Te mau tao’a pae vārua

Māuruuru nō te pehe nehenehe. ’A ti’a ai tātou nō te hīmene « Māuruuru mātou, e te Atua », e piti mana’o pūai tei puta mai. Te hō’ē, nō ni’a ïa i te peropheta Iosepha Semita, te peropheta nō teie tau tu’ura’a. Tē rahi noa nei tō’u here ’e tō’u faahiahia iāna i te mau mahana ato’a. Te piti o te mana’o, ’ua puta mai ïa ’a hi’o ai au i tā’u vahine, tā’u mau tamāhine, mau mo’otua vahine ’e mau hina vahine. Mai te huru ē, ’ua hina’aro vau ’ia parau ē, e fēti’i ana’e ’outou nō’u.

Ma’a ’āva’e i ma’iri, i te hope’a o te hō’ē ’ōro’a hiero, ’ua nā ’ō vau i ta’u vahine ia Wendy : « Maita’i pa’i ’ua māramarama te mau tuahine i te mau tao’a pae vārua nā rātou i roto i te hiero. » E te mau tuahine, pinepine au i te feruri nō ni’a ia ’outou, mai tei tupu ’a piti ’āva’e i ma’iri, i te haerera’a māua Wendy i Harmony (Pennsylvania).

Hōho’a

Fa’aho’i-fa’ahou-ra’a o te Autahuara’a a Aarona

’O te pitira’a o te taime māua i te haerera’a i’ō. Terā e piti taime ato’a māua i te putapū-roa-ra’a ’a hāhaere ai nā te reira vāhi mo’a. I te hō’ē vāhi tāpiri ia Harmony tō Ioane Bāpetizo fāra’a ia Iosepha Semita ’e tōna fa’aho’ira’a mai i te Autahu’ara’a a Aarona.

Hōho’a

Fa’aho’i-fa’ahou-ra’a o te Autahu’ara’a a Melehizedeka

I reira ato’a tō te mau ’āpōsetolo Petero, Iakobo ’e Ioane fāra’a mai nō te fa’aho’i mai i te Autahu’ara’a a Melehizedeka.

I Harmony tō Emma Hale Smith tāvinira’a ’ei pāpa’i parau mātāmua nō tāna tāne, ’a ’īriti ai te peropheta i te Buka a Moromona.

I Harmony ato’a tō Iosepha fāri’ira’a i te hō’ē heheura’a tei fa’a’ite i te hina’aro o te Fatu nō Emma. ’Ua fa’aue te Fatu ia Emma ’ia tātara i te mau pāpa’ira’a mo’a, ’ia a’o i te ’Ēkālesia, ’ia fāri’i i te Vārua Maita’i ’e ’ia tu’u i te taime rahi « nō te ha’api’ira’a i te tahi mau mea e rave rahi ra. » ’Ua a’o-ato’a-hia Emma « e ha’apae i te mau mea o teie nei ao, ’e e tītau ho’i i te mau mea nō tei maita’i a’e ra », ’e ’ia tāpe’a māite i tāna mau fafaura’a ’e te Atua ra. Fa’aoti a’era te Fatu i tāna mau arata’ira’a i teie parau fa’ahiahia : « ’O teie tō’u reo i te mau ta’ata ato’a ».¹

Te mau mea ato’a i tupu i terā mau vāhi, e mau hope’a rahi ato’a ïa i roto i tō ’outou orara’a. E nehenehe te fa’aho’i-fa’ahou-ra’a-hia mai te autahu’ara’a, nā reira ato’a te parau a’o a te Fatu ia Emma, e riro ’ei arata’i ’e ’ei ha’amaita’ira’a nō ’outou tāta’itahi. ’Auē ïa tō’u hina’aro rahi ’ia māramarama ’outou ē, nō te mau tāne te fa’aho’i-fa’ahou-ra’a-hia te autahu’ara’a ’e nō ’outou ato’a ho’i te mau vahine. Nō te fa’aho’i-fa’ahou-ra’a-hia mai te Autahu’ara’a a Melehizedeka, e matara i te mau vahine ’e te mau tāne ha’apa’o fafaura’a « te mau ha’amaita’ira’a ato’a nō te ’ēkālesia i te pae vārua ra »,² ’aore rā e nehenehe e parau ē, i te mau tao’a pae vārua ato’a a te Fatu nō tāna mau tamari’i.

