutubu.4
Au nanuma lesu e dua na noqu itaviqaravi taleitaki ni lotu vakamatavuvale. Ena sureta e dua na luvena o Ta me “Vakatovolei.” Ena solia vua na gone eso na idusidusi me vaka, “Lako mada i valekuro, dolava ka sogota na bola ni waililiwa. Qai cici ki na noqu rumu ni moce ka taura mai e dua na pea sitokini mai na noqu drowa. Oti qai lesu mai vei au, qai rika cake vakatolu, ka kaya, ‘Ta, au sa rawata!’”
Au dau taleitaka ni sa yaco mai noqu gauna. Au vinakata me donu na kena ikalawa yadua, kau vakamareqeta na gauna sa rawa kina niu tukuna, “Ta, au sa rawata!” Na itaviqaravi oya e vukea na tarai cake ni noqu yalodei ka rawarawa kina vua e dua na gonetagane waribariba me vakarorogo ni rau vakavulica o Ta kei Na e dua na ivakavuvuli ni kosipeli.
E vakasalataka o Peresitedi Gordon B. Hinckley:“Kevaka o vakatitiqataka voli na ivalavala dodonu ni lotu vakamatavuvale, tovolea mada. Vakasoqoni ira mai vei iko na luvemu, vakatavulici ira, wasea vei ira na ivakadinadina, wilika vata na ivolanikalou ka marautakana nomudou gauna vata.5
Ena tiko ga kina na veisaqasaqa ena gauna ni lotu vakamatavuvale.6 Se cava ga, au sureti kemuni mo ni vaqara na sala me ulabaleti kina na dredre ka vakaliuci na lotu vakamatavuvale ni bibi tikoga—ia me dua na tikina bibi na veivakamarautaki.
Vakavulici na Masu Vakamatavuvale
Na masu vakamatavuvale e dua tale na madigi cecere me vakavulici.
Au taleitaka na ivakarau e vakavulici Peresitedi N. Eldon Tanner kina o tamana.E kaya vaka oqo o Peresitedi Tanner:
“Au vakananuma ena dua na bogi ni keitou tekiduru vakamatavuvale ena masua kaya vua na Turaga o tamaqu, ‘A cakava nikua o Eldon e dua na ka e sega ni dodonu me cakava; sa kere veivosoti kina o koya, ia keveka o ni na vosoti koya, ena sega tale ni cakava vakadua.’
“Oqori a vakavuna noqu lewa meu kakua ni cakava tale vakadua—e kaukauwa cake mai na kanakuita.”7
Niu se gonetagane, au dau yaloca ena so na gauna ni vaka sa rui dau sivia tale na masu, au dau nanuma, “Keitou se qai masu ga ena vica na miniti sa oti?” Ena gauna oqo niu sa itubutubu, au kila ni sega ni rawa vakadua ni sivia na neitou masu vakamatavuvale.8
Dau tarai au nona vakaveikilaitaki Jisu Karisito na Tamada Vakalomalagi ni Luvena Daulomani.9 Au dau taleitaka na masulaki iratou na luvequ ena yacadratou yadua ni ratou vakarogoci au niu cavuta vei Tamada Vakalomalagi na noqu dau lomani iratou. E vaka ni sega tale ni dua na gauna vinaka cake me da tukuna kina na loloma vei ira na luveda mai na noda masu vata kei ira se vakalougatataki ira. Ni soqoni vata na matavuvale ena masu ni yalomalumalumu, sa vakavulici kina na lesoni mana ka tudei.
Veivakavulici ni Gadrevi
Na veivakavulici vakaitubutubu e vaka na vuniwai wawa me kacivi. Eda na gadreva me da tuvakarau me da vakavulici ira na luveda baleta ni da sega ni kila na gauna ena basika kina na madigi.
O keda eda vaka na iVakabula, ni levu na nona veivakavulici “a sega ni vakayacori ena dua na valenilotu ia ena veigauna sega ni vakarautaki, e veisiga—ni caka tiko na kana kei iratou Nona tisaipeli, taki tiko na wai mai na dua na tobu, se lako sivita e dua na vunilolo.”10
Ena vica na yabaki sa oti, a wasea kina o tinaqu ni rua nona gauna ni veiwasei vinaka duadua ni kosipeli vata kei tuakaqu, o Matt, e dua ena nona lobi isulusava tiko kei na kena ikarua nona kauti koya tiko vua na vuniwai ni bati. E dua vei ira na vuqa na ka au dau qoroi tinaqu kina sai koya na nona dau tuvakarau me vakavulici ira na luvena.
