Muaj Kev Ntseeg Coj Raws Li Yexus Khetos

Ua tsaug, pawg hu nkauj, vim nej hu nkauj “Txhua Kauj Ruam Mus, Cia Li Ntseeg.” Tij Laug Newell Dayley¹ tau sau cov nkauj thiab cov lus rau zaj nkauj no nyob rau xyoo 1996 kom npaj rau kev ua koob tsheej nco txog 150 xyoo tom qab cov pioneer tuaj txog lub Hav Salt Lake nyob rau xyoo 1847.

Txawm yog tau sau zaj nkauj no kom npaj rau kev ua koob tsheej ntawd, zaj lus ntawm zaj nkauj no yeej yog qhia rau tag nrho lub ntiaj teb.

Kuv yeej ib txwm nyiam txwm nkauj uas rov hu dua:

Cov kwv tij thiab cov muam, kuv ua tim khawv tias thaum peb coj raws li Yexus Khetos nrog kev ntseeg hauv txhua kauj ruam, yeej muaj kev cia siab. Muaj kev cia siab los ntawm tus Tswv Yexus Khetos. Muaj kev cia siab rau txhua tus nyob hauv lub neej no. Muaj kev cia siab kom kov yeej tej yam peb ua yuam kev, peb txoj kev tu siab, peb tej teeb meem, thiab peb tej kev sim siab thiab ntxhov siab. Muaj kev cia siab thaum peb hloov siab lees txim thiab txais kev zam txim thiab thaum peb zam txim pub rau lwm tus. Kuv ua tim khawv tias muaj kev cia siab thiab kev kaj siab lug uas los ntawm Yexus Khetos. Nws muaj peev xwm ris peb niaj hnub kom dhau tej yam nyuaj. Nws tau ua li no rau cov pioneer, thiab niaj hnub no Nws yuav ua rau peb txhua tus.

Xyoo no yog 175 xyoos tom qab cov pioneer tau tuaj txog lub Hav Salt Lake, uas ua rau kuv xav txog kuv cov poj koob yawm txwv, ib txhia yog cov uas taug kev los ntawm Nauvoo mus rau lub Hav Salt Lake. Kuv muaj cov poj koob yawm txwv uas tau taug kev hauv tiaj nras thaum lawv tseem hluas. Henry Ballard muaj 20 xyoo;³ Margaret McNeil muaj 13 xyoo;⁴ thiab Joseph F. Smith, uas tau los ua lub Koom Txoos tus Thawj Tswj Hwm thib rau, nws muaj 9 xyoos xwb thaum nws tuaj txog lub Hav Salt Lake.⁵

Lawv raug txhua yam tej xwm txheej thaum lawv taug kev, xws li lub caij no no heev, kev mob kev nkees, thiab tsis muaj zaub mov thiab khaub ncaws txaus. Piv txwv hais tias, thaum Henry Ballard nkag hauv lub Hav Salt Lake, nws zoo siab heev vim nws pom “Thaj Av uas Cog Lus Cia” tiam sis nws ntshai tias leej twg yuav pom nws rau qhov nws cov khaub ncaws ntuag tag thiaj li tsis npog nws lub cev zoo. Nws nkaum nyob hauv cov nroj tsuag tas ib hnub mus txog thaum tsaus ntuj lawm. Ces nws mus rau ib lub tsev thiab thov khawv kom muab ris tsho rau nws thiaj li yuav mus tom ntej thiab nrhiav nws niam nws txiv. Nws tau ua Vajtswv tsaug vim nws tau los txog nws lub tsev tsis raug xwm txheej dab tsi.⁶

Kuv cov poj koob yawm txwv muaj kev ntseeg coj raws li Yexus Khetos thaum lawv raug txhua yam kev sim siab. Kuv yeej ris lawv txiaj heev vim lawv tsis tau tso tseg. Lawv txoj kev ntseeg mus tom ntej twb tau foom koob hmoov rau kuv thiab tej tiam neeg tom ntej, ib yam li nej txoj kev ntseeg hnub no yuav foom koob hmoov rau nej cov xeeb ntxwv.

