Mmobo Mfon nto Jehovah ke Ofuri Usen Uwem
Didie ke isinam ye afanikong nnyin? Ndi nnyin imekop ndino ekom koro nnyin imese edidiong nnyin ikan mfima nnyin?
Udongo COVID-19 edi kiet ke otu edwak idomo ye mfina emi ndito Abasi esobode ke mbuk ofuri ererimbot. Ke ntongo isua emi, edima ekpuk mi ye ami ekedu ke okposong ini. Udongo emi ye mfina eken eda mkpa ye ubiak edi ufokemana nnyin etiene mkpanga ndusuk mbon ima nnyin. Okposuk enode usobo, utre-udia, ye akam, ke ufang urua ition eyen-eka mi eren Charly, ye eka mi nnwan Susy, ye ukot mi eren Jimmy ema ebe eka ikpehe uwem efen.
Ndusuk ini mmesikere ntak Andinyanga akatuade ke ini Enye okokutde Mary ofuhode ke mkpa eyen-eka esie, Lazarus, ama okodiongo ke Enye enyene odudu ndinam Lazarus eset koro idibihike Andinyanga eyeda odudu emi anyanga ufan Esie osio ke mkpa. 1 Idem akpa mi ke ima ye mbom Andinyanga ekenyenede ono Mary; Enye ama odiongo akwa ubiak emi Mary okokopde ke mkpa eyen-eka esie, Lazarus.
Nnyin imokop ukem akwa ubiak oro ke ini nnyin idiangade ikpong mme ndima oruk nnyin. Andinyanga ama enyene ata mbom abanga nnyin. Enye ikwe ndudue ke ntin-usung nnyin mme ke unana nnyin ndida nkut isang nsinsi nnyin. Edi, Enye enyene mbom abanga mfuho ye ukut nnyin.
Ete ke Heaven ye Eyen Esie, Jesus Christ, eyom nnyin inyene idaresit. 2 President Russell M. Nelson ekpep ete: “Inemesit emi nnyin inyenede isangake nkpo ye mme nkpo-ntibe ke uwem nnyin edi etiene se nnyin iyomde. Adangante edinam nnyin asangade ye uduak erinyanga Abasi, … nnyin iyekop inemesit ifinake se itibede—ye se mitibeke—ke uwem nnyin.” 3
Ini nkedide ekpri missionary, mmeti ini ata eti missionary emi nkamade okobode idioketop. Eka esie ye ekpri eyen eka esie ekekpa ke enyene-ndik unomo. Mission president nnyin ama ono elder emi ufang ndikibuana ke ikpo oro. Edi, ama eketing iko ye ete esie ke phone, missionary emi ama ebiere nditie man ekure mission esie.
Ekpri ini ama ekebe, ke ini ikidude ebiet kiet, ada-nsanga mi ye ami ima ibo mbuat ikot; ino ema eyip enang-ukwak ekenyenede kpasuk missionary emi enyung ekama ikwa eno enye unan. Enye ye ada-nsanga esie ema esanga eka ufok-ibok adade ekpere, emi ami ye ada-nsanga mi ikisobode do ye mmo. Ke usung ikakade ufok-ibok, mma mfuho mbanga missionary emi. Ami nkekere ke spirit esie osuhore ndien ke akpan, ke nkpo ndik emi ama akebe, ke enye oyoyom ndinyong nka obio mmo.
Edi, adangante ikesimde ufok-ibok, nkokut missionary emi nte anade ke mkpana esie, ebet ndibo usobo—kasak imam. Mma nkere,“Enye anam didie asak imam idaha emi?” Nte enye osuk odude ke ufok ibok, enye ama osiongo mkpri nwed ye Nwed Mormon ono mme abia-usobo ye mbon udongo eken. Ke uto idomo emi, enye ikoyomke ndinyong. Edi, enye ama odu tutu akpatre usen mission ye mbuotidem, uko, odudu ye inemesit.
Ke ntongo Nwed Mormon, Nephi ete, “Mma nkut ukut ke mme usen uwem mi, okposukedi emi, mma mbo akwa mfon nto Jehovah ke ofuri eyo uwem mi.” 4
Mmeti ediwak idomo Nephi okokutde, emi ediwak mmo edongode ke nwed esie. Idomo esie anam idiongo ke kpukpru nnyin imenyene nkim-nkim usen. Kiet ke mme idomo emi ekedi ke ini ekedongde Nephi afiak aka Jerusalem man okobo itiat-nwed brass emi Laban akakamade. Ndusuk ndito eka Nephi ekedi mbon mkpri mbuotidem, emi ekekam emiade Nephi ke ikpa. Nephi amakut idomo efen ke ini enye okobungde utiha esie ndien ikemeke ndida udia nsok ekpuk esie. Ke ini ekedongde Nephi obop ubom, ndito eka esie ema esak enye enyung esin ndinwam enye. Ke kpukpru emi ye ekese idomo efen, ke isang uwem esie, Nephi esiti mfon Abasi kpukpru ini.
