Sia Tongeni Fofforochuno me Pwisin Aochuno

Pwii kana mi achengicheng, mi fakkun amwarar ne nenniu won ei mwichen noun ewe Samon kewe sounfiu chon pristut. Ami mi eu sokkun pochokun mi napanap fan iten met mi och! Aua tongeikemi. Aua iotek fanitemi. Aua fakkun kinisou ngenikemi.

Ua kuna pwe ua aucheani an ewe Samon kapasen awewe ngeni ewe Soufos Joseph Smith: Kosap apasa och mettoch me nukun aier ngeni ei tappin aramas.¹ Ei Esinesin mi nom ekkis meinisin non ekkewe pukfel.² A efisata ewe kapas eis: “Mi namot aramas meinisin repwe aier?” Pwonuan ewer.

A chommong aramas ra nuku pwe aier mi eu sokkun efeingaw—och mettoch emon epwe touau seni chinon chok non sokkun tipis mi fakkun ngaw. Nge ei memmefin efeingaw mi feito seni Setan. A achocho ne eppetikich seni ach nenengeni Jises Kraist,³ ewe a uta ren poun kewe mi etiwatiwoch,⁴ a mochen echikara, omusano, tonu, apochokuna, awena, me epinano kich.

Ewe kapasen aier non ewe Testamen Sofo non fosun Greek itan metanoeo. Nepoputan meta- a wewen “siwin.” Nesoponon -noeo mi wewe ngeni kapasen Greek usun “tipom,” “mirit,” “ngun,” me “ngasangas.”⁵

Iwe, nupwen Jises a tingorei kich ne “aier,”⁶ A tingoreikich ne siwini ach ekiek, ach sineioch, ngunuch we—pwan ewe napanap sia ngasangaseno. A tingoreikich pwe sipwe siwini ach napanapen tong, ekiek, angang, aea ach fansoun, ach foffor ngeni punuwach, aiti nouch semirit, me pwan tumunu inisich.

Ese wor och mettoch mi ngaseno, mi apochokuna, are auchea ngeni pwisin ach fefeita nap seni aier, iteitan ran. Aier esap eu mettoch a fis fan eu; mi eu angang. Ina ewe kiien pwapwa me kinamwen ekiek. Fiti ach nuku, aier a suki ach tufichin weri ewe manamanen ewe Achasefanin Jises Kraist.⁷

Ika ouwa soposopono won ewe anen pwon, are rikino ika suseni ewe anen pwon, are ouse tongeni mo kuna ewe an seni neniom we, ua tingoreikemi pwe oupwe aier. Oupwe mefi pochokunen ewe manamanen aier iteitan—ren fofforochuno me pwisin aochuno iteitan ran.

Nupwen sia finata ne aier, sia finata ne siwin! Sia mut ngeni ewe Chon Amanau ne ekkesiwinikich ngeni napanapoch. Sia finata ne mamarita non pekin ngun me weri pwapwa—ewe pwapwan ngaseno non I.⁸ Nupwen sia finata ne aier, sia finata ne winiti pwan usun chok Jises Kraist!⁹

Pwii kana, mi namwot sipwe fofforochuno me pwisin aochuno pokiten sia fiti eu maun. Ewe maun ren tipis mi ennet. Ewe chon ungeni a anapano an achocho ne aosukosuku kapasen pwarata me akouno ewe angangen ewe Samon. A ngeni noun kewe chon angang pisekin maun minen eppetikich seni ach sipwe weri ewe pwapwa me tongen ewe Samon.¹⁰

Aier ina ewe kii ne touaueno seni netipengaw mi fis seni sossotun ewe chon ungeni. Ewe Samon ese anamwota unusoch senikich non ei fansoun non ach manau ese much. Nge a anamwota pwe sipwe achocho ngeni unusoch ekkis me ekkis. Aier iteitan ran ina ewe an ngeni unusoch, me unusoch a efisata manaman. Unusoch pwisin a tongeni efisata pwe sipwe pisekin angang non poun Kot. Ach aier—ach unusoch—epwe apochokuna kich ne aninis ne ochufengeni Israel.

