!Yu Save Karem Isrel I Kam Tugeta!
Mi mi agri fulwan se yufala ol yut i save mekem hemia from se i gat wan samting abaot aedentiti blong yufala, wan bigfala paoa we i stap insaed long yufala.
Kolosap tri yia i pas, Presiden Russell M. Nelson i bin invaetem evri yut blong Jos Ia blong Jisas Kraes blong Ol Lata-dei Sent blong joenem “yut ami blong Lod blong tekpat long bigfala wok blong wol ia tedei—blong help blong karem Isrel i kam tugeta” long tugeta saed blong vel. Hem i talem: “Kam tugeta ia, i samting we i moa impoten we i stap tekem ples long wol tedei.”1 Mi mi agri fulwan se yufala ol yut i save mekem hemia—mo mekem i gud tumas—from se (1) i gat wan samting abaot aedentiti blong yufala (2) wan bigfala paoa we i stap insaed long yufala.
Fotiwan yia i pas, tu misinari i filim Spirit i lidim tufala i go long wan haos, long Niu Jesi long Yunaeted Stet. Long en, bigfala merikel i hapen, tugeta papa mo mama mo evri 10 pikinini, oli bin kasem baptaes. Long toktok blong profet, oli “letem God i win”2 insaed long laef blong olgeta. Mi sapos blong talem se long “laef blong mifala.” Mi mi nambatri pikinini long famli. Mi bin kasem 17 yia, taem mi disaed blong mekem wan kavenan blong folem Jisas Kraes blong oltaem. ?Yu ting se wanem bakegen mi disaed long hem? Bae mi no go long wan fultaem misin. Hemia i tumas. Mo hemia bae oli no ting se mi save mekem ?i tru? Mi wan niufala memba nomo blong Jos. Mi no gat mane. Be nomata we mi jes graduet long wan had skul, we i stap kolosap long Wes Filadelfia, mi bin fesem sam denja jalenj, i no gat man i save, be mi stap fraet blong lego hom blong tu ful ia.
Tru Aedentiti blong Yufala
Be mi jes lanem nomo se mi mo evri man, i bin laef wetem Papa blong yumi long Heven olsem ol spirit pikinini boe mo gel blong Hem, bifo yumi bon i kam long wol ia. Ol narafala man oli nid blong save, olsem we mi bin save, se Hem i wantem tumas se bae evri pikinini blong Hem bae oli glad blong gat laef we i no save finis wetem Hem. So, bifo i gat eniwan i kam long wol, Hem i presentem, long yumi evriwan, plan ia blong Hem blong fasin blong sevem man mo stap glad wetem Jisas Kraes olsem Sevya blong yumi. Wetem rabis tingting, Setan i agensem plan blong God.3 Folem buk blong Revelesen, “!nao i gat bigfala faet i stat long heven”!4 Setan i trikim wan kwota blong ol spirit pikinini blong Papa long Heven blong oli letem hem i win, be i no God.5 !Be i no yufala! Aposol Jon i luk se yufala i bin winim Setan tru long “paoa blong trutok (blong yufala) ya we [yufala i] stap talemaot.”6
Blong save tru aedentiti blong mi, wetem help blong petriakel blesing blong mi, i givim strong paoa long tingting mo fet blong mi blong akseptem invitesen blong Presiden Spensa W. Kimbol, blong karem Isrel i kam tugeta wanples.7 Bae i semmak long yufala, ol dia fren. Blong save se yu winim Setan tru long toktok blong testemoni blong yu bifo bae i helpem yu blong lavem, serem mo invaetem man8 naoia mo blong oltaem—blong invaetem ol narawan blong kam mo luk, kam mo help, mo kam mo stap, taem semmak wo ia blong ol sol blong ol pikinini blong God i stap gohed strong.
