Kaupod ang Gahum sang Dios sa Dako nga Himaya

Mga tatlo ka tuig pagkatapos sang Una nga Panan-awon, sa gab-i sang Septyembre 21, 1823, ang bataon nga si Joseph Smith nagapangamuyo agud makabaton sang kapatawaran sang iya mga sala kag agud mahibal-an ang iya kahimtangan kag tindog sa atubang sang Dios.¹ Isa ka persona ang nagpakita sa kilid sang iya kama, gintawag si Joseph sa iya ngalan, kag nagpahayag “nga mensahero sia nga ginpadala halin sa presensya sang Dios … kag nga ang iya ngalan si Moroni.” Nagpaathag sia “nga ang Dios may buluhaton nga ipahimo kay [Joseph]”² kag dayon nagtudlo sa iya parte sa paggwa sang Libro ni Mormon. Talalupangdon nga ang Libro ni Mormon isa sang pinakauna nga topiko nga ginpamulong sa mensahe ni Moroni.

Ang Libro ni Mormon isa pa ka katipan parte kay Jesucristo kag labing maayo nga pamaagi sa pagpanghaylo sa ulihing mga adlaw. Ang amon katuyoan sa pagpaambit sang ebanghelyo amo nga agdahon ang tanan nga magpalapit kay Jesucristo,³ magbaton sang mga bugay sang ginpanumbalik nga ebanghelyo, kag magbatas tubtob sa katapusan paagi sa pagtuo sa Manluluwas.⁴ Ang pagbulig sa mga indibidwal nga maeksperiyensyahan ang dako nga pagbag-o sang tagipusuon⁵ kag ihugpong ang ila mga kaugalingon sa Ginuo paagi sa sagrado nga mga kasugtanan kag mga ordinansa amo ang tig-una nga mga katuyoan sang pagwali sang ebanghelyo.

Ang pagtudlo ni Moroni parte sang Libro ni Mormon kay Joseph Smith nagsugod sang buluhaton sang kaluwasan kag pangkahitaasan para sa mga indibidwal sa sining bahin sang belo sa dispensasyon sang kabug-osan sang mga panahon.

Sa pagpadayon sang iya pagtudlo kay Joseph, si Moroni dason nagsambit halin sa libro ni Malaquias sa Daan nga Katipan, nga may diutay nga kinalain sa hambal nga ginagamit sa bersyon sang King James:

“Tan-awa, ipahayag ko sa inyo ang Pagkapari, paagi sa kamot ni Elias nga propeta, antes mag-abot ang dako kag makahaladlok nga adlaw sang Ginuo.

“…Kag itanom niya sa mga tagipusuon sang mga anak ang mga promisa nga ginhimo sa mga amay, kag ang mga tagipusuon sang mga anak magaliso sa ila mga amay. Kon indi mangin amo sini, ang bilog nga duta lubos nga maguba sa iya pagkari.”⁶

Ang aton katuyoan sa pagpasad sang mga templo amo nga matigayon ang balaan nga mga lugar sa diin ang sagrado nga mga kasugtanan kag mga ordinansa nga kinahanglanon para sa kaluwasan kag pagpakataas sang tawhanon nga pamilya mahimo nga mahatag, para sa mga buhi kag mga patay. Ang tudlo ni Moroni kay Joseph Smith parte sa importante nga papel ni Elias kag awtoridad sang priesthood nagpasangkad sang buluhaton sang kaluwasan kag pangkahitaasan sa sining bahin sang belo kag nagsugod sa aton dispensasyon sang buluhaton para sa mga minatay sa pihak nga bahin sang belo.

Sa kabug-osan, ang mga panudlo ni Moroni sadtong Septyembre sang 1823 parte sa Libro ni Mormon kag sa misyon ni Elias nagpahamtang sang pundasyon sang doktrina para sa buluhaton sang kaluwasan kag pangkahitaasan sa duha ka bahin sang belo.

Ang mga leksyon nga natun-an ni Joseph Smith kay Moroni nag-impluwensia sang tagsa ka aspeto sang iya pag-alagad. Halimbawa, sa isa ka sagrado nga pagtipon nga ginhiwat sa Kirtland Temple sang Abril 6, 1837, ang Propeta nagpahayag: “Sa tanan nga nahambal na, ang pinakadako kag pinkaimportante nga tulumanon amo ang magwali sang Ebanghelyo.”⁷

Pagligad sing halos pito ka tuig, sang Abril 7, 1844, si Joseph Smith naghatag sang sermon nga kilala sa karon nga bilang King Follett Discourse. Nagpahayag sia sa sinang pagpamulong, “Ang pinakadako nga responsibilidad sa sining kalibutan nga ginhatag sang Dios sa aton amo ang pagpangita sang mga ngalan sang aton mga minatay.”⁸

Apang paano ang pagwali sang ebanghelyo kag pagpangita sang mga ngalan sang aton mga minatay mangin amo lamang nga pinakadako nga tulumanon kag responsibilidad nga ginbutang sang Dios sa aton? Nagapati ako nga ang Propetang si Joseph Smith nagadagmit sa duha ka pahayag sang tig-una nga kamatuoran nga ang mga kasugtanan, nga nasulod paagi sa mga ordinansa sang priesthood, makahugpong sa aton sa Ginuong Jesucristo kag ini sentro gid sa buluhaton sang kaluwasan kag pangkahitaasan sa duha ka bahin sang belo.

