Ol Storian we I Nid blong Gat

?Yu bin tingting finis se from wanem yumi singaotem Praemeri i “Praemeri”? Nem ia i tokbaot we ol pikinini oli lanem samting long ol fas yia blong olgeta, be long mi, hem i mekem mi tingbaot wan trutok we i gat paoa. Long Papa blong yumi long Heven, ol pikinini oli neva kam seken— oltaem oli kam “faswan.”¹

Hem i trastem yumi blong yumi tekem olgeta oli impoten, yumi respektem mo protektem olgeta olsem ol pikinini blong God. Hemia i minim se yumi neva mekem nogud olgeta long bodi, long toktok, o long filing blong olgeta long eni wei, iven taem we ol samting oli fasfas mo tingting i go antap evriwan. Be, yumi mas tekem ol pikinini oli impoten mo mekem evri samting blong yumi faet agensem ol ivel blong abius. Blong yumi kea long olgeta, i mas kam faswan long yumi—semmak olsem Hem i mekem.²

Wan yang mama mo papa oli sidaon long kijin tebol blong tufala, mo luklukbak long dei blong tufala. Nao tufala i harem wan slo saon blong wan samting i foldaon. Mama i askem: “?Wanem ia?”

Nao tufala i harem wan sofsof krae we i kam long bedrum blong boe blong tufala we i gat fo yia. Tufala i spid i go. Hem i stap ia, i ledaon long floa, long saed blong bed blong hem. Mama i karem smol boe mo askem hem wanem i bin hapen.

Hem i se: “mi foldaon long bed.”

Mama i talem: “?from wanem yu foldaon long bed?”

Hem i saksakem solda blong hem mo talem: “Mi no save. Ating mi no go insaed inaf.”

Hem i abaot “blong go insaed inaf” we mi wantem blong tokbaot long yufala tedei. Hem i spesel janis mo responsabiliti blong yumi blong helpem ol pikinini blong “go insaed inaf” long gospel blong Jisas Kraes. Mo yumi neva eli tumas blong stat.

I gat wan spesel taem ia nomo, long laef blong ol pikinini, we oli gat proteksen long paoa blong Setan. Hem i wan taem we oli no gat rong mo oli no gat sin.³ Hem i wan tabu taem blong papa, mama mo pikinini. Oli mas tijim ol pikinini, tru long toktok mo eksampol, bifo mo afta we oli “kasem yia we [oli] save ansa from aksen blong [olgeta] long fored blong God.”⁴

Presiden Henry B. Eyring i tijim: “Yumi gat janis we i moa bigwan wetem ol yangwan. Gudfala taem blong tij hem i taem yu stat eli, long taem we ol temtesen blong ol enemi blong ol pikinini long wol i no save spolem olgeta yet, mo bifo i save kam moa had long olgeta blong harem ol toktok blong trutok long medel blong ol hadtaem we oli fesem wanwan.”⁵ Kaen tijing ia bae i helpem olgeta blong oli luksave tabu aedentiti blong olgeta, stamba tingting blong olgeta, mo ol rij blesing we i stap wet long olgeta taem oli stap mekem ol tabu kavenan mo kasem ol odinens folem kavenan rod ia.

Yumi no save wet se bae jenis i jes hapen nomo olsem wetem ol pikinini blong yumi. Wok blong gat jenis wanwan taem, i no wan prinsipol blong gospel blong Jisas Kraes. Blong kam olsem Sevya blong yumi, bae i no hapen wanwan taem nomo. Taem yu gat tingting blong givim lav, tij, mo testifae, i save helpem ol pikinini blong stat, taem oli yang, blong filim paoa blong Tabu Spirit. I nid blong gat Tabu Spirit long testemoni blong ol pikinini blong yumi, mo long fasin we bae oli jenisim laef i kam long Jisas Kraes; yumi wantem olgeta blong “oltaem tingbaot hem, blong oli save gat Spirit blong hem i stap wetem olgeta.”⁶

Tingting hamas i impoten blong gat ol famli storian abaot gospel blong Jisas Kraes, ol storian we i nid blong gat, we i save stap olsem wan gudfala tul blong invaetem Spirit. Taem yumi gat ol kaen storian olsem wetem ol pikinini blong yumi, yumi helpem olgeta blong krietem wan fandesen, “i wan sua fandesen, wan fandesen we sapos ol man oli bildimap olgeta antap long hem, oli no save foldaon.”⁷ Taem yumi mekem wan pikinini i kam strong moa, yumi mekem famli i kam strong moa.

