Kov Yeej lub Ntiaj Teb thiab Nrhiav Tau Kev So
Cia li nrhiav tau kev so kom tsis txhob raug tej yam nyuaj, tej kev tsis paub tseeb, thiab kev txhawj xeeb los ntawm lub ntiaj teb thaum nej ua raws li nej tej kev khi lus nrog Vajtswv kom kov yeej lub ntiaj teb no.
Kuv cov kwv tij thiab cov muam, kuv zoo siab ntsib nej thaum Hnub Caiv sawv ntxov zoo nkauj no. Kuv xav txog nej tsis tu ncua. Kuv xav tsis thoob thaum ib tug neeg xav tau kev pab es nej txawm pab tus ntawd kiag. Kuv xav tsis thoob txog nej txoj kev ntseeg thiab nej zaj lus tim khawv. Kuv quaj txog nej tej kev nyuaj siab, tej kev poob siab, thiab tej kev txhawj xeeb. Kuv hlub nej. Kuv qhia tseeb rau nej tias peb Leej Txiv Saum Ntuj Ceeb Tsheej thiab Nws Leej Tub uas Nws Hlub, Yexus Khetos, hlub nej. Nkawd paub zoo txog nej tej xwm txheej, nej txoj kev zoo, tej yam nej xav tau, thiab nej tej lus thov pab nej. Kuv thov tas zog kom nej yuav muaj peev xwm hnov Nkawd txoj kev hlub rau nej.
Peb yuav tsum hnov Nkawd txoj kev hlub, rau qhov peb raug tej xov xwm nyuaj siab yuav luag txhua hnub. Tej zaum nej muaj tej hnub thaum nej xav hnav ris tsho pw, caws ib ce, thiab thov ib tug ua kom nej tsim los thaum twg kev kub ntxhov tiav lawm.
Tiam sis, kuv cov kwv tij thiab cov muam, muaj ntau yam zoo kawg nyob tom ntej. Thaum yav tom ntej, peb yuav pom tej kev tshwm sim txog tus Cawm Seej lub hwj chim uas zoo tshaj plaws tej uas lub ntiaj teb yeej tsis tau pom dua. Txij no mus txog lub sij hawm uas Nws rov qab los “muaj hwj chim thiab yeeb koob loj,”1 Nws yuav muab cov txiaj ntsim, cov koob hmoov, thiab ua tej txuj ci tseem ceeb rau cov uas mob siab ntseeg.
Txawm li ntawd los, niaj hnub no peb nyob hauv ib lub caij nyoog uas nyuaj tshaj hauv lub ntiaj teb zaj keeb kwm. Tej yam nyuaj thiab tej teeb meem ua rau neeg coob qaug zog thiab nyuaj siab txhawj xeeb. Tiam sis,kuv yuav hais txog ib zaj uas yuav pab peb to taub tias yuav ua li cas kom peb thiaj tau so.
Thaum qhib lub Tuam Tsev Washington D.C. rau tib neeg saib, ib tug mej zeej ntawm pawg saib xyuas kev qhib tsev tau hnov ib yam thaum nws coj ob peb tug kws sau xov xwm mus hauv lub tuam tsev. Xyov ua cas ib yim neeg hluas koom nrog cov kws sau xov xwm no. Ib tug kws sau xov xwm pheej nug txog qhov uas ib tug “taug kev” mus thaum nws tuaj rau lub tuam tsev. Nws xav paub seb qhov uas yus taug kev hauv lub tuam tsev puas yog ib lub cim txog tej teeb meem uas yus raug thaum yus ua neej.
Ib tug me nyuam tub nyob hauv yim neeg ntawd mloog txoj kev sib tham no. Thaum pawg neeg ntawd nkag hauv chav txais vaj txiaj ntsim, tus tub hluas taw tes rau lub thaj, yog qhov chaw uas tib neeg txhos caug khi lus nrog Vajtswv, thiab hais tias, “Auj, zoo heev. Nov yog ib qho chaw rau tib neeg tau so thaum lawv taug kev hauv lub tuam tsev.”
