Ima Abasi: Ata Andinyene Inem Nkan ke Ukpong

Ndito-eka irenowo ye iban, ndi afo omofiok ofon danga Abasi, Ete nnyin eke Heaven, amade nnyin? Nte afo omokop ima Esie ke esit ukpong fo?

Kini afo ofiokde onyung enyenede mbufiok kabanga nte enehede ema fi nte eyen Abasi, oro okpuho ofuri nkpo. Oro okpuho danga nte afo ekerede abanga idem fo kini anamde ndudue. Oro okpuho danga nte afo ekerede kini mme mkposong nkpo etibede. Oro okpuho nte afo okutde mme mbet Abasi. Oro okpuho nte afo okutde mbon efen nko ye ukeme fo ke ndinam ukpuhode.

Elder Jeffrey R. Holland ekekpep: “Akpa akamba mbet ke ofuri nsinsi edi ndima Abasi ke ofuri esit nnyin , ukeme, ye odudu—oro edi akamba mbet. Edi akpa akamba akpaniko ke ofuri nsinsi edi ke Abasi amama nnyin ke ofuri esit Esie ukeme, ye odudu.” ¹

Didie ke nnyin owo kiet-kiet ikeme edinehede ke ukpong nnyin akwa akpaniko eke nsinsi oro?

Ekewut prophet Nephi ke nkukut ata enyene odudu nkan uwut nkpo eke ima Abasi. Ke ndise eto uwem, Nephi ama obup ndifiok se oworode. Ke iboro, angel owut Nephi obio kiet, eka, ye nsek eyen. Nte Nephi ekesede ke obio Nazareth ye eti eka Mary, akamade ekpri Jesus ke afara esie, angel eting anwa-anwa, “Sese Eyenerong Abasi, nko, kpa nte Eyen-eren eke Ete Nsinsi!” ²

Ke edisana ini oro, Nephi ama ofiok ete ke Andinyanga edidimana, ke Abasi okowut edisana ye oyoho ima Esie. Nephi etie ntiense abanga ima Abasi ete kemi, “esinde idem esie ke esen idut ke mme esit ndito owo.” ³

Nnyin imikeme ndikut ima Abasi nte unwana emi oworode oto ke eto uwem, owutde idem esie ke kpukpru esen idut ke isong odukde mme esit ndito owo. Unwana ye ima Abasi odu ke kpukpru nkpo-obot Esie. ⁴

Ndusuk ini nnyin ke ndudue imisikere ite ke nnyin ikeme ndikop ima Abasi kpot kini itienede esang ukwak nyung ndia ke mfri oro. Ima Abasi, ke misehe, idige kpot ke ndibo otode mbon oro edide ebine eto edi, edi odudu oro onode nnyin udong ke ndiyom eto oro.

“Ntre, enye edi emi eyomde ekan ke kpukpru nkpo,” Nephi ekekpep, ndien angel ofiori, Ndien, edi ata nnem-nkan ono ukpong.” ⁵

Ke isua Edip emi ekebede, edima owo ufokemana oworo-okpong ke Ufok Abasi. Enye ama enyene ediwak mbume emi iboro mikiduhe. Nnwan esie, emi ekedukde Ufok Abasi, omum mbuotidem esie akama ke akpaniko. Mmo enam okposong utom ke ndikpeme ndo mmo ke mme mfina emi ekedahade ada.

Isua emi ekebede enye ewet mbume ita kabanga Ufok Abasi emi okosongde ye enye ndiyo ndien ono esok mme ebe ye nnwan iba emi ekedide me ufan esie ke ediwak isua. Enye okot mmo ete ekere ebanga mme mbume oro enyung edi ke udia mbubreyo ke ndibuana mme ekikere mmo.

Etienede ndikise emi ye mme ufan, enye oduk ke ubet esie onyung otongo ndinam nkpo. Nneme mbubreyo ye ima emi ekenode enye otode mme ufan esie odu ke ata ekikere esie. Ekem enye afiak ewet ete ke ema enyik enye nditre utom esie. Enye ama odoho ete: “Ediyama unwana oyoho ukpong mi. … Mma nnyene mbufiok mbanga ntotungo ekikere edinam anwanga emi, edi ke enye emi enye akaiso ndikori ke okposong akan nte esidide onyung aka iso ke ediwak minute. Nsuhore ntie sung-sung ye ekikere, emi ami nkedifiokde nte uwutnkpo ima Abasi kabanga mi. … Ami nkop ntuk eke spirit emi ekedohode mi ete ke ami mekeme ndifiak nka ke ufok abasi nnyung nwut ima Abasi emi ke se namde do.”

