ເຮົາສາມາດເຮັດໃຫ້ດີກວ່າເກົ່າ ແລະ ເປັນຄົນດີກວ່າເກົ່າ
ໃຫ້ເອົາໃຈໃສ່ຕໍ່ການກັບໃຈທຸກວັນຂອງທ່ານ ຈົນມັນເປັນສິ່ງສຳຄັນໃນຊີວິດຂອງທ່ານ ເພື່ອວ່າທ່ານຈະສາມາດໃຊ້ຖານະປະໂລຫິດ ດ້ວຍອຳນາດທີ່ຍິ່ງໃຫຍ່ກວ່າທີ່ຜ່ານມາ.
ອ້າຍນ້ອງທີ່ຮັກແພງຂອງຂ້າພະເຈົ້າ, ຊ່າງເປັນພາບທີ່ດົນໃຈແທ້ໆ ເມື່ອຫລຽວອອກໄປເບິ່ງກອງທັບຈຳນວນຫລວງຫລາຍ ຜູ້ດຳລົງຖານະປະໂລຫິດ ຂອງພຣະຜູ້ເປັນເຈົ້າ. ພວກທ່ານຊ່າງເປັນພະລັງອັນມະຫາສານ ເພື່ອຄວາມດີແທ້ໆ! ພວກເຮົາຮັກພວກທ່ານ. ພວກເຮົາອະທິຖານເພື່ອພວກທ່ານ. ແລະ ພວກເຮົາມີຄວາມກະຕັນຍູຫລາຍຕໍ່ພວກທ່ານ.
ເມື່ອບໍ່ດົນມານີ້ ຂ້າພະເຈົ້າໄດ້ຄຸ້ນຄິດ ກ່ຽວກັບຄຳແນະນຳຂອງພຣະຜູ້ເປັນເຈົ້າ ທີ່ໄດ້ມອບໃຫ້ແກ່ສາດສະດາ ໂຈເຊັບ ສະມິດ ທີ່ວ່າ ຢ່າກ່າວສິ່ງໃດນອກຈາກການກັບໃຈແກ່ຄົນລຸ້ນນີ້.1 ການປະກາດນີ້ ມີຢູ່ໃນພຣະຄຳພີຫລາຍໆເທື່ອ.2 ມັນກະຕຸ້ນຄຳຖາມທີ່ແຈ່ມແຈ້ງວ່າ: “ທຸກຄົນ ຈຳເປັນຕ້ອງກັບໃຈບໍ?” ຄຳຕອບກໍຄື ຕ້ອງກັບໃຈ.
ຜູ້ຄົນຢ່າງຫລວງຫລາຍຄິດວ່າ ການກັບໃຈເປັນການລົງໂທດ—ເປັນບາງສິ່ງທີ່ຕ້ອງຫລີກເວັ້ນ ນອກຈາກໃນສະພາບການທີ່ຮ້າຍແຮງເທົ່ານັ້ນ. ແຕ່ຄວາມຮູ້ສຶກວ່າ ຕົວເອງຖືກລົງໂທດ ແມ່ນມາຈາກຊາຕານ. ມັນພະຍາຍາມກີດກັນເຮົາບໍ່ໃຫ້ຫວັງເພິ່ງພຣະເຢຊູຄຣິດ,3 ຜູ້ຢືນວາແຂນຢູ່,4 ດ້ວຍຄວາມຫວັງ ແລະ ຄວາມເຕັມພຣະໄທ ທີ່ຈະປິ່ນປົວ, ໃຫ້ອະໄພ, ຊຳລະລ້າງ, ຊູກຳລັງ, ເຮັດໃຫ້ເຮົາສະອາດ, ແລະ ບໍລິສຸດ.
