Wekpeseng pen Ngoang oh Soukautih
Sang ni kemwekid en sampah ah kalaudelahr utuhtpen tepelo, kitail anahne ngoangki ni mehlel atail pahn loaloapwoatieng mihmi nan ahl me pahn kahreikitailahng atail Sounkomouro.
Ehu ansou ieu I kilangada kilel ni ehu sdohwa me nda, “Peren, $15.00.” I men ese uwen peren dah me I kak pwainki $15.00 kahrehda I kohlongala kilang. Ihte me I diar kisin dipwisou mwahl oh mehn ketemen kei—sohte mehkot I diar me kak wadohng ie soangen peren me kilelo kasalehdahu! Erein pahr kei mwuri, I kin kalapw medewe kilelo oh duwen atail kin men rapahki peren sang dipwisou mwahl de ohngete ansou tehkis kan. Nin duwen tohn Mwomwohdiso en Sises Krais en Souleng en Imwin-Rahn Akan, kitail paiki atail wehwehki ia wasa peren mehlel kak dierek ie. E kin kohsang ni atail kanaiehng atail mourki rongamwahu me ketsang rehn atail Sounkomouro, Sises Krais, oh ni atail kin nantiheng duwehla Ih.
Mie kempoakepaht me kin wia soun katanga trein. Ehu rahno ni eh wie tangatang nan elen treino, e kilangada sdohsa oapwoat peipei mwowe. E madangete kasawiada me sdohsahu tengalahr oh sohte kak kohsang nan ahlo. Ansouohte e kairkiheng koaruhsien dahme wihwiawio, oh tepdahr kaukauhdi treino pwon me reireiki mwail silikis pahiu oh totohki paun 13,000,000. Treino sohte douhlul kak uhdi mwohn eh pahn loieng sdohsahu. Me iei e wiawi. Tohn sdohsahu paiamwahu pwe re rongada ngilen treino ah wie katkatairongo irail eri doudihsang sdohsahu mwohn eh dokdio. Ansou me iangat soun katanga treino wie koaskoasoaieng pwoliso, lih lingeringer emen kohla rehra. Liho werwerki me e kilang soahng koaros oh kadehdehki me soun katanga treino sohte pil songen wet pwehn keisang mwohn sdohsahu.
E wehwehier me ma iangat soun katanga treino wetsang nan elen treino pwehn pitsang kahpwalo, ohlo iangahki treino pwon pahn ohla mehlel oh e pahn sohla kak lella wasa e kohkolahngo. Ohlo paiamwahu pwe elen treino kolehdi teng treino oh e udahn pahn kohkolahng wasa e anahne lella ieo mendahte kahpwal kan me e pahn lelehng. Kitail paiamwahu pwe kitail iang mih nan ahl pwoat, elen inou sarawi kan me kitail miher loale sangete ansou me kitail pepdaisla oh wiahla tohn Mwomwohdiso en Sises Krais en Souleng en Imwin-Rahn Akan. Mendahnte atail pahn kakete lelehng kahpwal nan ahlo, ahl wet pahn sewesei kitail en wenlahte mwowe pwehn alehdi atail sohso poatoapoat ma kitail pahn loaloapwoatehng.
