Porongel

Tamuhlwel ac tahmtahel sacohk wiyuck, fuhkah wolacnaiyac in kuloh kihn, ke orekmakihnyacn kuhfa se, ke oreklac kuht kuh in ohsun in alu ke lututacng in Sacnri se inge. Fuhkah insewowo kuht puhlakihn in etuh lah wosasuc luhn Jisus Kraist sifilpac fohlohkihnyuckyak fin facluh!

Ke wik ekahsr somlah ah, kuhtuh sesr puhlakihn ma ahkfohsye moul lasr sifacna. Kusrusr, e fihrihr, sronot, mas, ac tukun ma upac sikyak inge e kuhnahoslah fahsr luhn ma inge ac oruh sracl in mongo, kuhfa, ac ma sefiyucki uh.

Ke ma inge kwewa, kuht suli kom ac kuloh kihn lah kom kuh in sulaclah in porongo kahs luhn Leum ke pacl fohs se inge in wi kuht ke toeni luhlahp uh. Yohkwaclihk lohsrlah ma ma upac uh e wi na in oruh kahlwem ke Jisus Kraist in lihksrweni kahlmwelihk. Srihke na nuhnkuh ke ma wo kuht kuh in oruh ke pacl se inge ke facluh nohfohn ahkfohsyeyuckyak. Luhngse lom ac luhlahlfongi ke Mwet Lahngo sahp e eklac nuh sin mwet sahyac in konwacack ke Fohlohkyak ke fohnlah luhn wosasuc luhn Jisus Kraist.

Ke yac luo somlah ah, nga ac Tahmtahel Nelson ohsun sin mwet tausin suwos raunweack facluh nohfohn. Kuht ke fahsrweni tuhkweni ke lihkihnihm mwesahs ac lun rum luhlahp luhn hotel uh. Ke kais sie acn, nga puhlakihn lah nga oasr yurun mwet ma Leum El sulaclah ac lah nga liye orekeni luhn mwet Israel ye muhtuhk.

Kuht muhta ke lwen se ma mwet mahtuh lasr sano rahrahlac.¹ Kuht oasr emet in ahklohye mihsengema mwet pahluh Nephi el liye ke aruhruhma muhkwena, tuh “kuh luhn Lahm nuhtin God” in puhtati “nuh fin mwet wuhlweacng luhn Leum, suc fahsrelihk nuh fin facluh nohfohn; ac elos nuklac ke suwohswohs ac ke kuh luhn God ke wolacna yohk.”²

Kom, tamuhlwel ac tahmtahel wiyuck, wi mukul , muhtwacn, ac tuhlihk ingacn suc Nephi el tuh liye ah. Nuhnkuh kac!

Oacna sie acn ma kom muhta we an kuh lah fuhkah moul lom, Leum Jisus Kraist El Mwet Lahngo lomac mwet pahluh luhn God, Joseph Smith, pa mwet pahluh lom. Sollac el met liki muhtwacwacackiyacn facluh in pa mwet pahluh nuh ke fihl in pacl sahflah, ke wacngihn ma in sruokyac liki ³ke mwet luhlahlfongi uh. Fwackyuck uh fahfahlac in tuhkuh sin Leum me ke orekma luhn Fohlohkyak uh.

Meac kalmac nuh sum lah wosasuc luhn Jisus Kraist fohlohkihnyuckyak nuh fin facluh?

Kalmac pa kom ac sucu lom an kuh in tuhkweni siliyucki ne tok ma pahtpaht! Kalmac pa ke srihpen kom pacptaislac sin sie suc oasr wal la yurun Jisus Kraist ac ahkkweyeyucklac muh mempucr ke Alu Lal, kom kuh in engankihn Nguhn Muhtahl in wi kom pacl nuhkwewa. El fah kol kom ac karihngihn kom. Kalmac pa kom e fah tiac fihliyucklac tiac ahkkweyeyucklac kuh in wacngihn atac in use kuh luhn God in kahsre kom. Kalmac pa kuh luhn pristut kuh in ahkkweye kom ke kom eis akwuck enenweyuck ac oraclah olwelah lom sin God ac karuhnguhnwacng. Ma pwacye inge kuh in oacna mwe kawuck se nuh ke nguhn lasr, yohkiyac na ke pacl ahkfohs inge.