ຄຳວ່າ ກັບໃຈ ໃນພຣະຄຳພີໃໝ່ພາສາກຣີກ ແມ່ນ metanoeo. ຄຳຕື່ມໜ້າ meta- ໝາຍເຖິງ “ການປ່ຽນແປງ.” ຄຳຕື່ມທ້າຍ -noeo ກ່ຽວພັນກັບສັບພາສາກຣີກ ໝາຍຄວາມວ່າ “ຄວາມຄິດ,” “ຄວາມຮູ້,” “ວິນຍານ,” ແລະ “ລົມຫາຍໃຈ.”5
ດັ່ງນັ້ນ, ເມື່ອພຣະເຢຊູຂໍໃຫ້ທ່ານ ແລະ ຂ້າພະເຈົ້າ “ກັບໃຈ,”6 ພຣະອົງໄດ້ເຊື້ອເຊີນເຮົາໃຫ້ປ່ຽນຄວາມຄິດ, ຄວາມຮູ້, ວິນຍານຂອງເຮົາ—ແມ່ນແຕ່ວິທີທີ່ເຮົາຫາຍໃຈ. ພຣະອົງຂໍໃຫ້ເຮົາປ່ຽນແປງວິທີທີ່ເຮົາຮັກ, ຄິດ, ຮັບໃຊ້, ໃຊ້ເວລາ, ປະຕິບັດກັບພັນລະຍາ, ສິດສອນລູກໆ, ແລະ ແມ່ນແຕ່ການດູແລຮ່າງກາຍຂອງຕົວເຮົາເອງ.
ບໍ່ມີສິ່ງໃດທີ່ເປັນອິດສະລະ, ຍົກລະດັບຈິດໃຈ, ຫລື ສຳຄັນສຳລັບຄວາມກ້າວໜ້າຂອງເຮົາ ຫລາຍໄປກວ່າການເອົາໃຈໃສ່ທຸກວັນ ຕໍ່ການກັບໃຈເປັນປະຈຳຂອງເຮົາ. ການກັບໃຈ ບໍ່ແມ່ນເຫດການໃດໜຶ່ງ; ມັນເປັນຂັ້ນຕອນ. ມັນເປັນສິ່ງທີ່ນຳເຮົາໄປສູ່ຄວາມສຸກ ແລະ ຄວາມສະຫງົບໃນຈິດໃຈ. ເມື່ອລວມໃສ່ກັບສັດທາ, ການກັບໃຈຈະເປີດໃຫ້ເຮົາເຂົ້າເຖິງອຳນາດແຫ່ງການຊົດໃຊ້ຂອງພຣະເຢຊູຄຣິດ.7
ບໍ່ວ່າທ່ານກຳລັງເດີນຢູ່ໃນເສັ້ນທາງແຫ່ງພັນທະສັນຍາ ຢ່າງພາກພຽນຫລືບໍ່ກໍຕາມ, ຫລືໄດ້ເດີນອອກໄປຈາກເສັ້ນທາງ ຫລື ຫລຽວບໍ່ເຫັນເສັ້ນທາງ ຈາກຈຸດທີ່ທ່ານຢູ່ໃນເວລານີ້ຫລືບໍ່ກໍຕາມ, ຂ້າພະເຈົ້າຂໍໃຫ້ທ່ານກັບໃຈ. ສຳພັດພະລັງທີ່ເສີມກຳລັງຂອງການກັບໃຈທຸກວັນ—ການເຮັດ ແລະ ການເປັນຄົນທີ່ດີຂຶ້ນເລັກນ້ອຍ ໃນແຕ່ລະວັນ.
