Mbuotidem Ndinam-nkpo nyung Nkabare-ndi
Otode ke akam, ndidunghore nwed abasi, ye edinam, nnyin imikeme ndikpohode mme edidiong eke heaven inyung idi nti anditiene Andinyanga Jesus Christ.
Esisit ini ke ema ekekot mmi nte General Authority Seventy, ami mma nnyene ufang ndikise President Russel M. Nelson ke ekpri ini. Enye ekedi nkpo unana mbenge idem ke cafeteria, enye ama enehede ofon ido ndikot Elder S. Mark Palmer ye ami nditie nyung nkop inem ke udia uwemeyo ye enye.
“Nso ke nnyin iketing ibanga kini udia uwemeyo ye prophet?” ekedi ekikere emi okodukde esit mi. Ndien ami mbiere ndibup President Nelson me enye ama enyene ndungore mme ndausung ono mi sia ami nketongode ikoot mi. Iboro esie ekedi memem ye nenen; eneye ese mi onyung odoho ete, “Elder Schmeil, ekot fi eno se afo ekemeke ndikabare-ndi.” Ami nsanga mbe ifiok-ukpeb oro nkere mbanga se Abasi oyom ete ami nkabare-ndi. Nte ami nkerede mbanga emi, ami ndifiok ke Enye oyom mi ndi eti ebe, ete, ye eyen-eren ye eti isung utom. Nko mfiok ke kpukpru emi ekeme ndidi nte ami nnamde utom ke ndidi eti mbet Andinyanga Jesus Christ.
Ke akpatre akwa mboho, President Nelson okodoho ete ke: “Ndinam nkpo ekededi ofon oyom ukeme. Ndidi eti mbet Jesus Christ iworoke ikpong.” 1 President Nelson okot nnyin ndinam utom okposong ke ndidi nti mbet Jesus Christ. Enye ododho nnyin ke nditie nte Andinyanga, ana nte nnyin isongo ke mbuotidem ke ndibup, ndinam nwut, ye ndikpep, ye mme nkpo efen.
1. Bup
Enye odoho ete, “Ebenge Ete mbufo ke Heaven, ke enying Jesus Christ, eyom unwam.” 2 Ndiyom nto ke akam edi ukpohode kiet ndifiok nte ndidi eti mbet Jesus Christ.
Ekperede utit utom ukoworo-iko Esie ke otu mbon Nephi ke America, Jesus Christ odok ke heaven. Ebede, mme mbet Esie eboho otokiet, “ediana ke akwa akam ye utre udia. Ndien Jesus inikiet efen owut mmo idem Esie, koro mmo ekebongde akam eno Ete ke enying esie.” 3 Nsidi ntak emi Jesus akafiakde owut mme mbet Esie idem? Koro mmo ekebongde akam; mmo ekebenge.
Ndien enye odoho ete:
“Idahaemi Ami nka mbine Ete. Ndien ke akpaniko ke ndoho mbufo, nkpo ekededi edibupde Ete ke enyin mi eyeno mbufo.
“Ke emi, ebup, ndien mbufo eyebo; ekong, ndien eyeberede eno mbufo; koro enye emi obupde, eyebo; ndien enye emi okongde eyeberede eno.” 4
Nnyin inyene ndibup ke mbuotidem ke ndifiok uduak Obong nyung nyime nte ke Obong ofiok sifonde ye nnyin akan nnyin.
2. Nam-nkpo
Ndinam-nkpo edi akpan ukpohode ke ndidi eti mbet Jesus Christ. Nte nnyin inamde iwut, Enye eye anwam oyung eteme nnyin usung. Ami mmefiok ke Nephi okoyom ndausung oto Obong ndifiok adanga nte edinyenede mme usan brass nto Laban, edi enye ye ndito eka esie iren edomo utim ikaba ndien ikutke unen. Edi mmo ekenam ewut, nko Obong okowut mmo usung. Ke akpatre, Nephi ama akan ke oyoho utime ikata. Enye eti ete ke, “Spirt akada imo usung, ndiem mfiokke mme nkpo emi ndinamde.” 5
Emi edi nte Obong esinamde nkpo nte nnyin isinde ukeme nyung nam nwut okposuk edi nte nnyin minyeneke ata mbufiok kabanga nkpo se idinamde. Obong okodoho Nephi ete se edinamde: ka kemen mme usan itiat oro. Edi Enye ikodohoke Nephi nte edinamde oro. Enye ayak ono Nephi ndikut ke idem esie usung ye ndiyom unwam Obong—ndien emi osop ndidi adanga nte Obong anamde nkpo ke uwem nnyin. Nte nnyin inamde iwut ke mbuotidem, Obong anwam oyung ada nnyin usung.
