Nkabɔmu Som no

Ndaansa Ebɔwbira no, ber a President Russell M. Nelson dze erosom adwenkyerɛ nyienyim too gua no, osii do dɛ ɔyɛ kwan a yɛbɛfa do esie mbrasɛm no mu asɛnkɛse no dɛ yɛndɔ Nyankopɔn na yɛndɔ hɛnho nkorkor.¹ Yɛyɛ Asɔr no n’edzibewdzifo no, yɛpaa ma hom mbo na yɛ wɔ mbuae soronko a hom dze ahyɛ iyi ase. Yɛda hom ase dɛ hom kã hɛn nkɔnhyɛnyi dɔfo no do wɔ dwumadzi nwanwa yi na yesusu dɛ mma hom nntweɔn nkyerɛkyerɛ pii biara. Hom nhuruw ntɔ nsutae no mu na hom mbor. Hom mbor nkɔ hɔn a wɔwɔ ehiadze no hɔ. Mma nketsenketse nnkyir hom nndwendwen dɛ hom mfa hom ekyir mbor anaa hom ndɔ esukɔ. Sɛ yedzi fapem nhyehyɛɛ no a wɔakyerɛ hɛn no do, yɛfa asɔfodzi nsaafee n’akwan, na yɛhwehwɛ Sunsum Krɔnkrɔn no kwankyerɛ a, yenkedzi nkogu.

Anapa yi, mepɛ dɛ mekasa fa erosom ne fã bi mpo a ɔyɛ ankorankor, onnhia kokoamu mpɛnsapɛnsamu a wɔnnhwehwɛ ne da, na no ho amandzɛɛbɔ kɔ ɔsorsor nko. Menkyɛ erosom dɛm no ne mfatoho kor a osii me fie nkyɛn.

Grant Morrell Bowen yɛ kun na egya dɔfo a ɔyɛ edwuma dzen, na tse dɛ dodowara no, nna odzidzi wɔ asaase no do, na ber a sɔn no hɔn ekuadze annyɛ yie no, ne sikasɛm mu bɛyɛɛ dzen. Ɔno na ne yer, Norma, kɛyɛɛ edwuma fofor, na ewiei no wotui kɔr kuropɔn fofor bi mu, na hɔn sikasɛm mu hyɛɛ ase nyaa mpontu. Naaso, asɛm yaayaw bi sii a, Onuabanyin Bowen benyaa ayawdzi kɛse ber a temple recommend kokoamu mpɛnsapɛnsamu no, bishop no anngye Morrell enndzi dɛ oetua ebupɛn-du emudzi mu.

Minnyim da no, mbanyin beenu yi mu nyia a n’asɛn tsen, naaso minyim dɛ Akyerɛbaa Bowen fii hɔ a wɔsesaa ne temple recommend maa no, a Onuabanyin Bowen dze ebufuw nantsewee puei a oyii no fii Asɔr no mu mfe 15 [duenum] no.

Ɔmmfa ho nyia nna n’asɛm tsen wɔ ebupɛn du no ho, naaso ɔda edzi dɛ Morrell na bishop no hɔ werɛ fiir Agyenkwa no no kɔkɔbɔ no dɛ “enye w’atamfo mbɔ mu ntsɛm”² na Paul n’afotu dɛ “mma wi nntɔ hom ebufuw do.”³ Nokwar no nye dɛ wɔammbɔ mu na wi no tɔree wɔ Onuabanyin Bowen n’ebufuw do nda pii, nkyii adapɛn, nkyii mfe pii, dze risi asɛm bi Romefo mu onyansafo mapã ɔbaako bi, a ɔkãa do dɛ, “Ebufuw, sɛ annhyɛ do a, ɔtaa yɛ [dze sɛɛfo] kyɛn mfom no a ɔyɛ ne farbaa no.”⁴ Naaso nkabɔmu ho anwanwadze no wɔ hɔ ma hɛn daa, na ɔnam no dɔ ma n’ebusua na Asɔr no a onyim dɛ ɔyɛ nokwar no, Morrell Bowen sanee baa Asɔr dwumadzi emudzi mu. Menkã mbrɛ osii baa no tsiabaa.