ເມື່ອເຮົາເລືອກທີ່ຈະກັບໃຈ, ເຮົາເລືອກທີ່ຈະປ່ຽນແປງ! ເຮົາໃຫ້ພຣະຜູ້ຊ່ວຍໃຫ້ລອດປ່ຽນເຮົາເປັນບຸກຄົນທີ່ດີທີ່ສຸດ. ເຮົາເລືອກທີ່ຈະເຕີບໂຕທາງວິນຍານ ແລະ ຮັບເອົາຄວາມຊື່ນຊົມ—ເປັນຄວາມຊື່ນຊົມຂອງການໄຖ່ ໃນພຣະອົງ.8 ເມື່ອເຮົາເລືອກທີ່ຈະກັບໃຈ, ເຮົາເລືອກທີ່ຈະກາຍເປັນເໝືອນດັ່ງພຣະເຢຊູຄຣິດ!9
ອ້າຍນ້ອງທັງຫລາຍ, ເຮົາຕ້ອງ ເຮັດ ໃຫ້ດີກວ່າເກົ່າ ແລະ ເປັນ ຄົນດີກວ່າເກົ່າ ເພາະວ່າເຮົາຢູ່ໃນສະໜາມຮົບ. ການຕໍ່ສູ້ກັບບາບເປັນເລື່ອງຈິງ. ຜູ້ປໍລະປັກໄດ້ເພີ່ມກຳລັງຢ່າງຫລວງຫລາຍ ເພື່ອລົບກວນປະຈັກພະຍານ ແລະ ຂັດຂວາງວຽກງານຂອງພຣະຜູ້ເປັນເຈົ້າ. ມັນກຳລັງຕຽມບໍລິວານຂອງມັນ ດ້ວຍອາວຸດທີ່ມີພະລັງ ເພື່ອກີດກັນເຮົາຈາກການຮັບເອົາຄວາມຊື່ນຊົມ ແລະ ຄວາມຮັກຂອງພຣະຜູ້ເປັນເຈົ້າ.10
ການກັບໃຈເປັນສິ່ງຊ່ວຍເຮົາໃຫ້ຫລີກເວັ້ນຈາກຄວາມໂສກເສົ້າ ທີ່ເກີດຈາກກັບດັກຂອງຜູ້ປໍລະປັກ. ພຣະຜູ້ເປັນເຈົ້າບໍ່ໄດ້ຄາດໝາຍໃຫ້ເຮົາດີພ້ອມ ໃນເວລານີ້ ໃນຄວາມກ້າວໜ້ານິລັນດອນຂອງເຮົາ. ແຕ່ພຣະອົງຄາດໝາຍໃຫ້ເຮົາ ກາຍເປັນຄົນບໍລິສຸດຫລາຍຂຶ້ນ. ການກັບໃຈທຸກວັນ ເປັນເສັ້ນທາງທີ່ນຳໄປສູ່ຄວາມບໍລິສຸດ, ແລະ ຄວາມບໍລິສຸດຈະນຳພະລັງມາໃຫ້. ຄວາມບໍລິສຸດສ່ວນຕົວ ສາມາດເຮັດໃຫ້ເຮົາເປັນເຄື່ອງມືທີ່ມີພະລັງ ໃນພຣະຫັດຂອງພຣະເຈົ້າໄດ້. ການກັບໃຈຂອງເຮົາ—ຄວາມບໍລິສຸດຂອງເຮົາ—ຈະຊ່ວຍເຮົາ ໃນການເຕົ້າໂຮມອິດສະຣາເອນ.
ພຣະຜູ້ເປັນເຈົ້າໄດ້ສອນສາດສະດາໂຈເຊັບ ສະມິດ ວ່າສິດຂອງຖານະປະໂລຫິດກ່ຽວຂ້ອງກັບອຳນາດແຫ່ງສະຫວັນຢ່າງແຍກອອກຈາກກັນບໍ່ໄດ້, ແລະ ວ່າອຳນາດແຫ່ງສະຫວັນຈະຖືກບັງຄັບບໍ່ໄດ້ ຫລື ຖືກໃຊ້ບໍ່ໄດ້ນອກຈາກຕາມຫລັກທຳແຫ່ງຄວາມຊອບທຳເທົ່ານັ້ນ.11
ເຮົາຮູ້ວ່າສິ່ງໃດສາມາດຊ່ວຍເຮົາໃຫ້ເຂົ້າເຖິງອຳນາດແຫ່ງສະຫວັນ. ເຮົາກໍຮູ້ອີກວ່າ ສິ່ງໃດຈະກີດກັນຄວາມກ້າວໜ້າຂອງເຮົາ—ສິ່ງທີ່ເຮົາຕ້ອງເຊົາເຮັດ ເພື່ອວ່າເຮົາຈະເຂົ້າເຖິງອຳນາດແຫ່ງສະຫວັນໄດ້. ອ້າຍນ້ອງທັງຫລາຍ, ຈົ່ງສະແຫວງຫາດ້ວຍການອະທິຖານ ເພື່ອຈະໄດ້ເຂົ້າໃຈວ່າ ແມ່ນຫຍັງທີ່ກີດກັນທ່ານບໍ່ໃຫ້ກັບໃຈ. ລະບຸສິ່ງທີ່ ຢຸດຢັ້ງ ທ່ານຈາກການກັບໃຈ. ແລະ ແລ້ວໃຫ້ປ່ຽນ! ໃຫ້ກັບໃຈ! ເຮົາທຸກຄົນສາມາດເຮັດໃຫ້ດີກວ່າເກົ່າ ແລະ ເປັນຄົນດີກວ່າເກົ່າ ຫລາຍກວ່າທີ່ຜ່ານມາໄດ້.12