E matara hua te mana Atua i te mau vahine ato’a ’e te mau tāne ato’a e rave i te mau fafaura’a ’e te Atua ma te ha’apa’o i te reira ’e ma te ’āmui ti’amā i te mau ’ōro’a o te autahu’ara’a. Te feiā e fāri’i i te ’ōro’a hiero i roto i te fare o te Fatu, e fāri’i rātou i te hōro’a nō te mana autahu’ara’a a te Atua maoti tā rātou mau fafauraa, nā reira ato’a te hōro’a nō te ’ite, ’ia ’ite rātou nāhea i te fa’a’ohipa i terā mana.

E vēteahia te ra’i i te mau vahine tei hōro’ahia te mana o te Atua nā roto i tā rātou mau fafaura’a autahu’ara’a mai tei vēteahia i te mau tāne tei mau i te autahu’ara’a, ’aita e ta’a-’ē-ra’a. Tē pure nei au ’ia vai te reira parau mau i roto i tō ’outou ’ā’au nō te mea tē ti’aturi nei au ē, e taui te reira i tō ’outou orara’a. E te mau tuahine, e ti’ara’a mana tō ’outou nō te fa’a’ohipa hua i te mana o te Fa’aora nō te tauturu i tō ’outou ’utuāfare ’e i te ta’ata tā ’outou i here.

I teienei, e parau paha ïa ’outou ē : « E mea au ’ia fa’aro’o i te reira, nāhea rā pa’i ? Nāhea vau i te fa’a’ohipa i te mana o te Fa’aora i roto i tō’u orara’a ? »

E’ita ’outou e ’ite i teie ’ohipa tau maoro i te tātarahia i roto i te hō’ē buka arata’i. Nā te Vārua Maita’i e a’o ta’a ’ē atu ia ’outou ’a ’imi ai ’outou ’ia māramarama e aha tā te Fatu i hina’aro ia ’outou ’ia ’ite ’e ’ia rave. E ’ere teie ’ohipa i te ’ohipa vitiviti ’e te ’ōhie, e mea fa’aoraora rā nō te vārua. E aha pa’i te ’ohipa ’ana’anatae a’e i te ha’ara’a ’e te Vārua nō te māramarama i te mana o te Atua—te mana autahu’ara’a ?

Te mea tā’u e nehenehe e parau ia ’outou, ’oia ho’i, nō te noa’a te mana o te Atua i roto i tō ’outou orara’a, e tītauhia te hō’ē ā mau mea tā te Fatu i fa’aue ia Emma ’e ia ’outou ’ia rave.

Nō reira, tē ani nei au ia ’outou ’ia tuatāpapa nā roto i te pure i te tuha’a 25 o Te Parau Ha’api’ira’a ’e te mau Parau Fafau ’e ’ia ’apo mai i te mea tā te Vārua Maita’i e ha’api’i ia ’outou. E fa’atae mai tā ’outou tauto’ora’a i te mau mea pae vārua i te ’oa’oa ’a ’āpī ai ’outou, a māramarama ai ’e a fa’a’ohipa ai i terā mana tei hōro’ahia ia ’outou.

E tītau te hō’ē pae o teie tauto’ora’a ’ia tu’u ’outou i te hiti e rave rahi mea o teie nei ao. I te tahi taime e fa’ahiti tāu’a ’ore tātou i te parau nō te fa’aāteara’a i te mau mea o teie nei ao, tō te reira mārōra’a, te mau ’umera’a purara ’ia hara ’e te mau mana’o hōhonu hape. Nō te rave mau rā i te reira, tītauhia ia ’outou ’ia hi’opo’a hu’ahu’a ’e hi’opo’a pinepine i tō ’outou orara’a. ’A nā reira ai ’outou, e muhumuhu mai te Vārua Maita’i ia ’outou i te mau mea ’aita e faufa’a fa’ahou, te mau mea ’eiaha fa’ahou e ha’amāu’a i tō ’outou taime ’e te pūai.

’A fāriu ’ē ai ’outou i te mau fa’anevanevara’a o teie nei ao, e riro te mau mea faufa’a rahi nō ’outou i teienei i te topa mai mai terā pārahira’a mātāmua. E tītauhia ia ’outou ’ia parau ’aita nō te tahi mau mea, noa atu ē ’ia hi’ohia, ’aita e fifi i reira. ’A ’e’e (embarquer) ai ’outou ’e ’a tāmau ai i teie ’ohipa nō te orara’a tā’āto’a, i te ha’amo’ara’a i tō ’outou ora i te Fatu, e māere ’outou i te mau tauira’a i roto i tā ’outou hi’ora’a, te mau mana’o ’e te pūai pae vārua !

