Tus Txheej Txheem Ua Thwj Tim

Tag kis no wb ob tug me nyuam thiab peb tus me nyuam xeeb ntxwv hauv Amelikas Sab Qaum Teb, thiab ib nrab neeg ntiaj teb pom lub hnub tawm hauv sab hnub tuaj. Wb lwm peb tug me nyuam thiab xya tus me nyuam xeeb ntxwv uas nyob tim Africa, thiab lwm nrab neeg ntiaj teb, pom lub ntuj tsaus zuj zus thaum lub hnub poob tim sab hnub poob.

Qhov uas pheej muaj hnub thiab hmos ntuj yog ib yam uas niaj hnub ua rau peb nco txog tej yam hauv peb lub neej uas peb hloov tsis tau. Thaum peb saib tau thiab ua kom haum tej kev tseeb uas kav mus ib txhis no, peb thiaj muaj kev thaj yeeb nyab thiab kev sib haum xeeb. Thaum peb tsis ua li ntawd, peb nyob tsis tswm, thiab txhua yam tsis mus raws li peb xav.

Nruab hnub thiab hmo ntuj yog ib qho piv txwv txog tej tus txheej txheem uas Vajtswv tau muab rau txhua tus neeg uas tau nyob hauv lub ntiaj teb no, uas qhia txog tej kev tseeb. Nws yog ib qho tseeb rau lub neej no uas peb hloov tsis tau tab txawm peb lub siab xav li cas thiab sim muab pauv li cas los xij. Kuv nco txog qhov no txhua lub sij hawm kuv ya dav hlau tim Africa tuaj koom lub tuam rooj sab laj no, yuav tsum ua rau kuv lub cev swm qhov uas sij hawm pauv rov qab 10 teev hauv ib hnub kiag.

Thaum twg peb nco qab ntsoov, peb yeej pom tias Leej Txiv Saum Ntuj Ceeb Tsheej twb muab tim khawv ntau txaus lawm txog tej kev tseeb uas kav peb lub neej xwv kom peb yuav paub Nws thiab txais tej koob hmoov uas yog kev thaj yeeb thiab kev zoo siab.

Dhau ntawm tus Yaj Saub Joseph Smith, tus Tswv tus Ntsuj Plig qhia tseeb tias, “Thiab ntxiv, kuv yuav muab ib tug txheej txheem ntawm txhua yam rau nej, kom nej yuav tsis raug ntxias; vim Xatas twb mus rau qhov txhia chaw hauv thaj av, thiab nws mus ntxias tej haiv neeg.”¹

Khaulihos tus neeg tawm tsam Yexus raug kev dag ntxias li no, vim nws tsis ntseeg hais tias muaj Vajtswv thiab tias Yexus tseem yuav los. Tus yaj saub Amas hais lus tim khawv rau nws hais tias, “Txhua yam qhia tias muaj ib tug Vajtswv; muaj tseeb tiag, tsis hais lub ntiaj teb, thiab txhua yam uas nyob hauv lub ntiaj teb, muaj tseeb tiag, thiab lub ntiaj teb txoj kev tig, muaj tseeb tiag, thiab tag nrho tej ntiaj teb uas txav li ib txwm txav twb ua tim khawv tias muaj ib tug Tsim Siab Kawg Nkaus.”²

Thaum Khaulihos xav tau ib lub cim ua ntej nws kam ntseeg, Amas ua rau nws hais tsis tau lus. Vim raug txom nyem li no nws thiaj txo hwj chim, Khaulihos thiaj lees hais tias dab ntxwg nyoog twb dag nws lawm.

Peb tsis tas yuav raug kev dag li no. Qhov txuj ci uas yog lub neej zoo kawg no yeej nyob rau ntawm peb qhov muag. Thaum lam ntsia saum ntuj pom cov hnub qub uas suav tsis txheeb qhov ntawd yeej ua rau yus ntseeg yus thiaj xav hu zaj nkauj hu ua “Kuv tus Vajtswv, … koj zoo kawg nkaus!”³

Muaj tseeb tiag, Vajtswv peb Leej Txiv Saum Ntuj Ceeb Tsheej muaj sia nyob, thiab Nws qhia Nws tus kheej rau peb pom ua ntau tsav ntau yam.