Puk luhn Mormon sruhmuhn ke muhsahyak ac kuhnanuclac luhn muhtuhn facl luo. Ma mahtuh kaclos ahkkahlwemye lah fihsrwacsr nuh sin inkaiyacn mwet uh in muhlkuhnlah God, lahfwekihn ma sensenkihnyuck sin mwet pahluh, ac suk kuh, pwengpweng, ac mwe ahkpwacr luhn ikoac.⁴ Kalweni na, mwet pahluh somlah ah palye “ma yohk srihpac ac wolacna nuh sin mwet uh, ma elos tiac luhlahlfongi.”⁵

Tiac na eklac nuh ke pacl lasr mihsenge. Nuh ke yac inge uh, ma yohk srihpac ac wolacna tuh lohngkihnyuck ke acn kihsaclah fin facluh nohfohn. Tuh ingena inkaiyacn mwet uh tiac eis ma pwacye inge—ke srihpen elos tiac etuh lah oasr yac⁶ kuh elos lohacng nuh selos suc tiac oasr ma pwacye ke fohnlah la kuh lahfwekihn ma pwacye in suk ma luhn facluh.

Setuhn el suhlallwacl. Ke yac tausin el oruh ma wo in luhman koluk ac ma koluk in luhman wo.⁷ Pweng lal oreklac in wohwohn, yensuhka, ac inse fuhlwact.

Tuhsruhktuh, pweng sin Pahpah Tuhmasr Inkuhsrao uh arulacna siena. El sramsram ke fihsrwacsr, mihslac, ac fihsrwacsr oruh kuht in arulacna kahlwem ke ma El fahk.⁸

Srihkasrak se, oacna sie pacl El ahkkahlwemye Wen Se Fanna Nahtuhl nuh mwet moul in mahno fin facluh, El oruh ke kahs suhpuhs. Ke Finohl luhn Eklac nuh sel Peter, James, ac John, God El fahk, “Pa inge Wen Nuhtihk: porongel.”⁹ Kahs Lal nuh sin Mwet Nephi ke acn mahtuh Bountiful pa “Liye Wen Kuloh nuhtihk, suc Nga engan na pwacye se, suc Nga kaksakihn ke Inek—porongel.”¹⁰ Ac nuh sel Joseph Smith, ke kahs wolacna ma ikacslah fihlin pacl se inge, God el fahk, “Pa inge Wen Kuloh Nuhtihk. Porongel!”¹¹

Ingena, tamuhlwel ac tahmtahel sacohk wiyuck, nuhnkuh lah ke srihkasrak pwacye tolu inge, met liki Pahpah El fahkwack ke Wen Nahtuhl, mwet uh sahngweng ac, kuhtuh selos, apkuhran in fuhlweack.

Mwet Tuhma Lutlut ah sahngweng ke elos liyacl Jisus Kraist rauniyucklac ke puhkuhnyeng ke Finohl luhn Eklac.

Mwet Nephi ah sahngweng mweyen elos sun kuhnausyucklac ac lohsrlah ke lwen puhs.

Joseph Smith el oasr ke kuh luhn lohsr met liki inkuhsrao ikacklah.

Pahpah Tuhmasr El etuh lah ke kuht rauniyucklac ke ma tiac etweyuck ac sahngweng, meac e kahsre kuht emet pa in porongo Wen Nahtuhl.

Mweyen ke kuht suk in lohng—lohng in wo—Wen Nahtuhl, kuht e fah kolyuck in etuh lah meac kuht oruh ke kuhtwena ma e sikyak.