I teienei rā, e vai ara. Tē vai nei te ta’ata e tōtōā i tō ’outou ’aravihi e ti’aoro i te mana o te Atua. Tē vai nei te ta’ata e fa’afē’a’a ia ’outou i roto ia ’outou iho ma te fa’aiti i tō ’outou ’aravihi pae vārua fa’ahiahia ’ei vahine parau ti’a.

E mea pāpū roa ïa ’aita te ’enemi e hina’aro nei ’ia māramarama ’outou i te fafaura’a tā ’outou i rave i te bāpetizora’a, ’e te ’ite ’e te mana tā ’outou i fāri’i ’aore rā ’o tā ’outou e fāri’i i roto i te ’ōro’a hiero i te hiero—te fare o te Fatu. E mea pāpū iho ā ïa ’aita Sātane e hina’aro nei ’ia māramarama ’outou ē, i te mau taime ato’a e tāvini ’e e ha’amori ’outou i roto i te hiero ma te ti’amā, e fa’aru’e ’outou i te reira vāhi ma te mau i te mana o te Atua ’e ma tōna mau melahi ra « e ha’apa’o » ia ’outou.³

E tāmau noa Sātane ’e tāna mau teuteu i te feruri i te mau ārai’ē’a (obstacles) ’eiaha ’outou ’ia māramarama i te mau hōro’a pae vārua tei ha’amaita’ihia ’outou ’e ’o tē nehenehe e ha’amaita’i ia ’outou. Te vāhi ’ino rā, tē vai nei te tahi mau ārai’ē’a, ’o te ravera’a hape ïa a te tahi atu ta’ata. E mea māuiui nō’u ’ia feruri i te hō’ē noa a’e o ’outou tei tupu te mana’o nō te patura’ahia i te hiti ’aore rā nō te ti’aturi-’ore-ra’a-hia e te ti’a fa’atere o te autahu’ara’a, ’aore rā tei hāmani-’ino-hia ’aore rā tei ha’avarehia e te tāne fa’aipoipo, te metua tāne ’e tei mana’ohia ē e hoa. E ’oto rahi tō’u ia ’outou tei tae mai te mana’o nō te tu’ura’ahia i te hiti, nō te fa’atura-’ore-ra’a-hia ’e nō te ha’avā-hape-ra’a-hia. ’Aita terā huru fa’a’inora’a i roto i te bāsileia a te Atua.

I te tahi pae, e mea au nā’u ’ia fa’aro’o ē, ’ua hina’aro mau te feiā fa’atere ’ia ’āmui mai te mau vahine i roto i te mau ’āpo’ora’a pāroita ’e titi. E fa’aurura’a nō’u te mau tāne fa’aipoipo ato’a e fa’a’ite nei ē, tāna hōpoi’a autahu’ara’a rahi roa a’e, ’o te ha’apa’ora’a ïa i tāna vahine.⁴ Tē ’ārue nei au i te tāne e fa’atura roa nei i te ’aravihi o tāna vahine nō te fāri’i i te heheura’a ma te poihere iāna ’ei ’āpiti ’aifāito nō tō rāua fa’aipoipora’a.

’Ia ta’a i te tāne te huru ari’i ’e te mana o te hō’ē vahine feiā mo’a parau ti’a ’e te ’imi maita’i ’e tei fāri’i i tōna ’ōro’a hiero, e māere ānei ïa tātou e ti’a fa’atura atu terā tāne i ni’a ’ia tomo mai ’oia i roto i te piha ?

Mai te ha’amatara’a mai ā o te tau, ’ua ha’amaita’ihia te mau vahine i te hō’ē ’avei’a mōrare hō’ē roa—te ’aravihi nō te fa’ata’a i te maita’i ’e te ’ino. E maita’i atu ā teie hōro’a nō rātou e rave ’e e ha’apa’o i te mau fafaura’a. ’E e iti mai te reira nō rātou e mā’iti ’ia tāu’a ’ore roa i te mau fa’auera’a a te Atua.