Onuabanyin Bowen ne babanyin Brad yɛ hɛn nyɛnko mapã na Apaamu Eduosuon etuhoakyɛnyi a ɔrosom wɔ Idaho anaafo. Ber a dɛm asɛm yi sii no nna Brad edzi mfe 11, na mfe 15 mu no ɔhwɛɛ n’egya ne nyamesom ho hyewbɔ a ɔrokɔ famu, na ɔyɛɛ dasefo wɔ ndɔbaa wenwen a wotwa no bea woedua ebufuw na ekyingye no. Okehiaa dɛ wɔyɛ ho biribi. Ntsi Ndaase afɛhyɛ akwanma bɛnee wɔ afe 1977 mu no, Brad, Brigham Young Sũapɔn adzesũanyi a oedzi mfe 26, ne yer, Valerie, na hɔn abɔdomaba banyimba, Mic, dze hɔn ndzɛmba hyɛɛ hɔn kaar dadaw mu, na wimu a ɔnnyɛ no mpo no, wɔkãa kaar no kɔr Billings, Montana. Wɔkɛhyɛɛ esukwankyɛaba siw bi mu a ɔbɛn Yellowstone atɔree no mpo ennkwetsir baasa yi dɛ wɔnnkɔkɔ Onuabanyin Bowen panyin nkyɛn akɔsom no.

Wokodurii no, Brad na n’akyerɛbaa Pam serɛɛ hɔn egya dɛ ɔnye hɔn nhyia kokoa mu. “Ayɛ egya nwanwanyi,” Brad hyɛɛ ase a sũ esi no, “na yenyim mbrɛ esi adɔ hɛn ber yi nyinara mu. Naaso biribi nnda yie, na ɔayɛ dɛm so akyɛr yie. Osiandɛ wɔhaaw wo ber bi no, ebusua yi nyina rehaw mfe pii yi mu. Yeebubu, na wo nko na ibotum esiesie hɛn. Yɛserɛ ara yie, hwɛ mber a egu mu yi, ana ibotum enya akoma edze nsɛm yaayaw a osii ɔwo na bishop no ntamu ato nkyɛn na ebedzi ebusua yi kan wɔ asɛmpa mu dɛ mbrɛ nkyɛ eyɛ no?

Hɔ taa dzinn. Ekyir no Onuabanyin hwɛɛ beenu yinom, ne mba, ne biew mu obiew na honam mu nam,⁵ na ɔkãa no kommyɛ mu ara dɛ, “Nyew. Nyew, mebɛyɛ.”

Nyiano no a enyi nnda no yɛɛ Brad Bowen na n’ebusua ahobow mbom ɔyɛɛ hɔn enyigye so, na wɔhwɛɛ hɔn kun na egya a ɔdze nkabɔmu kɔɔr bishop a ɔwɔ hɔ no ne nkyɛn dze siesie n’abrabɔ mu ndzɛmba yie. Bishop no a, ɔato nsa afrɛ Onuabanyin Bowen mpɛn pi dɛ ɔnsan mbra no a, nna n’enyi nnda nsera no do koraa no, naaso ɔdze akokodur buaa no emudzi mu—tui na ofuaa no mber tsentsen ara yie.

Adapɛn kakra ara ekyir no—ɔannkyɛr biara—nna Onuabanyin Bowen dze noho ahyɛ Asɔr dwumadzi mu yie na ɔbɛfataa dɛ ɔsan kɔ temple. Annkyɛr na ɔgyee ɔfrɛ dɛ ɔbɔhwɛ asɔr nkorbata bi a no mu mba 25 a wɔrehaw, na ɔhwɛe ma wonyinii bɔbɔr 100 a asɔrmba no bɔhyew. Iyinom nyina sii mfe eduonum a abɛsen no, naaso babanyin na babaa a wɔdze ntotɔserɛ soom hɔn egya, na egya no a ɔdze kyɛɛ ɔpɛ mu ara na ɔannhwɛ binom hɔn esintɔ na ɔkɔr kan no, dze nhyira horow aba a ogu do reba—na ɔbɛba afebɔɔ—aba Bowen ebusua no do.