Kahs se emet ke Doctrine and Covenants pa porongo.¹² Kalmac pa in lohng ke kena se in ahkos.¹³ In porongo pa in “Porongel”—pa porongolah meac Mwet Lahngo El fahk ac in lohacngnuh ke mwet luti Lal. Ke kahs se inge—“Porongel”—God El use nuh sesr pactuhn in kuhtanglah, engan, ac kaksak ke moul se inge. Kuht in porongo kahs luhn Leum, porongo ma inge, ac lohacng nuh ke ma El fahk nuh sesr!

Ke mwet tuhma lutlut lal Jisus Kraist, kampare lasr in Porongel enenuh se na kuht in oruh. Oruh kuht in nuhnkuh kac ac kwacna srihke in nwacklah moul lasr ke kahs Lal, mwe luti Lal, ac ma pwacye Lal.

Kuht tiac kuh in orekmakihn na etwacack ma kuht konwacack ke social media. Ke kahs pucspucs online ac ke pweng luhn facluh ma wohwohn, suhlalacl luhn Setuhn, kuht kuh in som nuh oyac in Porongel ?

Kuht kuh in som nuh ke ma suhmuhslah. Elos luti kuht ke Jisus Kraist ac wosasuc Lal, yohkiyacn Iwaclah Lal, ac plwacn in engan ac molwelah yohk luhn Pahpah tuhmasr. In luti lwen nuhkwewa ke kahs luhn God yohk srihpac nuh ke moul in nguhn lasr, yohkna ke lwen ahkfohsyeyuck inge. Ke kuht ipeis kahs luhn Kraist lwen nuhkwewa, kahs luhn Kraist e tuhfah tahfweyuck nuh sesr lah fuhkah in top nuh ke ma upac ma kuht tiac pahngon kuht e sun.

Kuht kuh pac in Porongel ke tempuhl. Lohm sin Leum pa lohm in lutlut. Ke tempuhl El luti ke inkacnek Lal sifacna. Ke tempuhl kais sie akwuck luti ke Mwet Lahngo. Ke tempuhl kuh etwaclah in ikaclah mwe lihsrlihsr ah ac sramsram ke kahlwem nuh sin inkuhsrao. Ke tempuhl kuht etwaclah in lahfwekihn Setuhn ac eis kuh luhn pristut luhn Leum in ahkweye kuht ac elos kuht luhngse. Kuht in arulacna engan in suk acn sef we.

Ke ma tulokihnyuck ke COVID-19 eisyucklac, nuhnakmuhnahs pakiyac pacl in alu ac kuhlwacnsap ke tempuhl. Minit nuhkwewa ke pacl lasr e fah ahkinsewowoye kom ac sucu lom an ke inkacnek ma wacngihn ma sahyac kuh. Eis pacl in motko ma kom porongo ac puhla ke kom oasr we uh. Siyuck sin Leum El in luti kom lah e fuhkah ikaclah inkuhsrao in ahkinsewowoye moul lom an ac moul lalos suc kom luhngse ac kuhlwacnsuhpuh.

Ke alu ke tempuhl tiac kuh in sikyak ingena, nga suli kowos in sang pacl yohk ke sramsram mahtuh luhn sucu, weacng sukyacn sramsram mahtuh luhn sucu ac ine an. Nga olwelah nuh sum lah ke kom sang pacl yohk nuh ke tempuhl ac orekma ke sramsram mahtuh luhn sucu, kom ac ahkyohkye ac ahkwoye kuh lom in porongel.