Fet We I Gat Bigfala Paoa we I Stap Insaed long Yu
?Weswe long bigfala paoa we i stap insaed long yu? Tingting long hemia, yu bin singaot wetem glad9 blong kam long wol we i foldaon, mo long ples we evriwan bae oli fesem ded long saed blong bodi mo spirit. Yumiwan, bae yumi neva save winim wan long tufala ded ia, yumiwan nomo. Bae yumi harem nogud, i no from ol sin blong yumiwan nomo, be, from hemia blong ol narafala man tu. Evri man long wol bae oli gat eksperiens blong luk evri kaen samting we i brokbrok mo i pulumdaon tingting blong man10—wetem wan vel blong fogetem samting i kavremap maen blong yumi mo enemi blong wol we i stap gohed blong makem mo temtem yumi. Evri hop blong laef bakegen mo kam klin blong gobak long tabu ples blong God, i dipen fulwan long wan Man ia nomo, blong i kipim promes blong Hem.11
?Wanem i givim paoa long yu blong go fored? Presiden Henry B. Eyring i bin tijim: “I tekem fet long Jisas Kraes blong sapotem plan blong hapines mo ples blong Jisas Kraes insaed long hem, taem yu no bin savegud long ol jalenj we bae yu fesem long wol ia.”12 Taem Jisas Kraes i promes, blong Hem i kam long wol ia mo givim laef blong Hem blong karem tugeta13 mo sevem yumi, yu no bin biliv long Hem olsem nomo. Yufala ol “hae spirit”14 oli bin gat “fet we i bigfala tumas” we yufala i luk se promes blong Hem oli tru.15 Hem i no save giaman, so yu luk Hem olsem se Hem i bin mekem blad blong Hem i ron finis from yu, longtaem finis bifo Hem i bon.16
Long ol simbol blong toktok blong Jon, yu “winim [Setan] finis tru long paoa blong blad blong Smol Sipsip.”17 Presiden Dallin H. Oaks i bin tijim se, insaed long wol ia, “[yu] bin luk en stat long stat.”18
!Sapos, wan dei, bifo yu go long skul, mo papa o mama blong yu i mekem wan tru promes se, bae yu save kakae fevret kaekae blong yu, taem yu kambak long haos! !Yu glad tumas! Taem yu stap long skul, yu stap pikjarem kaekae ia mo yu save testem tes blong hem finis. I nomol blong serem gudfala nius ia wetem ol narawan. Blong stap lukluk fored blong gobak long haos i mekem yu hapi tumas, mekem se ol tes mo jalenj blong skul i isi nomo. !I no gat wan samting we i save karem glad blong yu o mekem yu gat tu tingting from yu sua se promes ia bae i kamtru! I semmak, bifo yufala, “ol hae spirit,” i bin bon, yufala i bin lanem blong luk ol promes blong Kraes long wan tru wei mo yufala i bin testem,19 plan blong glad blong Hem. Bigfala fet blong yufala i olsem ol masel we oli kam strong moa mo kam moa bigwan taem yu yusum olgeta moa, be oli stap insaed long yu finis.
?Olsem wanem yu save wekemap bigfala fet blong yu long Kraes, mo yusum fet ia blong karem Isrel i kam tugeta naoia, mo win ova long Setan bakegen? Taem yu stap lanem bakegen blong lukluk fored wetem semmak sua tingting long promes blong Lod blong karem tugeta mo sevem man tedei. Oltaem, hem i yusum Buk blong Momon mo ol profet blong Hem blong tijim yumi olsem wanem blong mekem. Longtaem bifo Kraes, Ol Man blong Nifae we oli “ol profet, mo… ol pris… ol tija… oli winim tingting [blong ol pipol] blong lukluk fored i go long Sevya mo biliv long hem blong kam olsem se hem i bin kam finis.”20 Profet Abinadae i tijim, “Mo nao sapos Kraes i no bin kam long wol, blong talemaot ol samting we bae oli kam olsem se oli bin kam finis, bae i no save gat wan fasin blong pemaot man.”21 Olsem Alma, Abinadae “i bin luk fored wetem wan ae blong fet”22 mo luk ol sua promes blong God blong sevem man, olsem se oli hapen finis. Olgeta oli winim [Setan] tru long blad blong Smol Sipsip, mo … toktok blong testemoni blong olgeta, longtaem finis, bifo Kraes i bon, olsem we yu bin mekem. Mo Lod i bin givim paoa long olgeta, blong invaetem mo karem Isrel i kam tugeta. !Hem bae i mekem i semmak taem yu lukluk fored wetem fet, taem yu luk Isrel i kam tugeta—long ful wol mo long “ol ples”23—mo invaetem evriwan!
