Ang Gugma sang Dios

Tungod ang gugma sang Dios nagasakop sang tanan, ang iban nagatumod sini nga “wala sing kondisyon,” kag sa ila hunahuna abi nila nga nagakahulugan ini nga ang mga bugay sang Dios “wala sing kondisyon” kag ang kaluwasan “wala sing kondisyon.” Indi ini amo. May mga magasiling, “Ang Manluluwas nagapalangga sa akon sa kon ano ako,” kag matuod ina. Pero indi Niya madala ang bisan sin-o sa aton sa Iya ginharian sa kon ano kita, “kay wala sang mahigko nga butang nga makapuyo didto ukon makapuyo sa iya presensya.”⁷ Ang aton mga sala kinahanglan anay maresolba.

Si Propesor Hugh Nibley sadto nagsiling nga ang ginharian sang Dios indi makabatas kon pahanugotan sini ang bisan pinakagamay nga sala: “Ang pinakagamay nga mantsa sang korapsyon nagakahulugan nga ang pihak nga kalibutan indi na mangin malig-on ukon wala katapusan. Ang pinakagamay nga sayop sa isa ka bilding, institusyon, pagsulundan, ukon karakter indi malikawan nga mangin tunaan sang kalaglagan samtang nagadugay sa wala katapusan.”⁸ Ang mga kasugoan sang Dios “istrikto”⁹ tungod ang Iya ginharian kag ang mga pumuluyo sini makapadayon lamang kon padayon nila nga sikwayon ang kalainan kag pilion ang maayo, nga wala sing pili.¹⁰

Si Elder Jeffrey R. Holland nagsiling, “Si Jesus maathag nga nakahangop sang mga daw nalipatan sang aton moderno nga kultura: nga may dako nga kinalain sa tunga sang mando nga magpatawad sang sala [nga sa diin Sia may walay katapusan nga ikasarang sa paghimo] kag sang paandam batok sa pagkunsinte sini (nga wala gid Niya ginhimo bisan kaisa).”¹¹

Ugaling, wala sapayan sang aton indi pagkaperpekto sa karon, makalaum kita gihapon nga makabaton sang “maayo nga ngalan kag reputasyon,”¹² sang lugar, sa Iya Simbahan kag sa selestiyal nga kalibutan. Pagkatapos athagon nga indi Niya mahatagan sing ligwa ukon bale-walaon ang sala, ang Ginuo nagapasalig sa aton:

“Apang, sia nga nagahinulsol kag nagatuman sang mga kasugoan sang Ginuo pagapatawaron.”¹³

“Kag subong man, kon ano kasunson maghinulsol ang akon katawhan patawaron ko sila sang ila mga kalapasan batok sa akon.”¹⁴

Ang paghinulsol kag diosnon nga kaluoy ang nagasolbar sining palaligban:

“Dumduma man ang mga pulong nga ginhambal ni Amulek kay Zisrom, sa dakbanwa sang Amonihas; kay nagsiling sia sa iya nga ang Ginuo pat-od gid nga magaabot sa pagtubos sang iya katawhan, apang nga indi sia magkari sa pagtubos sa ila sa ila mga sala, kundi sa pagtubos sa ila gikan sa ila mga sala.

“Kag may gahum sia nga ginhatag sa iya gikan sa Amay sa pagtubos sa ila gikan sa ila mga sala tungod sang paghinulsol; gani ginpadala niya ang iya mga anghel sa pagpahayag sang balita sang mga kondisyon sang paghinulsol, nga nagadala sang katawhan padulong sa gahum sang Manunubos, padulong sa kaluwasan sang ila mga kalag.”¹⁵

Sa kondisyon sang paghinulsol, matanyag sang Ginuo ang kaluoy nga wala ginakawatan ang hustisya, kag “[ang Dios] wala nagauntat nga mangin Dios.”¹⁶