Ang pang-misyonaryo nga buluhaton, buluhaton sa templo kag sa family history magkaupod kag nagahilisanto nga mga aspeto sing isa ka dako nga buluhaton nga nagatutok sa sagrado nga mga kasugtanan kag mga ordinansa nga nagabulig sa aton sa pagbaton sang gahum sang pagkadiosnon sa aton mga kabuhi, kag sa ulihi, pagbalik sa presensya sang Amay nga Langitnon. Gani, ang duha ka pahayag sang Propeta nga sa una nagapakita nga daw wala nagasinanto, sa pagkamatuod, nagadagmit sang sentro sining dako nga buluhaton sa ulihing mga adlaw.

Ang Manluluwas nagsiling:

“Itakod ang akon gota sa inyo, kag magtuon kamo sa akon; kay ako mapainubuson kag malulo sa tagipusuon: kag makakita kamo sang kapahuwayan sa inyo mga kalag.

“Kay ang akon gota mahulas, kag ang akon lulan mamag-an.”⁹

Ginatakod naton ang gota sang Manluluwas sa aton samtang nagatuon kita parte sa, takos nga nagabaton, kag nagapasidungog sang sagrado nga mga kasugtanan kag mga ordinansa. Malig-on kita nga nahugpong sa Manluluwas kon matutum kita nga nagadumdom kag nagahimo sang tanan naton nga masarangan sa pagkabuhi suno sa mga obligasyon nga aton ginbaton. Kag inang pagkahugpong sa Iya amo ang ginahalinan sang espiritwal nga kusog sa tanan nga tion sa aton kabuhi.

Ginaagda ko kamo nga binagbinagon ang mga bugay nga ginpromisa sa mga disipulo ni Jesucristo nga nagatuman sang mga kasugtanan. Halimbawa, si Nefi “nakakita sang simbahan sang Kordero sang Dios [sa ulihing mga adlaw], kag diutay lang ang kadamuon sini, … ang mga santos sang Dios, yara man sa bug-os nga ibabaw sang duta; kag ang ila mga nasakopan … diutay lang.”¹⁰

Iya man “nakita ang gahum sang Kordero sang Dios, nga nagpanaog ini sa mga santos sang simbahan sang Kordero, kag sa katawhan sa kasugtanan sang Ginuo, … kag sila naarmasan sang pagkamatarong kag kaupod ang gahum sang Dios sa dako nga himaya.”¹¹

Ang dinalan nga “naarmasan sang pagkamatarong kag kaupod ang gahum sang Dios sa dako nga himaya” indi lamang isa ka manami nga ideya ukon halimbawa sang matahum nga hambalanon sang balaan nga mga kasulatan. Kundi, ining mga bugay maathag nga makita sa mga kabuhi sang di-maisip nga mga disipulo sang Ginuo sa ulihing mga adlaw.

Ang akon mga takay bilang miyembro sang Dose nagatugot sa akon nga magbiyahe sa bilog nga kalibutan. Kag nabugayan ako sa pagkilala kag pagtuon sing indi malipatan nga mga leksyon halin sa kalabanan sa inyo. Nagapamatuod ako nga ang katawhan sa kasugtanan sang Ginuo sa karon matuod nga naarmasan sang pagkamatarong kag kaupod ang gahum sang Dios sa dako nga himaya. Nasaksihan ko ang pagtuo, kaisog, pagtamod, pagpadayon, kag kalipay nga lampas pa sa mortal nga ikasarang—kag ang Dios lamang ang makahatag.

Nasaksihan ko ang pagkamatarong kag gahum sang Dios sa dako nga himaya, nga nabaton paagi pagkatutom sa mga kasugtanan kag mga ordinansa sa kabuhi sing isa ka lamharon nga miyembro sang Simbahan nga medyo naparalisado sa isa ka makahaladlok nga aksidente sa salakyan. Pagligad sining mabudlay nga mga binulan sa indibidwal nga pagpaayo kag pagpasibu sa bag-o nga pangabuhi nga limitado ang paggiho, nakigkita ako kag nakigsugilanon sa sining matutum nga tawo. Sa amon pagsugilanon namangkot ako, “Ano ang imo natun-an sa sini nga eksperiyensya?” Ang gilayon nga sabat amo nga, “Wala ko nasuboan. Indi ako akig. Kag mangin OK lang ang tanan.”