Tē ha’aviti nei au i te parau ē, ’aita roa atu vau e tātara nei i te tītaura’a i ni’a i te mau tāne ’ia fa’ata’a ato’a rātou i te maita’i ’e te ’ino. Teie rā, e te mau tuahine here ē, e mea faufa’a roa ’ino tō ’outou ’aravihi e hāro’aro’a i te parau mau ’e te hape, ’ia riro ’outou ’ei tīa’i i te pae mōrare, i teie mau mahana hope’a nei. ’E tē tūru’i nei mātou i ni’a ia ’outou nō te ha’api’i ia vetahi i te reira. E parau pāpū roa atu vau : ’āhiri e ’ere te ao i te ’āfaro mōrare o te mau vahine, e’ita roa atu te ao e ora mai.

Tātou te feiā mo’a i te mau mahana hope’a nei, e ’ere tātou nō teie nei ao ; ’o ’Īserā’ela fafau tātou. ’Ua pi’ihia tātou nō te fa’aineine i te hō’ē pupu ta’ata nō te Tae-piti-ra’a mai o te Fatu.

I teienei, e ha’apāpū atu vau i te tahi atu ā mau mea e au i te mau vahine ’e te autahu’ara’a. ’Ia fa’ata’ahia ’outou nō te tāvini i roto i te hō’ē pi’ira’a i raro a’e i te fa’aterera’a a te ta’ata tei mau i te mau tāviri o te autahu’ara’—mai te ’episekōpo ’aore rā te peresideni titi—e mana nō te autahu’ara’a tei hōro’ahia ia ’outou nō te ’ohipa i roto i terā pi’ira’a.

Nā reira ato’a, i roto i te hiero mo’a, e fa’ati’ahia ’outou ’ia rave ’e ’ia fa’atere i roto i te mau ’ōro’a o te autahu’ara’a i te mau taime ato’a e haere atu ’outou. E fa’aineine te fāri’ira’a i te ōro’a hiero ’ia rave i te reira.

Mai te mea ’ua fāri’i ’outou i tō ’outou ’ōro’a hiero, ’aita rā i fa’aipoipohia i te hō’ē tāne tei mau i te autahu’ara’a ’e tē nā ’ō ra te tahi ta’ata ia ’outou ē : « E mea ’oto roa ’aita tō ’oe autahu’ara’a i te fare », ’ia ’ite ’outou ē, ’ua hape terā parau. ’Aita paha e ta’ata tei mau i te autahu’ara’a i tō ’outou fare, ’ua fāri’i rā ’e ’ua rave ’outou i te mau fafaura’a mo’a ’e te Atua i roto i tōna hiero. Mai roto i taua mau fafaura’a ra e mani’i mai ai te hōro’ara’a o tōna mana autahu’ara’a i ni’a ia ’outou. ’E ’a ha’amana’o ē, ’ia pohe noa atu tā ’outou tāne fa’aipoipo, nā ’outou e peresideni i tō ’outou ’utuāfare.

’Outou te mau vahine feiā mo’a parau ti’a tei fāri’i i tō ’outou ’ōro’a hiero, e paraparau ’outou ’e e ha’api’i ’outou ma te mana ’e te ha’amanara’a nō ’ō mai i te Atua. I roto i te a’ora’a ’aore rā te ’āparaura’a, tītauhia ’ia ha’api’i tō ’outou reo i te ha’api’ira’a tumu a te Mesia. Tītauhia tō ’outou mana’o i roto i te mau ’āpo’ora’a ’utuāfare, pāroita ’e titi. E mea faufa’a roa ’ia ’āmui mai ’outou, e ’ere ’outou nō te fa’anehenehe noa !

E au mau tuahine here, e rahi atu ā tō ’outou mana ’ia tāvini ’outou ia vetahi ’ē. E riro tā ’outou mau pure, te ha’apaera’a mā’a, te taime i roto i te mau pāpa’ira’a mo’a, te tāvinira’a i te hiero ’e i roto i te ’ā’amu ’utuāfare, i te ha’avētea i te ra’i nō ’outou.

Tē tāparu nei au ia ’outou ’ia tuatāpapa nā roto i te pure i te tā’āto’ara’a o te parau mau e ’ite mai ’outou nō ni’a i te mana autahu’ara’a. E nehenehe e ha’amata nā ni’a i Te Parau Ha’api’ira’a ’e te mau Parau Fafau 84 ’e te 107. E arata’i atu teie nā tufa’a i te tahi atu mau ’īrava. ’Ua ’ī te mau pāpa’ira’a mo’a ’e te mau ha’api’ira’a a te mau peropheta, te mau hi’o ’e te mau heheu parau i tō tātou nei anotau i teie mau parau mau. ’A māramarama noa ai ’outou ’e ’a fa’a’ohipa ai i te fa’aro’o i te Fatu ’e i tōna mana autahu’ara’a, e rahi atu ā tō ’outou ’aravihi e fa’a’ohipa i teie tao’a pae vārua tā te Fatu i fa’aineine. ’A nā reira ai ’outou, e ’ite mai ’outou i tō ’outou ’aravihi rahi a’e nō te fa’atupu i te ’utuāfare mure ’ore ’e te tāhō’ē ’e tei tā’atihia i roto i te hiero o te Fatu ’e tei ’ī i te here nō tō tātou Metua i te Ao ra ’e nō Iesu Mesia.