Tiam sis yog yuav lees paub, ntseeg, thiab pheej tso siab rau Vajtswv, peb lub siab yuav tsum kam txais yuav tus Ntsuj Plig rau qhov tseeb. Amas qhia tias kev txo hwj chim los ua ntej kev ntseeg.⁴ Maumoos qhia ntxiv hais tias leej twg uas tsis “muaj siab mos siab muag thiab txo siab txo ntsws” yuav tsis muaj kev ntseeg thiab kev cia siab txaus kom txais tau Vajtswv tus Ntsuj Plig.⁵ Vaj Ntxwv Npeyamis tshaj tawm hais tias leej twg uas tso siab rau lub yeeb koob hauv ntiaj teb no yog “Vajtswv ib tug yeeb ncuab.”⁶

Thaum Yexus Khetos los ua kev cai raus dej kom ua tau txhua yam kev ncaj ncees, tab txawm Nws ua ncaj ncees thiab dawb huv los, Yexus qhia kev txo hwj chim rau ntawm Vajtswv yog ib tug cwj pwm ntawm Nws cov thwj tim.⁷

Tag nrho cov thwj tim tshiab yuav tsum qhia lawv txoj kev txo hwj chim rau ntawm Vajtswv thaum lawv los ua kev cai raus dej. Yog li ntawd “tag nrho cov uas txo lawv hwj chim rau Vajtswv, thiab xav ua kev cai raus dej, thiab los nrog lub siab puas tas thiab lub siab xav ua zoo … ces yuav txais cov no los mus rau hauv nws lub koom txoos los ntawm kev cai raus dej.”⁸

Kev txo hwj chim ua rau yus xav hloov siab lees txim thiab mloog lus. Vajtswv tus Ntsuj Plig thiaj li muaj cuab kav coj qhov tseeb los rau hauv yus lub siab, thiab yuav nkag mus tog rau hauv nruab siab.⁹

Twb yog thaum tsis muaj kev txo hwj chim thiaj li muaj raws li tus Thwj Tim Povlauj cov lus qhia txog lub caij nyoog kawg hais tias:

“Rau qhov tej neeg nyias yuav xav txog nyias xwb, lawv yuav xav tsis txog lwm tus li. Lawv yuav ntshaw nyiaj, yuav khav theeb, yuav muab hlob, yuav tsis mloog niam txiv lus, yuav tsis ris luag txiaj ntsig, thiab yuav saib tsis taus Vajtswv txoj kev cai,

“Lawv yuav tsis sib hlub, tsis zam txim rau lwm tus, nyiam taug xaiv, tsis tswj lawv lub siab, ua neeg tsiv tsaim thiab tsis nyiam ua zoo.”¹⁰

Tus Cawm Seej txoj kev caw peb los kawm txog Nws yeej yog caw peb kom txhob ua raws li neeg ntiaj teb thiab rais los mus ua neeg zoo li Nws—txo hwj chim thiab muaj siab mos siab muag. Peb thiaj li pab ev tau Nws tus quab thiab yuav nrhiav pom tias nws sib heev—hais tias kev ua nws ib tug ntseeg tsis yog ib lub nras tiam sis yog txoj kev zoo siab, ib yam li Thawj Tswj Hwm Russell M. Nelson twb qhia rau peb ntau zaus los lawm.

Txoj kev kawm txog Khetos thiab Nws tej kev yuav coj peb los paub thiab hlub Nws.

Nws ua yam ntxwv rau peb hais tias thaum yus txo hwj chim yus thiaj paub thiab hlub Vajtswv Leej Txiv kawg siab kawg ntsws thiab yuav hlub tau lwm tus neeg thaum peb hlub peb tus kheej, txhob tseg ib yam dab tsi. Nws txoj kev qhuab qhia hauv ntiaj teb no, thaum Nws tso Nws lub siab thiab Nws lub cev rau saum lub thaj, kuj yog ib tug txheej txheem rau peb raws qab twb yog tej ntsiab cai uas ua lub hauv paus rau Nws txoj moo zoo. Ob txoj ntsiab cai no yog saib sab nraud thiab seb peb nrog lwm tus neeg sib raug zoo li cas, tsis yog nrhiav tej yam uas yus lub siab nyiam los sis ua kom yus muaj yeeb koob.

Qhov zoo kawg nkaus yog thaum peb sib zog sim hlub Vajtswv thiab lwm tus neeg, peb thiaj pom hais tias peb muaj nuj nqi li cas vim peb yog, Vajtswv cov tub cov ntxhais, muaj kev thaj yeeb thiab kev zoo siab puv npo.