Nasaksihan ko ang pagkamatarong kag gahum sang Dios sa dako nga himaya nga nabaton paagi pagkatutom sa mga kasugtanan kag mga ordinansa sa mga kabuhi sang mga bag-ong bunyag kag nakompirmahan nga mga miyembro sang Simbahan. Ining mga hinaylo luyag gid nga makatuon kag mag-alagad, handa apang sa masami indi sigurado sa kon paano ipahigad ang naandan na nga mga pamatasan kag mabaskog nga mga tradisyon, apang nalipay nga mangin “mga kasimanwa sang mga tumuluo, kag mga katapo sang panimalay sang Dios.”¹²

Nasaksihan ko ang pagkamatarong kag gahum sang Dios sa dako nga himaya nga nabaton paagi sa mga kasugtanan kag mga ordinansa, sa mga kabuhi sing isa ka pamilya nga nag-atipan sing mapinalanggaon sang isa ka tiayon kag ginikanan nga may malala na nga balatian. Ining maisog nga mga disipulo naglaragway sang mga tinion sang ang ila pamilya nakabatyag nga nagaisahanon—kag mga tinion nga nahibal-an nila nga ang kamot sang Ginuo nagabayaw kag nagapabakod sa ila. Ini nga pamilya nagpabutyag sing sinsero nga pagpasalamat para sa mabudlay nga mortal nga mga eksperiyensya nga nagatugot sa aton nga magtubo kag mangin mas pareho sa aton Amay nga Langitnon kag aton Manunubos nga si Jesucristo. Ang Dios nagpaumpaw kag nagpakamaayo sining pamilya nga kaupod ang Balaan nga Espiritu kag ginhimo ang ila puluy-an nga sagrado nga dalangpan pareho sang templo.

Nasaksihan ko ang pagkamatarong kag gahum sang Dios sa dako nga himaya, nga nabaton paagi sa katutom sa mga kasugtanan kag mga ordinansa sa mga kabuhi sing isa ka miyembro sang Simbahan nga nakaeksperiyensya sang kasakit sang diborsyo. Ang espirituwal kag emosyunal nga kasakit sining sister naglala pa gid tungod sa indi matarong nga pagsupak sang iya tiayon sang mga kasugtanan kag pagkaguba sang ila pag-asawahay. Gusto niya sang hustisya kag pagkamay-salabton.

Samtang ining tampad nga babayi nagalalain sa tanan nga natabo sa iya, gintun-an niya kag ginbinagbinag sing mas maayo kag sing mas maid-id pa gid ang Pagbayad-Sala sang Manluluwas. Sing amat-amat, ang mas madalom nga paghangop sang misyon ni Cristo sa pagtubos nagtulo sa iya kalag—Iya pag-antos para sa aton mga sala kag para man sa aton mga kasakit, mga kahuyangan, mga kapaslawan, kag pag-antos. Kag nainspirar sia nga pamangkuton ang iya kaugalingon sing nagapahunahuna nga pamangkot: bangod nabayaran na inang mga sala, pangayuon mo bala nga bayaran ini sa makaduha ka beses? Narealisar niya nga ang amo nga ginapangayo indi mangin matarong ukon maluluy-on.

Ining babayi nakatuon nga ang pagkahugpong niya sa Manluluwas paagi sa mga kasugtanan kag mga ordinansa makapaayo sang mga pilas nga gintuga sang di-matarong nga pagbuot sinang isa kag nagbulig sa iya nga makapatawad kag makabaton sang paghidaet, kaluoy, kag gugma.

Ang mga promisa kag mga bugay sang kasugtanan posible lamang tungod sang aton Manluluwas nga si Jesucristo. Ginaagda Niya kita nga magtulok sa Iya,¹³ magpalapit sa Iya,¹⁴ magtuon sa Iya,¹⁵ kag ihugpong ang aton mga kaugalingon sa Iya¹⁶ paagi sa mga kasugtanan kag mga ordinansa sang Iya ginpanumbalik nga ebanghelyo. Nagapamatuod ako kag nagapromisa nga ang pagpadungog sang mga kasugtanan nagahatag sa aton sang pagkamatarong kag sang gahum sang Dios sa dako nga himaya. Kag nagasaksi ako nga ang buhi nga Ginuong Jesucristo ang aton Manluluwas. Sa sining mga kamatuoran malipayon ako nga nagapamatuod sa sagrado nga ngalan ni Jesucristo, amen.