Riro ’ei feiā mo’a hi’ora’a maita’i

E ’āmuira’a fa’auru mau ’e te rahi tei tupu a’enei. Tē hi’o atu nei tātou i te ananahi ma te ’ana’anatae mau. ’Ua fa’aitoitohia tātou ’ia rave maita’i a’e ’e ’ia riro ’ei ta’ata maita’i. E mea hanahana mau te mau poro’i i hōro’ahia i teie nei puripiti e tō tātou mau hui mana fa’atere rahi ’e te feiā fa’atere rahi, nā reira ato’a te mau hīmene ! Tē a’o nei au ia ’outou ’ia tuatāpapa i teie mau poro’i, ’a ha’amata i teie hepetoma.¹ ’O te mana’o te reira ’e te hina’aro ho’i o te Fatu nō tōna mau ta’ata, i teie mahana.

Tē vai nei i roto i te fa’anahora’a ha’api’ira’a ’āpī tei fa’atumuhia i ni’a i te ’utuāfare, turuhia e te ’Ēkālesia, te fāito pūai nō te fa’a’ū’ana i te mana o te mau ’utuāfare, ’a pe’e māite ai te ’utuāfare tāta’itahi ’e ’a ha’apa’o ai rātou i te reira nō te fa’ariro i tō rātou ’utuāfare ’ei vāhi mo’a nō te fa’aro’o. Tē parau fafau atu nei au ē, ’ia ha’a itoito noa ’outou nō te fa’aau i tō ’outou ’utuāfare ’ei pū nō te ha’api’ira’a ’evanelia, e riro mai ïa tā ’outou mau sābati ’ei mahana hina’arohia. E ’ana’anatae roa mai tā ’outou mau tamari’i i te ha’api’i ’e i te ora i te mau ha’api’ira’a a te Fa’aora, ’e e iti noa mai te mana o te ’enemi i roto i tō ’outou orara’a ’e tō ’outou ’utuāfare. E taui roa mai tō ’outou ’utuāfare ’e e vai noa mai te reira maita’i.

I roto i teie ’āmuira’a, ’ua ha’apūai tātou i tā tātou fa’aotira’a e rave i te tauto’ora’a faufa’a rahi e fa’atura i te Fatu Iesu Mesia i te mau taime ato’a e fa’ahiti tātou i te parau nō tāna ’Ēkālesia. Tē parau fafau atu nei au ia ’outou ē, e riro te ha’apa’o-māite-ra’a i te huru fa’a’ohipara’a i te i’oa tano o te ’Ēkālesia a te Fa’aora ’e o tōna mau melo, i te fa’atupu i te fa’aro’o rahi atu ā ’e i te ha’amatara i te mana pae vārua rahi atu ā nō te mau melo o tāna ’Ēkālesia.

I teienei e paraparau tātou nō te mau hiero. ’Ua ’ite tātou ē, e mea faufa’a rahi roa ’ino tō tātou taime i roto i te hiero nō tō tātou fa’aorara’a ’e tō tātou fa’ateiteira’a, nā reira ato’a nō tō tātou ’utuāfare.

’Ia oti tātou i te fāri’i i tā tātou iho mau ’ōro’a o te hiero ’e ’ua rave tātou i te mau fafaura’a mo’a ’e te Atua, tītauhia nō tātou tāta’itahi te ha’apūaira’a pae vārua tāmau ’e te ha’api’ira’a tāmau e noa’a i roto noa i te fare o te Fatu. ’E ’ua hina’aro tō tātou hui tupuna ’ia tāvini tātou ’ei ta’ata mono nō rātou.

’A feruri na i te aroha rahi ’e te maita’i o te Atua, hou te niu o te ao nei, ’ua fa’aineine ’oia i te hō’ē rāve’a ’ia noa’a te mau ha’amaita’ira’a o te hiero ia rātou e pohe ma te ’ite ’ore i te ’evanelia. E mea tahito mau teie mau ’ōro’a mo’a o te hiero. Nō’u nei, e mea ’ana’anatae roa te mea ē, e ’ohipa te reira nō te tau tahito, e fa’a’itera’a ho’i nō te huru mau o te reira.²

