Sruhkwack Sahkseng Lasr
Sruhkwack nuh fowos sifacna sahkseng lowos ac fahsr tukun Mwet Lahngo kalmac in fahsr luhlahlfongi ke inkacnek luhn Leum ac tiac ipeis ke ma koluk luhn facluh.
Nuh suwos tamuhlwel ac tahmtahl, kuht eis mwe luti wolacna sin mwet kol lasr ke lusen lwen luo tari ah. Nga fahkwack nuh suwos lah kuht fin srihke moulkihn mwe luti moklweyuck inge, Leum, ke pahkomuhta Lal, El fah kahsruh kais se sesr sruhkwack sahk soko nahtuhsr ac oruh in muhlahlah ma toasr lasr uh.1
Ke El muhta acn Caesarea Philippi, Mwet Lahngo El ahkkahlwemye nuh sin mwet tuhma lutlut Lal ke ma El fah kweok ke poun mwet elder, prist fuhlact, ac mwet sihm fin acn Jerusalem. El luti nuh selos yohk ke misac Lal ac moulyak wolacna Lal.2 Ke pacl se inge, mwet tuhma lutlut Lal tiac kahlwem na pwacye ke kunohkohn Lal fin facluh. Peter sifacna, ke el lohng ma Mwet Lahngo fahk nuh sel ah, el eisuhlacng ac lainuhl, fahk “God El tia ku in lela in ouingan, Leum! Ma inge tia ku in sikyak nu sum!.”3
In kahsruh mwet tuhma lutlut Lal kahlwem lah oaru nuh ke orekma Lal nein inse pucsisacl ac kweok, Leum El fahk ke kuh:
“Kutena mwet fin lungse wiyu, el enenu in lafwekunul sifacna, srukak sakseng lal ac fahsr tukuk.
“Tuh el su lungse molela moul lal, ac fah tuhlac lukel; a el su moul lal tuhlac lukel keik, el fah konauk moul lal.
“Ac tuh mwe mea nu sin sie mwet el fin eis lal faclu nufon, a moul lal tuhlac? Wangin sripa, mweyen wangin ma el ac ku in sang in sifil molela moul lal.”4
Ke fahkwack se inge, Leum El ahkuhtweyac yohk lah elos suc luhngse fahsr tohkohl elos enenuh lahfwekuhnuhlos sifacna ac karihngihn ma kenayuck lalos, ma luhngseyuck, ac kihsaclah ma nuhkwewa, finne moul uh fin enenweyuck, inse pucsisacl na pwacye nuh ke luhngse luhn Pahpah—oacna El oruh ah.5 Pa inge, na pwacye, luhpan mani in moliyuck ke molwelah luhn nguhna se. Ke srihpac pwacye lal Jisus ac orekmakihn akucl in sahkseng in kahsruh mwet tuhma lutlut Lal kahlwem wo meac mwe kihsac ac oaru uh nuh ke orekma luhn Leum. Sahkseng soko etweyuck yohk sin mwet tuhma lutlut Lal ac mwet suc muhta ke Roman Empire ke srihpsrihpyak in sruokyac sahkseng lalos sifacna kuh in sruokyacna acn in srihpsrihpyak lalos ma e sikyak uh.6
Tukun Moulyak Lal muhkwena tuh nuhnak luhn mwet tuhma lutlut ah ikacklah ac elos kahlwem ke ma nuhkwewa ma sihmuhsyuck Kacl7 ac ma ac fah enenweyuck selos ke pacl sacn fahlac.8
Ke atac se pacna inge, kuht nuhkwewa, tamuhlwel ac tahmtahel, enenuh in ikucslah nuhnak lasr uh ac insiacsr in mwe enenuh se in kahlwem yohk ke srihpac in eis sahkseng lasr ac fasr Tohkohl. Kuht luti ke ma suhmuhslah lah elos suc kena sruhkwack sahkseng lalos sifacna elos luhngse Jisus Kraist ke ohiyac se ma oruh elos in lahfwekuhnuhlos sifacna ke ma koluk nuhkwewa ac ma luhngse luhn facluh nuhkwewa ac elos in liyacacng masap Lal.9
Oaru lasr in sislah ma koluk nuhkwewa in oruh ma luhngse luhn God ac in kihselah ma nuhkwewa siyuckyak sesr ac in ukwe mwe luti Lal ac fah kahsrwe kuht in muhtweng ke inkacnek luhn wosasuc luhn Jisus Kraist—finne ye muhtuhn ma upac uh, mwe muhnahs luhn nguhnasr, kuh nuhnak ac mwe luti luhn facluh ma lain mwe luti Lal.
