“Harem Nogud blong Yumi Bae I Tanem i Kam Glad”

Sam yia i pas, taem mi stap atendem ol miting long Sol Lek Siti, dia profet blong yumi, Russell M Nelson, i kam mo talem halo long mi wetem bigfala glad. Long fasin mo stael blong hemwan, hem i askem, “Mak, ?mama i oraet?”

Mi talem long hem se, mi bin stap wetem hem eli long wik ia, long hom blong hem long Niu Silan mo we hem i stap kam olfala, be hem i fulap long fet mo i stap olsem wan insperesen long evri wan we oli save hem.

Afta, hem i talem se: “Plis sendem lav blong mi long hem … mo talem long hem se mi luk fored blong luk hem bakegen.”

Mi sapraes mo askem: “?Yu yu gat wan trip blong go long Niu Silan?”

Wetem plante tingting wetem tru hat, hem i ansa: “O no, bae mi luk hem long nekis laef.”

I no gat wan samting i series long ansa blong hem. I wan stret mo nomol wei blong talem wan filing abaot wan trutok. Long praevet mo smol taem ia we i no gat wan i luk, mi harem mo filim wan stret mo tru we i kam long wan profet we i stap laef, se laef i gohed afta long ded.

Long konfrens wiken ia, bae yufala i harem ol aposol mo profet we oli stap laef, oli testifae abaot Laef Bakegen long Ded blong Jisas Kraes. “Ol stamba prinsipol blong relijin blong yumi oli ol testemoni blong ol Aposol mo ol Profet, abaot Jisas Kraes, se Hem i bin ded, oli bin berem Hem, mo Hem i bin girap long nambatri dei, … evri narafala samting abaot relijin blong yumi, oli go wetem [trutok ia].”¹ Mi promes se taem yu lisin wetem tru tingting, Tabu Spirit bae i konfemem insaed long maen mo hat blong yu, trutok long saed blong ol testemoni ia.²

Ol aposol blong Jisas long taem bifo, oli bin jenis bigwan afta we Hem i kamkamaot long olgeta, afta we Hem i ded. Ten long olgeta oli luk Hem, we Hem i bin Laef Bakegen long Ded. Tomas we i no bin stap long taem ia, i talem, “Sapos mi luk ol hol blong nil long han blong hem … bambae mi jes bilif long hem.”³ Afta, Jisas i wonem Tomas: “Yu mas bilif long mi. Yu no moa hafhaf long bilif blong yu.”⁴ Afta, Lod i tijim stamba wok blong fet: “Be olgeta we oli no luk mi, be oli bilif long mi, bambae oli save harem gud.”⁵

Lod ia we i laef bakegen long ded i givim long ol aposol blong Hem, responsabiliti blong testifae abaot Hem. Olsem Ol Aposol blong yumi we oli stap laef tedei, oli lego ol wok blong olgeta mo spenem ful laef blong olgeta blong stanap mo stap talemaot, se God i resemap Jisas ia. Ol testemoni blong olgeta we i gat paoa, i lidim taosen pipol blong stap akseptem invitesen blong kasem baptaes.⁶

Mesej we i fulap long glori, blong Ista moning i stamba blong evri kristin pipol. Jisas Kraes i bin girap bakegen long ded, mo from hemia, bae yumi laef afta long ded. Save ia i stap givim mining mo stamba tingting long laef blong yumi. Sapos yumi go fored wetem fet, laef blong yumi bae i jenis blong oltaem, olsem Ol Aposol blong bifo. Yumi, olsem olgeta, bae yumi save winim eni had situesen wetem fet long Jisas Kraes. Fet ia i stap givim hop blong wan taem we “harem nogud blong yumi bae i tanem i kam glad.”⁷

Fet blong miwan, i stat afta long ol taem blong harem nogud.

Papa mo mama blong mi oli bin ol fama long Niu Silan.⁸ Tufala i glad long laef blong tufala. Olsem wan yang kapol, oli kasem blesing blong gat tri smol gel. Las bon long olgeta, nem blong hem, Ann. Wan dei, oli stap tugeta long wan bigfala wota, long wan holidei, mo Ann we i gat 17 manis, i wokbaot i go samples. Afta sam minit we oli lukaotem hem wetem wari, oli faenem hem i ded insaed long wota.

I no gat toktok we i save tokbaot hat brok situesen ia. Papa i raetem sam yia afta: sam long ol glad mo hapines we i bin kamaot long laef blong olgeta, blong oltaem. Hemia i mekem se, strong filing ia blong lukaotem ol ansa long ol impoten kwestin blong laef oli kam: “?Wanem bae i hapen long naesfala Ann blong mitufala? ?Bae mifala i save luk hem bakegen? ?Olsem wanem nao famli blong mifala bae i save glad bakegen?”

