Kokohp Wiawiher
Audepen kokohp kan me sang Kopwurupwurdohn rongamwahu unsek en Sises Krais me tohto.
Riei ohl oh lih oko, I ahniki wahu en iang wia ai padahk ni rahn en kapokon lap kesempwal wet oh iang kataman en Joseph Smith Keieu en Kaudiahl en Koht Sahm oh Sapwellime Iehros, Sises Krais, me iei, ni sohte peikasal, nan Mwutin Tuhke Sarawi. Kaudiahl wet me wia tepin Kopwurupwurdohn rongamwahuo oh soang kan koaros me dierekda, sang nan Pwuhk en Mormon me kapwurehdo mweimwei oh kih kan en prihsduhd, koasonepen Sapwellimen Kauno Mwomwohdiso mehlel, tehnpas sarawi kan en Koht, oh soukohp oh wahn poaren kan me kaunda doadoahk wet nan rahn pwukat.
Sang ni dahme sansal, soukohp en mahs akan en Koht, ni ansou me kin mwekida sang ni Ngehn Sarawi, kohpadahr Kopwurupwurdohu oh dahme pahn pwarada ni atail ansou, ni keimwseklahn ansou oh pweidahn ansou kan. Tepidahn doadoahko “saihrada palingehn akan” en tepin ohl sarawih kan en ansouo.1 Sang ni dih kan en ansou, irail soukohp en mahs akan ketin koasoiadahr, ouramankiher, kilangehr, kohpadahr Sapwellimen Koht wehi pohn sampah, dahme Aiseia ketin ketihtihki “mwekid kopwuriamwei kan.”2
Kokohp kan me pweidahr sang ni Kopwurupwurdohn rongamwahu unsek en Sises Krais, me iangahki Mwomwohdiso en Sises Krais en Souleng en Imwin-rahn Akan. Rahnwet, I pahn sairahdahte ekei sang me I kin pereniki. Mepwukat me I kaskuhlki sang ai sounpadahk kan en Primary oh sang ni kaskuhl en ai nohno.
Daniel, me kawuhdi mwekid en laiohn kan sang ni ah pwoson Kaun Sises Krais oh irail tohnleng kan en Koht, pil wia emen me iang kilang kaudiahl en atail rahn rahnwet. Ni kawehwehpen ouraman en Nanmwarki Nepukadnesar, Daniel kohpadahr Sapwellimen Koht Mwomwohdiso me pahn sansalada ni imwin rahn akan me duwehte kisin takai tikitik “pwupwisang ni dohl ehu ni eh sohte me doahke.”3 “Ni sohte me doahke,” ni kaweweh sang dahme sansal, Sapwellimen Kauno Mwomwohdiso pahn tohtohla ni wen we ehu lel ansou me e pahn kapilidi sampah pwon “sohte pahn kak lohdi ahpw pahn mihmi kokohlahte.”4
Met me wia kadedeh laud ehu me sapwellimen Daniel mahsen kan pweidahr ni toweh kan en Mwomwohdiso, sang wasa koaros nin sampah, me kilikilang oh rongorong pokon lap wet rahnwet.
Wahnpoaren Paul ketin kawewehda duwen “ahnsou me soang koaros pahn weliakapwala sang ni tepin sampah.”5 Wahnpoaren Paul intingihdi me ni ansou me soahng koaros pahn pweida, Koht pahn ketin “ketkipene … soahng koaros ehute rehn Krais,”6 “me peihn Krais me wia takai en pwukekeimw.”7 I kehn wen kehlail en kokohp pwuko ni ansou me I iang patehng kasarawihn Tehnpas Sarawi nan Rome Italy. Soukohp akan oh wahnpoaren akan koaros iang ket mwo wihwia arail kadehde duwen Sises Krais, Soundor en sampah, duwehte dahme Pihter oh Paul wia. Mwomwohdiso wet me wia karasaras me sansal ansou wet ong ni kopwurupwurdohu, soulengko, oh sapwellimatail toweh kan me wia soun kadedehn kokohp kesempwal pwuko nan rahn kei samwalahr.