Kuv xav tias tus me nyuam tub tsis tau paub tias nws cov lus muaj nqis npaum li cas. Nyaj nws tsis paub hlo li hais tias qhov uas yus nrog Vajtswv khi lus txuas rau qhov uas tus Cawm Seej cov lus cog tseg li no:
“Nej cov uas sab sab vim ris nra hnyav, nej cia li los cuag kuv, kuv yuav cia nej so.
“Nej cia li los kwv kuv tus quab thiab kawm tej uas kuv qhia, nej thiaj yuav tau so.”
“Tus quab uas kuv muab rau nej kwv yooj yim kwv, thiab lub nra uas kuv muab rau nej ris, lub ntawd tsis hnyav.”2
Kuv cov kwv tij thiab cov muam, kuv yeej nyuaj siab txog cov uas tawm lub Koom Txoos mus vim lawv xav tias kev ua mej zeej nyuaj dhau. Lawv tsis tau kawm tias kev ua raws li lawv tej kev khi lus ua rau lawv lub neej yooj yim dua! Txhua tus uas khi lus thaum lawv ua kev cai raus dej thiab nyob hauv lub tuam tsev—thiab ua raws li tej kev khi lus ntawd—txais tau Yexus Khetos lub hwj chim ntxiv. Thov xav txog qhov tseeb zoo kawg ntawd!
Lub nqi zog rau kev ua raws li Vajtswv tej kev khi lus yog lub hwj chim saum ntuj ceeb tsheej—lub hwj chim uas txhawb peb lub zog kom nyiaj dhau peb tej kev sim siab, kev ntxias, thiab kev mob lub siab. Lub hwj chim ua rau peb txoj kev ua neej yooj yim dua. Cov uas ua raws li Yexus Khetos tej kev cai siab dua txais tau Nws lub hwj chim siab dua. Yog li ntawd, cov uas ua raws li kev khi lus muaj cai so yam tshwj xeeb uas los rau lawv los ntawm lawv txoj kev sib khi lus nrog Vajtswv.
Ua ntej tus Cawm Seej raug kev txom nyem hauv Khexemanes thiab Khaulakhauthas, Nws hais rau Nws cov Thwj Tim, “Neeg ntiaj teb yuav tsim txom nej. Tiam sis [cia li zoo siab], rau qhov kuv twb kov yeej lub ntiaj teb no lawm.”3 Tom qab ntawd, Yexus hais kom peb txhua tus ua ib yam li ntawd thaum Nws hais tias, “Kuv xav kom nej kov yeej lub ntiaj teb.”4
Cov kwv tij thiab cov muam, kuv zaj lus rau nej hnub no yog vim Yexus Khetos tau kov yeej lub ntiaj teb uas poob lawm thiab, vim Nws theej peb txhua tus lub txhoj, nej kuj muaj peev xwm kov yeej lub ntiaj teb no uas muaj kev ntxias txhua qhov chaw, xav txog tus kheej tas li, thiab pheej ua rau yus qaug zog.
Vim tus Cawm Seej, dhau los ntawm Nws txoj Kev Theej Txhoj, tau txhiv peb txhua tus dim tej kev qaug zog, kev ua yuam kev, thiab kev txhaum, thiab vim rau qhov Nws raug txhua tus mob, kev txhawj, thiab lub nra uas nej ib txwm tau ris,5 ces, thaum nej hloov siab lees txim thiab nrhiav Nws txoj kev pab, nej yuav muaj peev xwm nce siab dua lub ntiaj teb ntxhov hnyo no.