Ndien enye odu ke mkpaidem abanga mbume esie. Ekikere emi enye okobode ekedi ke Abasi okpono mme mbume esie ndien ke nditre ndinyene mme iboro ikemeke nditre enye ke ndika iso. ⁶ Ana nte enye abuana ima Abasi ye kpukpru kini enye akade iso ke ndikere. Nte enye anamde ke mbufiok oro, enye okop ebuana ye Joseph Smith, emi ekewetde abanga ke Akpa Nkukut ama ekebe, “Ukpong mi ama oyoho ye ima, ndien ke ediwak usen ami mankeme ndidara ye akwa inemesit.” ⁷

Nte ewetde ebanga, ke esisit ofiong ama ekebe, mbon ufok emana emi ama ebo ukem-ukem ikoot emi enye ekenyenede ke mme isua Edip ke edem. Akpa ini enye ekekamade ikoot, enye ama anam mme ubiong utom esie nte eti anam utom owo Ufok Abasi. Idahaemi mbume enode enye ekedi idige “Adanga nte ndinamde ikoot emi enyene unen?” edi “Adanga nkemede ndiwut ima Abasi otode ke utom mi?” Ye obufa usung emi enye okop inemesit, oworode, ye ufon ke kpukpru oruk ikoot esie.

Ndito eka iban ye iren, didie ke nnyin ikeme ndibo odudu ukpuhode eke ima Abasi? Prophet Mormon okot nnyin ete “ibong akam ino Ete ke ofuri odudu esit, man nnyin iyoho ye ima emi, enye okonode kpukpru mbio emi edide ata anditiene Eyen Esie, Jesus Christ.” ⁸ Mormon ikotke nnyin kpot ite ibong akam man nnyin ikeme ndiyoho ye ima Esie onode mbon efen edi ndibong-akam man nnyin ikpefiok ata ima Abasi kabanga idem nnyin ⁹

Nten nnyin ibode ima Esie, nnyin inyene akwa inemesit ke ndinwana ndima nnyung nam nkpo nte Enye akanamde, ndikabade ndi nti anditiene Eyen esie, Jesus Christ.” ¹⁰

Ima Abasi iduhe ke mme nkpo ntibe eke uwem nnyin edi ke iso Esie ke uwem nnyin. Nnyin imifiok ibanga ima Esie kini nnyin ibode odudu akande eke nnyin ye kini spirit Esie emende emem, ndong-esit, ye ndausung edi. Ndusuk ini edi okposong ke ndikop ima Esoie. Nnyin imikeme ndibong akam ke ndinyenentara enyin ke ndikut ubok Esie ke uwem nnyin ye ke ndikut ima ke uya mme nkpo obot Esioe.

Nte nnyin ikerede ibanga uwem Andinyanga ye anana ndo uwa Esie, nnyin imikeme nditongo ndifiok ima Esie ye nnyin. Nnyin ke mimi emi ikwo mme iko eke Eliza R. Snow: “nsong udua iyip Esie ke enye okoduok ke mfon; uwem Esie ke enye okono ke mfon.” ¹¹ Nsuhode idem Jesus ke ndutuho ke ntak nnyin osuhode oduk ke ukpong nnyin, eberede mme esit nnyin ndiyom edifen nno ke ubok Esie ye ndiyoho nnyin ye udong ndidu nte Enye okodude. ¹²

President Russel M. Nelson ekewet ete, “Nte inehede isinifik ke ndinam uwem nnyin etie nte eke Esie, ata edisana ye edifon ke ima nnyin akabade edi.” ¹³

Eyen eren nnyin akabuana: “ kini ami nkedide isua Duopokiet, mme ufan mi ye ami ima-inyime nditama akpa ndaha primary class nnyin. Kini nnyin ikesimde ke akpatre, ke nkpaidem, andikpep okom nnyin ofon. Enye ndien ama ono akam mbungo esit kini emi enye ama ekenehede okom Jehovah ke nnyin ima inyime ndidi classke usen oro ke idem nnyin. Ami nkemeke nditi se ukpep nkpo ekedide mme ata enying andikpep nnyin edi idahaemi, ke mme isua edip-ye-duop amakebe, ami nsuk nnyenyene ndituk kabanga ata ima enye okowutde mi ke usen oro.”

Ke isua ition emi ekebede mma nkut uwut nkpo eke ata ima kini nkodukde Primary ke Russia. Mma nkut enyene mbuotidem eyen-eka nnwan kiet otongode edong ke iso ndito iba onyun etingde iko ntiense owut mmo ete okposuk edi ekpedide mmo kpot ekpedu ke isong, ke Jesus okpokosuk obobo ndutuho onyung akpa ono mmo kpot.

Ami ntinf iko ntiense nte ke Obong ye Andinyanga nnyin ama akpa ono kpukpru nnyin kiet kiet. Ekedi ndiwut anana-ndo ima emi Enye enyenede ono nnyin ye Ete Esie.

“Ami mmofiok nte ke Andifak mi odu-uwem. Ewe ndongesit ke inem udim iko emi ono! … Enye odu uwem man odiong [nnyin] ye ima Esie.” ¹⁴

Yak nnyin ikubode esit nnyin ndibo ata nsasana ima emi Abasi enyenede ono nnyin kiet kiet nko oduok ima Esie oro ke kpukpru se nnyin inamde ye se idide. Ke edisana enying Jesus Christ, amen.