Sie srihkasrak, nuh selos suc soenna konwacuhk mukul tuhma kuh muhtwacn kiac ke ma pahtpaht ac muhkaimtacl wacngihn finsrak la, kuh nuh selos suc fahsrwelihk ac puhla elos tiacna esamyuck, nga fahk na pwacye nuh suwos lah kowos fin eis suli luhn Mwet Lahngo in suhkwack sahkseng lowos ac fahsr tohkohl kalmacn pa kampare ke luhlahlfongi ke inkacnek luhn Leum, liyacacng patuhn ke ma suwohs, ac in tiac sroeng nuh ke ma koluk luhn facluh ma ac fah eislah luhkacsr finsrak ke luhngse ac pahkomuhta luhn God.
Kain ip yohk inge ma pac nuh suwos suc puhlakihn luhngse luhn mukul ac mukul kuh muhtwacn ac muhtwacn ac kowos puhla muh wacngihn kuiowos. Ac sahp ke kuhtuh srihpac kom puhla tuh wosasuc luhn Jisus Kraist tiac wo nuh sum. Fin ma inge sikyak, nga fahkwack lah pacl nuhkwewa oasr finsrak in God Pahpah ac in placn in engan Lal, in Jisus Kraist ac iwaclah Lal, ac in moulkihn masap in luhngse Lalos. Ke lahlmwetmwet Lal, kuh, nuhnuhnkuh, ac pahkomuhta suwohswohs Lal Leum El kuh ni silikuhti ma Lal, tuh kuh in uskuhtyuck ye muhtahl ac eis moul ma pahtpaht, kuht fin tu na kuh in liyacacng masap uh10 ac pacl nuhkwewa oruh ma wo.11
Nuh suwos suc oreklah ma koluk luhlahp, eis suli sacpacna inge kalmacn pa, wi pac ma sahyac, ahkinsepucsisaclye kowos sifacna ye muhtuhn God, sramsram nuh sin mwet kol ke Alu uh, ac in auliyak ke ma koluk lowos. Ohiyac se inge ac fah oayacpac ahkinsewowoye elos nuhkwewa suc kampare in lain ma koluk ma kalweniyuck, oacna opioids, drugs, nihmnihm, ac liyacn petsac koluk. Oruh ma inge uskomlac nuh yurin Mwet Lahngo, suc El muhkwena kuh in molikomlac liki mwacta, ahsor, ac sruhuh luhn nguhn ac mahno. In wi pac, sahp kom ac fah oacyacpac suk kahsruh luhn sucu, kawuck, ac mwet suhmaht ke ono ah ac mwet sang kahs in kahsruh.
Nuhnak muhnahs met fuhlweack kom fin sifilpac tahfonglac ac sifacna nuhnkuh muh kom tiac kuh in sislah ma koluk lom. Kom tiac kuh in tui ke srihke lom ac fahsr ke moul koluk ac muhnahs se! Pacl nuhkwewa srihke oruh ma wo emet lom, ahkkahlwemyeyuck ke orekma lom kena se in ahknwacsnwacsye monum, oacna lutiyuck sin Mwet Lahngo.12 Kuhtuh pacl uh kahsruh nuh ke kain in ma upac tuhkuh tukun mahlwem ac yac puhkantwen ke oaru uh. Olwelah se sukokyak ke Puk luhn Mormon lah “ke luhng kuhlwacng kuht moliyucklac, tukun ma nuhkwewa ma kuht kuh in oruh,”13 ma nuh sesr ke pacl inge. Nuhnak muhnahs esam lah mwe sang luhn luhng kuhlwacng luhn Mwet Lahngo “tiacna muhkwena ke ‘tukun’ ma nuhkwewa kuht kuh in oruh. Kuht kuh in eis luhng kuhlwacng Lal met liki, inmahsrlon, ac tukun pacl ma kuht sang kuiyacsr.”14
Nga fahkwack lah ke kuht kalweni srihke in kuhtanglah ma upac lasr, God El fah ahkinsewowoye kuht ke mwe sang luhn luhlahlfongi in wolac ac ke orekma luhn usrnguck uh.15 El ac fah oruh kacsr ma kuht tiac kuh in oruh kacsr sifacna.