ມີວິທີການສະເພາະ ທີ່ເຮົາສາມາດປັບປຸງ. ຢ່າງໜຶ່ງແມ່ນວິທີທີ່ເຮົາເຮັດກັບຮ່າງກາຍຂອງເຮົາ. ຂ້າພະເຈົ້າງຶດງໍ້ກັບຄວາມມະຫັດສະຈັນຂອງຮ່າງກາຍມະນຸດ. ມັນເປັນການສ້າງທີ່ງົດງາມ, ຈຳເປັນຕໍ່ການກ້າວຂຶ້ນສູ່ສັກກະຍະພາບທີ່ສູງສົ່ງຂອງເຮົາ. ເຮົາບໍ່ສາມາດກ້າວໜ້າປາດສະຈາກມັນ. ໃນການມອບຂອງປະທານທີ່ເປັນຮ່າງກາຍໃຫ້ເຮົາ, ພຣະເຈົ້າໄດ້ອະນຸຍາດໃຫ້ເຮົາ ເຮັດຕາມຂັ້ນຕອນທີ່ສຳຄັນ ໃນການກາຍເປັນເໝືອນດັ່ງພຣະອົງຫລາຍຂຶ້ນ.
ຊາຕານເຂົ້າໃຈເລື່ອງນີ້. ມັນໃຈຮ້າຍ ເພາະການຖືກຂັບໄລ່ໜີຕອນຢູ່ໃນໂລກກ່ອນເກີດ ໄດ້ເຮັດໃຫ້ມັນໝົດສິດຕະຫລອດການ ຈາກສິດທິພິເສດນີ້, ຈຶ່ງເຮັດໃຫ້ມັນມີແຕ່ຄວາມອິດສາບັງບຽດ ແລະ ຄວາມແຄ້ນໃຈ. ສະນັ້ນ, ການລໍ້ລວງຢ່າງຫລວງຫລາຍ, ຖ້າບໍ່ແມ່ນເກືອບທັງໝົດ, ທີ່ມັນໄດ້ວາງຂວາງທາງໄວ້ ແມ່ນເພື່ອເຮັດໃຫ້ເຮົາທຳຮ້າຍຮ່າງກາຍຕົວເອງ ຫລື ຂອງຄົນອື່ນ. ເພາະວ່າຊາຕານໂສກເສົ້າ ທີ່ບໍ່ມີ ຮ່າງກາຍ, ມັນຈຶ່ງຢາກໃຫ້ເຮົາໂສກເສົ້າ ຍ້ອນ ຮ່າງກາຍຂອງເຮົາ.13
ຮ່າງກາຍຂອງທ່ານ ເປັນວິຫານສ່ວນຕົວຂອງທ່ານ, ຖືກສ້າງຂຶ້ນເພື່ອເປັນເຮືອນໃຫ້ແກ່ວິນຍານນິລັນດອນຂອງທ່ານ.14 ການຮັກສາວິຫານນັ້ນ ແມ່ນສຳຄັນຫລາຍ. ບັດນີ້, ຂ້າພະເຈົ້າຂໍຖາມທ່ານ, ອ້າຍນ້ອງທັງຫລາຍວ່າ: ທ່ານສົນໃຈນຸ່ງຖື ແລະ ດູແລຮ່າງກາຍຂອງທ່ານໃຫ້ໜ້າສົນໃຈຕໍ່ໂລກ ຫລາຍກວ່າທີ່ຢາກໃຫ້ພຣະເຈົ້າພໍພຣະໄທບໍ? ຄຳຕອບຂອງທ່ານຕໍ່ຄຳຖາມນີ້ ໄດ້ສົ່ງຂໍ້ຄວາມໂດຍກົງເຖິງພຣະອົງ ກ່ຽວກັບຄວາມຮູ້ສຶກຂອງທ່ານ ກ່ຽວກັບຂອງປະທານອັນລ້ຳຄ່າທີ່ພຣະອົງໄດ້ປະທານໃຫ້ທ່ານ. ໃນຄວາມເຄົາລົບຕໍ່ຮ່າງກາຍຂອງເຮົາ, ຂ້າພະເຈົ້າຄິດວ່າ ເຮົາສາມາດເຮັດໃຫ້ດີກວ່າເກົ່າ ແລະ ເປັນຄົນດີກວ່າເກົ່າໄດ້.