Kuht oacyacpac Porongel in ahkwoye kuh lasr in akihlen mahmah luhn Nguhn Muhtahl. Pacl inge pa yohk srihpac emet in etuh lah Nguhn uh sramsram fuhkah nuh sum. Ke Sifac ke God uh, Nguhn Muhtahl pa mwet in utuck pweng. El ac fah usot nuhnak nuh in mwe nuhnak lom an suc Pahpah ac Wen Nahtuhl ke kom in eis. El pa Mwet in Ahkmihs uh. El ac fah usot puhla in mihslac nuh insiom. El fahkwack ke ma pwacye ac ahkkweyeye lah meac ma pwacye ke kom lohng ac riti kahs luhn Leum.

Nga ahksasucye mwe siyuck nuh sum in oruh kuhtwena ma e usot pacl lom in ahkyohkye in eis ip luhn nguhn ke fwackyuck.

Oruh ma inge e kahsrekom in etuh lah kom e fahsr nuh met fuhkah ke moul lom an, meac e orek ke pacl se inge in sifacna eklac, ac in akihlen fuhkah ac kahingkihn mwe sruhf ac kikiacp luhn Setuhn.

Ac, ahksahfye, kuht Porongel ke kuht lohacng nuh ke kahs luhn mwet pahluh, mwet liyactwen, ac mwet eis fwackyuck. Pacl nuhkwewa Mwet Sap ma ahkkweyeyucklac luhn Jisus Kraist fahkwack Kacl. Elos srihsrngiyac inkacnek kuht fahsr kac ke fuhfahsryucsr upac ac fohs luhn moul suhkawihl lasr uh.

Meac e sikyak ke kom lohng, porongo, ac sensenkihn in ahklohye lah meac Mwet Lahngo El fahk ac meac El fahk ingena sin mwet pahluh Lal? Nga olwelah nuh sum lah kom e fah insewowo ke kuh ma e orekmakihnyuck ke mwe sruhf, ma upac, ac muhnahs. Nga olwelah lah usrnguck ke macruht lom an, kuhpahsr ke sucu lom an, ac orekma ke pacl nuhkwewa. Ac nga olwelah lah kuh lom in puhlakihn engan ac yohkwaclihk finne ma ahkkoluk yohkwaclihk ke moul lom an.

Toeni luhlahp ke Eprel 2020 pa pacl lasr in akihlen sie pacl ma ekuhllah facluh. Ke kuht sano anniversary ahk 200 ke Aruhruhma Se Met lal Joseph Smith, Prestuhnsi Se Met ac Council luhn Mwet Sap Singucul Luo elos motko lah meac kuhtac oruh in acsmakihnye pacl yohk se inge.

Sikyak luhn God nuh sin mwet uh ahkfahsrye Fohlohkyak ke fohnlah luhn wosasuc luhn Jisus Kraist ac pwacnma fihlin pacl ke fohnlah luhn pacl uh.

Kuht motko fin sie mwe acsmak ah in muhsahiyuckyak. Tuhsruhk ke kuht nuhnkuh ke ma sikyak yohk ke sramsram mahtuh ac ma mokleyuckyak facluh ke Aruhruhma Se Met, kuht puhlakihn wo in oraclah sie mwe acsmakihn tiac ke granite kuh yot tuhsruhk ke kahs—kahs in fahkwack ohi ac muhtahl—sihmlac, in tiac taflweyucklac ke “ipin yot” tuhsruhk in sihmlac ke “monun” insiacsr.¹⁴

Ke Alu uh tuh akwucki ah, mwe fahkwack limekohsr iyacna tuh utuckuh, ac ma sahflah sac pa “Sucu: Sie Mwe Fahkwack nuh Fin Facluh,” utuckuh sel Prestuhn Gordon B. Hinckley ke 1995.

