Yexus Khetos Yog cov Tub Hluas Ntxhais Hluas lub Dag Zog
Cia li tso siab rau Yexus Khetos. Nws yuav coj nej mus rau txoj kev yog. Nws yog nej dag zog.
Thaum kuv tau npaj kuv zaj lus, kuv tau txais kev tshoov siab kom hais lus rau cov tub hluas ntxhais hluas.
Kuv kuj hais rau cov uas yog tub hluas ntxhais hluas thaum yav tas los, tsis hais cov uas tsis nco qab lub sij hawm ntawd lawm.
Thiab kuv hais rau cov uas hlub peb cov tub hluas ntxhais hluas thiab xav kom lawv vam meej hauv lub neej no.
Tiam neeg uas tab tom loj hlob tuaj, kuv muaj ib zaj lus rau nej los ntawm nej tus Cawm Seej, Yexus Khetos.
Tus Cawm Seej zaj Lus rau Nej
Kuv cov phooj ywg hluas, yog tus Cawm Seej sawv ntawm no tam sim no, Nws yuav hais li cas rau nej?
Kuv ntseeg tias thaum xub thawj Nws yuav qhia nej tias Nws hlub nej kawg. Tej zaum Nws yuav hais li ntawd, tiam sis nej kuj yuav hnov qhov ntawd nyob hauv nej lub siab—vim Nws nyob ntawd xwb—nej thiaj li yuav paub qhov no muaj tseeg kawg nej lub siab lub ntsws!
Tiam sis, vim peb sawv daws qaug zog thiab tsis yog neeg zoo tag nrho, tej zaum yuav muaj tej kev txhawj nkag hauv nej lub siab. Tej zaum nej yuav nco txog tej lub sij hawm uas nej ua yuam kev, nej raug kev ntxias, muaj tej yam uas kheev lam nej tsis tau ua—los sis nej tau ua zoo dua.
Tus Cawm Seej yuav paub li ntawd, thiab kuv ntseeg tias Nws yuav nplij nej lub siab thaum Nws hais tej lus los ntawm cov vaj lug kub:
“Tsis txhob ntshai.”1
“Txhob ua xyem xyav.”2
“Cia li zoo siab.”3
“Cia li txais kev nplij siab.”4
Kuv tsis xav tias Nws yuav hais tias qhov uas nej ua yuam kev tsis tseem ceeb. Nws yuav tsis qhia tias tej ntawd tsis ua li cas. Tiam sis, Nws yuav hais kom nej hloov siab lees txim—tso nej tej kev txhaum tseg, hloov siab, kom Nws yuav zam txim pub rau nej. Nws yuav qhia nej tias 2,000 xyoos tas los Nws twb theej nej lub txhoj kom nej yuav muaj cib fim hloov siab lees txim. Nov yog ib feem ntawm txoj hau kev zoo siab uas peb Leej Txiv Saum Ntuj Ceeb Tsheej tau pub rau peb.
Yexus yuav qhia nej tias nej tej kev khi lus uas nej nrog Nws khi—thaum nej ua kev cai raus dej thiab rov qab khi lus thaum nej txais lub cim nco txog—ua rau nej nrog Nws sib txuas. Kev sib txuas uas cov vaj lug kub piav tias nej koom siab nrog nraim Nws ua ke, nej thiaj li yuav muaj Nws txoj kev pab ris txhua lub nra.5
Kuv ntseeg tias tus Cawm Seej Yexus Khetos yuav xav kom nej pom, hnov, thiab paub tias Nws yog nej lub dag zog. Thiab thaum Nws pab nej, ces yeej tsis muaj ciaj ciam uas tav nej kev. Nej muaj peev xwm uas tsis paub kawg. Nws yuav xav kom nej saib nej tus kheej ib yam li Nws saib nej. Thiab Nws txoj kev saib nej los yeej tsis zoo li neeg ntiaj teb saib nej.
Tus Cawm Seej yuav qhia nej tias nej kom paub tseeb tias nej yog Vajtswv uas Muaj Chim Loj Kawg Nkaus ib tug me nyuam. Nej Leej Txiv Saum Ntuj Ceeb Tsheej yog tus uas muaj yeeb koob ntau tshaj hauv lub ntiaj teb, muaj kev hlub puv npo, kev xyiv fab, kev dawb huv, kev kaj, kev tshav ntuj, thiab kev tseeb. Thiab Nws xav kom nej txais tag nrho txhua yam Nws muaj los ua nej tug.6
Yeej yog vim li no nej thiaj li nyob hauv lub ntiaj teb—kom kawm, loj hlob, thiab vam meej thiab hloov los ua neeg zoo li nej Leej Txiv Saum Ntuj Ceeb Tsheej xav kom nej ua.