ວິທີໜຶ່ງທີ່ເຮົາສາມາດເຮັດໃຫ້ດີກວ່າເກົ່າ ແລະ ເປັນຄົນດີກວ່າເກົ່າ ຄືວິທີທີ່ເຮົາໃຫ້ກຽດແກ່ຜູ້ຍິງໃນຊີວິດຂອງເຮົາ, ເລີ່ມຕົ້ນຈາກພັນລະຍາ ແລະ ລູກສາວຂອງເຮົາ, ແມ່, ເອື້ອຍ, ແລະ ນ້ອງສາວຂອງເຮົາ.15
ຫລາຍເດືອນມານີ້, ຂ້າພະເຈົ້າໄດ້ຮັບຈົດໝາຍທີ່ເຈັບປວດໃຈ ຈາກເອື້ອຍນ້ອງທີ່ດີຄົນໜຶ່ງ. ນາງໄດ້ຂຽນວ່າ: “[ລູກສາວກັບຂ້ານ້ອຍ] ຮູ້ສຶກວ່າ ພວກຂ້ານ້ອຍກຳລັງແຂ່ງຂັນຢ່າງດຸເດືອດ ເພື່ອຍາດແຍ່ງຊີງເອົາຄວາມສົນໃຈຂອງສາມີ ແລະ ລູກຊາຍ ຈາກຂ່າວກິລາຕະຫລອດຊາວສີ່ຊົ່ວໂມງທຸກມື້, ວິດີໂອເກມ, ຂ່າວຕະຫລາດຫຸ້ນ, [ແລະ] ການວິເຄາະ ແລະ ການເບິ່ງກິລາ [ທຸກຊະນິດ] ແບບບໍ່ມີທີ່ສິ້ນສຸດ. ພວກຂ້ານ້ອຍຮູ້ສຶກວ່າ ຕົວເອງບໍ່ມີບ່ອນນັ່ງຢູ່ແຖວໜ້າ ເພາະສາມີ ແລະ ລູກຊາຍ ນັ່ງຈອງຕັ່ງແຖວໜ້າຕະຫລອດເວລາ ກັບ [ການເບິ່ງກິລາ ແລະ ການຫລິ້ນເກມ].”16
ອ້າຍນ້ອງທັງຫລາຍ, ໜ້າທີ່ທຳອິດ ແລະ ສຳຄັນກວ່າໝູ່ໝົດ ໃນຖານະຜູ້ດຳລົງຖານະປະໂລຫິດ ແມ່ນທີ່ຈະຮັກ ແລະ ດູແລພັນລະຍາຂອງທ່ານ. ໃຫ້ເປັນໜຶ່ງກັບນາງ. ໃຫ້ເປັນຄູ່ຂອງນາງ. ເຮັດໃຫ້ມັນງ່າຍສຳລັບນາງ ທີ່ຢາກຕ້ອງການເປັນຂອງທ່ານ. ຢ່າໃຫ້ຄວາມສົນໃຈອື່ນໃດໃນຊີວິດ ມີຄວາມສຳຄັນຫລາຍກວ່າ ການສ້າງຄວາມສຳພັນນິລັນດອນກັບນາງ. ຢ່າໃຫ້ ໂທລະພາບ, ເຄື່ອງມືຖື, ຫລື ຄອມພິວເຕີ ມີຄວາມສຳຄັນຫລາຍກວ່າ ຄວາມຜາສຸກຂອງນາງ. ໃຫ້ສຳຫລວດເບິ່ງວ່າ ທ່ານໃຊ້ເວລາເຮັດຫຍັງແດ່ ແລະ ສຸມເຫື່ອແຮງເຮັດຫຍັງຢູ່ໃສ. ສິ່ງນັ້ນຈະບອກວ່າ ຫົວໃຈຂອງທ່ານຢູ່ກັບສິ່ງໃດ. ໃຫ້ອະທິຖານ ຂໍໃຫ້ໃຈທ່ານສອດຄ່ອງກັບໃຈພັນລະຍາຂອງທ່ານ. ພະຍາຍາມເຮັດໃຫ້ນາງມີຄວາມສຸກ. ສະແຫວງຫາຄຳແນະນຳຂອງນາງ, ແລະ ຮັບຟັງ. ຄຳແນະນຳຂອງນາງ ຈະປັບປຸງການກະທຳຂອງທ່ານ.
ຖ້າຫາກທ່ານມີສິ່ງທີ່ຕ້ອງກັບໃຈ ເພາະວິທີທີ່ທ່ານໄດ້ປະພຶດຕໍ່ຜູ້ຍິງທີ່ຢູ່ໃກ້ທ່ານທີ່ສຸດ, ແລ້ວໃຫ້ເລີ່ມຕົ້ນ ໃນເວລານີ້. ແລະ ຈົ່ງຈື່ຈຳວ່າ ມັນເປັນໜ້າທີ່ຮັບຜິດຊອບ ຂອງທ່ານ ທີ່ຈະຊ່ວຍຜູ້ຍິງໃນຊີວິດຂອງທ່ານ ໃຫ້ໄດ້ຮັບພອນທີ່ມາຈາກການດຳລົງຊີວິດຕາມກົດພົມມະຈັນຂອງພຣະເຈົ້າ. ບໍ່ຄວນເປັນເຫດຜົນທີ່ເຮັດໃຫ້ຜູ້ຍິງບໍ່ສາມາດຮັບພອນພຣະວິຫານຂອງນາງ.
ອ້າຍນ້ອງທັງຫລາຍ, ເຮົາທຸກຄົນຕ້ອງກັບໃຈ. ເຮົາຕ້ອງລຸກຂຶ້ນຈາກຕັ່ງສະລົ້ງ, ວາງເຄື່ອງເປີດໂທລະທັດ, ແລະ ຕື່ນຈາກການຫລັບນອນທາງວິນຍານ. ມັນເຖິງເວລາແລ້ວ ທີ່ຈະສວມຍຸດທະພັນຄົບຊຸດຂອງພຣະເຈົ້າ ເພື່ອວ່າເຮົາຈະສາມາດເຮັດວຽກງານທີ່ສຳຄັນທີ່ສຸດນີ້ ຢູ່ໃນໂລກ. ມັນເຖິງເວລາແລ້ວ ທີ່ຈະເດ່ກ່ຽວຂອງເຮົາອອກໄປ, ແລະ ເກັບກ່ຽວດ້ວຍສຸດພະລັງ, ຄວາມຄິດ, ແລະ ກຳລັງ.17 ພຣະລັງຂອງຄວາມຊົ່ວຮ້າຍບໍ່ເຄີຍຂະຫຍາຍຢ່າງກວ້າງໄກຫລາຍກວ່າທຸກວັນນີ້. ໃນຖານະຜູ້ຮັບໃຊ້ຂອງພຣະຜູ້ເປັນເຈົ້າ, ເຮົາຈະນອນຫລັບຢູ່ບໍ່ໄດ້ ຂະນະທີ່ການຕໍ່ສູ້ຂະຫຍາຍອອກໄປຢ່າງກວ້າງໄກ.