Nej yuav muaj peev xwm kov yeej kev mob kev nkees ntawm sab ntsuj plig hauv lub ntiaj teb no, xws li kev muab hlob, kev khav theeb, kev chim siab, kev coj tsis dawb huv, kev ntxub, kev qia dub, kev khib, thiab kev ntshai. Txawm yog muaj tej yam uas meem txom thiab ntxeev siab nyob ib puag ncig peb, nej yuav tau so tiag tiag—uas txhais tias kev nplij siab thiab kev kaj siab lug—txawm yog nej raug tej teeb meem nyuaj tshaj plaws los yog.
Qhov tseeb tseem ceeb no ua rau peb nug peb lo lus tseem ceeb:
Thib ib, kev kov yeej lub ntiaj teb txhais li cas?
Thib ob, peb yuav ua li cas thiaj ua tau?
Thiab thib peb, vim li cas kev kov yeej lub ntiaj teb ua rau peb lub neej tau koob hmoov?
Kev kov yeej lub ntiaj teb txhais li cas? Yog kev kov yeej tej kev ntxias uas hais tias tsim nyog xav txog tej yam los ntawm lub ntiaj teb ntau tshaj yus xav txog tej yam los ntawm Vajtswv. Yog kev tso siab rau Khetos cov lus qhuab qhia ntau dua li yus tso siab rau tib neeg lub tswv yim. Yog kev zoo siab txog qhov tseeb, hais lus tawm tsam kev ntxias, thiab yog kev los ua “cov uas txo hwj chim coj raws li Khetos.”6 Yog kev xaiv tsis txhob ua tej yam twg uas ua rau tus Ntsuj Plig tawm mus. Yog kev txaus siab tso tag nrho peb tej kev txhaum tseg, tsis hais tej uas peb tseem nyiam los.7
Nim no, kev kov yeej lub ntiaj teb tsis txhais tias peb yuav los ua neeg zoo tag nrho hauv lub neej no, thiab tsis txhais hais tias nej cov teeb meem yuav ploj mus xwb—vim yeej yuav tsis zoo li ntawd. Thiab nws tsis txhais tias nej yuav tsis ua yuam kev ntxiv. Tiam sis kev kov yeej lub ntiaj teb txhais tias nej yuav muaj peev xwm ntxiv kom tiv taus kev txhaum. Yuav muaj lub siab mos siab muag thaum nej txoj kev ntseeg Yexus Khetos loj zuj zus.8 Kev kov yeej lub ntiaj teb txhais tias yus hlub Vajtswv thiab Nws Leej Tub ntau tshaj yus hlub lwm tus los yog lwm yam huv tib si.
Yog li ntawd, peb yuav ua li cas kom kov yeej lub ntiaj teb? Van Ntxwv Npeyamis tau qhia peb ua li cas. Nws qhia tias “tus neeg ntawm sab cev nqaij daim tawv yog ib tug yeeb ncuab rau Vajtswv” thiab ib txwm yog “tsuas yog nws ywj rau tus Vaj Ntsuj Plig Dawb Huv tej kev tshoov siab, thiab tso tus neeg ntawm sab cev nqaij daim tawv tseg thiab los ua ib tug neeg dawb huv los ntawm tus Tswv Khetos txoj kev theej txhoj.”9 Txhua zaus nej nrhiav thiab coj raws li tus Ntsuj Plig tej kev tshoov siab, txhua zaus nej ua ib yam dab tsi zoo—tej yam uas “tus neeg ntawm sab cev nqaij daim tawv” yuav tsis ua—ces nej kov yeej lub ntiaj teb.
