’A ha’apa’o, ’eiaha ’ia ha’apa’o ’ore

’Ua pāpū iā’u ē, e rave rahi o ’outou ’o te ta’a ra. ’Ua rau te mau ha’amaita’ira’a o te mau rāve’a ’āpī o teie ’anotau. E nehenehe te reira e fa’atū’ati ia tātou i te mau hoa ’e i te ’utuāfare, i te mau ha’amāramaramara’a, ’e i te mau parau ’āpī nō ni’a i te mau mea e tupu ra ’ati a’e te ao nei. Terā rā, e nehenehe ato’a te reira e fa’anevaneva ia tātou i te tū’atira’a faufa’a roa a’e : Tō tātou tū’atira’a i te ra’i.

E fa’ahiti fa’ahou atu vau i te parau tā tō tātou peropheta, te Peresideni Russell M. Nelson i parau : « E ao fifi ’e te mārō rahi roa tā tātou e ora nei. Tē tūpita tāmau nei te mau rāve’a tūreiara’a tōtiare ’e te mau parau ’āpī 24 hora ia tātou i te mau poro’i hope’a ’ore. Mai te peu tē vai ra te ti’aturi e tīti’a i teie naho’a reo ’e te mana’o hōhonu o te ta’ata e ’aro ra i te parau mau, tītauhia ’ia ha’api’i tātou nāhea i te fāri’i i te heheura’a ».

’Ua ha’api’i mai ā te peresideni Russell M. Nelson ē, « i te mau mahana i muri nei, e’ita tātou e ora mai i te pae vārua mai te peu ’aita te mana arata’i ’e te fa’atere ’e te tāmāhanahana ’e te tāmau o te Vārua Maita’i ».¹

Rave rahi matahiti i ma’iri a’e nei, ’ua fa’ati’a mai te peresideni Boyd K. Packer nō ni’a i te hō’ē nana ria tei mau i rāpae i tō rātou vāhi orara’a nō te he’era’a te hiona, ’e e mea pāpū ē, e pohe rātou i te po’ia. Tē vai ra te tahi mau ta’ata mana’o maita’i tei māni’i i te mau pere’o’o aihere nā te reira vāhi nō te fa’aora ia rātou—’e ’ere ho’i te reira te mā’a tumu a te ria, terā rā, ’ua ti’aturi rātou ē, terā a’e tā rātou mā’a nō te roara’a o te pu’e tau to’eto’e. Te vāhi pe’ape’a rā, ’ua pohe te rahira’a o te mau ria. ’Ua ’amu rātou i te aihere, ’aita rā te reira i ha’apa’ia ia rātou, ’e ’ua pohe rātou i te po’ia noa atu te ī o te ’ōpū.²

’Ua riro e rave rahi o te mau parau poro’i e tūpita nei ia tātou i teie tau o te ha’amāramaramara’a, e tuea i te pae vārua nō te fa’a’amura’a i te ria i te aihere—e nehenehe tā tātou e ’amu i te roara’a o te mahana, ’aita rā te reira e ha’apa’ia ia tātou.

I hea e ’itehia ai ia tātou te mā’a pae vārua mau ? I te rahira’a o te taime, e ’ere ïa i te hō’ē peu i ni’a i te mau rāve’a tūreiara’a tōtiare. E ’itehia te reira ia tātou ’a « nu’u ai [tātou] i mua » i ni’a i te ’ē’a nō te fafaura’a, « ma te mau māite i taua ’āuri ra », ’e ’a ’amu ai i te hotu o te rā’au o te ora.³ Te aura’a ra, e ti’a ia tātou ’ia rave pāpū i te taime i te mahana hō’ē, ’ia tāpū ia tātou i te ao nei ’e ’ia tū’ati atu i te ra’i.