Inge ke kuht motko pacl yohk se inge ke sramsram mahtuh luhn facluh ac kai luhn Leum in oracni nuh sie Israel fahsrelihk in ahkolah nuh ke Tuhkuh Ahkluo luhn Jisus Kraist, kuht, Prestuhnsi Se Met ac Council luhn Mwet Sap Singucul Luo, usot mwe fahkwack se inge. Sifac an pa “The Restoration of the Fulness of the Gospel of Jesus Christ: A Bicentennial Proclamation to the World.” Prestuhnsi Se Met Ac Council luhn Mwet Sap Singucul Luo ke Alu luhn Jisus Kraist luhn Mwet Luhlahlfongi ke Lwen-sahflah. Oreklac ke Eprel 2020. In ahkolah nuh misenge, nga suhmuhslah na met mwe fwahkwack se inge ke Insack Muhtahl, yac Joseph Smith el tuh liyacack emet Pahpah ac Wen.

Kuht sulkackihn ke ohi lah God El luhngse tuhlihk Nahtuhl ke muhtuhnfacl nuhkwewa fin facluh. God suc Pahpah El use isuslac muhtahl, moul yohk wacngihn ma oacna, ac kihsac in iwaclah ma wacngihn sahflahiyac luhn Wen Kuloh Nahtuhl, Jisus Kraist. Ke kuh luhn Pahpah, Jisus El sifilpac moulyak ac kuhtanglah misac. El pa Mwet Lahngo lasr, Mwet in Ahkkweyelah lasr, ac Mwet in Molwelah lasr.

Yac lofko somlah ah, ke lututacng kahto se ke spring 1820, Joseph Smith fuhsr, el suk lah piyac kac alu elac welah uh, el som nuh ke acn sahk ah in pruhe sisken lohm sel ah lucng ah New York, USA. El kihsensiyuck ke molwelah luhn nguhnal ac luhlahlfongi lah God El ac kohluhl.

Ke mongfihsrwacsr, kuht fahkwack lah ke topuk pruhe lal, God suc Pahpah ac Wen Nahtuh, Jisus Kraist, Elos sikyang nuh sel Joseph ac ahkfahsryeack “fohlohkihnyuckyak luhn ma nuhkwewa” oacna ke tuh sruhmuhnyuck ke Bible ah. Ke aruhruhma se inge, el lotwelah lah tukun misac luhn Mwet Sap Singucul Luo emet ah, Alu ke Wuhlweacng Sasuc luhn Kraist tuhlac liki facluh. Joseph el mukwikwi ke fohlohkyak la uh.

Kuht ahkkweye lah ye kohkoh luhn Pahpah ac Wen, mwet in utuck pweng inkuhsrao me elos lotwel Joseph ac sifilpac akiyac Alu luhn Jisus Kraist. John Baptist suc sifilpac moulyak el fohlohkohnwack wal in pacptaislac ke tili otyak nuh ke iyucklac luhn ma koluk. Tolu sin Mwet Sap singucul luo emet ah—Peter, James, ac John—elos fohlohkohnwack un mwet sap ac ki ke wal luhn pristut. Mwet sahyac tuhkuh pac, weluhlwacng Elijah, suc fohlohkohnwack wal in siliyac sucu uh ne tok ma pahtpaht ke kuhpahsr in sucu ma pahtpaht ma ahluhkwelah misac.

Kuht tahfwelah in ahklohye lah tuh ituckyang nuh sel Joseph Smith mwe sang ac kuh luhn God in luhngaslah ma sihmlac ke pacl mahtuh omeet ah—Puk luhn Mormon: Siepac Wuhlweacng ke Jisus Kraist. Sra puk ke ma sihmlac muhtahl se inge weacng sie sramsram ke orekma luhn Jisus Kraist inmahsrlon mwet ke Lacfahl Rohtoh tiac paht tukun Sifilpac Moulyak Lal. Ma inge luti srihpac luhn moul uh ac ahkuhtweyac mwe luti luhn Kraist, suc yohk srihpac nuh ke srihpac sacn. Oacna sie mwe weacng ma suhmuhslah nuh ke Bible, Puk luhn Mormon fahkwack lah mwet nuhkwewa pa wen ac acn nuhtin Pahpah luhngkuhlwacng Inkuhsrao, lah oasr plwacn muhtahl Lal nuh ke moul lasr uh, ac lah Wen Nahtuh, Jisus Kraist, El sramsram misenge oacna ke pacl mahtuh omeet ah.

