Kuh luhn Puk luhn Mormon in Eklac

Tukun nga riti ripohrt ke fokokoi mahno, nga luti lah nga enenuh in oraclah eklac ke moul luhk. In kahsrweyuc, mwet ono luhk el sang plwacn ke kain mongo ac ahsrosr in oruh, tuh, nga fin sulaclah in ukwe, ac fah oruh nga in eklac nuh ke kuh in mahno wo.

Kuht fin oruh oacna sie in liye ohiyacn nguhn lasr, meac kuht ac etwaclah kacsr? Meac taktuh lasr ke nguhn el ac fahk nuh sesr in eklac? In sun ma kuht enenuh sun, arulacna yohk srihpac in etuh ma kuht enenuh etuh na oruh ma kuht etuh.

Jisus Kraist pa Taktuh Kol.¹ Ke Iwaclah Lal, El ahksuwohsye kihnet lasr, eis ma sesuwohs lasr nuh Sel, ac ahkkweye inse muhna lasr.² Ke kuhlwacng Lal mwe muhnahs lasr kuh in eklac nuh ke ma fokoko.³ El suli kuht in Ukwacl⁴ ke lotwelah Sel, lohng kahs Lal, ac fahsr ke fihlpacp luhn Nguhn Lal.⁵ El olwelah in kahsruh kuht⁶ ke mukwikwi nohfohn luhn moul uh in eklac ohiyacsr, ma eklac kuht ac use engan ma pahtpaht nuh sesr.⁷

Mwet Lahngo El use nuh sesr Puk luhn Mormon in kuhfa fokoko in kahsruh ke eklac lasr. Puk luhn Mormon sang mongo luhn nguhn, sang plwacn se ke mukwikwi, ac tahfwekuhtlac yurin Nguhn Muhtahl. Sihmlac kacsr,⁸ oasr kahs luhn God kac fihsrwacsr⁹ in kahlwem ac fahk nuh sesr ke ohiyacsr, srihpac lasr, ac acn lasr tohk.¹⁰ Ke Pwacpuhl, Puk luhn Mormon fahkwack ke Jisus Kraist¹¹ ac luti fuhkah kuh kuh in etuh ma pwacye ac eklac in oacna El.

Petsac

Tamuhlwel Saw Polo

Tamuhlwel Saw Polo el pa matwac yac 58 ke pacl se met el ohsun nuh ke wosasuc fohlohkihnyuckyak luhn Jisus Kraist. Ke nga ohsun nuh sel, el kuhlwacnsap tari ke prestuhn luhn pracns ke yac puhspuhs, tuhsruhktuh nga konwacack lah el soenna riti Puk luhn Mormon ke srihpen soenna oasr ke kahs Burmese lal. Ke nga siyuck sel fuhkah el etuh puk sa inge pwacye ac el soenna riti, el topuk lah el lutlut ke puk petsac pahngpahng Book of Mormon Stories kais sie lwen ke el ngwetngwet liye petsac an, orekmakihn dictionary se in luhngaslah kahs English, ac suhmuhslah ma nuh kwewa el etwaclah. El ahkuhtweyac, “Pacl nuh kwewa nga lutlut, nga ac pruhe ke ma nga lotwelah, ac nga ac puhla mihslac ac engan, nuhnak luhk oasr kahlwem, ac insiuck puhla fihsrwacsr. Nga puhla ke Nguhn Muhtahl El fahk nuh sihk ma pwacye. Nga etuh Puk luhn Mormon pa kahs luhn God.”

Oacna Tamuhlwel Saw Polo, kais sie sesr kuh in lutlut ke Puk luhn Mormon ke ohiyac kuht kuh. Ke kuht kena in luhlahlfongi ac motko mwe luti luhn puk ke insiacsr, kuht kuh in siyuck sin God ke luhlahlfongi fin mwe luti an pwacye.¹² Kuht fin pwacye ke kena lasr in etuh ac oasr kena pwacye in mukwikwi, El ac fah topuk kuht ke insiacsr nuh sin Nguhn Muhtahl. Ke kuh luhn Nguhn Muhtahl kuht fah etuh ma pwacye nuh kwewa.¹³ Ke kuht eis mwe ahkpwacye wolacna ke Puk luhn Mormon, kuht oacyacpac etuh ke kuh oacna sie lah Jisus Kraist pa Mwet Lahngo luhn facluh, lah Joseph Smith pa mwet pahluh Lal, ac Alu luhn Jisus Kraist luhn Mwet Luhlahlfongi ke Lwen-sahflah pa Alu fohlohkihnyuckyak Lal.¹⁴