Ang pamaagi sang kalibutan, sa nahibal-an na ninyo, isa ka anti-Cristo, ukon “bisan ano nga wala Cristo.” Ang aton panahon isa ka pagsulit sang kasaysayan sang Libro ni Mormon kon sa diin ang may mga impluwensya nagagamit sang indi matarong nga pagdumala sa iban, nagaselebrar sang sekswal nga pagpinagusto, kag pagduso sang pagpadamo sang manggad bilang amo ang katuyuan sang aton pagkabuhi. Ang ila mga pilosopiya “nagapakatarong sang paghimo sang diutay nga sala”¹⁷ ukon bisan gani sang madamo nga sala, pero wala sa mga ini sing makatanyag sang pagtubos. Nagaabot lamang ina paagi sa dugo sang Cordero. Ang matanyag lamang sang mga nagasuporta sang “bisan ano nga wala Cristo” ukon “bisan ano nga wala sing paghinulsol” amo ang wala sing basehan nga pahayag nga wala sing sala ukon kon may ara gid man, sa ulihi wala ini sing mga konsikwensya. Indi ko makita ang ina nga pangatarungan nga mabaton sa Katapusan nga Paghukom.¹⁸

Indi naton kinahanglan nga himuon ang imposible para lang rasonan ang aton mga sala. Kag sa pihak nga bahin, indi naton kinahanglan nga himuon ang imposible para panason ang mga epekto sang sala paagi sa aton katakos lamang. Ang aton relihiyon indi relihiyon sang pagpangatarungan ukon relihiyon sang pagkaperpekto kundi relihiyon sang pagtubos—pagtubos paagi kay Jesucristo. Kon isa kita sa mga nagahinulsol, paagi sa Iya Pagbayad-Sala ang aton mga sala ginalansang sa Iya krus, kag “kag sa iya mga [labhag] ginaayo kita.”¹⁹

Madugay na ako nga nagadayaw, kag nabatyagan man, ang nagakalangkag nga gugma sang mga propeta sang Dios sa ila mga pagpaandam batok sa sala. Wala ini sila ginatulod sang handum nga magpakamalaut. Ang ila matuod nga handum nagapakita sang gugma sang Dios; in fact, amo ini ang gugma sang Dios. Palangga nila ang mga tawo kon diin sila ginpadala, bisan sin-o pa sila ukon ano pa sila. Pareho sa Ginuo, indi gusto sang Iya mga alagad nga mag-antos ang bisan sin-o sang kasakit sang sala kag indi maayo nga mga pagpili.²⁰

Si Alma ginpadala agud ideklarar ang mensahe sang paghinulsol kag pagtubos sa puno-sing-dumot nga katawhan nga handa sa pagpamigos, pagpasakit, kag bisan sa pagpatay sang Kristiyano nga mga tumuluo, lakip na kay Alma mismo. Pero ginpalangga niya sila kag ginhandum ang ila kaluwasan. Pagkatapos nga ipahayag ang Pagbayad-Sala ni Cristo sa katawhan sang Amonihas, nagpakitluoy si Alma: “Kag karon, mga kauturan ko, ginahingyo ko gikan sa pinakaalibutod nga bahin sang akon tagipusuon, huo, upod ang dako nga kabalaka bisan tubtob sa kasakit, nga mamati kamo sa akon mga pulong, kag isikway ang inyo mga sala, … agud mabayaw kamo sa katapusan nga adlaw kag magsulod sa palahuwayan [sang Dios].”²⁰

Sa mga pulong ni Pangulong Russell M. Nelson, “Bangud mismo sang madalom namon nga pag-ulikid sa tanan nga mga anak sang Dios nga ginapahayag namon ang Iya kamatuoran.”²²

Ang pagpalangga sang Amay nga Langitnon kag sang Anak libre nga ginahatag pero nagalakip man ini sang mga ginalauman kag ginapaabot. Sa liwat, nga ginasambit si Pangulong Nelson, “Ang mga layi sang Dios lubos nga ginapahulag sang Iya walay dulonan nga gugma para sa aton kag Iya kaluyag para sa aton nga mangin tanan nga mahimo kita nga mangin.”²³

Tungod palangga Nila kamo, indi Nila luyag nga ibilin kamo nga “amo kamo sina.” Tungod palangga Nila kamo, luyag Nila nga maangkon ninyo ang kalipay kag kadalag-an. Tungod palangga Nila kamo, luyag Nila nga maghinulsol kamo bangud amo ina ang dalan padulong sa kalipayan. Pero inyo ini pagpili—ginatahod Niya ang imo kahilwayan sa pagpili. Kinahanglan ninyo nga pilion nga palanggaon Sila, nga alagaran Sila, nga tumanon ang Ila mga kasugoan. Dayon sarang Nila kamo bugayan sing bastante kag palanggaon kamo.