E arata’i tā tātou mau tauto’ora’a ato’a nō te aupuru i te tahi ’e te tahi, nō te poro i te ’evanelia, nō te ha’amaita’i i te feiā mo’a ’e nō te fa’aora i te feiā pohe, i te hiero mo’a. 166 hiero tā tātou i teienei nā te ao ato’a nei, ’e tē vai fa’ahou ra.

Mai tā ’outou i ’ite, e fa’a’āpīhia te hiero nō Roto Miti, ’o Temple Square, ’e te mau vāhi tāpiri mai i te fare nō te piha tōro’a a te ’Ēkālesia i roto i te hō’ē ’ōpuara’a patura’a e ha’amata i te hope’a o teie nei matahiti. E mea tītauhia ’ia fa’ahereherehia ’e ’ia fa’aineinehia teie hiero mo’a nō te fa’auru i te mau u’i nō ananahi, mai tāna i fa’auru ia tātou nō teie nei u’i.

’A tupu rahi noa ai te ’Ēkālesia, e rahi atu ā te mau hiero tē pātuhia ’ia noa’a i te mau ’utuāfare e rave rahi atu ā terā ha’amaita’ira’a rahi roa a’e i te mau ha’amaita’ira’a ato’a, ’oia ho’i te ora mure ’ore.⁵ Tē hi’o nei tātou i te hō’ē hiero ’ei fare mo’a roa a’e i roto i te ’Ēkālesia. ’Ia fa’aara-ana’e-hia te ’ōpuara’a nō te hō’ē hiero ’āpī, e tuha’a faufa’a rahi ïa te reira nō tō tātou ’ā’amu. Mai tā tātou i paraparau i teie pō, e mea faufa’a rahi ’outou te mau tuahine nō te ora o teie ’ohipa hiero, ’e ’o te hiero te vāhi e fāri’i ai ’outou i tā ’outou mau tao’a pae vārua teitei roa a’e.

E fa’aro’o māite na i teie nei ’e ma te mana’o tura, e fa’aara atu vau i te mau ’ōpuara’a patura’a nō e va’u hiero ’āpī. Mai te mea e fa’aarahia atu te hō’ē hiero i te hō’ē vāhi ta’a ’ē nō ’outou, tē ani nei au ia ’outou ’ia taupe noa i tō ’outou upo’o i raro ma te pure ha’amāuruuru i te ’ā’au. Tē ’oa’oa nei mātou i te fa’aara i te ’ōpuara’a patura’a hiero i te mau vāhi i muri nei : Freetown (Sierra Leone) ; Orem (Utah) ; Port Moresby (Papua Niu Guinea) ; Bentonville (Arkansas) ; Bacolod (Firipino) ; McAllen (Texas) ; Cobán (Guatemala) ’e Taylorsville (Utah). Māuruuru ’e te mau tuahine here ē. Tē māuruuru roa nei mātou i tā ’outou fāri’ira’a i teie mau ’ōpua ma te mana’o tura.

I teienei, ’ei ’ōpanira’a, tē hina’aro nei au e vaiiho i te hō’ē ha’amaita’ira’a i ni’a ia ’outou, ’ia māramarama ’outou i te mana autahu’ara’a tei hōro’ahia ia ’outou, ’ia fa’arahi ho’i ’outou i taua mana nei nā roto i te tu’ura’a i te fa’aro’o i roto i te Fatu ’e i tōna mana.

E au mau tuahine, ma te fa’atura rahi ’e te māuruuru, tē fa’a’ite nei au i tō’u here ia ’outou. Ma te ha’eha’a, tē fa’a’ite nei au ē, tē ora nei te Atua ! ’O Iesu te Mesia. ’O teie tāna ’Ēkālesia. Tē fa’a’ite pāpū nei au i te reira i te i’oa mo’a o Iesu Mesia, ’āmene.