Sohsep nan Isip kohpada me nan imwin rahn akan: “Kauno ei Koht pahn ketin kasapwilada ohl sarawi men, me pahn ketin wia ohl sarawi kesempwal men ong kadaudokei kan.”8 “Pwehki e pahn wia [sapwellimen Kauno] doadoahk.”9 Sohsep Smith me wia Soukohp en Kopwurupwurdohu, me wia ohl sarawio.
Sohn soun Kaudiahl kohpadahr tohnleng men en Wasa Lapalahpieh ketkipenehr ire kesempwal kan en Kopwurupwurdohu ni lepin mahsen pwuka: “I ahpw pil kilangada pil emen tohnleng me pipihr nanwerengen nanleng, me weuwa rongamwahu poatopoat ehu me e pahn lohkihong tohn sampah kan, oh ong wehi koaros, oh kadaudok koaros, oh lokaia koaros, oh aramas koaros.”10 Moroni me wia tohnlengo. E kilangehr atail wehi nin duwen me intingdier nan Pwuhk en Mormon. Ni eh kin ketin kapwkapwurehieng, e ketin kaunopadahr Joseph Smith ong sapwellime doadoahk sarawi, iei me iangahki kawewehdihen Pwuhk en Mormon: Iei Ehu Kadedehpen Sises Krais.
Ekei soukohp akan pil koasoiadahr duwen atail wehi. Malakai pil koasoiahier duwen Elaisa ah kapwurepene “sahm akan oh nahi kan.”11 Elaisa ketin sapahldohr, oh sang ni pweida me sansalehr, rahnwet kitail ahnikiher tehnpas sarawi 168 me kohpesengehr nan sampah. Ehu ehu tehnpas sarawi audawudki toweh kan me warohng en wia inou sarawih kan oh ale kapai sarawi en tiahk sarawi kan ni arail kin weliandi pein irail oh arail peneinei kan me melahr. Ni kaweweh sang Malakai duwen doadoahk sarawi wet iei me wia “poason ong pilahn en Soun Kepikipiko ohng ni kekeirda soutuk en Sapwellime serih kan.”12
Kitail mihmiher nan ahnsou me kokohpdahro; iei kitail me wia aramas me wihwiahier doadoahk ong ni Ketdo Keriau en Sises Krais; kitail en kapokonepene Sapwellimen Koht serih kan, irail kan me pahn rong oh kapaia me mehlelo, inou sarawi kan, oh inou kan en rongamwahu poatoapoato. Preseden Nelson kahdaniki “iei kadarpehpeme keieu laud me keieuelehda oh me keieudoadoahk laud pohn sampah rahnwet.”13 San ni manamano me I kadehdehki.
Sang ni kapwukoah sang Preseden Russell M. Nelson,, nan sounpwung en Pepwueri en pahr wet, I kasarawiala Tehnpas Sarawi en Durban South Aftrica. E wia rahn ehu me I sohte pahn manokehla nan ai mour. I pato rehn irail toweh kan me kodohr rehn rongamwahuo nin duwen me Seremaia kohpadahr keilahn aio-- “kahnihmw ehu, oh peneinei riau.”14 Padahk sarawi en Sises Krais kapokonei kitailpene--nan sampah pwon--ni atail wia Sapwellimen Koht pwutak oh serepein kan, ni atail wia perien kei nan rongamwahu wet. Ni sohte lipilipil mwomwen mwomwetail de mwomwen atail likou, kitail wia ehute rehn Samatail Nanleng me sapwellime pilahn sangete ni tapio oh iei ong Sapwellime peneinei en pwurehng tuhpene sang ni wiahda oh kolokol inou sarawi kan en tehnpas sarawi
Kapokon tikitik ehu irail me kolokol prihsduhd nan imwen skuhl nan Kirtland, Ohio, nan parh [kid welipwiki silihsek pahiou] 1834, Soukohp Joseph ahpw kohpada, “Kumwail kilang prihstuhd malaulaukei pwohnget, ahpw Mwomwohdiso wet pahn audehla paliepeng oh palieir en Amerika— e pahn audehla sampa pwon.”15
Ni pahr kei samwalahrko I seilokseli oh tuhwong toweh kan en Mwomwohdiso. Riei Ohl akan nan Pwihn en Ehk-riemeno pil ahniki songen pwukoah pwukat. Ahpw, ihs me pahn kakehng koasondi en kempoakepahtail soukohp, Preseden Nelson, me sapwellime seilok en keieu en pahr riau ni ah ketin wia Preseden en Mwomwohdiso tuhwehngedier Souleng kan nan wehi 32 oh kisehn kahndeke kapatapat en U.S.”16 pwehn kadehdeh me Krais ieias.