I roto i tāna moemoeā, ’ua ’ite o Lehi i te ta’ata i te ’amura’a i te hotu, terā rā, ’ua fa’aru’e rātou i te reira nō te fa’ao’o’ora’a a te fare rahi ’e te ’ā’ano, te te’ote’o o te ao nei.⁴ E nehenehe te feiā ’āpī e fa’a’amuhia i roto i te hō’ē ’utuāfare feiā mo’a i te mau mahana hope’a nei, e ’āmui i te mau putuputura’a ’e te mau ha’api’ira’a a te ’Ēkālesia, ’e e ’āmui ato’a i roto i te mau ’ōro’a i roto i te hiero, ’e e haere atu ai nā ni’a « i te mau ’ē’a au ’ore ra, ’e mo’e atu ai ».⁵ Nō te aha teie e tupu ai ? I te rahira’a o te taime, nō te mea ïa ē, ’aita rātou i fa’afāriu-pāpū-hia, noa atu ē, ’ua ora rātou i roto i te mau ’ohipara’a pae vārua. ’Ua fa’a’amuhia rātou ’aita rā i pa’ia

Hōho’a

Mau ’ohipara’a a te feiā ’āpī

Terā rā, ’ua fārerei ato’a vau e rave rahi o ’outou te feiā mo’a ’āpī, te pūai, te māramarama ’e te ha’apa’o nō te mau mahana hope’a nei. ’Ua ’ite ’outou ē, e mau tamaiti ’e e mau tamāhine ’outou nā te Atua ’e e ’ohipa tāna i fa’ata’a nā ’outou. Tē here nei ’outou i te Atua mā tō ’outou « ʼāʼau atoʼa, ma tō pūai, tō mana’o ’e ma tō itoito ho’i ».⁶ Tē ha’apa’o nei ’outou i tā ’outou mau fafaura’a ’e te tāvini nei ia vetahi ’ē, ma te ha’amatara’a i te fare. Tē fa’a’ite nei ’outou i te fa’aro’o, te tātarahapa ’e tē ha’amaita’i nei ia ’outou i te mahana tāta’itahi, ’e tē hōro’a mai nei te reira ia ’outou i te ’oa’oa vai maoro. Tē fa’aineine nei ’outou ia ’outou nō te mau ha’amaita’ira’a o te hiero ’e nō te tahi atu mau mea tā ’outou e fāri’i ’ei mau pipi mau nā te Fa’aora. ’E tē tauturu nei ’outou i te fa’aineinera’a i te ao nei nō te tae-piti-ra’a mai, ma te ani i te mau ta’ata ato’a ’ia haere mai i te Mesia ’e ’ia fāri’i i te mau ha’amaita’ira’a o tōna tāra’ehara. ’Ua tū’atihia ’outou i te ra’i.

Hōho’a

Tere o te feiā ’āpī i te hiero

’Oia mau, tē fa’aruru nei ’outou i te mau tāmatara’a. Mai te reira te mau u’i ato’a. Nō tātou teie mau mahana, ’e e tītauhia ia tātou ’ia ha’apa’o, ’eiaha ’ia ha’apa’o ’ore. Tē fa’a’ite pāpū nei au ē, ’ua ’ite te Fatu i tō tātou mau tāmatara’a, ’e nā roto i te fa’aterera’a a te peresideni Nelson, tē fa’aineine nei ’oia ia tātou nō te fa’aruru i te reira. Tē ti’aturi nei au ē, te pi’ira’a a te peropheta ’aita i maoro a’e nei, nō te hō’ē ’Ēkālesia fa’atumuhia i ni’a i te fare, pāturuhia nā te mau mea tā tātou e ravenei i roto i tā tātou mau fare,⁷ nō te tauturu ïa ia tātou ’ia ora—’e ’ia haere i mua—i roto i teie tau nava’i ’ore te mā’a i te pae vārua.

E aha te aura’a ’ia riro ʼei ’Ēkālesia fa’atumuhia i ni’a i te fare ? ’Ua rau te huru o te fare ’ati a’e te ao nei. Tei roto paha ’outou i te hō’ē ’utuāfare melo nō te ’Ēkālesia e rave rahi u’i i teienei. ’Aore rā o ’outou ana’e paha te melo o te ’Ēkālesia i roto i tō ’outou ’utuāfare. ’Ua fa’aipoipohia paha ’outou ’aore rā e ta’ata ’ōtahi noa, e tamari’i ’aore rā ’aita e tamari’i i te fare.