ຄອບຄົວຂອງທ່ານ ຕ້ອງການຄວາມເປັນຜູ້ນຳ ແລະ ຄວາມຮັກຂອງທ່ານ. ກຸ່ມຂອງທ່ານ ແລະ ຜູ້ທີ່ຢູ່ໃນຫວອດ ຫລື ສາຂາຂອງທ່ານ ຕ້ອງການພະລັງຂອງທ່ານ. ແລະ ທຸກຄົນ ທີ່ພົບທ່ານ ຢາກຮູ້ວ່າ ການເປັນສານຸສິດທີ່ແທ້ຈິງຂອງພຣະຜູ້ເປັນເຈົ້າ ເປັນຄົນຈັ່ງໃດ ແລະ ທຳຕົວແບບໃດ.
ອ້າຍນ້ອງທີ່ຮັກແພງຂອງຂ້າພະເຈົ້າ, ທ່ານໄດ້ຖືກເລືອກໂດຍພຣະບິດາຂອງເຮົາ ໃຫ້ມາສູ່ໂລກ ໃນເວລາທີ່ສຳຄັນນີ້ ເພາະວິນຍານທີ່ກ້າຫານຂອງທ່ານ ຢູ່ໃນໂລກກ່ອນເກີດ. ທ່ານເປັນຜູ້ໜຶ່ງທີ່ດີເລີດ, ກ້າຫານທີ່ສຸດ ໃນບັນດາຜູ້ເຄີຍມາສູ່ໂລກນີ້. ຊາຕານຮູ້ວ່າທ່ານເປັນໃຜໃນເວລານີ້ ແລະ ໃນໂລກກ່ອນເກີດ, ແລະ ມັນເຂົ້າໃຈວ່າຕ້ອງເຮັດຫຍັງ ກ່ອນການສະເດັດກັບມາຂອງພຣະຜູ້ຊ່ວຍໃຫ້ລອດ. ແລະ ຫລັງຈາກໄດ້ເຝິກຝົນເລ່ຫລ່ຽມທີ່ສະຫລາດແກມໂກງຂອງມັນເປັນເວລາໜຶ່ງພັນປີ, ຜູ້ປໍລະປັກຈຶ່ງມີປະສົບການຫລາຍ ແລະ ປ່ຽນແປງບໍ່ໄດ້.
ໂຊກດີແຕ່ ຖານະປະໂລຫິດທີ່ເຮົາດຳລົງຢູ່ ມີພະລັງຫລາຍກວ່າກົນອຸບາຍຂອງຜູ້ປໍລະປັກ. ຂ້າພະເຈົ້າອ້ອນວອນທ່ານ ໃຫ້ເປັນຄົນທີ່ພຣະຜູ້ເປັນເຈົ້າ ຕ້ອງການໃຫ້ທ່ານເປັນ. ໃຫ້ເອົາໃຈໃສ່ຕໍ່ການກັບໃຈ ທຸກວັນ ຂອງທ່ານ ຈົນມັນເປັນສິ່ງສຳຄັນໃນຊີວິດຂອງທ່ານ ເພື່ອວ່າທ່ານຈະສາມາດໃຊ້ຖານະປະໂລຫິດ ດ້ວຍອຳນາດທີ່ຍິ່ງໃຫຍ່ ຫລາຍກວ່າທີ່ຜ່ານມາ. ນີ້ຄືວິທີທາງດຽວ ທີ່ທ່ານຈະຮັກສາຕົວເອງ ແລະ ຄອບຄົວ ໃຫ້ປອດໄພທາງວິນຍານ ໃນອະນາຄົດທີ່ທ້າທາຍທີ່ສຸດນີ້.