Sam yia afta long nogud situesen ia, tu yangfala misinari blong Jos Ia blong Jisas Kraes blong Ol Lata-dei Sent, oli kam long fam blong mitufala. Tufala i stat blong tijim ol trutok we i stap insaed long Buk blong Momon mo Baebol. Ol trutok ia, oli givim wan stret filing se, naoia Ann i stap laef long spirit wol. From Laef Bakegen long Ded blong Jisas Kraes, Ann tu bae i laef bakegen long ded. Tufala i bin tijim se Jos Ia blong Jisas Kraes i bin kam bakegen long wol ia wetem wan profet we i stap laef, mo twelef Aposol. Mo oli tijim spesel mo impoten doktrin, se famli i save stap tugeta blong oltaem tru long semmak prishud atoriti, we Jisas Kraes i bin givim long jif Aposol blong Hem, Pita.⁹

Kwiktaem, mama i luksave trutok mo kasem wan witnes blong Spirit. Be papa, i faenem i had blong disaed bitwin ol tu tingting mo Spirit we i stap toktok long hem. Mo tu, hem i tingting tu blong jenisim wei blong laef blong hem. Wan moning, afta long wan naet we hem i no slip gud, hem i stap wokbaot go kam long flo mo i tanem hem i go long mama mo talem, “Bae mi baptaes tedei o neva.”

Mama i talem long ol misinari wanem i bin hapen, mo kwiktaem tufala i luksave smol laet blong fet blong papa blong mi we bae oli mas mekem i laet bigwan naoia o lego laet ia i ded.

Long semmak moning ia, famli blong mifala i travel i go long solwota we i kolosap moa. Mifala ol pikinini i no save wanem stret i stap hapen, mo mifala i gat wan piknik long naesfala sanbij, mo Elda Boyd Green mo Garry Sheffield i lidim papa mo mama blong mi i go insaed long solwota mo baptaesem tufala. Long wan nara aksen blong fet, Papa, i komitim hemwan long Lod long praevet se, nomata wanem we bae i kam, bae hem i stap tru long ful laef blong hem, long ol promes we hem i stap mekem.

Wan yia i pas, oli dediketem wan tempol long Hamilton, Niu Silan. Smoltaem afta, famli blong mi mo wan we i ripresentem Ann, mifala i nildaon raon long olta insaed long tabu haos blong Lod. Long ples ia, tru long atoriti blong prishud, mifala i yunaet olsem wan famli we i no save finis, long wan simpol mo naesfala odinens. Hemia i givim plante pis mo glad.

Plante yia i pas, Papa i talem long mi se, sapos i no bin hat brok situesen blong ded blong Ann, hem bae i neva putum tingting blong hem i stap daon inaf blong akseptem gospel ia we i bin kambak. Yet, sloslo, Spirit blong Lod i givim hop, se wanem we tufala misinari i bin tijim i tru. Fet blong papa mo mama blong mi i gohed blong gro kasem taem we wanwan i bon wetem faea blong testemoni, we long wan kwaet fasin mo wetem tingting i stap daon, i lidim evri desisen long laef blong tufala.

Bae mi oltaem talem tangkyu from eksampol blong papa mo mama blong mi, i go long ol fiuja jeneresen. I no posibol blong mesarem namba blong ol laef blong ol pipol we oli bin jenis foreva, from ol aksen blong fet blong olgeta olsem wan ansa blong bigfala harem nogud.

Mi invaetem evriwan we oli stap harem nogud, olgeta we tingting i fasfas, olgeta we oli stap tingting long wanem we bae i hapen afta we yumi ded, blong putum fet blong yufala long Kraes. Mi promes se sapos yu wantem long hat blong yu blong bilif, tekem aksen wetem fet mo folem smol kwaet voes blong Spirit, bae yu faenem glad long laef ia mo long wol we i stap kam.

Mi stap luk fored long dei we bae mi mitim sista blong mi, Ann. Mi stap luk fored long wan bigfala glad blong joenem papa blong mi we i bin ded ova long 30 yia nao. Mi testifae long glad ia we i kam taem yumi stap laef long fet, stap bilif be i no blong luk mo bilif, be blong save tru long paoa blong tabu Spirit se Jisas Kraes i stap laef. Wetem ful hat mo sol blong mi, mi jusum blong folem Jisas Kraes mo gospel blong Hem we i bin kambak. Hemia i blesem evri situesen blong laef blong mi. Mi save se, Jisas Kraes i pikinini blong God, Sevya mo Ridima blong yumi. Long nem blong Jisas Kraes, amen.