Kev kov yeej lub ntiaj teb tsis yog ib yam uas yus ua tas lawm hauv ob peb hnub xwb. Yuav tsum siv ib sim neej thaum peb muab siab npuab Khetos cov lus qhuab qhia. Peb ntseeg Yexus Khetos ntxiv thaum peb hloov siab lees txim txhua hnub thiab ua raws li tej kev khi lus uas ua rau peb txais tau lub hwj chim. Peb taug txoj kev ua raws li peb tej kev khi lus thiab tau koob hmoov xws li kev muaj zog ntawm sab ntsuj plig, kev tshwm sim, kev ntseeg uas loj zuj zus, thiab cov tim tswv txoj kev txhawb pab. Kev ua neej raws li Khetos cov lus qhuab qhia yuav tsim ib tug txheej txheem uas muaj hwj chim ua rau peb sab ntsuj plig muaj zog zuj zus tuaj.10
Thaum peb siv zog ua neej raws li Yexus Khetos tej kev cai siab dua, ces peb lub siab thiab peb tej cwj pwm pib hloov. Tus Cawm Seej tsa peb kom dim tej uas lub ntiaj teb rub peb ua vim Nws foom koob hmoov rau peb kom haj yam muaj kev siab hlub, kev txo hwj chim, kev ua siab dawb siab zoo, kev tswj tus kheej, kev kaj siab lug, thiab kev so.
Tej zaum nej xav tias ua li no yog kev khwv ua hauj lwm rau nej sab ntsuj plig es tsis yog kev tau so. Tiam sis qhov no yog qhov tseeb tiag: lub ntiaj teb hais tias lub hwj chim, tej khoom, kev muaj koob muaj npe, thiab tej yam uas sab cev nqaij daim tawv ntshaw ua rau yus zoo siab heev, tiam sis tsis yog li ntawd! Yeej ua tsis tau! Tej no tsuas tsim tej yam uas tsis muaj nqis dab tsi kom pauv cov “koob hmoov thiab [kev] zoo siab ntawm [cov uas] ua raws li Vajtswv tej lus txib.”11
Qhov uas yus nrhiav kev zoo siab nyob hauv tej qhov chaw uas yus yeej yuav nrhiav tsis tau yog qhov uas sab tshaj plaws! Tiam sis, thaum nej muab nej tus kheej khi rau Yexus Khetos thiab ua tej hauj lwm ntawm sab ntsuj plig kom kov yeej lub ntiaj teb, ces Nws, Nws ib leeg xwb, muaj hwj chim tsa nej los saum ntuj kom dim lub ntiaj teb txoj kev rub.
Nim no, vim li cas kev kov yeej lub ntiaj teb ua rau peb lub neej tau koob hmoov? Cov lus teb yeej meej heev: Thaum peb ua kev khi lus nrog Vajtswv ces ua rau txhua tsav txhua yam hauv lub neej no yooj yim dua. Thov tsis txhob to taub yuam kev: kuv tsis tau hais tias kev khi lus ua rau peb lub neej yooj yim. Muaj tseeb tiag, yus yuav tsum paub tias nej yuav raug kev tawm tsam, vim tus yeeb ncuab tsis xav kom nej paub txog Yexus Khetos lub hwj chim. Tiam sis qhov uas nej kwv tus Cawm Seej tus quab txhais tias nej txais tau Nws lub dag zog thiab lub hwj chim txhiv dim.