Ta’a ’ē noa atu tō ’outou huru, e nehenehe ’outou e fa’ariro i tō ’outou fare ’ei pū nō te ’apora’a mai ’e te orara’a i te ’evanelia. E aura’a ’ōhie roa, ’oia ho’i, e amo i tā ’outou iho hōpoi’a nō tō ’outou fa’afāriura’a ’e te tupura’a pae vārua. Te aura’a, ’o te pe’era’a ïa i te a’o a te peresideni Nelson « ’ia fa’anaho fa’ahou i tō ’outou fare ’ei vāhi mo’a nō te fa’aro’o ».⁸

E parau taparu te ’enemi ia ’outou ē, ’aita e tītauhia te mā’a vārua, ’aore rā, ma te ha’avarevare, e nehenehe e tīa’i. ’O ’oia te fatu nō te fa’anevaneva ’e te tumu nō te fa’ataerera’a. E tu’u mai ’oia i mua ia ’outou i te mau mea rū ’ia hi’ohia, terā rā, te ti’ara’a mau e ’ere ïa i te mea faufa’a roa. E fa’atupu ’oia i roto ia ’outou i « te pe’ape’a i te mau mea e rave rahi » ’a ha’afaufa’a ’ore ai ’outou « i te hō’ē mea ti’a ».⁹

E māuruuru rahi tō’u i tō’u « nā metua maitata’i »,¹⁰ tei fa’a’amu i tō rāua ’utuāfare i roto i te hō’ē fare fa’a’amura’a mā’a pae vārua tāmau, te mau auta’atira’a here, ’e te mau fa’a’oa’oara’a maita’i. Nā te mau ha’api’ira’a tā rāua i hōro’a mai i roto i tō’u ’āpīra’a i tāpe’a noa iā’u i roto i te hō’ē fāito maita’i. E te mau metua, ’a fa’atupu i te mau auta’atira’a pūai ’e tā ’outou mau tamari’i. Tē hina’aro nei rātou i tō ’outou taime rahi, ’eiaha te iti mai.

Mai te mea e nā reira ’outou, tei reira te ’Ēkālesia nō te pāturu ia ’outou. E nehenehe tō tātou mau ’itera’a i te fare pure e ha’apūai i te fa’a’amura’a pae vārua i te fare. I teie matahiti, ’ua ’ite tātou i teie huru pāturura’a a te ’Ēkālesia i roto i te Ha’api’ira’a Sābati ’e te Paraimere. E hau atu tā tātou e ’ite i roto i te mau putuputura’a a te Autahu’ara’a a Aarona ’e te Feiā ’Āpī Tamāhine. Ma te ha’amata i teie ’āva’e Tēnuare, e taui-ri’i-hia te fa’anahora’a ha’api’ira’a nō teie mau putuputura’a. E tāmau noa te fa’atumura’a i ni’a i te mau parau tumu pāpū nō te ’evanelia, terā rā, e fa’atueahia te reira mau parau tumu i ni’a i te Mai, pe’e mai—nō te ta’ata hō’ē ’e te ’utuāfare. E tauira’a na’ina’i teie, e nehenehe rā te reira e fa’atupu i te hō’ē ’ohipa rahi i ni’a i te fa’a’amura’a pae vārua o te feiā ’āpī.

E aha te tahi atu mau huru pāturura’a tā te ’Ēkālesia e hōro’a ? Tē ’amu nei tātou i te ’ōro’a mo’a i te fare purera’a, ’o te tauturu ho’i ia tātou ’ia ha’amau fa’ahou i tā tātou fafaura’a i te Fa’aora i te hepetoma tāta’itahi. ’E i te fare purera’a tē putuputu nei tātou ’e te tahi atu feiā ti’aturi tei rave ato’a i taua fafaura’a ra. E nehenehe terā mau auta’atira’a maita’i tā tātou e fa’atupu ’e te mau pipi a Iesu Mesia, e riro ’ei turu pūai nō tō tātou ti’ara’a pipi fa’atumuhia i ni’a i te ’utuāfare.