Handred long ol misinari oli bildimap paoa long fet blong olgeta long laef, long Kraes, taem oli gat visen abaot olgeta we oli kontaktem o tijim blong oli dresap long ol baptaes mo tempol klos. Long wan toktok we taetol i:“Stat wetem En long Maen,”24 Presiden Nelson i serem wan eksampol blong hemwan, blong stap mekem hemia mo i givim instraksen long ol misin lida blong tijim ol misinari blong mekem semmak. Blong save se oli stap praktisim bigfala fet ia long Jisas Kraes long laef bifo laef long wol ia, i helpem ol dia misinari blong “lisingud long Hem”25 mo wekemap bigfala fet blong olgeta blong karem tugeta Isrel, olsem we Lod i promesem.
I tru, giaman tingting i kilim fet.26 Ol fren blong mi, gat tingting ia blong wantem gat ol visen o wei blong luk ol samting we oli stap blokem huia yu, speseli ponografi, bae oli mekem fet blong yu long Kraes i kam slak, mo sapos i no gat fet, bae i smasem gud yu. Plis yusum wei we yu tingting long samting, blong i mekem fet i kam antap, be i no blong spolem fet.
Program blong Ol Pikinini mo Ol Yut
Program ia blong Ol Pikinini mo Ol Yut i wan tul blong profet blong mekem i kam antap, paoa long bigfala fet blong yu. Presiden Oaks i bin tijim: “Program ia oli mekem blong helpem yufala i kam moa olsem Sevya long fo eria: saed blong spirit, saed blong bodi, mo saed blong waes.”27 !Taem yufala ol yut i lid—lid—blong stap laef folem gospel, stap kea long ol narawan, invaetem evriwan blong kasem gospel, yunaetem ol famli blong taem we i no save finis mo stap oganaesem ol aktiviti blong gat wan gudtaem,28 bigfala fet we yu bin gat long Kraes, we yu bin gat long laef bifo laef long wol ia, bae i kamkamaot bakegen mo givim paoa long yufala blong mekem wok blong Hem long laef ia!
Mo tu, ol gol blong yufala wanwan, “speseli ol gol blong sot taem,”29 oli helpem yu blong wekemap fet blong yu we i gat paoa. Taem yu stap putum wan gudfala gol, yu stap lukluk i go fored, olsem we yu bin mekem bifo, mo stap luk wanem we Papa blong yu long Heven i wantem yu o ol narawan blong kam olsem.30 Nao yu mekem plan mo yu wok had blong kasem gol ia. Elda Quentin L. Cook i bin tijim: “Neva tingdaon long hamas blong mekem plan, setem ol gol … , mo [invaetem ol narawan]—evriwan wetem wan ae blong fet.”31
!Joes i blong yu! Lod i talem long yu, “paoa [blong jusum samting] i stap insaed long olgeta.”32 Elda Neil L. Andersen i eksplenem: “Fet blong yu bae i gro, be i no from i gat janis, be tru long joes.”33 Hem i ademap: “[Eni] kwestin we i ones [we yu gat] … bae i kasem ansa sapos yu gat longfala tingting mo wan ae blong fet.”34
Mi testifae se (1) tru aedentiti blong yu mo (2) bigfala paoa blong fet long Kraes bae i save mekem yu “helpem blong mekem wol ia i rere from Seken Kaming blong Sevya, taem yumi invaetem evriwan blong kam long Kraes mo kasem ol blesing blong Atonmen blong Hem.”35 Bae yumi serem glad blong sua promes blong Buk blong Momon:
“Olgeta we oli stret mo gud we oli lisin long ol profet, mo… oli lukluk i go fored long Kraes wetem strong bilif, i nomata long evri fasin blong givim hadtaem … bae oli no ded.
“Be [Kraes]… bae i hilim olgeta, mo bae oli gat pis wetem hem.”36
Long nem blong Jisas Kraes, amen.