I taman ansou me I alehdi malipilip en wia ai misin ansou me I wia pwutak pwulopwul. I udahn men wia ai misin Germany, duwehte ai papah, riei pwutak, oh ai mwah. Sohte kak awih emen en leledo nihmwo, I mwadangete kohla ni nait kakon en ale kisin likouo oh kadingada kisin likou en ai misino. I wadekada me I pahn kohla wia ai misin Eastern States Misin, me wia ohpis laud nan New York City. I insensuedla eri ngei pidolongala oh kihpeseng nei pwuhk sarawi pwe ien ahniki insenamwahu. I tapiada wadek nan Doctrine and Covanents me Kauno ketin kolokol diren aramas washau oh nan wehio pwon oh me wenihmw ehu pahn ritidahng wehio pwon ni palimesehn sahpwo.”17 Kokohp wet me Joseph Smith ketin alehdi nan pahr [kid welipwiki silihsek siluh] 1833, wia kaudiahl ehu ong ie. I esehier me iei ih wasa me I patohwan malipilipehng ie me Kauno ketin kupwurki ien papah ie. I padahkiher duwen Kopwurupwurdohu oh tepin ahnsou me Sahm Nanleng mahsenieng Joseph Smith oh mahsanih, “Iet Nei Pwutak Kesempwal. Rong Ih!”18
Me keieiu kesempwal ong Mwomwohdisoht iei kokohp en Aiseia, sounpar [isipwiki] 700 samwa mwohn ipwidihn Sise Krais: “Oh ni rahn ekei me pahn kohdo, me ni nahnahn sapwellimen Kauno tehnpas pahn ketin kokouda ie pohn dohl akan me keieu ileile, oh wehi koaros pahn idawehndo.”19
Nan ai madamadau rahnwet, I kilang miliohn en iengetail souleng kan oh kempoakepahtail kan me iang patehng kemwekid en rahnwet sang ni kasdo, inderned, de soahng teikan. Kitail mwohdala duwehte kitail mihmihpene “pohn dohl ileileh kan.”20 Brigham Young me wia mahsen pwukat me ketihtihki “Iei ih wasa pwungo met.”21 Souleng kau, ekei irail wia ai kadaudek en paionihr me koadoahkehda kawada Saion ni Dohl Lap akan de Rocky Mountains “sang ni ineng oh peren en ih me kin ketin katanga wehi kan en sampah.”22
I kesihnenda rahnwet pohn pwehl sarawi me kin wahdo miliohn en aramas. Nan pahr [riekid riau] 2002, ansou en Winder, Salt Lake City apwalih Mwadong en Olimpik kan. Pwihn en Koul en Dapernakel me koul ni ritidahn kasarawihn rahno, oh Mwomwohdiso wia kemweiht en keseng kan oh pirokram kan ong lukodoh kan oh irail kan me iang towehda sang wehi tohto. I pahn kin kalapw taman kilang tehnpas sarawio wasahu ni pwohng me nuhs wie peipeiwehng sampah pwon.