I te 14ra’a o tō’u matahiti, ’ua taui mātou i tō mātou fa’aeara’a. E ’ere paha te reira i te mea fifi nō ’outou, nō’u rā, i taua taime, e mea fifi mau. Te aura’a e hā’atihia vau e te mau ta’ata ’aita vau i mātau. Te aura’a pauroa te feiā ’āpī nō tā’u pāroita e haere ïa rātou i te fare ha’api’ira’a ta’a ’ē i tā’u. I roto i tō’u ferurira’a 14 matahiti, ’ua feruri au, « nō te aha tō’u nā metua i nā ’ō ai iā’u ? » Mai te huru ra ē, ’ua tū’inohia tō’u orara’a.

Terā rā, nā roto i tā mātou mau fa’a’oa’oara’a Feiā ’Āpī Tamāroa, ’ua ti’a iā’u ’ia fa’atupu i te mau autā’atira’a ’e te tahi atu mau melo o tā’u pupu autahu’ara’a, ’e ’ua riro mai rātou ’ei mau hoa nō’u. Ta’a ’ē atu i te reira, ’ua ha’amata te ’episekōpora’a ’e te feiā fa’atere nō te Autahu’ara’a a Aarona i te fa’a’ite i te ’ana’anatae ta’a ’ē i tō’u orara’a. ’Ua haere mai rātou i tā’u mau ’ohipa tū’arora’a. ’Ua pāpa’i mai rātou i te tahi mau rata fa’aitoito ’o tā’u i tāpe’a e tae roa mai i teie mahana. ’Ua tāmau noa rātou i te fārerei mai iā’u i muri a’e i tō’u haerera’a i te ha’api’ira’a tuarua ’e ’a haere ai au i tā’u misiōni. ’Ua haere roa mai hō’ē o rātou i te taura’a manureva i tō’u ho’ira’a mai. E māuruuru tō’u e a muri noa atu nō teie mau taea’e maita’i ’e tō rātou here ’e te mau tīa’ira’a teitei. ’Ua fa’afāriu rātou iā’u i te ra’i, ’e ’ua māramarama te orara’a, e ’ua ’oa’oa.

Nāhea tātou te mau metua ’e te feiā fa’atere ’ia tauturu i te feiā ’āpī ’ia ’ite ē, e ’ere o rātou ana’e ’ia haere rātou nā ni’a i te ’ē’a o te fafaura’a ? Ta’a ’ē atu te fa’atupura’a i te mau auta’atira’a, e ani tātou ia rātou ’ia haere mai i te mau rurura’a rahi ’e te na’ina’i—mai te mau ’āmuira’a ’e te mau pūhapara’a nā te feiā ’āpī ’e tae atu i te mau fa’a’oa’oara’a hepetoma nā te pupu autahu’ara’a ’aore rā nā te piha ha’api’ira’a. ’Eiaha roa atu e ha’afaufa’a ’ore i te pūai o te rurura’a ’e o vetahi o tē tāmata ato’a ra ’ia pūai. E te mau ’episekōpo ’e te tahi atu feiā fa’atere, ’a fa’atumu i ni’a i te fa’a’amura’a i te mau tamari’i ’e i te feiā ’āpī i roto i tā ’outou pāroita. Tē hina’aro nei rātou i tō ’outou taime rahi atu, ’eiaha ’ia iti mai.

E ta’ata fa’atere ’outou, e ta’ata tupu, e melo nō te pupu autahu’ara’a, ’aore rā e melo noa nō te ’Ēkālesia, mai te mea ē, e taime tō ’outou nō te ha’aputapū i te orara’a o te hō’ē taure’are’a, ’a tauturu iāna ’ia tū’ati atu i te ra’i. E riro paha ē, tā ’outou fa’aurura’a o « te pāturura’a ïa i te ’Ēkālesia » tā teie taure’are’a e hina’aro ra.

E te mau taea’e ’e te mau tuahine, tē fa’a’ite pāpū nei au ē, tei te upo’o o teie ’Ēkālesia o Iesu Mesia. Tē fa’auru nei ’oia i tō tātou feiā fa’atere ’e tē arata’i nei ia tātou i te mā’a vārua tā tātou e hina’aro nei nō te ora ’e nō te haere i mua i te mau mahana hope’a nei. E tauturu te reira mā’a vārua ia tātou ’ia ha’apa’o ’eiaha ’ia ha’apa’o ’ore. I te i’oa o Iesu Mesia, ’āmene.