3. Kpep
Ke 3 Nephi, mme mbet eting eno Andinyanga ete ke mme enini ama odu ke otu mbon owo kabanga enying Ufok Abasi. Ke iboro, Andiyanga ama ekpep akpan ukpep nkpo kini Enye obupde, “Nte mmo ikikootke mme Nwed Abasi?” 6 Ndikpep nko edi akpan ukpohode ke ndidi eti mbet Jesus Christ. Akam ye ndikpeb Nwed Abasi asanga ukem-ukem. Mmo enam utom otokiet ke ufon nnyin. Emi edi ubono-nkpo emi Abasi ekenimde. Tabi ke mme iko Christ; sese, mme iko Christ eyeteme fi kpukpru nkpo emi edinamde” 7
Andinyanga nko ama ekpep ete ke inaha nte nnyin idungode nwed Abasi kpot, edi ana nte ikpep ito mmo, nte Enye akanamde owut mme Nephi: “Ndien edikem nte Jesus owutde kpukpru mme nwed Abasi ke kiet, emi mmo ema ekewet, enye owuk mmo ete ke ana nte mmo ekpep mme nkpo emi enye ekekpepde mmo.” 8
Emi edi ntak kiet ekedide akpan ono Nephi ndifiak nka nkemenmme usan itiat brass: ufokemana esie ema eyom nwed Abasi idihe ndniwam mmo kpot ndisanga nka isong enwongo nko ndinwam mmo ndikpep ndito mmo. Nnyin nko ana iyom ndausung ito mme nwed abasi ke isang nnyin, nko ana nte nnyin ikpep ito mmo ke ufokemana nnyin ye ke mme ikoot eke Ufok Abasi.
4. Nam-nwut man Akabare-edi
Ediwak ini iboro akam ididighe usop-usop. Edi ana nte nnyin inyene mbuotidem ndika iso, ndinam nwut ke edinen ido, nyung nsongo nda nte Nephi kini enye okodomode ndibo mme itiat nwed brass. Obong eyewut nnyin ekpri kini kini; Nte nnyin idungode nwed abasi, Obong eyeno nnyin mme iboro mme ata ukeme ke nnyin ndibe ke usen kiet efen, udua kiet efen, nyung ndomo inikiet efen. Elder Ricard G. Scott ama eting ete: “Nno ekom ete ke ndusuk ndaha Abasi ayak mbufo enwana ke anyan ini mbemiso iboro oro edi. Emi anamde mbuotidem fo okori ye edu fo ndikori.” 9
Otode ke akam ye ndidungode nwed abasi, Obong kpukpru ini ono mi ukeme ndinam nkpo nnyung nyo ke usen kiet efen, udua kiet efen, nnyung mfiak ndomo ini kiet efen. Ediwak ini iboro isidighe usop-usop. Mmenyene mme ibume emi iboro miduhe kanga, edi nka iso ke ndibup nnyung ndungore, nko ami mmekop inemesit nte ke Obong ke aka iso ndino mi ukeme ke ndinam nwut ke nte ami mbetde iboro.
Elder Scott nko okodoho ete, “Nte afo asangade ekpere adanga mbufiok fo ke odukde ekep-kep ndutime, ndinyene mbuotidem, eyeda fi usung ndikut mme iboro emi muduboho ke usung efen.” 10
Ke ndidi eti anditiene Andinyanga Jesus Christ edi isang ini uwem, nko nnyin idi nsio nsio ke mme ndaha, isangade ke nsio nsio ndaha. Ana nte nnyin inyene ke ekikere ke emi idighe mbuba, ndien nnyin idu mi ke ndima nyung nnwam kiet eken. Ana nte nnyin inam iwut man Andinyanga ekeme ndinam utom ye nnyin ke uwem nnyin.
Ke nditing iko nno Sidney Rigdon, Obong okodoho emi: “Ami mmese fi ye utom fo. Ami mmekop akam fo, nnyung mbenge fi idem nno akwa utom.” 11 Ami nting iko nfiense nte ke Obong okop onyung oboro akam, Enye ofiok nnyin, nko Enye enyene akwa utom ono nnyin kiet kiet. Otode ke akam ndidunghore nwed abasi, ye edinam, nnyin imikeme ndikpohode mme edidiong eke heaven inyung idi nti anditiene Andinyanga Jesus Christ.
President Dallin H. Oaks ama ekpep ete “Akpatre Ubiere ikpe idihe ndungore eke kpukpru nti ye ndioi edinam—se nnyin ikenamde. Enye edi ndifiok akpatre utom eke mme edinam ye ekikere nnyin—se nnyin ikabare-idi.” 12
Ami mmekop inem mbanga mme prophets, mme asiak uduak ye mme andiyarade; mmo edi andikpeme edude ke tower. Mmo ekut mme nkpo emi nnyin mikutke. Ami nting iko ntiense nte ke otode ke mme iko mmo, nnyin imikeme ndidi nti anditiene Andinyanga Jesus Christ inyung ibo ndaha nnyin. Ami nting iko ntiense nte ke Christ odu uwem onyunng ofiok nnyin kiet kiet ke owo ke owo. Emi edi ufok Abasi Esie. Ke edisana enying Jesus Christ, amen.