Pasapeng kan ong Kapakap

Ehu padahk kesempwal oh kansenamwahu nan rongamwahu en Sises Krais iei me Samatail Nanleng ketin poakoahng Sapwellime seri kan ni unsek. Pwehki limpoak unseko, E kin ketin kapai kitailda kaidehn sangete atail inengkan oh anahn kan ahpw pwehki sang ni Sapwellime eripit. Ihme soukohp Nihpai koasoia, “I ese me [Koht] ketin poakohng sapwellime seri kan.”¹

Ehu kisehn limpoak unseko iei en Samatail Nanleng ah kin kamwakamwakid ire pisetik kan en atail mour kan, tetehn kitail kin sehse de sawehwehki. Kitail kin peki en Kauno kaweid oh sawas sang nan atail kapakap loal kan. Ni atail kin wauneki atail inou kan oh nantiong en duwehla atail Sounkomouro, kitail warehng en ale² kaweid sarawi sang ni kamarain en Ngehn Sarawio

Pwuhk sarawi padahkihong kitail: “Samamwail o ketin mwahngih dahme konehng kumwail mwohn amwail kin peki mehkot,”³oh E “mwahngi mehkoaros, pwe mehkoaos kin patpato mwhohn Sihlangi.”⁴

Ehu karasaraso iei Soukohp Mormon. E sohte konoahdi lipwen ah doadoahk kan. Ahpw e wehwehki me Kauno me ketin kakahluwa ih. Ni eh alehdi kamarain pwehn ale pleit tikitik kan en Nihpai oh kapatahiong nan ah rekohto, Mormon ntingihdi me: “Oh I wia met sang ni kahrepe pwung ehu; pwe I alehier kamarain en wia met sang Ngehn en Kauno me mihmi rehi. Oh met, I sehse mehkoaros; ahpw Kauno mwahngi mehkoaros me pahn kohdo; ihme kahrehda, e ketin kaweid ie ien doadoahngki kupwure.”⁵ Tetehn Mormon sehse duwen salongalahn tehn doropwe 116 me wiawi mwuri, Kauno kaunopadahr wiepen powehdi kahpwalo mwohn eh wiawi.

Sahmo mwahngi kitail, atail anahn kan, oh pahn ketin sewesei kitail ni unsek. Ekei ansou sawaspatail kin wiawi ansouohte de ansou kis mwurin atail peki sawas. Ekei ansou kitail sohte kin alehdi pasapeng pen atail anahn kan me keieu laud nin duwen me kitail kasik, ahpw kitail kin diara me Koht kin ketkihda kapai laud ong kitail. Oh ekei ansou, atail anahn mehlel kan sohte kin kohieng kitail nan mour wet. I pahn kawehwe soangen wiepe silu me Samatail Nanleng kin sapengki atail pekipek ngidingid kan ong Ih.

Nait pwutak keieu tikitik alehdi likiwer en wia ah misin nan France Paris Mission. Pwehn onopada, se iang ih kohla pwehn pwainda ah seht, sekid, nekdai, sidakin oh ehu sekid en kopou. Paisuwed, pwe sekid en kopou me e anahne o sohte ah sais nan sidohwau. Ahpw tohn doadoahko nda me sekido pahn miehda mwurin wihk kei oh e pahn wisikla nan wasahn kasukuhl en misineri nan Provo mwohn en nait pwutako eh pahn mwesel lang France. Se pwainla sekido oh sohla taman.

Nait pwutak lella nan wasahn kasukuhlo nan Suhn, oh sekido wisikla wasao rahn kei mwohn en pwutako ah mwesel nan Ahukus. E sohte soahngada koudo ahpw mwadangete kihdiong nan ah kapango limwahn ah likou kan.

Ni ansoun en kepeu eh lella nan Paris, wasa me nait pwutako wiewia ah misin, e ntingdohng kiht me e waikehi sekido, soahngada, ahpw diarada me e inenen tikitik. Kahrehda se anahne kihlong mwohni nan ah akaunto pwehn kak alehda pilehu sekid nan Paris, iei me e wia. Ni ei ekis sonsuwed, I ntingla reh oh ndahiong en kisakiskihla sekido pwe e sohte kak doadoahngki.