Xwv kom muaj li no, Nws tau txib Yexus Khetos los ua nej tus Cawm Seej. Yog lub hom phiaj ntawm Nws txoj hau kev zoo siab, Nws lub Koom Txoos, Nws lub pov thawj hwj, cov vaj lug kub—tag nrho tej ntawd.
Nej txoj hmoov yeej yog li ntawd. Nej lub neej tom ntej yeej yog li ntawd. Nej yeej xaiv tau li ntawd
Qhov Tseeb thiab tej Kev Xaiv
Qhov tseem ceeb ntawm Vajtswv txoj hau kev zoo siab yog nej txoj kev xaiv.7 Muaj tseeb tiag, nej Leej Txiv Saum Ntuj Ceeb Tsheej xav kom nej xaiv txoj sia nyob mus ib txhis, thiab Nws yuav pab nej txais tau, tiam sis Nws yeej yuav tsis yuam nej.
Yog li ntawd Nws cia nej xaiv: Qhov kaj los sis qhov tsaus? Qhov zoo los sis qhov phem? Kev xyiv fab los sis kev nyuaj siab? Txoj sia nyob mus ib txhis los sis kev tuag ntawm sab ntsuj plig?8
Zoo li yog ib qho yooj yim rau nej xaiv, yom? Tiam sis, nyob hauv lub ntiaj teb no, ntshe qhov no nyuaj tshaj qhov neeg xav.
Qhov teeb meem yog qhov uas peb tsis pom meej npaum li peb xav pom. Tus Thwj Tim Povlauj tau hais tias “peb pom zoo li tus duab plooj plooj uas nyob hauv daim tsom iav xwb.”9 Muaj kev ntxhov siab heev vim tsis paub tseeb tias qhov twg yog qhov yog thiab yog qhov phem. Neeg muab qhov tseeb hloov kom neeg hu qhov phem ua qhov zoo thiab qhov zoo ua qhov phem.10
Tiam sis thaum nej rau siab nrhiav qhov tseeb—tej yam tseeb uas tsis hloov mus ib txhis li—ces nej yuav pom meej paub xaiv qhov yog. Nej tseem yuav raug kev ntxias thiab kev sim siab. Nej tseem yuav raug tej yam phem thiab. Tej yam uas ua rau nej xav tsis thoob. Yuav raug kev txom nyem thiab. Tiam sis nej yuav kov yeej thaum nej paub tias nej yog leej twg, vim li cas nej nyob no, thiab thaum nej tso siab rau Vajtswv.
Yog li ntawd, nej nrhiav qhov tseeb nyob qhov twg?
Nyob hauv Yexus Khetos txoj moo zoo. Tag nrho txoj moo zoo ntawd yog qhia hauv Yexus Khetos lub Koom Txoos ntawm Tsoom Haiv Neeg Ntseeg ntawm Hnub Nyoog Kawg.
Yexus Khetos hais tias, “Kuv yog txoj kev, yog qhov tseeb thiab yog txoj sia; tsis muaj leej twg mus cuag tau Leej Txiv tsuas yog mus ntawm kuv mus xwb thiaj tau.”11
Thaum nej yuav tsum xaiv tej yam tseem ceeb, ces kev xaiv Yexus Khetos thiab Nws txoj moo zoo yeej yog kev xaiv zoo tshaj plaws. Thaum nej muaj lus nug, Yexus Khetos thiab Nws txoj moo zoo yog lus teb zoo tshaj plaws. Thaum nej qaug zog, Yexus Khetos yog nej lub dag zog.
Nws muab hwj chim rau cov neeg nkees; thiab Nws muab zog rau cov uas xav tias lawv tsis muaj hwj chim.
Cov uas cia siab tos ntsoov tus Tswv yuav rov qab muaj zog.12
Ntxiv Dag Zog rau cov Tub Hluas Ntxhais Hluas
Kom pab nej nrhiav tau txoj Kev thiab pab nej coj raws li Yexus Khetos cov lus qhuab qhia, Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg tau npaj ib phau ntawv tshiab, uas yog kev rov qab muab phau Ntxiv Dag Zog rau cov Tub Hluas Ntxhais Hluas luam tawm.