Oacyacpac, nuh suwos suc puhla ahngyahng, muhlat, ahkkolukyeyuck, kuh ahsor ke ma ma kowos puhla wacngihn srihpac kac, in sruhwack sahkseng soko ac fahsr tukun Mwet Lahngo kalmacn pa in srihke fihliyac nuh sahyac mwe puhla inge ac forlah nuh sin Leum El in kuh in ahkmwesahsye kuht ke nuhnak se ngacn ac kahsrwe kuht sokwack mihs. Tiacna wo, tuh kuht fin sruohkyac puhla koluk inge, sahp kuht ac fah konwacyuckyak sifacna lah wacngihn Nguhn luhn Leum in moul lasr uh. Kuht tiac kuh in auliyak ke mwet sahyac, tuh kuht kuh in nuhnak muhnahs nuh selos—ke kuht sulwaclah in tiac kaclpousi selos suc ahkkolukye kuht.16
Ma suhmuhslah luti lah oasr inkacnek soko liki kain ma upac inge—ke kuht suli Mwet Lahngo El in kahsrwe kuht in aholah insiac kwekwe ke insiac sasuc.17 Ke ma inge in sikyak uh, kuht enenuh in tuhkuh nuh yurin Leum ke mwe muhnahs lasr, inse pucsisacl ye muhtahl19 ac siyuck ke kahsruh ac nuhnak muhnahs Lal,20 yohk ke pacl sacohk muhtahl se ke kuht ipeis ke sackracmacn kais sie Sacnri. Lwelah kuht in suk kahsruh Lal ac lwelah kuht in oruh ip yohk srihpac ac upac se in nuhnak muhnahs nuh selos suc ahkngalye kuht tuh kihnet lasr kuh in muhtwacwacack wolac. Nga olwelah nuh suwos lah ke kowos oruh ma inge, fong lowos ac fah nweklah ke mihslac ma tuhkuh sin nuhnak se ma ma sefanna nuh yurin Leum.
Ke el muhta Kaclpos Liberty ke 1839[sie alfoko tonngoul yuc], mwet pahluh Joseph Smith el suhmuhslah nuh sin membucr ke Alu uh ma nein ma palyeyuck ma arulacna fal nuh ke pacl inge uh. El suhmuhslah, “lah tron ac acn nuhkwewa, mura ac kuh nuhkwewa, ac fah ahkkahlwemyeyuck ac akwucki kaclos nuhkwewa suc oaru kampare ke wosasuc luhn Jisus Kraist.”20 Ohinge, tamuhlwel ac tahmtahel wiyuck, elos suc eis faclos inen Mwet Lahngo, luhlahlfongi ke olwelah Lal ac kampare nuh ke sahflah, ac fah moliyuck21 ac elos kuh in muhta yurin God wacngihn sahflahiyacn engan uh.22
Kuht ohsun pacl sensen in moul lasr ma oruh kuht in ahsor, wacngihn kuh lasr, wacngihn finshrak, ac kuhtuh pacl uh muhnahslac. Kuhtuh sin ma puhla inge sahp ac oruh kuht in siyuck Leum: “Kuh efuh nga tuh puhla kain ohiyac inge ah?” kuh “Efuh enenuh luhk soana ahkfalyeyucklac? Tukun ma nuhkwewa, nga tuh oruh ma nuhkwewa ke kuhiyuck nohfohn in sruhkwack sahkseng luhk ac fahsr tukun Mwet Lahngo!”