Mwuhr se ahpw alehdi ehu sin likou sang reh dene: “Udahn kopou douluhl wasaht. … Tetehn ahi sekid kapwo inenen mwahu oh mosul kisinengo likamw e kin ipidohte pwar kiht. I kihong ahi sekid meringo [ong emen misineri me mihmi nan ihmw me se iang mihmi ie] e nda me e wie kapakapkiher en ale ehu sekid me mwahu. E iangala Mwomwohdiso sounpar kei samwalahro oh ihte me wia kiseh ah nohnou … oh misineri me pepdaisiala me kin sesewese ih nan ah misin oh sekido wia pasapeng pen ah kapakap, karehda I pereniki dahme wiawihero.”⁶

Sahm Nanleng mwahngi me misineri menet, me wiewia ah misin nan France me dohkihsang nimweho mwail 6,200 de (10,000 km) pahn anahne ehu sekid kapw ohng ansoun kepeu nan Paris ahpw sohte nein misnerio mwohni pwehn kak alehda ehu me kapw. Sahm Nanleng pil ketin mwahngi me nait pwutako pahn ale sang wasahn likou nan Provo, Utah, ehu sekid me inenen tikitik sang ah sais. E mwahngi me misneri riemen pwukat pahn papah nan Paris oh sekido pahn wia pasapeng pen kapakap karakarahk oh ngidingid en misineri tieo me ahane sekido.

Sounkomouro ketin padahngki:

“Kumwail kak pwainkihda kisin menpihr riemen sense ehu; ahpw sohte emen ira pahn pwupwudiong nanpwel ma Samatail sohte ketin mweidohng.

“A ohng kumwail, pil pitenmoangamwail koaros iangehr wadawadedi.

Eri, kumwail dehr masak, pwe kumwail kesempwalsang mehlel menpihr tohto.”⁷

Ahpw ekei ansou, ma me kitial inenen inangi kan sohte pweida ni soangen mwoahmw me kitail kin kasik, e kakete wia mehkot me inenen mwahu ong kitail. Karasepe, uwen en rien Sosep nein Seikop pwutangko arail kailongki ih irail soang en kemehla ih. Ahpw, irail uhd netikihla en wiahla lidu men nan wehin Isip.⁸ Ma mie aramas emen me pepehm me ah kapakap kan sohte pasapengla nin duwen me e kasik, iei ih Sosep. Ihme wiawi, ah paisuwedo imwila ni kapai kouwahlap ong ih oh dorehla ah peneinei sang nan lehk. Kedekede, mwurin eh wiahla sounkaweid likilik men nan Isip, ni pwoson mwuledek oh eripit e ndahiong rie pwutak ko:

“Eri met kumwail dehr nsensuwed de kapwukoahkin kumwail pwehki amwail netikiniehdo wasaht. Pwe mehlel me Koht me ketin kadarodohng ie wasaht mwomwail pwe I en komourala aramas akan

“Erein sounpar riau met me lehk lapalap wiewiawi nan sahpwet oh erein sounpar limau me sohte koadoahkpen wahnsahpw de dolung wahn sahpw pahn wiawi.

“Koht ketin kadariehdo mwohmwail, pwe ien kapitkumwailla ni soangen irair kapwuriamwei wet pwe kumwail en momourte iangahki kadaudokamwail kan.

“Eri kaidehn kumwail me kadariedohng wasaht, ahpw Koht.”⁹

Nan college, nait pwutak keieu laud alehdi doadoahk en lepin ansou kaselel ehu me pahn kak elehiong en ale ehu doadoahk poatopot mwurin eh kanekehla ah sukuhl. E pwerisekieng ah pwukoan doadoahko erein sounpar pahieu, inenen koahiekla, oh ienge tohn doadoahk oh ah kaun kan kin wauneki ih. Ni ansou me e pwihn keisek riauo, likamwete e koasondi sang nanleng (nin duwen me nait pwutako medemedewe) ehu doadoahk poatopot pa langada oh ih me keieun kandideid, mehlel sang ni mehn sosohng koaros, ih me pahn alehdi doadoahko.