Enuanom na nkyerɛbaa, Jesus ase hɛn dɛ “[yɛmbɔ] mu ntsena wɔ ɔdɔ mu”⁶ a “ekyingye biara mmba [hɛn] mu.”⁷ Ɔbɔɔ Nephifo no kɔkɔ dɛ “Obiara a wentwiwentwi sunsum wɔ no mu no nnyɛ medze.”⁸ Nokwar, hɛn nkitahodzi a yɛnye hɛnho dzi no—annyɛ yie koraa no—ɔbɛkyerɛ nkitahodzi a yɛnye Christ benya.

Ɔsee dɛ, “Sɛ ereba mo hɔ … na sɛ ekaa dɛ wo nua wɔ asɛm bi tsia wo a—

“Dzi kan kɔ enye wo nua no nkɔbɔ mu, na afei fa akoma a odzi mu bra me nkyɛn, na mebɛgye wo.””⁹

Ampaara hɛn mu kor biara botum akã kur adadaw na awerɛhow na yaw ho nkaakaa horow ho nsɛm a sesieara ɔda ho tseetsee obi anaa ebusua bi anaa sɔn mu fo hɔn akoma. Sɛ hɛn na yɛmaa dɛm yaw no bae anaa wɔdze yɛɛ hɛnankasa a, ɔsɛ dɛ wɔsã dɛm epira kur no ama abrabɔ ayɛ mfaso dɛ mbrɛ Nyame rohwehwɛ no. Tse dɛ edziban a ɔwɔ wo freegye mu a nananom hwɛ do ma wo no, dɛm ayawdzi dadaw no nyina ne mber etwa mu. Meserɛ mma hom mma hɔn kwan wɔ hom akra a ɔsombo no mu bio. Tse dɛ ma Prospero kãa no mfehoekyir mu ara kyerɛɛ Alonso wɔ The Tempest, mu no “Mma hom mma yɛmfa awerɛhow a wɔabɛsen no nnhaw hɛn adwen.”¹⁰

Christ kyerɛkyerɛɛ wɔ Ahyɛmu Fofor aber mu dɛ, “hom mfa nkyɛ, na wɔdze akyɛ hom.¹¹ Na hɛn nda mu yi: “Emi, Ewuradze, medze hɔn a mepɛ no hɔn bɔn kyɛ hɔn, na mbom homdze, ɔyɛ hom ahyɛdze dɛ hom dze nyimpa nyina hɔn bɔn kyɛ hɔn.”¹² Naaso, ohia dɛ hom mu binom a hom tse atseetsee mu no hyɛ dza Ɔannkã no no nsew. Ɔannkã dɛ, “Wɔmmaa wo kwan ma nntse yaw na awerɛhow ankasa fi sũahu a ofi obi nsa a ɔsɛɛ wo ara yie no.” Nna Ɔannkã so dɛ, “Ama edze bɔn bɛkyɛ emudzi mu no, ɔsɛ dɛ esan kɔ nkitahodzi a ɔyɛ atsetsee, anaa esan kɔ nsisi na esian gyinabew mu.” Mbom mfom yaayaw binom mpo to hɛn a, gyedɛ yɛdze hɛn anan si nokwar ayarsã anamɔn kwan no do ana yeetum yeedzi hɛn yaw no do. Dɛm anamɔn kwan no dza wɔdze bɔn kyɛ no a Jesus Nazarethnyi no nantseew do no, na Ɔfrɛ hɛn mu kor biara dɛ, “Bra, na bɛka mo do.”¹³