Kawuck sacohk luhk, kuht enenuh esam lah sruhkwack sahkseng lasr sifacna nien insepucsisacl ac luhlahlfongi in God ac ke lahlmwetmwet ma pahtpaht Lal. Kuht enenuh akihlen tuh El etuh kacsr ac etuh ma kuht enenuh. Oacyacpac enenuh se tuh kuht in insese nuh ke ma pwacye se lah sahp pacl luhn Leum siena like pacl lasr. Kuhtuh pacl uh kuht suk ke mwe insewowo se ac pacl in oreklac la Leum El in ahkfalye uh. Kuht tiac kuh in luhlahlfongi El muhkwena ke kuht sulaclah pacl lasr El in topuk kena lasr. Ke kuht oruh ohinge, kuht oacna mwet Nephite suhlahllahlfongi ke pacl somlah ah, suc isuhn tamuhlwel ac tahmtahel wiyaclos ke elos fahk muh pacl uh tari in ahkfalyeyuck kahs sruhmuhnyuck sel Samuel mwet Lamanite se, ac oraclah fohs inmahsrlon elos suc luhlahlfongi.23 Kuht enenuh in luhlahlfongi Leum fal tuh kuht in tu na sano ac etuh lah El pa God uh, lah El etuh ma nuhkwewa, ac lah El etwe kuht kais sie.24
Pacl fototo somlah ah nga eis pacl wowo se in kuhlwacnsapuh muhtwacn katinmas se Franca Calamassi, suc oasr mas koluk se lal. Tahmtahel Calamassi el membucr se met ke sucu lal in wi Alu luhn Jisus Kraist fohlohkyuck uh. Finne mukul tuhmwacl soanna paptaislac, el insese in ohsun nuh yurin misineri ac el wi Alu pacl pucs. Ne ohinge, Tahmtahel Calamassi el mwet luhlahlfongi oaru se ac el tahfwelah tuhlihk ahkohsr nahtuhl ke wosasuc luhn Jisus Kraist. Yac se tukun mukul tuhmwacl el misac, Tahmtahel Calamassi us tuhlihk nahtuhl nuh ke tempuhl uh, ac elos wi ke akwuck muhtahl ac siliyucki ke sucu se. Olwelah ke akwuck inge sang nuh sel finsrak ac engan na yohk ma kahsruh el in fahsr ke moul lal ah.
Ke mas lal muhtwacwacack akihlenyuck ah, pisap lal sang nuh sel mwe insewowo se. Ke pacl sacn el fahk nuh sin pisap lal lah el ahkolah in eis luhngse luhn Leum, ahkkahlwemye luhlahlfongi lal in kwelac oacyacpac luhlahlfongi lal in muhtweng mas lal ne ke sahflah uh.
Ke muhtwacta se luhk, ke nga sruok pahol Tahmtahel Calamassi ac ngetlah nuh in muhtahl, nga liye kahlwem luhn lipufacn ke luhmahl—ahkkahlwemyeyuck luhlahlfongi lal in placn luhn God ac finsrak suwohs lal in luhngse ac placn luhn Pahpah kacl.25 Nga puhla oaru fokoko lal in kampare ke luhlahlfongi lal nwe ke sahflah ke el sruhkwack sahkseng lal, finne ke ma upac el ohsun ah. Moul luhn muhtwacn se inge fahkwack luhlahlfongi lal ke Kraist, ac luhngse yohk lal nuh Sel.
Tamuhlwel ac tahmtahel sacohk, nga fahkack nuh suwos lah sruhkwack sahkseng lasr ac fahsr tukun Mwet Lahngo enenuh kuht in ukwe srihkasrak Lal ac srihke in oacna El,26 muhtweng ke pacl luhn moul uh, lahfwekihn ac sruhnga ma luhngse luhn facluh, ac soano Leum. Mwet sihm pohloh kahs suhmuhslah:
“Lulalfongi in Leum God. Lulalfongi, ac tia fuhlweak. Lulalfongi na in Leum God.”27
“El mwe lango ac mwe kasru lasr.”28
Nga fahkwack nuh suwos lah ke kuht ukwe Mwet Luti lasr ac soano El suc mwet ono pwacye se ke moul lasr kuht ac fah eis monglac in nguhnasr ac ahkmuhlahlahye ma toasr lasr ac kahlwem.29 Ke ma inge nga fahkwack ke ine muhtahl luhn Jisus Kraist, amen.