E tōʼu mau taeaʼe ʼe mau tuahine here ē, tē ’ū’ana noa mai ra te ’arora’a a te ’enemi, tō te reira pūai ’e te huru rau.³ ’Aita e tau i ma’iri i hina’aro-rahi-hia ’ia ti’a pinepine i roto i te hiero. Tē tāparu nei au ia ’outou ’ia hi’o nā roto i te pure i te huru ’outou e fa’a’ohipa nei i tō ’outou taime. ’A tu’u i te taime nō tō ’outou ananahi ’e te ananahi o tō ’outou ’utuāfare. Mai te peu e mea huru piri ’outou i te hiero, tē a’o nei au ia ’outou ’ia ’imi i te rāve’a nō te fa’ata’a i te hō’ē taime fārereira’a tāmau noa ’e te Fatu—nō te ti’a i roto i tōna fare mo’a—i muri iho e tāpe’a ti’a noa i terā taime fārereira’a ma te ’oa’oa. Tē parau fafau atu nei au ē, e fa’atae mai te Fatu i te mau semeio ’o tāna i ’ite e mea tītauhia nō ’outou, ’ia fa’atusia rā ’outou nō te tāvini ’e nō te ha’amori i roto i tōna mau hiero.

Tē vai nei e 159 hiero tei ha’amo’ahia. E mea faufa’a nō mātou ’ia ha’apa’o maita’i ’e ’ia ’atu’atu maita’i i te reira mau hiero. ’E ’ia he’e te tau, e mea tītauhia te tahi tātā’ira’a ’e te fa’a’āpīra’a nō teie mau hiero. Nō reira, tē ’ōpuahia nei e fa’a’āpī ’e e fa’atano maita’i i te hiero nō Roto Miti ’e te tahi ato’a mau hiero nō te tau o te mau pionie. E fa’a’itehia atu te parau nō te reira ’a nahonaho mai ai te reira.

I teie mahana, tē ’oa’oa nei mātou i te fa’aara atu i te ’ōpuara’a e patu 12 fa’ahou hiero. E patuhia te reira mau hiero i te mau vāhi i muri nei : i Mendoza (Rāparata) ; Salvador (Beresiria) ; Yuba City (California) ; Phnom Penh (Cambodia) ; Praia (Cape Verde) ; Yigo (Guam) ; Puebla (Mehiko) ; Auckland (Aotearoa) ; Lagos (Nigeria) ; Davao (Firipino) ; San Juan (Puerto Rico) ; ’e Washington County (Utah).

E’ita paha te patura’a ’e te ’atu’atura’a i te mau hiero e taui i tō tātou orara’a, nā tō ’outou rā taime i roto i te hiero e nā reira. ’Outou tei ma’iri i te hiero e mea maoro i teienei, tē fa’aitoito nei au ia ’outou ’ia fa’aineine ’e ’ia ho’i ’oi’oi i te hiero. I muri iho, tē ani nei au ia ’outou ’ia ha’amori i roto i te hiero ’e ’ia pure nō te putapū hōhonu roa i te here fāito ’ore o te Fa’aora nō ’outou, ’ia roa’a ia ’outou tāta’itahi tō ’outou ’itera’a pāpū ē, tē fa’atere nei ’oia i teie ’ohipa mo’a ’e te mōrohi ’ore.⁴

Te mau taea’e ’e te mau tuahine, tē ha’amāuruuru nei au ia ’outou nō tō ’outou fa’aro’o ’e te mau tauto’ora’a tāmau noa. Tē vaiiho nei au i tō’u here ’e i tā’u ha’amaita’ira’a i ni’a ia ’outou, ’ia ’oa’oa ’outou i te fa’a’amua o te parau a te Fatu ’e ’ia fa’a’ohipa i tāna mau ha’api’ira’a i roto i tō ’outou iho orara’a. Tē ha’apāpū nei au ia ’outou ē, tē tāmau noa nei te heheura’a i roto i te ’Ēkālesia ’e e tāmau noa te reira ē tae noa atu « ’ua hope te mau ’ōpuara’a a te Atua i te fa’atupuhia ’e ’a parau mai ai ’o Iehova Rahi ē ’ua oti te ’ohipa ».⁵

Tē ha’amaita’i nei au ia ’outou i te fa’aro’o rahi atu ā iāna ’e i tāna ’ohipa mo’a, ’ia vai te fa’aro’o ’e te fa’a’oroma’i nō te fa’aruru i tō ’outou iho mau fifi o te orara’a. Tē ha’amaita’i nei au ia ’outou nō te riro ’ei feiā mo’a hi’ora’a maita’i. ’O ta’u ïa ha’amaita’ira’a ia ’outou ’e tō’u ’itera’a pāpū ē, tē ora nei te Atua ! ’O Iesu te Mesia ! Teie tāna ’Ēkālesia. Nōna tātou, i te i’oa o Iesu Mesia, ’āmene.