Nsato a ɔtse dɛm dɛ yɛmbɛyɛ N’esuafo na yɛmbɔ mbɔdzen nnyɛ dza Ɔyɛe no, Jesus rese hɛn dɛ yɛnyɛ N’adom ho edwindadze—yɛnyɛ “ahembɔfo [m]ma Christ” wɔ “nkabɔmu som” no mu dɛ mbrɛ Paul kyerɛɛ wɔ Corinthfo nwoma mu no.¹⁴ Epirakur nyina Ɔyarsafo no, Ɔno a ɔtsen dza omuo biara no, serɛ hɛn dɛ yɛnye No nyɛ esiesiefo edwumadzen no a wiadze yi mu wonnkenya no kwan fofor biara do no.

Ntsi, dɛ mbrɛ Phillips Brooks kyerɛwee no, “Ɔwo a ama ntseasee bɔn atahye afrenhyia afrenhyia, a epɛ dɛ dakor bi ebesiesie; ɔwo a ema ɔham bɔn kɔdo, osiandɛ nntum nsi w’adwen pi dɛ edze w’ahantan bɔto nkyɛn na [esiesie]; ɔwo a emuna w’enyim twuuw fa nkorɔfo nkyɛn wɔ stiitse mu a nnkasa hɔnho a ɔnam ayawdzi bi … ; ɔwo a erema … [obi] akoma yaw a enntum annkyerɛ enyisɔ anaa awerɛkyekye, na ewɔ enyidado dɛ … dabi ebɛma no, … kɔ ntsɛmara kɛyɛ dza innkenya ho kwan dabiarada bio dze bɛyɛ no.”¹⁵

Mo nuanom na nkyerɛbaa adɔfo, megye dase dɛ yɛdze bɔn rekyɛ na yekwetsir dɛ yɛbɔfom no, adadaw anaa afofor no, yɛ Jesus Christ No Werdambɔ nwanwa no ne fapem. Megye dase dɛ, ewiei no dɛm sunsum mu esiesie no befi hɛn Pomfo krɔnkrɔn No nko hɔ, Ɔno ɔyɛ ntsɛm “dze ɔyarsa wɔ ne ntsaban mu” bɔboa hɛn.¹⁶ Yɛda No ase, hɛn Ɔsor Egya a Ɔsomaa No, dɛm nkenyan na awoo fofor no a, ndaamba yebenya ahotɔ efi hɛn awerɛhow na mfom abɛsen no, nnkɛba mu no, naaso wɔatɔ no dada, woetua ho kaw, kaw kɛse yaayaw a Eguambaa no Okyii no bɔgyaa no dze kyerɛ no.

Medze asomafo tumdzi a wiadze yi Agyenkwa no dze ama me no, megye dase wɔ asomdwee a ɔba ɔkra no mu sɛ yɛdze ahobrɛadze na akokodur ara yie hwehwɛ Nyame hɔ na hɛnho nkorkor nkabɔmu a. Agyenkwa no serɛɛ dɛ, “Hom ngyaa dɛ hom nye homho bedzi aper.”¹⁷ Sɛ inyim ayawdzi dadaw bi a, siesie no. Hom nhwɛ homho do nkorkor

M’anyɛnkofo adɔfo, wɔ hɛn nkabɔmu som a yɛsom no, meserɛ dɛ yɛbɛyɛ esiesiefo—yɛbɔdɔ asomdwee, yɛahwehwɛ asomdwee, yɛama asomdwee aba, na yɛapɛ asomdwee. Mema dɛm ntotɔserɛ yi wɔ Asomdwee hen, Ɔno a onyim birbiara a ɔfa “epirakur [o]nyae wɔ [n’]anyɛnkofo fie”¹⁸ naaso Onyaa ahoɔdze dze kyɛɛ na no werɛ firii—na ayarsã—na yebenya enyigye. Ɔno ho na mobɔ mpaa ma emi na hom, wɔ Ewuradze Jesus Christ dzin mu, amen.