Tsom Ntsoov rau lub Tuam Tsev

Los ntawm Thawj Tswj Hwm Russell M. Nelson

Thawj Tswj Hwm ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg

Kuv cog lus tias kev siv sij hawm hauv lub tuam tsev ntxiv yuav ua rau nej txais tau cov koob hmoov zoo dua li lwm yam.

Cov kwv tij thiab cov muam, nyob hauv tsib tuas ntawm lub tuam rooj sab laj no, peb tau rov qab pom ib zaug ntxiv hais tias Vajtswv tau qhib lub rooj ntug! Kuv cia siab tias nej tau sau ntawv txog nej tej kev tshoov siab thiab yuav ua raws li tej ntawd. Peb Leej Txiv Saum Ntuj Ceeb Tsheej thiab Nws Leej Tub, Yexus Khetos, yeej tos ntsoov kom pab nej. Kuv thov kom nej yuav siv zog ntxiv nrhiav Nkawd txoj kev pab.

Tsis ntev tas los, Muam Nelson thiab kuv wb muaj cib fim saib kev ua yeeb yam thib 4 ntawm Phau Ntawv Maumoos cov Vidi-aus tshiab.¹ Ua rau wb txais kev tshoov siab! Cia kuv muab ib feem rau nej saib txog kev ua yeeb yam txog tus Cawm Seej txoj kev tshwm sim rau cov Neeg Nifais.

Qhov uas tus Cawm Seej xaiv kom tshwm sim rau cov neeg nyob ntawm lub tuam tsev yeej yog ib qho tseem ceeb. Yog Nws lub tsev. Nws lub tsev puv Nws lub hwj chim. Cia peb nco ntsoov txog tej yam uas tus Tswv ua kom pab peb tam sim no. Nws ua kom yooj yim rau peb mus rau Nws lub tuam tsev. Nws ua kom peb txawj ua tuam tsev ceev zog. Nws ua kom peb muaj peev xwm muab Ixayees sau los ua ke. Nws kuj ua kom yooj yim rau peb txhua tus hloov peb sab ntsuj plig kom dawb huv ntxiv. Kuv cog lus tias kev siv sij hawm hauv lub tuam tsev ntxiv yuav ua rau nej txais tau cov koob hmoov zoo dua li lwm yam.

Tam sim no peb muaj 168 lub tuam tsev thiab 53 lub tuam tsev tshiab uas tseem ua thiab 54 lub tuam tsev ntxiv uas npaj kev yuav ua!² Kuv zoo siab tshaj tawm txog kev npaj ua tej lub tuam tsev tshiab nyob hauv tej qhov chaw no:Busan, Korea; Naga, Philippines; Santiago, Philippines; Eket, Nigeria; Chiclayo, Peru; Buenos Aires City Center, Argentina; Londrina, Brazil; Ribeirão Preto, Brazil; Huehuetenango, Guatemala; Jacksonville, Florida; Grand Rapids, Michigan; Prosper, Texas; Lone Mountain, Nevada; thiab Tacoma, Washington.

Peb kuj npaj kev ua cov tuam tsev nyob hauv tej qhov chaw uas muaj lub nroog loj heev thiaj li yuav tsum siv sij hawm ntau kom tsav tsheb mus rau ib lub tuam tsev. Yog li ntawd, kuv zoo siab tshaj tawm txog plaub qhov chaw tshiab nyob ze México City uas yuav ua tej lub tuam tsev tshiab nyob hauv Cuernavaca, Pachuca, Toluca, thiab Tula.

Kuv cov kwv tij thiab cov muam, thov kom nej tsom ntsoov rau lub tuam tsev ntau dua li yav tas los. Kuv foom koob hmoov rau nej kom nej sib raug zoo nrog Vajtswv thiab Yexus Khetos txhua hnub. Kuv hlub nej. Thov kom Vajtswv yuav nrog nraim nej nyob mus txog thaum peb rov qab sib ntsib dua, kuv thov los ntawm Yexus Khetos lub npe dawb ceev, amees.