Ke ini ufokemana esie ekebede akwa inyang ke usung ndika isong enwongo, ndusuk mbon ekpuk Nephi “ema enam idara,” esong enyin, enyung efre ke edi odudu Abasi okomum mmo akama. Ke ini Nephi asuade ono mmo, mmo ema eyat esit enyung ebop enye ke uruk tutu enye ikemeke ndimenere idem. Nwed Mormon Ewetde ette ke ndito ete esie “ema eno [enye] okposong ufen”; itong-ubok esie ye itong-ukot “ema eyok, enyung ebiak mi okposong” 5 Nephi ama ofuho ke isongesit ndito eka esie, onyung odu ke ukut ediwak ini. 6 “Okposuk edi emi,” enye ette, “Ami nkese Abasi, ndien ami nkotoro Enye kpukpru usen; ndien ami nkosukke Jehovah uyo ke ntak ukut mi.” 7
Ndima iren ye iban, nnyin isinam didie ke afanikong nnyin? Ndi nnyin imosuk Jehovah uyo ke ntak mmo? Mme, nte Nephi ye akani missionary ufan mi, ndi nnyin imeti ndikom ke iko inua, ekikere, ye edinam; koro nnyin imese edidiong nnyin ikan mfima nnyin?
Andinyanga nnyin, Jesus Christ, ama ono nnyin uwutnkpo ke ini utom Esie ke isong. Ke ini afanikong ye idomo, odu mme mkpo emi enode nnyin emem ye uyuho ekan ndinwam owo efen. Nwed Matthew eting se iketibede ke ini Andinyanga okokopde ke Edidem Herod ama esibe ibuot oruk Esie John the Baptist man anam esit enem adiaha Herodias.
“Ekem mbet John edi, emen okpo esie ekebuk, enyung edaha eketing eno Jesus.
“Edi ke ini Jesus okopde mkpo emi, Enye ediere ke ubom, adaha ke oto oro, aka ke ebiet eke edide desert; ndien ke adanga mme otu owo ekopde, mmo esanga ke ukot etiene Enye.
“Ndien Jesus oworo ke ubom okut akwa otu owo, onyung atua mmo mbom, onyung okok mbon udongo mmo.
“Edi ke ini mbubreyo, mbet etiene Enye ,edoho ette, Ebiet emi edi desert, ini ama onyung ebe; dong mme otu owo enyongo, man mmo eka ke obio-inwang ekedep udia eno idem mmo.
“Edi Jesus odoho mmo ete, Mmo ekukpa ndinyongo; mbufo eno mmo mkpo edia.” 8
Jesus Christ ama owut nnyin ete ke ini idomo ye afanikong, nnyin imekeme ndikut afanikong mbon efen. Ke mbom, imekeme ndisanga mkpere inyung idibere mmo. Ndien nte inamde ntre, edibere nnyin nko, oto utom Christ inamde. President Gordon B. Hinckley ette, “Nkukure mkpo akpande mfina edi utom. Nkukure ibok okokde mmem-idem edi ndino unwam. Nkukure edikok ke edikpa-mba edi mfina ndinwam owo emi enehede okop mmem-idem.” 9
Ke Ufok-Abasi Jesus Christ emi, ami mmenyene ediwak ufang ndise nyung nwam mbon efen. Edi ke mme ini oro ke ami ndikop nte Ete Heaven obiomore mbiomo mi. President Russell M. Nelson edi nkukure prophet Abasi ke isong, enye edi akamba uwut-mkpo nte nnyin ikpinwamde mbon efen ke ini okposong idomo. Ami mmadian iko ntiense mi ye eke ediwak ikot-Abasi nte ke Abasi edi edima Ete Heaven nnyin. Ami mmokop anana-mbiet ima esie ke mme nkim-nkim usen mi. Andinyanga nnyin, Jesus Christ, odiongo ubiak ye afanikong nnyin. Enye oyom mbiomo nnyinefere onyung ndiong nnyin. Ana itiene uwut-mkpo Esie ke ndinwam nnyung mkpeme mbon oro ebiomde mbiomo okponde akan eke nnyin. Ke enying Jesus Chrst, amen.