Txij thaum 50 xyoo tawm los, Ntxiv Dag Zog rau cov Tub Hluas Ntxhais Hluas tau pab coj cov tub hluas ntxhais hluas uas yog Haiv Neeg Ntseeg hauv Hnub Nyoog Kawg. Kuv yeej muaj ib phau nyob hauv kuv hnab tsho, thiab kuv muab rau cov neeg uas xav paub tias peb coj tej kev cai twg. Twb tau kho phau no kom pab kov yeej tej teeb meem thiab tej kev ntxias uas muaj niaj hnub nim no. Yuav muab phau Ntxiv Dag Zog rau cov Tub Hluas Ntxhais Hluas no luam tawm ua 50 yam lus lub hli no. Phau no yuav pab nej txiav txim siab txog tej yam tseem ceeb hauv nej lub neej. Thov yuav ib phau rau nej tus kheej thiab muab tej phau rau nej cov phooj ywg thiab.
Phau Ntxiv Dag Zog rau cov Tub Hluas Ntxhais Hluas tshiab no kuj muaj lub npe hais tias Ib Phau Pab Nej Xaiv Qhov Yog.
Xav qhia meej tias tus coj kev zoo tshaj plaws uas nej muaj kom pab nej xaiv qhov yog yeej yog Yexus Khetos. Yexus Khetos yog cov tub hluas ntxhais hluas lub dag zog.
Yog li ntawd lub hom phiaj ntawm phau Ntxiv Dag Zog rau cov Tub Hluas Ntxhais Hluas yog kom nej mus cuag Nws. Phau no qhia nej txog tej yam tseeb mus ib txhis li ntawm Nws txoj moo zoo—tej yam tseeb txog qhov uas nej yog leej twg, Nws yog leej twg, thiab nej muaj peev xwm ua dab tsi thaum muaj Nws lub dag zog pab nej. Phau no qhia nej kom paub xaiv kev ncaj ncees los ntawm tej yam tseeb mus ib txhis li no.13
Xav kom nej paub tias phau Ntxiv Dag Zog rau cov Tub Hluas Ntxhais Hluas tsis ua tej yam twg. Phau no tsis txiav txim siab rau nej. Phau no tsis qhia tias “ua” los sis “tsis ua” txog txhua yam uas nej yuav tsum xaiv. Phau Ntxiv Dag Zog rau cov Tub Hluas Ntxhais Hluas tsom ntsoov rau lub hauv paus ntawm tej yam uas nej xaiv. Phau no tsom ntsoov rau tej ntsiab cai, tej kev cai, thiab cov lus qhuab qhia thiab tsis qhia txog txhua yam uas yus ua.
Tus Tswv, dhau los ntawm Nws cov yaj saub, yeej tau coj peb mus rau txoj kev ntawd. Nws thov kom peb “sab ntsuj plig yuav haj yam muaj peev xwm txais kev tshwm sim”14 Nws caw peb kom “mloog Nws hais.”15 Nws hu peb kom coj raws li Nws ua tej yam siab thiab dawb huv ntxiv.16 Thiab peb kawm ib yam li no txhua lub lim tiam hauv phau Los, Nrog Kuv Mus.
Tej zaum thaum peb sau phau ntawv no tau xav tias yuav sau ntau yam txog tej khaub ncaws uas nej yuav tsum tsis txhob hnav, tej lus nej yuav tsum tsis txhob hais, thiab tej movie uas nej yuav tsum tsis txhob saib. Tiam sis qhov ntawd puas pab hauv ib lub koom txoos uas muaj nyob thoob plaws lub ntiaj teb? Qhov ua li ntawd puas npaj nej kom ua neej raws li Yexus Khetos tas mus li?