ພຣະຜູ້ເປັນເຈົ້າຕ້ອງການຜູ້ຊາຍທີ່ບໍ່ເຫັນແກ່ຕົວ ຜູ້ຄິດເຫັນຄວາມຢູ່ເຢັນເປັນສຸກຂອງຄົນອື່ນ ກ່ອນຂອງຕົວເອງ. ພຣະອົງຕ້ອງການຜູ້ຊາຍທີ່ຕັ້ງໃຈພະຍາຍາມທີ່ຈະໄດ້ຍິນສຸລະສຽງຂອງພຣະວິນຍານ ຢ່າງແຈ່ມແຈ້ງ. ພຣະອົງຕ້ອງການຜູ້ຊາຍແຫ່ງພັນທະສັນຍາ ຜູ້ຮັກສາພັນທະສັນຍາຂອງຕົນ ດ້ວຍຄວາມຊື່ສັດ. ພຣະອົງຕ້ອງການຜູ້ຊາຍທີ່ຕັ້ງໃຈຮັກສາຕົວເອງໃຫ້ບໍລິສຸດທາງເພດ—ຜູ້ຊາຍທີ່ມີຄ່າຄວນ ພ້ອມສະເໝີທີ່ຈະໃຫ້ພອນແກ່ຄົນອື່ນ ໃນທຸກເວລາ ດ້ວຍໃຈທີ່ສະອາດບໍລິສຸດ, ດ້ວຍຄວາມຄິດທີ່ແຈ່ມແຈ້ງ, ແລະ ດ້ວຍມືທີ່ເຕັມໃຈ. ພຣະຜູ້ເປັນເຈົ້າຕ້ອງການຜູ້ຊາຍທີ່ຢາກກັບໃຈໄວ—ຜູ້ຊາຍກະຕືລືລົ້ນທີ່ຈະຮັບໃຊ້ ແລະ ເປັນພາກສ່ວນໃນກອງທັບ ຜູ້ດຳລົງຖານະປະໂລຫິດທີ່ມີຄ່າຄວນ ຂອງພຣະຜູ້ເປັນເຈົ້າ.
ຂ້າພະເຈົ້າອວຍພອນທ່ານ ເພື່ອໃຫ້ກາຍເປັນຜູ້ຊາຍເຊັ່ນນັ້ນ. ຂ້າພະເຈົ້າອວຍພອນທ່ານ ດ້ວຍຄວາມກ້າຫານທີ່ຈະກັບໃຈທຸກວັນ ແລະ ຮຽນຮູ້ວິທີທີ່ຈະໃຊ້ອຳນາດຂອງຖານະປະໂລຫິດທັງໝົດ. ຂ້າພະເຈົ້າອວຍພອນທ່ານ ໃຫ້ສື່ສານຄວາມຮັກຂອງພຣະຜູ້ຊ່ວຍໃຫ້ລອດ ກັບພັນລະຍາ ແລະ ລູກໆຂອງທ່ານ ແລະ ກັບທຸກຄົນທີ່ຮູ້ຈັກທ່ານ. ຂ້າພະເຈົ້າອວຍພອນທ່ານ ເພື່ອ ເຮັດ ໃຫ້ດີກວ່າເກົ່າ ແລະ ເປັນ ຄົນດີກວ່າເກົ່າ. ແລະ ຂ້າພະເຈົ້າອວຍພອນທ່ານ ວ່າເມື່ອທ່ານມຸ່ງໝັ້ນໃນສິ່ງເຫລົ່ານີ້, ທ່ານຈະປະສົບກັບການມະຫັດສະຈັນ ໃນຊີວິດຂອງທ່ານ.
ເຮົາມີສ່ວນຮ່ວມໃນວຽກງານຂອງພຣະເຈົ້າອົງຊົງລິດອຳນາດຍິ່ງໃຫຍ່. ພຣະເຢຊູ ຄືພຣະຄຣິດ. ເຮົາແມ່ນຜູ້ຮັບໃຊ້ຂອງພວກພຣະອົງ. ຂ້າພະເຈົ້າເປັນພະຍານ ໃນພຣະນາມຂອງພຣະເຢຊູຄຣິດ, ອາແມນ.