Lo lus pioneer kuj yog ib tug neeg thiab ib yam yus ua. Thaum hais txog ib tug neeg ces yog tus uas mus nrhiav los nyob hauv ib qho chaw tshiab. Thaum hais txog ib yam yus ua, ces txhais tias yog kev qhib los yog npaj kev rau lwm tus mus.⁷

Thaum kuv xav txog cov pioneer uas tau npaj kev rau lwm tus, ua rau kuv xub xav txog tus Yaj Saub Joseph Smith. Joseph yog ib tug pioneer vim nws txoj kev ntseeg mus tom ntej ua rau nws mus hauv ib koog ntoo, es nyob ntawd nws tau txhos caug thiab npaj kev rau peb muaj Yexus Khetos txoj moo zoo tag nrho. Joseph txoj kev ntseeg “thov Vajtswv”⁸ thaum lub caij nplooj ntoo hlav nyob rau xyoo 1820 tau qhib Kev Muab Yexus Khetos Txoj Moo Zoo Txum Tim Rov Qab Los, thiaj muaj cov yaj saub thiab cov thwj tim uas tus Tswv hu kom ua hauj lwm hauv lub ntiaj teb no.⁹ Kuv paub tias Joseph Smith yog Vajtswv ib tug yaj saub. Kuv paub tias nws txoj kev ntseeg mus tom ntej ua rau nws txhos caug nyob rau ntawm Vajtswv Leej Txiv thiab Nws Leej Tub, Yexus Khetos, lub xub ntiag.

Tus Yaj Saub Joseph txoj kev ntseeg mus tom ntej ua rau nws kam tus Tswv siv nws kom txhais Phau Ntawv Maumoos, uas yog ib zaj lus tim khawv ntxiv txog Yexus Khetos thiab Nws txoj Kev Theej Txhoj.

Los ntawm Joseph Smith txoj kev ntseeg thiab txoj kev nyiaj ntxeem thaum raug tej xwm txheej nyuaj kawg nkaus thiab kev tawm tsam, nws yog ib lub cuab yeej hauv tus Tswv txhais tes kom rov qab txhim tsa Yexus Khetos lub Koom Txoos hauv lub ntiaj teb no.

Hauv lub tuam rooj sab laj tas los, kuv tau hais lus txog qhov uas kuv tau koob hmoov los ntawm kuv txoj kev ua ib tug tub txib. Kuv tau koob hmoov thaum kuv tau qhia txog peb Leej Txiv Saum Ntuj Ceeb Tsheej txoj hau kev cawm seej, Joseph Smith Thawj Zaug Ua Yog Toog, thiab nws txoj kev txhais Phau Ntawv Maumoos. Tej lus qhuab qhia no tau coj kuv txoj kev ntseeg thaum kuv qhia cov uas txaus siab mloog tej zaj lus los ntawm Kev Muab Txoj Moo Zoo Txum Tim Rov Qab Los.

Peb cov tub txib yog cov pioneer hauv lub caij nyoog no vim lawv tshaj tawm txog zaj lus zoo kawg nkaus no rau cov neeg nyob thoob plaws lub ntiaj teb no, thiaj li qhib kev rau peb Leej Txiv Saum Ntuj Ceeb Tsheej cov me nyuam kom paub Nws thiab Nws Leej Tub, Yexus Khetos. Kev lees yuav Yexus Khetos txoj moo zoo qhib kev rau txhua tus kom npaj thiab txais cov kab ke thiab cov koob hmoov uas los ntawm lub Koom Txoos thiab lub tuam tsev.

Lub tuam rooj sab laj tas los, Thawj Tswj Hwm Russell M. Nelson tau hais tias “tus Tswv tau hais kom txhua tus tub hluas uas tsim nyog thiab muaj peev xwm kom lawv npaj thiab mus ua tub txib” thiab “kev ua ntxhais txib yeej yog ib lub cib fim uas muaj hwj chim heev, tiam sis tsis tas ua.”¹⁰

Nej cov tub hluas ntxhais hluas, nej txoj kev ntseeg mus tom ntej yuav pab nej coj raws li tus Tswv caw nej kom mus ua tub txib ntxhais txib—los ua cov pioneer hauv lub caij nyoog no—thaum nej qhib kev rau Vajtswv cov me nyuam nrhiav thiab taug raws nraim li txoj kev ua raws li lawv tej kev khi lus kom rov qab mus cuag Vajtswv.

Thawj Tswj Hwm Nelson kuj yog ib tug pioneer nyob hauv lub Koom Txoos no. Thaum Nws yog ib tug Thwj Tim nws tau ncig mus thiab qhib ntau lub teb chaws rau kev tshawj tawm txoj moo zoo. Tsis ntev tom qab nws los ua tus yaj saub thiab tus Thawj Tswj Hwm ntawm lub Koom Txoos, nws tau thov kom peb “sab ntsuj plig yuav haj yam muaj peev xwm txais kev tshwm sim.”¹¹ Nws tseem qhia peb kom txhawb peb zaj lus tim khawv lub dag zog. Nyob hauv kev sib ntsib hawm Vajtswv rau cov tub hluas ntxhais hluas, nws hais tias:

“Kuv thov kom nej lav ris nej zaj lus tim khawv. Ua hauj lwm kom muaj zog. Saib nws rau nqi. Saib xyuas zoo. Pab tu kom yuav loj hlob tuaj. …