Kasansal en tuhkehn komouro kin kasalehieng kitail kasuwedpen soukautih oh duwen eh kak kih kitail sang ni elen inou sarawi kan. Medewe mas duwen reil reireio oh ahl tehtikitiko, me rasehng elen inou sarawi kan, oh wia kohkohlahngete ni tuhkehn komouro, wasa me kapai koaros me kohsang atail Sounkomour oh sapwellime Tomw kak alahldi ie ong me pwoson kan. Me pil iang mih nan kasansalo iei pihl lap ieu me rasehng samin en sampah. Pwuhk sarawi kan kawehwe me pihl lap wet “wie tangatang limwahn” ahlo ahpw douhlihte “limwahn” tuhkehu, ahpw e sohte lel ni tuhkehu. Sampah wet direkilahr kasongsong kan me kakete pitihdi me pilipildahr kan, oh kahrehieng irail en soukautiheng arail inou sarawi kan—me rahsehngete kahreiraila “limwahn” tuhkehu, ahpw re sohte lel ni tuhkehu. Ma kitail sohte ngoangki mourki atail inou sarawi kan ni pisetik, atail soukautiheng kakete kahreikitailahng ahl akan me irehdi de en iang irail akan me iangehr doulongala ni ihmw kalaimwon oh lapalao. Ma kitail sohte kanaiehng kitail kakete duhla nan pihl loal samin ehu.1
Mie wiepen ngoang oh soukautih ni soahng koaros, iangahki mourki rongamwahuo. Ni atail kin medmedewe uwen atail inangih idawehn Sounkomouro, kitail kin ngoangki de soukautiheng? Pwehki atail wia aramas uduk kei, kitail sou kin uhkihda atail pali, ndinda me atail wiewia kan mih nan pwungen pwung oh sapwung, de elepw mwahu ah elepw sohte nohk mwahu? Ansou me kitail nda “mwein,” de “ahpw” duwen atail pahn idawehn kaweid en atail soukohp kan de mourki rongamwahuo ni ngoang, mehlel kitail ndinda me, “kaweid wet sohte pwung rehi.” Kitail kak kasalehda atail pali koaros, ahpw ni mehlelo sohte wiepe pwung ong ni wia me sapwung!
Oaralap en me pwulopwul ohng nan 2019 kohsang Sohn 14:15, ni en Kauno mahsani: “Ma kumwail poakehng ie, ah kumwail en kapwaiada ehi kosonned akan.” Ma kitail poakehng Ih rasehng atail kin kosoia, ah kitail kak kasalehda limpoak wet sang ni ekis ekis en kalaudlahn atail ngoang en mourki sapwellime kosonned akan?
Pwehn ngoangki mourki rongamwahuo sohte wehwehki kitail en kin mehlel ansou koaros de aklapalapla. Ahpw ni mehlelo met wehwehki kitail pahn kanaiehng atail madamadau kan oh wiewia kan nin duwen atail wia tohnpadahk en Sises Krais men. Ni atail medewe laudki ia wekpeseng pen mourki rongamwahuo ni ngoang oh soukautih, iet ekei iren kaweid me kak sawas:
Kitail kin ngoangki atail kaudek ni rahn en Sapad oh atail kaunopehng ale kamadipw sarawi wihk koaros?
Kitail kak kalaudehla uwen atail ngoangki kapakap oh onopki pwuhk sarawi kan de ngoangkihda prokram en Come, Follow Me—For Individuals and Families?
Kitail kin ngoangki atail kaudek nan tehnpas sarawi oh pil eimahki inou sarawi kan me kitail wiahda ni atail pepdais oh nan tehnpas sarawi? Kitail kin kanaiehng mwomwatail oh likou me kitail kin likawih, ni mehlel nan wasa kan oh nan irair kan me sarawi? Kitail kin kanaiehng mwomwen atail kin likawih atail likou sarawi kan me sang nan tehnpas sarawi? De kitail kin soukautihk pwehki ngilen aramas?
Kitail kin ngoangki papah mehteikan oh kapwaiada atail pwukoah ohng Mwomwohdiso, de kitail kin pohnsehse de soukautiheng atail pwukoah en papah?
Kitail kin kanaiehng dahme kitail kin wadek de kilang nan kasdo oh wia nan neitail sehl kan de soh? Kitail kin kanaiehng atail lokaia kan? De kitail kin perenkihda mehkan me sakanakan de samin?
Nan pwuhken For the Strength of Youth mie kaweid kei me, ni atail pahn idahwen Ih ni ngoang, e pahn wahdo kapai laud oh seweseikitail pwehn tengedieng elen inouo. Mendahte eh intingda pwehn kaweidih pwihn pwulopwul kan, kaweid wet saik uhdi mendahte ma kitail solahr iang mih nan pwihn en Mwahnakapw oh Peinakapw kan. E ohng emen emen kitail, ansou koaros. Ma kitail pilehu wadek iren kaweid pwukat e kakete kiheng kitail wiepe tohrohr kei en ngoangki mourki rongamwahuo.