E sega ni dau oti rawa nona veivakavulici vakaitubutubu. Niu veiqaravi voli vakabisopi, a tukuna vei au o tinaqu, sa yabaki 78 tiko kina, ni dodonu me koti na uluqu. E kila o koya ni dodonu meu ivakaraitaki vinaka, ka sega ni vakataratutu me tukuna vei au. Au lomani iko, Na!
Niu tamanigone, au sa dau vakauqeti meu vulica ka vakananuma titobu na ivolanikalou me rawa kina niu sotava na madigi ni veivakavulici era dau vakavurea na luvequ se na makubuqu ena gauna e gadrevi kina.11 Eso na gauna uasivi ni veivakatavulici e tekivu ena taro se kauwai e yalona e dua na lewe ni [matavuvale].”12 Eda vakarorogo tiko li ena veigauna vakaoqori?13
Au taleitaka nona veisureti na iApositolo o Pita, “Mo dou vakarau tiko mo dou tukuna vua na tamata yadua sa tarogi kemudou, na vu ni nuinui sa tu ena lomamudou.”14
Niu se gone, keirau dau taleitaka kei tamaqu me keirau veisisivi se o cei e kaukauwa na ibobo ni ligana. Keirau na boboka vakaukauwa na ligai koya kadua ena sasaga me rawa ni osi ena mosi. Sa sega soti ni lasa ena gauna oqo, ia a lasa vakalevu ena gauna oya. Ni oti e dua na veisisivi vakaoya, a raici au e mataqu o Ta ka kaya, “Sa kaukauwa dina na ligamu, luvequ. Au nuitaka me na tiko e ligamu na igu me kakua ni tara vakaveitalia e dua na goneyalewa.” A qai sureti au meu vakasavasavataka tikoga noqu bula ka vukei ira tale eso me ra kitaka vakakina.
A wasea na veika oqo baleti tamana o Elder Douglas L. Callister: “Ni lesu tiko mai vale ena cakacaka ena dua na siga a kaya vaqo o Tamaqu, ‘Au sa sauma noqu ikatini nikua. Au vola “vinaka” ena jeke ni ikatini. Au sa vakavinavinaka vakalevu vua na Turaga ena nona vakalougatataka nodatou matavuvale.’”
Qai tukuna vaqo o Elder Callister vei tamana-nona qasenivuli: “E vakavuvulitaka o koya na ivalavala kei na itovo ni talairawarawa.”15
Au vakabauta ni vinaka me da tarogi keda ena so na gauna, “Na cava meu vakavulica, se na cava au vakavulica tiko, vei ira na luvequ ena noqu ivalavala kei na itovo ni talairawarawa?”
iVakavuvuli ni Vuli iVolanikalou Vakamatavuvale
Na vuli ivolanikalou vakamatavuvale sa gauna vinaka sara me vakavulici kina na ivunau e vale.
E kaya o Peresitedi Russell M. Nelson, “Me kakua walega ni ra kubeta na vosa ni Turaga o ira na itubutubu, ia sa nodra itavilesi vakalou me ra vakavulica vei ira na luvedra.”16
Ni keirau susugi ira tiko na luvei keirau kei Julie, keirau tovolea me keirau tudei ka bulia eso na ka vovou. Ena dua na yabaki, keitou tovolea me keitou wilika na iVola i Momani vaka-Sipeni vakamatavuvale. Koya beka ya na vuna e kacivi iratou yadua kina na luvei keirau na Turaga ki na tabana ni kaulotu ena vosa vaka-Sipeni. ? Es posible.
A tarai au vakalevu sara nona wasea vei au o Brother Brian K. Ashton ni rau a wilika vata kei tamana na veidraunipepa yadua ni iVola i Momani ena nona veiyabaki e muri ni vuli torocake. E taleitaka o Baraca Ashton na ivolanikalou. Sa volai tu ena nona vakasama kei na yalona. A teivaka na sorenitei oya o tamana ni yabaki tini vakacaca o Baraca Ashton, ia na sorenitei17 oya sa tubu me dua na vunikau tudei na wakana ni dina. Sa kitaka vakakina o Baraca Ashton vei ira na luvena qase cake.18 A tarogi koya ena dua na gauna walega oqo na luvena tagane yabaki walu, “Ta, na gauna cava daru qai wilika vata kina na iVola i Momani?”