Joseph Smith tau hais tias, “Kuv qhia lawv tej ntsiab cai yog, thiab lawv mam li tswj hwm lawv tus kheej.”17
Thiab Vaj Ntxwv Npeyamis tau qhia nws cov neeg nyob hauv Phau Ntawv Maumoos hais tias, “Kuv tsis muaj peev xwm qhia nej txhua yam uas yuav ua rau nej ua txhaum; vim muaj ntau txoj kev thiab ntau hom, twb muaj ntau heev ua rau kuv suav tsis txheeb.”18
Vaj Ntxwv hais ntxiv tias, “Tiam sis kuv qhia tau rau nej npaum li no, hais tias … [cia li] xyuas nej tus kheej, thiab nej tej kev xav, thiab nej tej lus, thiab tej uas nej ua, thiab ua raws li Vajtswv tej lus txib, thiab yeej meem ntseeg … tus Tswv … kom mus txog thaum nej txoj sia kawg.”19
Qhov uas muaj kev cai puas yog kev txhaum? Yeej tsis yog li ntawd. Peb yuav tsum muaj kev cai txhua hnub. Tiam sis yeej yog kev txhaum yog peb tsom ntsoov rau tej kev cai thiab tsis tsom ntsoov rau tus Cawm Seej. Nej yuav tsum paub vim li cas thiab ua li cas ces xav txog qhov uas yuav raug li cas los ntawm tej yam nej xaiv. Nej yuav tsum tso siab rau Yexus Khetos. Nws yuav coj nej mus rau txoj kev yog. Nws yog nej dag zog.20
Lub Hwj Chim ntawm cov Lus Qhuab Qhia Tseeb
Ntxiv Dag Zog rau cov Tub Hluas Ntxhais Hluas yeej qhia ncaj txog Yexus Khetos cov lus qhuab qhia. Phau no caw nej xaiv raws li Khetos cov lus qhuab qhia. Thiab phau no piav meej txog cov koob hmoov uas Yexus Khetos cog lus tias cov uas coj raws li Nws txoj Kev mam li txais.21
Thawj Tswj Hwm Russell M. Nelson qhia tias: “Thaum nej xav cia Vajtswv yeej xwb [nyob hauv nej lub neej], … ces tej kev txiav txim feem ntau haj yam yooj yim txiav. … Tej teeb meem ntau heev ploj mus xwb! Yus paub tu yus tus kheej. Yus paub saib thiab nyeem dab tsi, siv sij hawm li cas, thiab ua phooj ywg nrog leej twg. Yus paub tias yus xav ua dab tsi. Yus paub tias yus … xav ua ib tug neeg zoo li cas.”22
Ib txoj Kev Cai Siab
Yexus Khetos muaj tej kev cai siab heev rau cov uas coj raws li Nws. Thiab qhov uas Nws caw kom nej mob siab xav ua raws li Nws lub siab nyiam thiab ua raws li Nws tej lus tseeb yeej yog kev cai siab tshaj plaws!
Tej kev xaiv ntawm sab cev nqaij daim tawv thiab sab ntsuj plig yuav tsum tsis txhob raws li yus lub siab nyiam xwb, los sis raws li tej yam uas yooj yim los sis lwm tus nyiam xwb.23 Tus Tswv tsis hais tias, “Ua li nej xav los xij.”
Nws hais tias, “Cia Vajtswv yeej.”
Nws hais tias, “Los nrog kuv mus.”24
Nws hais tias, “Ua neej dawb huv tshaj, siab tshaj, coj zoo tshaj.”
Nws hais tias, “Ua raws li kuv cov lus txib.’
Yexus Khetos yog tus uas coj yam ntxwv zoo tag nrho, thiab peb siv tag nrho peb ub zog kom coj raws li Nws.
Kuv cov phooj ywg zoo, kuv rov qab hais tias yog tus Cawm Seej sawv ntawm no hnub no, Nws yuav qhia nej tias Nws hlub nej kawg, Nws tso siab rau nej. Nws yuav qhia nej tias nej muaj peev xwm ua li no. Nej muaj peev xwm tsim ib lub neej zoo siab vim Yexus Khetos yog nej lub dag zog. Nej yuav ua siab loj, muaj kev kaj siab lug, kev nyab xeeb, kev zoo siab, thiab kev koom siab tam sim no thiab nyob mus ib txhis li, vim nej yuav muaj tag nrho tej no los ntawm Yexus Khetos, Nws txoj moo zoo, thiab Nws lub Koom Txoos.
Los ntawm qhov uas kuv yog ib tug Thwj Tim ntawm tus Tswv Yexus Khetos, kuv ua tim khawv txog qhov no thiab foom koob hmoov rau nej vim kuv hlub nej heev, los ntawm Yexus Khetos lub npe, amees.