Kitail sohte konehng lamalam suwedla pwehn pahrekieng lamalam en mehteikan de kaloalamwahuih me sohte lamalam kehlail. Kitail wia tohpadahk en Sises Krais kei, oh pwehki met kitail en pil kakehlailih mehteikan, kihraildalahng wasa ileile kan, iei wasa sarawi kan pwe ren iang dolung kapai laud kan.
I men luke emen emen kitail en rapahki kaweid sang rehn Ngehn Sarawi pwehn esehla dahme komw anahne wekidala nan omwi mour pwehn kainenehla atail inou sarawi kan. I pil men pekihda rehmwail en dehr kadeik irail akan me iang mih nan seiloak wet. “Ngehi me pahn Kadeik, Kauno ketin mahsani.”2 Kitail koaros wie kekeirda oh wekwekla.
I kin medmedewe soai pwoat nan Pwuhk en Mormon me pid mehn Amlisaid kei me kin soupwoson. Pwehn wia mehn kasalepen arail solahr men ehuieng Sises Krais de Sapwellime Mwomwohdiso, re kihehng kilel sansal weitahta ieu ni temwarailko pwe koarusien en kak kilang.3 Ni mwohmwohte, oh nin duwen tohnpadahk mehlel en Sises Krais, ia mwomwen atail kin kiheng pein kitail kilel sansal pwoat? Mehteikan kak kilang ni sansal Sapwellime kupwur rehtail oh wehwehki ihs me kitail weliandi sang ni atail kin insenohki atail mwekid kan?
Nin duwen atail wia aramas pahn inou sarawi kei, kitail sohte konehng duwehla tohn sampah teikan. Kitail kin kahdanki aramas men soahng kei4—ah ia uwen mwahu en ahd wet! Ansou me sampah pwungkidahr lamalam suwed en tepelo, kitail anahne nantiheng uwen atail kak pwehn tengedieng ahl me kohkolahng Reh, oh kalaudehla wekpeseng pen nan pwugen atail mourki inouo oh tiahk en sampah kan.
Ni ei kin medemedewehdo duwen alahldi en peren poatoapoato, I diarada me ekei pak kitail kak salongala. Kitail udahn pahn kin loieng pwoaik rotorot erein atail seiseiloak nan elen inou sarawio. Kasongsong oh soukautih kakete kahrehieng kitail en ekis ekis wetlahng nan ahl rotorot en sampah oh dohsang elen inou sarawio. Nan irair pwukat ah pil lelehr, atail soukohp kempoake, Presiden Russell M. Nelson, kangoangoahkin kitail en pwuralahng nan ahlo, oh en kin mwadang. Ia uwen kaping kalahngan me I ahniki pwehki kisakis en koluhla oh manaman me kin ketsang ni Tomw en atail Sounkomouro.
Atail mour sohte kak unsek. Emente aramas me kak unsek erein ah momour pohn sampahn delestiel wet. Met iei Sises Krais. Mendahte atail sohte unsek, ahpw rieiko, kitail kakete warehng: warehng tungoale kamadipw sarawi, warehng kapai en tehnpas sarawi, oh warehng alehdi pein atail kaudiahl.
Nanmwarki Pensamihn kadehdehki duwen kapai kan me kin kohiehng irail akan me ngoangki idawehnla Sounkomouro: “Pwehn kapatahieng, I men kumwail en kin teneki irair en kapai de popohl en irail akan me kin dadaur kosonned en Koht akan. Pwe kilang, irail kapaidahr ni mehkoaros, ong ni pwaliwar oh pali ngehn; oh ma irail kin kolokolete arail loaloapwoat lao lel ni imwio, irail pahn kohla nanleng, pwe irail en mihla rehn Koht nan irair en popohl soutuk.”5
Aramas kak pwainkihda peren tala $15? Soh, sohte kak. Peren mehlel oh loal kin kohsang ni ineng oh ngoang en mourki rongamwahu en Sises Krais. Ni mwaren Sises Krais, ahmen.