Ang mayor nga ginapaabot sa aton amo nga magpalangga man kita. “Ang bisan sin-o nga wala nagahigugma wala makakilala sa Dios, kay ang Dios gugma.”²⁴ Sa sinulat ni Juan, “Mga hinigugma, kon amo ini ang paghigugma sang Dios sa aton, dapat man kita maghigugmaanay.”²⁵

Si Anay Pangkabilogan nga Pangulo sang Primary Joy D. Jones nagsugid nga sang bag-o pa lang sila nakasal, sia kag ang iya bana gintawag agud bisitahan kag ministeran ang isa ka pamilya nga wala na makasimba sing malawig na nga tinuig. Nangin maathag gilayon sa ila una nga pagbisita nga wala sila ginabaton didto. Pagkatapos nga mapaslawan sing pila pa ka beses, kag pagkatapos sang madamo nga sinsero nga pagpangamuyo kag pagbinagbinag, si Brother kag Sister Jones nakabaton sang sabat kon ngaa nagaserbisyo sila sa sining bersikulo sang Doktrina kag mga Kasugtanan: “Higugmaa ang Ginuo sa bug-os mo nga tagipusuon, sa bug-os mo nga ikasarang, panghunahuna, kag kusog; kag sa ngalan ni Jesucristo alagaran mo sia.”²⁶ Siling ni Sister Jones:

“Narealisar namon nga sinsero kami nga nagatinguha sa pag-alagad sining pamilya kag sa pag-alagad sa amon bishop, pero kinahanglan namon usisaon ang amon kaugalingon kon nagaalagad gid bala kami bangod sang gugma sa Ginuo. …

“… Nagapaabot na kami sa amon mga pagduaw sa sining pamilya bangod sang amon gugma sa Ginuo (tan-awa sa 1 Nefi 11:22]. Ginahimo namon ini para sa Iya. Ang mabudlay ginhimo Niya nga indi na tama kabudlay. Pagkaligad sing pila ka bulan nga pagtindog namon sa puwertahan, ginpasulod na kami sining pamilya. Sang ulihi, nagahiwat na kami sang masunson nga pagpangamuyo kag paghinambalanay parte sa ebanghelyo. Nagluntad ang isa ka malawig nga pag-inabyanay. Ginasimba kag ginapalangga namon Sia paagi sa pagpalangga sang Iya mga anak.”²⁷

Sa pagkilala nga ginapalangga kita sang Dios sing perpekto, ang tagsa sa aton mahimo magpamangkot: “Paano ko ayhan ginapalangga ang Dios? Makasalig bala Sia sa akon pagpalangga samtang nagasalig ako sa Iya? Indi bala manami nga handum ang magkabuhi agud sarang kita palanggaon sang Dios nga indi lang ang aton mga kapaltahan kundi tungod man sa kon mangin ano kita? O, nga mahambal Niya parte sa inyo kag sa akon pareho sang ginsiling niya kay Hyrum, halimbawa, “Ako, nga Ginuo, nagahigugma sa iya bangod sang integridad sang iya tagipusuon.”²⁸ Tandaan naton ang malulo nga laygay ni Juan: “Kay kon nagahigugma kita sa Dios ini nagakahulugan nga nagatuman kita sang iya mga sugo: kag ang iya mga sugo indi tama kabudlay para sa aton.”²⁹

Matuod gid, ang Iya mga kasugoan indi mabudlay—kundi ang kabaliskaran sini. Ginamarkahan sini ang dalan sang pag-ayo, kalipayan, paghidaet, kag kasadya. Ang aton Amay kag ang aton Manunubos nagbugay sa aton sang mga kasugoan, kag sa pagtuman sang Ila mga kasugoan, mabatyagan naton ang Ila perpekto nga gugma sing mas lubos kag mas dako.³⁰

Ari ang solusyon sa aton wala untat nga pagginamo sa karon nga panahon—ang gugma sang Dios. Sa tion sang kahamungaya sa kasaysayan sang Libro ni Mormon nga nagsunod sang pag-alagad sang Manluluwas, ginsiling nga “wala sing pagbinaisay sa kadutaan, tungod sang gugma sang Dios nga nagpuno sa mga tagipusuon sang katawhan.”³¹ Samtang nagatinguha kita padulong sa Sion, dumduma ang promisa sa Bugna: “[Bulahan sila nga nagatuman sang iya mga kasugoan], kag gani may kinamatarong sila sa pagkaon sang bunga sang kahoy sang kabuhi, kag sa pagsulod sa mga pwerta pakadto sa [balaan nga] siyudad.”³²