Ke nga mukul fuhsr ac muhtwacwacack kuhlwacnsap luhn misin luhk, nga utyak nuh ke oak sohk soko ac som nuh ke acn Australia. Nga puhla in muhkuh, oasrasr, ac suhfal tuhsruhktuh oasr moniyuck in kuhlwacnsap, nga enenuh yohk mokleyuck ke ma nga luhlahlfongi pwacye. Nga pruhe and riti ma suhmuhslah luhk, tuhsruhktuh ke oak sohk kalweni, suhmuhngnguh luhk yohkwelihk ac puhla ke mahno luhk koluklac. Tukun ao ekahsr ke nga muhnahslah kac ma inge, sie flight attendant fahsr nuh sihk in tui sisken siyah luhk. El eis Puk luhn Mormon an nga riti ke pouk. El ngwetwacng nuh ke muhtuhn puk ac fahk, “Pa inge puk wo!” na el fihliyac puk ke pouk ac kalweni fahsr. Wacngihn pacl tok nga sulpac liyacl.

Ke kahsr lal kalweni lohng ke insrwek, nga lohng ac puhla suwohs ke insiuck, “Nga oasr inge, ac nga etuh suc kom an. Oruh ma kom kuh na, mweyen nga ac karihngihn ma nuhkwewa sahyac.” Ke oak sohk soko ingen ye Meoa Pacific, nga eis mwe ahkpwacye sifacna ke nga lutlut Puk luhn Mormon ac mokleyuck luhn Nguhn Muhtahl lah Mwet Lahngo luhk El etuh suc nga uh ac wosasuc pwacye.

Elder David A. Bednar el luti: “In etuh lah wosasuc an pwacye pa ma yohk srihpac emet ke fahkwack luhlahlfongi la. In pwacye nuh ke wosasuc pacl nuh kwewa pa ma yohk ke eklac.”¹⁵ Eklac enenuh kuht in “oruh in kom orekmakihn kahs, ac tiac lohng muhkwena.”¹⁶ Plwacn luhn Leum nuh sesr—wosasuc luhn Kraist—lutiyuck ma wo emet ke Puk luhn Mormon.¹⁷ Ma inge weacng:

• Ma se met, orekmakihnyen luhlahlfongi nuh sin Jisus Kraist ke luhlahlfongi El, karihngihnmasap Lal, ac in etuh El ac fah kahsruh kuht.¹⁸

• Ahkluo, in auliyak lwen nuh kwewa ke mukwikwi suhfal lasr ac puhla engan ac mihslac ke El sang nuhnak muhnahs nuh sesr.¹⁹ Auliyak enenuh kuht in sang nuhnak muhnahs nuh sin mwet sahyac²⁰ac kahsre kuht in fahsr nuh met. Mwet Lahngo El olwelah in sang nuhnak muhnahs nuh sesr kuhtwena pacl kuht auliyak.²¹

• Ahktolu, oraclah ac karihngihn wuhlweacng yurin God nuh ke akwuck oacna pacptais. Ma inge fah karihngihnkuht nuh ke inkacnek wuhlweacng ma kol kuht nuh Sel.²²

• Ahkahkosr, in eis mwe sang luhn Nguhn Muhtahl. Mwe sang inge lwelah kuht in wi pacl nuh kwewa sie suc ahkmuhtahlye, ahkkweye, ac kol kuht.²³

• Ahklimekohsr, muhtweng nuh ke sahflah ke fahsr oaru nuh met mongo lwen nuh kwewa ke kahs luhn Kraist.²⁴ Ke mongo luhlahp ke Puk luhn Mormon ac lohacng kuh nuh ke luti an, kuht kuh in kuhtanglah ac eis mwe kol ac karihngihnyuck ke moul lasr.²⁵