Peb yuav nrog Vajtswv thiab lwm tus neeg sib koom siab thaum muaj kev hlub thiab kev sib pab. Ces thaum ntawd peb txais tau lus tim khawv los ntawm tus Vaj Ntsuj Plig Dawb Huv txog kev hlub dawb paug ntawd, uas yog lub txiv uas Lihais qhia tias “yog cov uas qab zib tshaj txhua yam uas [nws] tau noj tas los.”¹¹

Yexus txais tag nrho lub hwj chim uas Leej Txiv muaj vim hais tias Nws tau muab thiab ua tus yam ntxwv txog Leej Txiv txoj kev hlub, es qhov ntawd twb yog kev tsa nto.¹²

Qhov uas peb txawj hlub Vajtswv thiab peb cov neeg zej zog pib hauv tsev thaum peb niaj hnub nrog Leej Txiv sib raug zoo thiab thov Vajtswv ua ib tse neeg los ntawm Leej Tub lub npe, ua ke kawm txog Nkawd thaum tej tus neeg thiab tsev neeg kawm vaj lug kub ua ke, ua tib zoo saib xyuas Hnub Caiv kom dawb huv ua ke, thiab txhua tus muaj daim ntawd tso cai nkag mus hauv lub tuam tsev, siv kom mus hauv lub tuam tsev ua ke ntau npaum li peb ua tau.

Thaum peb txhua tus kawm ntxiv thiab hlub Leej Txiv thiab Leej Tub, peb haj yam muaj kev ris txiaj thiab kev hlub rau lwm tus neeg. Peb thiaj haj yam muaj cuab kav hlub thiab pab cov neeg uas nyob sab nraum peb lub tsev.

Tej yam uas peb ua hauv tsev yeej yog qhov uas pab peb ua cov thwj tim muaj kev zoo siab ntev mus. Tej koob hmoov zoo tshaj hauv txoj moo zoo uas muab txum tim rov qab los uas kuv tus poj niam, Gladys, wb muaj hauv tsev yog vim wb kawm paub thiab hwm Vajtswv hauv tsev thiab muab Nws txoj kev hlub rau wb cov me tub me nyuam.

Txoj kev hlub Vajtswv thiab ib leeg pab ib leeg hauv tsev thiab kev pab lwm tus neeg sab nraum tsev yuav loj hlob tuaj ua qhov uas peb hu ua kev siab hlub.

Qhov no yog tus txheej txheem txog kev ua hauj lwm hauv Vajtswv lub nceeg vaj uas tus Tswv cov yaj saub thiab cov thwj tim twb qhia rau peb lawm. Peb thiaj nrog lawv sib koom ib lub siab.

Peb thiaj yuav muaj cuab kav, dhau ntawm lawv, saib tus Tswv “hauv txhua yam kev xav,” kom peb thiaj yuav “tsis poob siab” los sis “tsis ntshai.”¹³

Zoo li tus Tswv cov yaj saub thiab thwj tim uas muaj sia nyob, peb yuav tawm mus muaj “lub siab … muaj txoj kev siab hlub puv nkaus rau txhua tus neeg, thiab … rau tsev neeg uas muaj kev ntseeg, [thiab] cia kev tsim txiaj txhawb [peb] tej kev xav kom tsis tu ncua; … [thiab peb] txoj kev tso siab yuav muaj zog tuaj nyob ntawm Vajtswv xub ntiag; thiab lub pov thawj hwj tej lus qhuab qhia … yuav teev los rau [peb] tus ntsuj plig ib yam li tej lwg los saum ntuj los.”

Nrog tus Tswv cov yaj saub thiab thwj tim uas muaj sia nyob, peb yuav sib koom siab muaj kev ntseeg thaum peb pab tau lwm tus neeg thaum “tus Vaj Ntsuj Plig Dawb Huv … ua [peb] tus khub tsis tu tsis tseg, thiab [peb] tus cwj vaj yog tus cwj vaj ntawm kev ncaj ncees thiab kev tseeb uas tsis hloov li; thiab [peb] txoj kev kav … yog txoj kev kav uas kav ib txhis, thiab [peb] txoj kev kav … ntws los rau [peb] mus ib txhiab thiab ib txhis tsis muaj kev quab yuam.”¹⁴ Rau qhov nov yog txoj kev cog lus hauv Leej Txiv txoj hau kev. Los ntawm Yexus Khetos lub npe, amees.