Puro nga Kamatuoran, Puro nga Doktrina, kag Puro nga Rebelasyon
Pahilog himoa ining komperensya nga tion sa pagpaayaw sa mga mensahe halin sa Ginuo paagi sa Iya mga alagad.
Pinalangga kong kauturan, pag-abiabi sa pangkabilogan nga komperensya. Ano nga kalipay nga makaupod kamo! Ara kamo sa akon kaisipan halos pirme sang nagligad nga anum ka bulan. Nagpangamuyo ako nahanungod sa inyo kag para sa inyo. Sang naliligad nga semana nagpangamuyo ako sing hugot nga ining komperensya mangin tion sang rebelasyon kag pagpamalandong sa tanan nga nagahandum sadtong mga bugay.
Malipayon kami nga maghambal sa inyo liwat halin sa Conference Center. Kalabanan sa mga pulungkuan bakante gihapon, pero ang presensya sang pila ka miyembro sang Tabernacle Choir isa ka matahum nga tikang paabante. Ginaabiabi namon kamo tanan sa sining online nga komperensya, kon sa diin man kamo.
Nagapangatubang kita sa gihapon sang malala nga epekto sang COVID-19 kag sang mga klase sini. Salamat sa pagsunod sang amon laygay kag sang laygay sang mga eksperto sa medisina kag opisyales sang gobyerno sa inyo kaugalingon nga mga komunidad.
Nagatipon kita kada pangkabilogan nga komperensya suno sa direksyon sang Ginuo.1 Ang porma nagbaylo na sa kadugayan. Sang hubin pa ako, ang komperensya nagalawig sing tatlo ukon apat ka adlaw. Sang ulihi, ang komperensya nagnubo na sa duha ka adlaw. Ang tagsa ka mensahe—sadto kag karon—resulta sang hugot nga pangamuyo kag malawig nga espirituhanon nga preparasyon.
Ang mga General Authority kag mga General Officer sang Simbahan nga mahambal magatutok sang ila mga mensahe sa aton Manluluwas nga si Jesucristo, sa Iya kaluoy, kag sa Iya wala dulunan nga gahum sa pagtubos. Wala na sing iban pa nga tion sa kasaysayan sang kalibutan sang ang ihibalo parte sa aton Manluluwas nangin mas personal nga kinahanglanon kag mapuslanon sa tagsa ka kalag sang tawo. Pamensara kon daw ano kadasig sang mga makahalalit nga kagamo sa bilog nga kalibutan—kag sang mga ara sa aton indibidwal nga kabuhi—nga masolbar kon kita tanan magpili nga sundon si Jesucristo kag pamatian ang Iya mga pinanudlo.
Santo diri, ginaagda ko kamo nga magpamati sa tatlo ka butang sa sining komperensya: puro nga kamatuoran, puro nga doktrina ni Cristo, kag puro nga rebelasyon. Kontra sa mga pagduhaduha sang iban, may ara gid sang butang nga husto kag sayop. May ara gid sing bug-os nga kamatuoran—wala katapusan nga kamatuoran. Isa sa mga problema sa aton panahon amo nga diutay lang gid sa katawhan ang nakahibalo kon diin magtulok para sa kamatuoran.2 Ginapasalig ko sa inyo nga ang inyo mabatian sini nga adlaw kag sa bwas human sa puro nga kamatuoran.
Ang puro nga doktrina ni Cristo gamhanan. Ginabag-o sini ang kabuhi sang tagsa-tagsa nga nakaintiendi sini kag nagatinguha nga himuon ini sa iya kabuhi. Ang doktrina ni Cristo nagabulig sa aton nga makita kag magtiner sa dalan sang kasugtanan. Ang pagtiner sa sinang makitid pero maathag nga banas sa ulihi magakalipikar sa aton nga mabaton ang tanan nga ara sa Dios.3 Wala na sing mas bilidhon pa sangsa tanan nga ara sa aton Amay!
Sa katapusan, ang puro nga rebelasyon para sa mga pamangkot sang inyo tagipusuon magahimo sining komperensya nga mapuslanon kag indi malimtan. Kon wala pa ninyo ginpangayo ang pag-alagad sang Balaan nga Espiritu agud buligan kamo nga mabatian kon ano ang gusto ipabati sang Ginuo sa inyo sa sining duha ka adlaw, ginaagda ko kamo nga himuon ini subong. Pahilog himoa ining komperensya nga tion sa pagpaayaw sa mga mensahe halin sa Ginuo paagi sa Iya mga alagad. Tun-i nga gamiton ini sa inyo kabuhi.
Ini ang Ang Simbahan ni Jesucristo sang mga Santos sa Ulihing mga Adlaw. Kita ang Iya katawhan sa kasugtanan. Ginsiling sang Ginuo nga Iya padasigon ang Iya buluhaton sa iya sini tiyempo,4 kag ginahimo Niya ini sing mas madasig. Pribelihiyo naton nga makapartisipar sa Iya balaan nga buluhaton.
Ginabendisyunan ko ang tanan nga nagahandum sang mas dako nga kasanag, ihibalo, kag kamatuoran. Ginapahayag ko ang akon pagpalangga sa kada isa sa inyo, sa sagrado nga ngalan ni Jesucristo, amen.