Pahr ngeder kei, preseden kan en Amerka, nanmwarkih kan, sounkopwung kan, minisder kan, ampasedohr kan, oh kaun en ohpis kan kodohr nan Salt Lake Cty oh tuhwongehr atail kaun kan. Preseden Nelson apwaliher kaun akan en National Association de Pwihn en Wehi ong ni Advancement of Colored People me wia pwihn ehu nan Amerka me ahniki ngoang ong pwung pahrek ni sohte liaktoahroahrki wasa emen kohsang ie. I taman ei kin ehu ohng kempoakepahi kan oh koun kan ni ansou me Presiden Nelson iang patehng irahil pehki luhk ehu pwehn kasalehda wahu oh minimin pene pohn sampah.23
Me tohtohieh kodohr ni Temple Square oh tuhwengehr kaun akan en Mwomwohdiso ong ni kaweid. Ni karasepe, pahr wet me douwehr powe, ien kasalehdahte ekei, se kasamwoh United Nations [ke wenapak waluh] 68th Civil Society Conference, pokon lap ehu, oh me wia keieu en me wiawi likin New York City. Se pil tuhwongehr Komidi en Epwelpen palien Sarawi de Mwomwohdso en Vietnam, ampasedohr sang Cuba, Pilipihn, Argentina, Romania, Sudan, Qatar, oh Saudi Arabia. Se pil kasamwohdo sekteri lap en Muslim World League.
Dahm I wie kaukauwehweh iei kokohp en Aiseia me pweidahr me ni imwin rahn akan, wehi kan pahn idawehndo “dohl en Sapwellimen Kauno tehnpas.”24 Tehnpas Sarawi kaselel en Salt Lake kesihnenehr nan werengen wasa lapalap oh sarawi.
Kaidehn mwomwen wasahu ah wiawihda me kihdo aramas, ahpw wasa me e mih ie me inenen kaselel; iei me wia kesempwalpen sarawi mwakelekel me sansal ni ngehn, keirda, udahn mwahu, oh lelepek en Mwomwohdiso en Sises Krais en Soulen en Imwin-rahn akan oh sapwellime aramas; atail limpoak nin duwen Koht ah kin limpoak oh atail ngoang ong kahrepe laud, iei dahme Joseph Smith kahdaniki, “iei kahrepen Krais.”25
Kitail sehse iahd me Sounkomouro pahn sapahldo, ahpw met me kitail ese. Kitail anahne kaunopada ni mongiong oh madamadau, warohng en alehda Ih, oh wauniki atail iang patehng soahng koaros me kohpadahr mahso.
I kadehdehki me Preseden Russell M. Nelson me wia Sapwellimen Kauno soukohp pohn sampaht, oh me iangih iei irail Wahnpoaren kan me malipilipda sang Koht, utuhtda ong soukohp akan, ohl sarawi kan, oh soun ale kaudiahl akan. Oh, riei ohl oh lih oko, Kopwurupwurdohu wie pepouseweite.
I pahn keimwsengkihla kokohp en Joseph Smith, mahsen akan me I kadehdehki me e mehlel: “Sohte aramas men me sohte warohng pahn kak kauhdi keirdahn doadoahk; kailok pahn kak wiawi, pwihn suwed kan pahn ehupene, sounpei kan pahn kohpene, lahlawe pahn wiawi, ahpw me mehlel en Koht pahn kohwei ni eimah, ni wahu, oh uhtohr, lau e pahn lel nan sahpw laud koaros, pwarek wasa koaros, pidelong nan wehi koaros, oh kalohkehng aramas koaros, lau doadoahk en Koht pahn pweida, oh Siowa Wasa lapalapie pahn mahsanih doadoahko imwseklahr.”26 I kadehdehki me kokohp pwukat en Joseph Smith pweidahr.
I inouki me ni ansou me kumwail pahn idawehn kaweid en kamarain en kempoakepahtail soukohp, Preseden Russell M. Nelson, nah sounsawas kan, Wahnpoaren kan, oh ekei kaun akan en Mwomwohdiso, oh ni amwail pahn rong mwahu soukohp akan en mahsoko me kosoiadahr duwen atail mwehi, kumwail pahn direkihla, nan amwail mohngiong oh ngenimwail, sang ni ngehno oh doadoahk en Kopwurupwurdohu. I inouki me kumwail pahn kilang sihlangin Koht nan amwail mour, rong Sapwellime ngihl tikitik kan, oh pehm Sapwellime limpoak. Ni mwaren Sises Krais, ki kaping kalahngan ong Kopwurupwurdo en Sapwellime rongamwahu oh Sapwellime Mwomwohdiso, sang ni kasalepen Sapwellime limpoak me sohte mehkot duwehte, ahmen.