Ke kuht orekmakihnyen mwe luti luhn Kraist lwen nuh kwewa ke moul lasr, kuht ac itucnglah ma sruhnga eklac ac sahngweng ma tulokihnyac mukwikwi. Na kuht ac eis fwackyuck sifacna, mweyen Nguhn Muhtahl “fah ahkkahlwemyeyuck nuh suwos ma nuhkwewa ma kowos enenuh in oruh,”²⁶ ac “fah fahk nuh suwos ma nuhkwewa ma kowos enenuh in oruh.”²⁷

Ke yac 20, Tamuhlwel Huang Juncong el muhnahs ke nihmnihm, sismohk, ac sritacl mani ke oacna sie pacl. Ke pacl se met el lohng ke Jisus Kraist ac wosasuc fohlohkihnyuckyak Lal, Tamuhlwel Huang el kena eklac ke srihpacn sucu fuhsr lal. Ma upac emet lal pa sismohk. El sismohk puhkantwen, el srihke tui pacl puhspuhs met ah ac tiac kuh. Sie lwen, kahs ke puk luhn Mormon inge oan ke nuhnak lal: “ke inse pwacye, kena in etuh na pwacye.”²⁸ Finne pacl met ah el sulpac puhtatlac, el puhla oacna el kuh in eklac ke kahsruh sin Pahpah Lucng ac Jisus Kraist.

Mwet misinacri ke pacl nuhkwewa elos oracni luhlahlfongi lalos yohrohl ac oraclah plwacn se in kuhtanglah, wi pac pruhe yohk ac lutlut kahs luhn God. Ke mukwikwi pwacye ac kena na pwacye, Tamuhlwel Huang el fahsr ke luhlahlfongi oaru ac konwacack lah ke el porongo nuh ke mukwikwi sasuc el kena in oraclah, oacna lutlut ke Puk luhn Mormon, el srihklac porongo nuh ke mukwikwi koluk el ke tui kac.

Ke el acsmakihn ma sikyak yac 15 tari ah, el fahkwack, “Nga tiac esam pacl se nge tui sismohk, tuhsruhktuh ke nga srihke lwen nuh kwewa in oruh ma nga etuh nga enenuh oruh in suli Nguhn luhn Leum nuh ke moul luhk ac kalweni oruh ma ingen, nga tiac kena sismohk ac kalweni nuh ke mihsenge.” Ke orekmakihnyacn mwe luti ke Puk luhn Mormon, moul lal Tamuhlwel Huang eklac yohk, ac el eklac in mukul tuhma ac pahpah wo liki met.

Petsac

Kamla Persand ac sucu lal

Prestuhn Russell M. Nelson el olwelah: “Ke kowos lutlut Puk luhn Mormon ke pruhe lwen nuh kwewa, kowos ac oruh sulaclah wo likina—lwen nuh kwewa. Nga olwelah ke kowos motko ma kowos lutlut, winto luhn inkuhsrao fah ikacslah, ac kowos ac eis topuk nuh ke kihsen siyuck lowos ac kolyuck ke moul sifacna lowos. Nga olwelah ke kowos sifacna oasr lun Puk luhn Mormon lwen nuh kwewa, kowos kuh in tilac wi ma koluk luhn lwen inge, finne ma koluk upac ke petsac koluk ac mwe liyac koluk sahyac.”²⁹

Kawuck sacohk, Puk luhn Mormon pa kahs luhn God, ac kuht fahk ahkfototoyeyucklac nuh Sel kuht fin lutlut ke puk sacn.³⁰ Ke kuht srihke kahs lal, kuht ac eis mwe ahkpwacye se ke ma pwacye kacl.³¹ Ke kuht oaru in moulkihn mwe luti lal,31wacngihnlac kena lasr in oruh kuhtwena ma koluk.³² Insiacsr, luhmahsr, ac ohiyacsr uh fah eklac³³in oacna Mwet Lahngo. Nga fahkwack ke mwe ahkpwacye luhk lah Jisus pa Kraist, Mwet Lahngo, ac Kawuck lasr. Ke inen Jisus Kraist, amen.