Ol storian we oli givim laef ia, oli save lidim ol pikinini blong:

• Oli andastanem doktrin blong fasin blong sakem sin.

• Oli gat bilif long Kraes, Pikinini blong God ia we i stap laef.

• Oli jusum baptaes mo presen we i Tabu Spirit taem oli gat eit yia.⁸

• Oli prea mo “wokbaot long stret laef long fored blong Lod.”⁹

Sevya i talem strong: “From hemia, mi givim wan komanmen long yu, blong yu tijim olgeta samting long ol pikinini blong yu, mo yu no holemtaet wan samting.”¹⁰ ?Mo wanem nao Hem i wantem yumi tijim we yumi no holemtaet?

1. Foldaon blong Adam

2. Atonmen blong Jisas Kraes

3. Blong stap bon bakegen¹¹

Elda D. Todd Christofferson i talem: “I mas tru se enemi i glad taem papa mo mama i no wantem save blong tijim mo trenem pikinini blong olgeta blong gat bilif long Kraes mo bon bakegen long saed blong spirit.”¹²

Be long narasaed, Sevya i wantem yumi helpem ol pikinini blong “putum tras [blong olgeta] … long Spirit ia we i lidim man blong mekem gud.”¹³ Blong mekem hemia, yumi save helpem ol pikinini blong stap luksave taem we oli stap filim Spirit mo blong luksave wanem aksen i mekem Spirit i go. Long wei ia oli lan blong sakem sin mo gobak long laet tru long Atonmen blong Jisas Kraes. Hemia i helpem mi blong mi mas girap bakegen mo gohed.

Yumi save gat gud taem blong stap helpem ol pikinini blong yumi blong bildimap fasin blong girap bakegen mo gohed, long eni yia. I no nid blong i fasfas tumas, o i tekem tumas taem. Ol storian we oli simpol, oli kea, i save lidim ol pikinini blong oli save wanem oli biliv long hem, be moa impoten, from wanem oli bilivim hemia. Ol storian we oli soem kea, oli hapen olsem nomo, mo evri taem; oli save lidim blong i gat moa andastaning mo moa ansa. Bae yumi no letem ol isi lektronik tul oli blokem yumi blong tijim mo lisin long ol pikinini blong yumi, mo lukluk olgeta insaed long ae blong olgeta.

Bae i save gat moa janis blong gat ol storian we i nid taem yumi mekem rolplei. Ol memba blong famli oli save aktem ol situesen we oli stap fesem temtesen, o filim fos blong mekem wan nogud joes. Wan kaen praktis olsem i save mekem ol pikinini oli gat paoa blong rere from wan jalenj situesen. Eksampol. Yumi save aktem, mo afta yumi tokbaot taem yumi stap askem ol pikinini blong yumi wanem bae oli mekem:

• Sapos oli gat temtesen blong brekem Tok blong Waes.

• Sapos oli fesem ponografi.

• Sapos oli gat temtesen blong giaman, stil, o kopi.

• Sapos oli harem wan samting we i kam long wan fren o wan tija long skul we i agensem ol bilif o valiu blong olgeta.

Taem oli aktem, mo afta oli tokbaot, be i no blong oli sek long wan nogud grup blong fren, we oli no rere blong fesem, ol pikinini bae oli gat tul blong faet “wetem sil blong fet we tru long hem, bae yufala i save blokem evri spia blong faea blong olgeta we oli nogud.”¹⁴

Wan gud fren blong mi i bin lanem impoten lesen taem hem i bin gat 18 yia. Hem i joenem ami long Yunaeted Stet long taem blong rao bitwin Yunaeted Stet mo Vietnam. Oli bin sendem hem i go mekem besik trening long grup blong soldia we bae oli wokbaot leg. Hem i eksplenem se trening ia, i mekem man i taed. Hem i tokbaot tija blong hem se i no gat sore mo i no wantem save long man.

Wan dei, skwad blong hem i dresap fulwan wetem ol tul blong faet, oli wokbaot long wan hot san we i hot. Wantaem nomo, tija i singaot, i givim oda blong oli foldaon long graon mo oli no muv. Tija i stap luklukgud se i no gat wan i muv wan pis nating. Eni muv, bae i mekem se nogud samting bae i kam afta. Skwad i safa blong ova long tu aoa long hot ia wetem kros we i stap kam fulap mo filing blong no laekem nating lida ia blong olgeta.

Plante manis afta, fren blong yumi i stap lidim skwad blong hem tru long ol dakbus blong Vietnam. Hemia rilwan, i no trening. Masket i stat blong faerap antap long ol tri raonabaot. Ful skwad i foldaon i go long graon wantaem.

?Enemi i stap lukaotem wanem? Man we i muv. Eniwan we i muv, bae i mekem oli sutum olgeta. Fren blong mifala i talem se, taem hem i stap ledaon i swet, mo i no save muv long floa blong dakbus ia, i wet blong plante longfala aoa, nao tingting blong hem i gobak long besik trening ia. Hem i tingbaot we hem i kam blong no laekem nating tija blong hem. Naoia, hem i filim bigfala tangkyu—from samting we tija i bin tijim hem, mo naoia, i mekem hem i rere from denja situesen ia. Tija blong hem i bin waes blong givim stret tul long fren blong mifala wetem skwad blong hem, mo givim olgeta paoa blong save wanem blong mekem taem we faet i stap go strong. Tija ia, i tru we hem i bin sevem laef blong fren blong mifala.

?Olsem wanem nao yumi save mekem sem samting long ol pikinini blong yumi, long saed blong spirit? Longtaem bifo oli go insaed long ples blong faet long laef ia, ?olsem wanem nao yumi save traehad moa blong tijim olgeta, mekem oli kam strong mo mekem oli rere?¹⁵ ?Olsem wanem nao yumi save invaetem olgeta blong “go insaed inaf?” ?Weswe? ?Bae i moa gud se oli “swet” long sef ples blong lanem samting insaed long hom, o blong blad blong olgeta i ron long ol ples blong faet blong laef ia?

Taem mi lukluk i gobak, i bin gat ol taem we, hasban blong mi mo mi, i filim se mifala i olsem tija ia long strong hadwok blong mifala blong helpem pikinini blong mifala blong laef folem gospel blong Jisas Kraes. Profet Jekob i bin talemaot ol semfala filing ia taem hem i talem: “From mi wantem blong helpem gudlaef blong sol blong yufala. Yes, wari blong mi i bigwan from yufala; mo yufala i save se hem i bin stap olsem oltaem.”¹⁶

Taem ol pikinini oli stap lanem samting mo progres, bilif blong olgeta i fesem jalenj. Be, taem oli holem ol stret tul blong faet, oli save groap long bilif, strong paoa long tingting, mo tras long olgetawan, iven long medel blong strong fasin blong agens.

Alma i tijim yumi blong “save mekem rere ol tingting blong ol pikinini.”¹⁷ Yumi stap mekem rere jeneresen ia we i stap kam antap blong oli kam ol fiuja man blong difendem bilif ia, blong oli andastanem se oli “fri blong tekem aksen blong [olgetawan] bakegen—blong jusum rod blong ded we i no gat en, o rod blong laef we i no save finis.”¹⁸ Ol pikinini oli inaf mo nid blong andastanem bigfala trutok ia: taem we i no save finis, i rong samting ia blong stap rong from.

Mi prea se ol simpol storian blong yumi, we i nid blong gat wetem ol pikinini blong yumi bae i helpem olgeta blong “stap glad long ol toktok blong laef we i no save finis” naoia, blong mekem se oli save “stap glad long laef we i no save finis long wol we i stap kam, we i glori ia we man i no save ded.”¹⁹

Taem yumi stap fidim mo mekem rere ol pikinini blong yumi, yumi letem blong oli mekem joes, yumi lavem olgeta wetem ful hat blong yumi, yumi tijim ol komanmen blong God long olgeta, mo presen ia blong Hem we i fasin blong sakem sin, mo yumi neva, neva, givap long olgeta. Long en, ?hemia i no rod ia nao we Lod i mekem wetem wanwan long yumi?

Bae yumi gohed fored wetem wan strong tingting long Kraes, mo save se yumi save gat “wan stret mo klin hop”²⁰ tru long Sevya we i gat lav.

Mi testifae se, Hem nao, oltaem i ansa. Long tabu nem blong Jisas Kraes, amen.