Ahpw, e sohte alahlda. Sohte emen kiht kak wehwehki dah. E kauopada mwahu, kapeidek en doadoahko mwahu, ih me keieu mwahu oh warohng, oh kapakapkiher ni koapworopwor oh kaskasik! E inenen nsensuwedla oh medekla, oh mwekido kahrehiong kiht koaros aht karkaripwide nan moangat kan. Dahme kahrehda Koht soikala ih sang ah ineng mehlelo?

Sounpar kei mwuri sahpw alehdi pasapeng pen mwekido. Ma e alehda doadoahk kaselelo mwurin eh neksang sukuhl, e sohte pahn alehdi ansou mwahu wet me wekidala mour oh wiahlahr ah tungoal kisakis oh kapai poatopot. Koht mwahngiher ni imwi sang ni tapio (iei me E kin kalapw wia), oh nan mwekid wet pasapengo ong kapakap mehlel ko iei soh, pwehki kapai mwuledek ehu me pahn patohdo mwuri.

Oh ekei ansou, pasapeng ong kapakap me kitail kin ni mehlel, peki ni ngidingid kin sohte pweida nan mour wet.

Ansou me Sister Patricia Parkinson ipwidi, mese ko koaros mwahu, ahpw e tepda sohla kilang wasa ansou me eh sounpar isu. Ni eh sounpar duwau, Pad tepda iang sukuhl en me Salengpon oh Maskun nan Ogden, Utah me dohsangki imweo mwail 90, kahrehda e anahne kin pweidi wasahn sukuhlo—kahrehiong eh kin ahneki laloid me seri sounpar duwau kin ahneki.

Ni eh sounpar 11 serepeino sohla kak kilang wasa douluhl. Pad ahpw pwurala ni imweho douluhl ni eh sounpar 15 pwehn iang ah sukuhl [high school]. Serepeino douda nan college oh alehdi nah dikri nan palien kahpwal kan nan kapehse oh mwurin eh koadoahki en pedelong nan kasukuhl lap rehn aramas akan me sohte nohn liki en serepeino koahiek, e ahpw pedelong nan sukuhl lapo oh alehdi nah master dikri nan palien mengihtik kan en kapahrek oh lokaia. Ansou wet Pat apwahpwali serihn sukuhl en elementary 53 oh kakaun semen en pali en kapahrek oh lokaia meh pahmen. Miehier pein imwe oh were sidohsa, me kempoakepah kan kin diraipi pwehn waseli Pad ong wasa me e anahne.

Mie ehu koadoahk koasondi en wiawi ong Pad ni eh sounpar 10 pwehn kasawih dahme kak kamwahula mesehko. Eh pahpa/nohno kin kalap ndahieng dahngekan me pahn kin wiawiheng soumwahu en mesehko, ahpw pwehki kahrepe me sohte sansal ira sohte ndahiong Pad dahme pahn wiawi nan koadoahk wet. Ansou me eh pahpa/nohno ndahieng me koadoahk o pahn wiawiher, Pad, nin duwen me eh nohnou nda, “lingeringerda.” Pad tangala nan pere teio ahpw pwuredo mwuri oh ndahiong eh pahpa/nohnou ni ngilen nsensuwed, “Iet me I pahn nda. I ese met, Koht mwahngi met, oh kumwa anahne pil ese. I pahn maskun erein ahi momour!”

Sounpar kei samwalahro, Pad seiloakla California pwehn pwarek tohn peneinei kan me koukouson wasao. Ansou me liho oh nein nah seri kisin pwutak me sounpar silu wie mwomwohd likio, pwutako nda, “Ino Pad, dahme ke sohte pekihki Sahm Nanleng en kawelian mesemw kan? Pwe ma ke peki mehkot rehn Sahm Nanleng, E pahn ketikihong uhk dahme ke mwahuki. Ke anahne peki Reh.”