Veivakavulici ena iVakaraitaki
Kena iotioti, na ivakavuvuli vakaitubutubu mana duadua na noda ivakaraitaki. Eda sa vakasalataki me da“ia mo yaco mo nodra ivakarau era sa vakabauta, ena vosa ena ivalavala, ena loloma, ena lomadina, ena yalosavasava.”19
Ena dua na ilakolako walega oqo, keirau a lako i lotu kei Julie ka raica na cakacakataki ni tikina oqo. A vosa ena soqoni ni sakaramede e dua na cauravou, ka vakarau biubiu tiko ki na kaulotu.
E kaya o koya, “O ni nanuma beka ni tamata vinaka e valenilotu o tamaqu, ia …” a cegu vakalailai, au a vakataroga se cava ena tukuna tarava. A tomana ka kaya, “E tamata vinaka cake sara mai vale.”
Au qai vakavinavinakataka e muri na cauravou oqo ena veivakacaucautaki vakauqeti a vakayacora vei tamana. Au qai kila e muri ni o tamana na bisopi ni tabanalevu. E dina ga ni qarava tiko nona tabacakacaka ena yalodina na bisopi oqo, e nanuma na luvena tagane ni nona cakacaka vinaka duadua e vakayacori tiko mai vale.20
E veivakasalataki vaka oqo o Elder D. Todd Christofferson: “E levu na sala me da vakavulici ira kina na … itabatamata era tubu cake tiko mai, ka dodonu me da vagoleya noda vakasama vinaka duadua kei na igu me da vakayagataki ira vakavinaka sara. Kena ilutua, sa dodonu me da vakayaloqaqataki ira ka vukei ira na itubutubu me ra qasenivuli vinaka cake ka tudei … vakauasivi ena ivakaraitaki.”21
Oqori na ivakarau ni nona veivakavulici na iVakabula.22
Ena dua na neitou gade vata kei rau na luvei keirau gone duadua ena yabaki sa oti, a vakatura o Julie me keitou laki papitaiso vakaveisosomitaki ena valetabu ruarua e St George kei San Diego. Au vosakudrukudru—i yaloqu—ka vakasamataka, “Keitou a lako ki na valetabu mai vale, ka keitou se gade mada. Vakacava me keitou cakava e dua na ka ni gade madaga?” Ni oti na papitaiso, a vinakata o Julie me keitou veitaba e tautuba ni vale tabu. Au vosa kudrukudru galugalu—tale. O na rawa beka ni kila na ka e qai yaco tarava—keitou veitaba.
E vinakata o Julie me tu ena nodrau vakanananu na luvei keirau na neitou vukei ira na tubui keitou, e vakakina o au. Keitou sega ni gadreva e dua na lesoni vakarautaki ena bibi ni valetabu. Keitou a bulataka tiko—vinaka vakalevu vua e dua na tina e dau lomana na valetabu ka vinakata me ra wasea na luvena na loloma oya.
Ni ra veivakamareqeti na itubutubu ka ivakaraitaki ni bula dodonu, era na vakalougatataki tawamudu na gone.
iTinitini
Vei kemuni kece o ni saga tiko mo ni solia nomuni vinaka duadua ena nomuni veivakavulici ena nomuni vale, mo ni kunea na vakacegu kei na reki ena nomuni sasaga. Ia kevaka o ni vakila ni dodonu mo ni vinaka cake se o ni gadreva mo ni vakavakarau vakalevu cake, yalovinaka rogoca ena yalomalumalumu na vei vakauqeti ni Yalo ka soli iko yani ena cakacaka.23
E kaya o Elder L. Tom Perry, “Na bulabula ni dua na tikotiko, na nodra marau na kena tamata, nodra tubu, kei na nodra tiko vakacegu era vakayavutaki kecega mai na nodra vakavulici e vale na gone.”24
Io, na noqu sova mai vale sa lala, ia au tuvakarau kevaka e gadrevi, au wawa tu meu kacivi, meu raica na madigi talei meu vakavulici ira na luvequ uabula, o ira na luvedra, vakakina ena dua na siga, au nuitaka, o ira na luvedra.
Au kerea na veivuke mai lomalagi ni da saga me da dauveivakavulici Vakarisito ena noda veivale. Ena yaca i Jisu Karisito, emeni.