Thawj Tswj Hwm Ezra Taft Benson tau qhia tias: “Cov txiv neej thiab cov poj niam uas muab lawv lub neej rau Vajtswv yuav kawm tias Nws pab tau lawv lub neej ntau dua li lawv pab tau lawv tus kheej. Nws yuav ua rau lawv muaj kev xyiv fab ntxiv, pom kev dav dua ntxiv, pab lawv nkag siab, … txhawb nqa lawv sab ntsuj plig, muab koom hmoov ntau zog, muab cib fim rau lawv ntxiv, nplij lawv lub siab, muab phooj ywg rau lawv, thiab ua rau lawv nyob kaj siab lug.”12
Cov txiaj ntsim zoo kawg nkaus no yuav los rau cov uas nrhiav Vajtswv txoj kev pab lawv kov yeej lub ntiaj teb no. Yog li ntawd, kuv caw cov mej zeej hauv tag nrho lub Koom Txoos no ua li kuv tau caw cov tub hluas ntxhais hluas thaum lub Tsib Hlis Ntuj tas los. Kuv tau yaum kom lawv—ib yam li kuv thov nej tam sim no—kom lav ris nej zaj lus tim khawv txog Yexus Khetos thiab Nws txoj moo zoo. Ua hauj lwm kom muaj zog. Pab tu kom yuav loj hlob tuaj. Ntxiv qhov tseeb rau. Tsis txhob ua kom nej zaj lus tim khawv qias thaum nej coj raws li tej laj lim tswv yim cuav ntawm cov neeg uas tsis ntseeg. Thaum nej saib nej zaj lus tim khawv yog qhov tseem ceeb tshaj plaws, ces saib seb yuav muaj tej txuj ci tseem ceeb hauv nej lub neej.”13
Tag kis no kuv thov kom nej nrhiav tau kev so kom tsis txhob raug tej yam nyuaj, tej kev tsis paub tseeb, thiab kev txhawj xeeb los ntawm lub ntiaj teb thaum nej ua raws li nej tej kev khi lus nrog Vajtswv kom kov yeej lub ntiaj teb no. Thov Nws thiab ua tej yam kom Nws paub tias nej xav kov yeej lub ntiaj teb no tiag. Thov kom Nws pab nej to taub thiab xa kev pab rau nej. Txhua hnub, cia li sau ntawv txog tej yam uas nej xav thaum nej thov Vajtswv; ces rau siab ua tej yam ntawd. Siv sij hawm ntxiv nyob hauv lub tuam tsev thiab nrhiav kev kom to taub lub tuam tsev ua li cas qhia nej txog kev sawv siab tshaj lub ntiaj teb uas tau poob lawm.14
Raws li kuv tau hais tas los lawm, kev muab Ixayees sau los ua ke yog txoj hauj lwm tseem ceeb tshaj plaws uas muaj hauv lub ntiaj teb no. Ib feem tseem ceeb ntawm txoj kev sau los ua ke no yog kev npaj ib co neeg uas muaj peev xwm thiab tsim nyog txais tus Tswv thaum Nws rov qab los, ib co neeg uas tau xaiv Yexus Khetos thiab tsis xaiv ib lub ntiaj teb uas poob lawm, ib co neeg uas xyiv fab siv lawv txoj kev ywj siab xaiv kom ua raws li Yexus Khetos tej kev cai uas siab thiab dawb huv dua.
Kuv hais kom nej, kuv cov kwv tij thiab cov muam, los ua cov neeg ncaj ncees no. Cia li ua raws nraim li nej tej kev khi lus thiab saib rau nqi tshaj lwm cov lus cog tseg. Thaum nej cia Vajtswv yeej hauv nej lub neej, kuv cog lus tias nej yuav tau kev kaj siab lug, kev xyiv fab, thiab nej yeej yuav tau so.
Los ntawm lub hwj chim ntawm kev ua ib tug thwj tim dawb huv, kuv foom koob hmoov rau nej kom nej yuav muaj peev xwm kov yeej lub ntiaj teb no. Kuv foom koob hmoov rau nej kom ntseeg Yexus Khetos ntxiv thiab kawm zoo dua kom paub siv Nws lub hwj chim. Kuv foom koob hmoov rau nej kom txawj paub qhov tseeb txawv ntawm qhov cuav. Kuv foom koob hmoov rau nej kom saib tej yam los ntawm Vajtswv muaj nqi tshaj tej yam uas los ntawm lub ntiaj teb no. Kuv foom koob hmoov rau nej kom nej pom lwm tus tej kev xav thiab txhawb cov uas nej hlub lub dag zog. Vim Yexus Khetos tau kov yeej lub ntiaj teb no, nej kov yeej tau thiab. Kuv ua tim khawv li no los ntawm Yexus Khetos lub npe dawb ceev, amees.