Pad dene e pwuriamweikihla mehlel peideko ahpw e sapeng nda, “Ekei ansou Sahm Nanleng sohte kin wia met. Ekei ansou E kupwurki ken sukuhlki mehkot, kahrehda E sohe ketin ketikihda mehkoaros me ke mwahuki. Ekei ansou ke anahne awi. Sahm Nanleng oh Sounkomouro mwahngi dahme keieu mwahu ong kitail oh dahme kitail anahne. Kahrehda Ira sohte pahn ketikihdo mehkoaros me ke mwahuki ansou me ke mwahuki.”

I esehier Pad erein sounpar kei oh me keren I ndahiong me I kin kapingki en serepeino eh kin kalapw mehlel oh peren. Serepeino sapeng, “Eri, ke saikinte iang ie mi nan imweio, pwa? E kin mie ahi ansou. I ahnekiher ansou me I kin mwarosala, oh kin wie sengiseng pak tohto.” Ahpw e pil kapatahieng, “Sangete ansou me I tepda sohla kilang wasa, I pwuriamweiki, ahpw I ese me Sahm Nanleng oh Sounkomoruo kin ketiket rehn ahi peneinei oh ngehi. Se apwalih ni uwen aht kak koaros, oh I kamehlele me se apwalih ni pwung. I wialahr aramas pweida men oh ni oralap, I wia aramas nsenamwahu men. I tamataman Limehko nan mehkoaros. Ong irail kan me kin idek rehi ma I kin lingeringerki ahi maskun, I kin sapengki: “Ihs me I pahn lingeringer pah? Sahm Nanleng kin ieiang ie nan irair wet; I sohte kelkelehpw. E ketin ieiang ie ansou koaros.”

Nan irair wet, en Pad eh anahn en kilangada wasa sohte pahn wiawi nan mour wet. Ahpw lepin kahs me e kin kalap nda, iei “Met pil pahn sohrala.”¹⁰

Presiden Henry B. Eyring kosoia, “ansoukiset Sahmo mwahngi kumwail, amwail pepehm kan, oh anahn kan en palingehn oh paliwar en mehn mpemwail koaros.”¹¹ Me mehlel kouwahlap oh kansenamwahu wet kak dierek nan irair silu me I kasaledahr.

Riei ohl oh lih akan, ekei ansou atail kapakap kan kin mwadangete pasapengla duwen atiail kin kasik. Ekei ansou, atail kapakap kan sohte kin pasapengla nin duwen me kitail kasik, ahpw mwurin ansou kis kitail kin diarada me Koht ketin kaunopadahr kapai kan ong kitail me sohte kin kasikpe. Oh ekei ansou atail pekipek pwung kan ong Koht sohte kin pasapengla nan mour wet.¹² Ihme Elder Neal A. Maxwell mahsanih, “Pwoson kin liki sapwellimen Koht ansou.”¹³

Kitail kamehlele me nin duwen Sapwellime koasondi oh Sapwellime ansou, Sahm Nanleng pahn kapai kitailda oh kapwungala atail kahpwal, ire sapahrek oh kansensuwed kan koaros.

Pwehn kasalehda en Nahnmwariki mahseno mwe kosoia: “Oh pil ehu I men kumwail en kin teneki irair en kapai oh popohl en irail kan me ki dadaur kosonned en Koht akan, Pwe kilang, irail kapaidahr ni mehkoaros ong ni paliwar oh palingehn; oh ma irail kin kolokolete arail loaloapwoat lao lel ni imwio, irail pahn kohla nanleng, pwe irail en mihla rehn Koht nan irair en popohl soutuk. Oh tamataman, tamataman me mepwukat koaros me mehlel pwe Kauno me ketin mahsaniher.”¹⁴

I ese me Koht ketin karonge atail kapakap kan.¹⁵ I ese met pwehki Ih Sahm limpoak men, E kin ketin sapeng atail kapakap kan ni unsek, nin duwen Sapwwellime eripit soh imwi, oh ni mwoahmw me kin katapan oh kapai kitailda kouwahlap. I kadehdehki mepwukat ni mwaren Sises Krais, amen.