Ewe Samon a aiti ewe soufos Joseph Smith pwe ekkewe pungun ewe pristut mi chufengen me ewe manamanan nang, me emon esap tongeni nemeni are aea ewe manamanan nang chinon chok seni ekkewe nongonongen wenechar.¹¹

Sia sinei met epwe atufichi ngenikich ekkewe manamanan nang. Sia pwan sinei met epwe eppeti ach fefeita—met sipwe kouno pwe sipwe awatteno ach tufichin weri ekkewe manamanan nang. Pwii kana, oupwe kutta fiti ikiotek ne weweiti me a eppetuk pwisin won ewe anen om aier. Kopwe esinna met a kouno om kopwe aier. Iwe mwirin, kopwe siwin! Aier! Kich meinisin sia tongeni fofforochuno me pwisin unusochuno nap seni me mwen.¹²

Mi wor ekkoch napanap sia tongeni ochuno. Eu napanap mi nom non ifa usun sia aea inisich kewe. Ua mwar ren ewe inisin aramas. Mi fakkun mwaremwar, mi namwot pwe sipwe fefeita ngeni ach sipwe achocho ngeni unusoch. Sise tongeni fefeita ika ese wor inisich. Non an niffangen inis, Kot a mut ngenikich ne ipweipeta ngeni ach sipwe winiti pwan usun chok I.

Setan a weweiti ei. Ese sani pwe an rochopwakano non fansoun mwach ese mut ngeni i an epwe wor inisin, me a chok nom non tipen nonowoiti me mengiringir. Iwe chommong, are meinisin, ekkewe sossot a minatiw won ewe an a efisi pwe sia aeangawa inisich are inisin ekkoch aramas. Pokiten Setan a riaffou me ese wor inisin, a mochen pwe sipwe pwan riaffou pokiten a wor inisich.¹³

Inisum ina pwisin om tempel, mi for pwe nenien ngunum we ese much.¹⁴ Om tumunuochu ena tempel mi auchea. Iei, ua tingorei ami pwii kana: ami mi aucheani ufemi me animeti inisum ne apwapwaiti ewe fonufan nap seni apwapwaiti Kot? Ami pwonueni ei kapas eis a pwar ngeni I usun mefiemi won an niffang ngenikemi. Non ei sufoniniun sich, pwi kewe, ua nuku pwe sia tongeni fofforochuno me pwisin unusochuno.

Pwan eu napanap sia pwan tongeni fofforochuno me pwisin unusochuno ina won ifa usun sia sufoniti ekkewe fefin non manauach, akkomwan punuwach me nouch kewe nengin, inach kewe me fefinach.¹⁵

Fitu maram me nom, emon fefin a makkeeto echo taropwe ngeniei minne ua netipengau ren. A makkei: “[Am me nei kewe nengin] aua mefi pwe aua kitir fan iten punuwem me noum kewe at repwe rongorongoch, pun mi osukosuk ren porausen urumot, video games, porausen moni, [me] pwan katon [meinisin] urumot iteitan. Ita pwe a pout senikem am kewe nenien mommot fengen me punuwem me noum kewe at pokiten ra aucheani [sokkopaten urumot].”¹⁶

Pwii kana, wisemi me akkomw me auchea pwe chon ewe pristut ina pwe kopwe tongei me tumunu punuwom. Kopwe winiti eu chok ren i. Kopwe angang fengen ren i. Kopwe amecheresi pwe epwe mochen fituk. Esap wor och sokkun mettoch kopwe aucheani nap seni om aueta ami chiechioch fengen me i. Ese wor och mettoch won TV, won fon, are computer mi auchea nap seni ochun i. Kopwe nengenochu won ifa usun ka aea om fansoun me met ka aucheani. Epwe erenuk ia minne netipom a nom ia. Kopwe iotek pwe netipom epwe chufengen me netipen punuwom we. Kopwe achocho pwe epwe pwapwa. Kopwe kutta an kapas aurour, me kopwe ausening. An kapas epwe aochu om foffor.