“Kuht fahkwack lah Alu luhn Jisus Kraist luhn Mwet Luhlahlfongi ke Lwen-sahflah, akwucki ke Eprel 6, 1830, pa Alu ke Wuhlweacng Sasuc luhn Kraist ma fohlohkihnyuckyak. Alu se inge kawucki ke moul suwohswohs ke pwelucng la an, Jisus Kraist, ac Iwaclah ma pahtpaht ac Sifilpac Moulyak Lal. Jisus Kraist El sifilpac pahngon Mwet Sap ac sang nuh selos wal luhn pristut. El suli kuht nohfohn in tuhkuh nuh Yohrohl ac Alu Lal, in eis Nguhn Muhtahl, akwuck luhn molwelah, ac in eis kaksak muhtweng.

“Lusen yac lofko somlah e ke Fohlohkyak se inge ahkfahsryeyuck sin God suc Pahpah ac Wen Kuloh Nahtuhl, Jisus Kraist. Million mwet fin facluh tuh sruokyac etwacack luhn pacl ma palyeiyuck inge.

“Kuht engan in fahkwack lah Fohlohkyak uliyuck uh ahkwot nuh met ke fahfahlac na luhn fwackyuck. Facluh ac fah tiac sifilpac oacna met ah, oacna ke God El ac “oracni nuh sie ma nuhkwewa in Kraist.”

“Ke suhnak ac kuloh, kuht suc Mwet Sap Lal suli mwet nuhkwewa in etuh—oacna ke kuht etuh—lah inkuhsrao ikacklah. Kuht ahkpwacyeye lah God El ahkkahlwemye kena Lal nuh sin wen ac acn kuloh Nahtuhl. Kuht fahkwack lah elos suc pruhe ac lutlut ke pweng luhn Fohlohkihnyuckyak ac orekma ke luhlahlfongi ac fah ahkinsewowoyeyuck in eis mwe loh lalos sifacna ke muhtahliyac ac srihpac in ahkolah facluh nuh ke olwelah luhn Tuhkuh Ahkluo luhn Leum ac Mwet Lahngo lasr, Jisus Kraist.”¹⁵

Tamuhlwel ac tahmtahel sacohk, pa ingacn mwe fahkwack tukun yac lofko nuh fin facluh ke Fohlohkyak luhn wosasuc luhn Jisus Kraist ke fohnlah la. Ma se inge lwenglac nuh ke kain in kahs 12. Kahs sahyac an ac sa na tuhkuh tok. Ac sa na oasr ke website luhn Alu uh, ma kom kuh in eis sie kapi ah. Muhkwena lutlutkihn ac wi sucu ac kawuck lom an lutlutkihn. Motko ma pwacye ac nuhnkuh ke mokleyuck luhn ma pwacye ingacn ac oruh ke moul lom an kom fin lohng ma ingacn, porongo ma ingacn, ac lohacng nuh ke masap ac wuhlweacng ma weacng ma ingacn.

Nga etuh lah Joseph Smith el ahkkweyeyucklac na met liki facluh in mwet pahluh suc Leum El sulaclah in ikucslah fihl in pacl sahflah se inge. Alu luhn Leum fohlohkihnyuckyak kacl nuh fin facluh. Joseph el siliyac kahs in luhlahlfongi lal ke srah lal. Fuhkah luhngse luhk nuh sel ac ahkfuhlwactyacl!

God El moul! Jisus pa Kraist! Alu Lal sifilpac fohlohkihnyuckyak! El ac Pahpah Tuhmal, Pahpah tuhmasr Inkuhsrao, liyekuhtyang. Nga fahkwack luhlahlfongi ke ine muhtahl luhn Jisus Kraist, amen.