“Ces saib seb yuav muaj tej txuj ci tseem ceeb hauv nej lub neej.”¹²

Nws qhia peb kom paub vam khom peb tus kheej ntawm sab ntsuj plig. Nws tau hais tias, “hauv tej hnub uas tseem yuav los, peb sab ntsuj plig yuav tsis txawj ciaj yog tias peb tsis muaj kev cob qhia, kev qhuab qhia, thiab kev tshoov siab zoo los ntawm tus Vaj Ntsuj Plig Dawb Huv.”¹³

Kuv ua tim khawv tias Thawj Tswj Hwm Russell M. Nelson yog Vajtswv tus yaj saub hauv lub ntiaj teb niaj hnub no.

Peb tus Cawm Seej, Yexus Khetos, yog tus pioneer zoo tshaj plaws vim Nws tau npaj ib txoj kev. Muaj tseeb tiag Nws yog “txoj kev”¹⁴ kom muaj raws li txoj hau kev cawm seej, peb thiaj li yuav hloov siab lees txim thiab, dhau los ntawm txoj kev ntseeg Nws, rov qab mus cuag peb Leej Txiv Saum Ntuj Ceeb Tsheej.

Yexus hais tias, “Kuv yog txoj kev, yog qhov tseeb thiab yog txoj sia; tsis muaj leej twg mus cuag tau Leej Txiv tsuas yog mus ntawm kuv mus xwb thiaj tau.”¹⁵ Nws tau cog lus tias Nws yuav tsis muab kev nplij siab rau peb; Nws yuav los rau peb thaum peb raug kev sim siab.¹⁶ Nws tau caw peb kom “los cuag [Nws] kawg siab kawg ntsws, thiab [Nws] yuav kho kom [peb] zoo.”¹⁷

Kuv ua tim khawv tias Yexus Khetos yog peb tus Cawm Seej thiab tus Txhiv Dim, tus uas Tuaj Peb Tog nrog Leej Txiv. Peb Leej Txiv Saum Ntuj Ceeb Tsheej tau qhib kev rau peb rov qab mus cuag Nws thaum peb coj raws li Nws Leej Tub uas Nws Hlub, Yexus Khetos, nrog kev ntseeg thaum mus txhua ruam tom ntej.

Kuv poj koob yawm txwv thiab lwm cov pioneer tau raug tej kev cov nyom ntau heev thaum lawv caij lub tsheb nees, thawb laub, thiab taug kev mus rau lub Hav Salt Lake. Peb kuj nyias yuav muaj nyias tej teeb meem hauv peb lub neej. Peb tsis thawb laub los sis caij lub tsheb nees pem roob thiab hauv cov daus tob; peb sim ua li lawv ua kom peb sab ntsuj plig kov yeej tej kev ntxias thiab tej teeb meem ntawm peb lub caij nyoog. Peb muaj kev uas peb yuav tsum taug; peb muaj toj—thiab tej lub sij hawm muaj roob—uas peb yuav tsum nce. Txawm yog peb tej kev sim siab yeej txawv ntawm cov pioneer thaum ub los, tej no yeej nyuaj rau peb ib yam.

Peb yuav tsum coj raws li tus yaj saub hais thiab mob siab taug kev raws nraim li peb tej kev khi lus, ib yam li cov pioneer thaum ub.

Thov kom peb muaj kev ntseeg coj raws li Yexus Khetos. Peb yuav tsum ua hauj lwm rau tus Tswv thiab ib leeg pab ib leeg. Peb yuav tsum ua raws li peb tej kev khi lus kom txhawb peb sab ntsuj plig kom muaj zog. Peb yuav tsum tsis txhob xav tias peb tsis tas ua raws li cov lus txib. Dab Ntxwg Nyoog sim ntxias peb kom rhuav peb tej lus cog tseg thiab peb txoj kev hlub Vajtswv thiab tus Tswv Yexus Khetos. Thov nco ntsoov tias yog leej twg poob zoo, tus Cawm Seej yeej yuav paub tias peb nyob qhov twg. Vim peb tau koob hmoov uas yog kev hloov siab lees txim, peb tig mus rau Nws los tau. Nws yuav pab peb kawm, loj hlob tuaj, thiab hloov thaum peb sim taug txoj kev ua raws li peb tej kev khi lus.

Thov kom peb yuav coj raws li Yexus Khetos txoj kev thiab, thaum muaj kev ntseeg mus txhua kauj raum, tsom ntsoov rau Nws, kom peb taug kev ua raws nraim li peb tej kev khi lus, es kuv thov li no los ntawm Yexus Khetos lub npe, amees.