Ika mi namwot pwe kopwe aier pokiten om foffor ngeni ekkewe fefin mi arap ngonuk, kopwe poputa iei. Pwan chechemeni pwe pwisin wisom ne anisi ekkewe fefin non manauom ne weri ekkewe feioch ra feito seni manaueni an ewe Samon annukun nimenimoch. Kete winiti popun emon fefin ese tufichin weri an feiochun tempel.

Pwii kana, mi namwot kich meinisin sipwe aier. Mi namwot pwe sipwe uta seni ewe nenien asoso, isettiw ewe pisekin fichi tv, me pwata seni ach mour non pekin ngun. Iei fansoun sipwe pwinitanong woch an Kot kewe pisekin maun pwe sipwe fori ewe angang mi napanap won fonufan. Iei fansoun sipwe aeaochu ach pisekin raas, me weri niwinich ren unusen netipach, ach ekiek me pochokun.¹⁷ Ekkewe pochokunen ngaw ese mo watteno nap seni non ekkei ran ikenai. Kich chon angangen ewe Samon, sise tongeni mour non ei fansoun maun.

Mi namwot om emwen me tong ren om famini. Om mwichen pristut me ekkewe ir non om wart ika pranch mi anwmota om pochokun. Me aramas meinisin ka churi repwe sinei nikinikinin me fofforun ennetin emon chon kunon ewe Samon.

Pwii kana mi achengicheng, oua kefin me ren ewe Sam ne feito fonufan non ei fansoun pokiten pochokunen ngunumi kewe me mwen ei manaua. Ami nein ekkewe mwan mi wenechareno ra feito ngeni ewe fonufan. Setan a sinei en io iei me en io me mwen ei manau, me a weweiti ewe angang mi namwot epwe for me mwen ewe Chon Amanau a niwinsefanito. Me mwirin fitu ngerou ier ren an fofforungaw, ewe chon ungeni a sineioch me akkachocho.

Iwe ren kinisou chapur, ewe pristut sia angei mi pochokununo nap seni ngawen ewe chon ungeni. Ua tingoreikemi pwe oupwe winiti ekkewe mwan me anuon minne mi namot me ren ewe Samon. Oupwe achocho ne aucheani aier iteitan ran pwe oupwe tongeni aea ewe pristut ren manaman nap seni me mwan. Iei chok ewe napanap ami me ami kana famini oupwe tumun non pekin ngun non ekkewe fansoun mwach mi weires.

Ewe Samon a anamwota mwan ra tumunu ekkoch aramas me mwer pwisin. A anamwota mwan ra akkachocho ne rongorong mungungun ewe Ngun mi Fel ren fatafatochun. A anamwota mwan mi pin ir ra anneasochisi ar kewe pwon mi pin. A anamwota mwan ra finata pwe repwe nimenimoch non pekin nisou—mwan mi nimenimoch mi tongeni kokko ngeni ar repwe angangepin ren netip mi nimenimoch, ekiek mi tonu, me pau mi mochen angang. Ewe Samon a anamwota mwan ra mochen aier—mwan ra wesewesen mochen angang me fiti an ewe Samon mwichen sounfiun chon pristut mi nimenimoch.

Ua efeiochukemi pwe oupwe winiti ekkena sokkun mwan. Ua efeiochukemi ren ewe pwara pwe oupwe aier iteitan ran me oupwe kaeo ifa usun ne aea unusen ewe manamanen pristut. Ua efeiochukemi ne apworausa ewe tongen ewe Chon Amanau ngeni punuwom we me noumi kewe semirit me ngeni aramas meinisin ka sinei. Ua efeiochukemi pwe oupwe fofforochuno me oupwe pwisin aochuno. Me ua efeiochukemi pwe nupwen oua fori ekkei mettoch, oupwe weri amwarar non manauemi.

Sia fiti ewe angangen Kot mi Napanap. Jises ii ewe Kraist. Kich Nour kewe chon angang. Ua pwarata non itan Jises Kraist, amen.