Ke Inkacnek in Kunohkohn Lalos

Yac 1947 mahkiyac anniversary ahk 100 luhn Mwet Luhlahlfongi ke Lwen-sahflah pioneer ma tuhkuh sun Infahlfahl Salt Lake. Puhs ahkfuhlwact in acsmakihn tuh orek ke yac sacn, ac puhs pac [mwet] ahkkahlwemye tarilacna [lalos] nuh sin mwet tuhma lutlut luhn Jisus Kraist suc sekihn inkacnek, muhsah lohm, yok fukunsahk ke acn mwesahs, ac akiyac mura.

Prestuhn J. Reuben Clark, mwet kahsruh se met ke Prestuhnsi Se Met, el oruh sie sramsram acsmakihnyuck ac wo nuh sin pioneer oaru inge ke toeni luhlahp ke Ohktohpa 1947.

Ke pweng lal, Prestuhn Clark el akihlen mwet kol etweyuck suc kol fuhfahsryucsr nuh rohtoh, suc pa Brigham Young, Heber C. Kimball, Wilford Woodruff, Parley P. Pratt, ac puhs pac sahyac. Tuhsruhk, srihpac yohk lal an pa in tiac sruhmuhn ke orekma luhlahp lalos. Tuhsruhk, el siiyac na sramsram lal ah ke nguhna oaru suc inelos tiac etweyuck kuh tiac sihmlac ke sramsram mahtuh luhn Alu uh. Sifac in luti ke pweng se lal uh pa, “Elos ke Wagon Sahflah.”¹

Prestuhn Clark el ahkuhtweyac in wo ohiyac ac ma upac mwet fahsr ingacn sun ke elos fuhfahsryucsr wi un wagon afyucf ke kais sie un wagon loeloes ma oraclah fuhfahsryucsr la fin acn ah. El kaksakihn mwet nihkihnyuck ac tiac kaksakihnyuck inge, ke pengana lwen, wik nuh ke wik, ac mahlwem nuh ke mahlwem, mahlwack na ke dust ma mayak ke wagon ah kwewa ma kahsruhsr met luhkwelos—ac suc kuhtanglah ma upac puhs elos sun ke inkacnek uh.

Prestuhn Clark el fahk lah, “Elos suc wi wagon sahflah sac fungyang nuh met, uli ac ullac, waek niyac, kuhtuh pacl uh apkuhran in fuhlweack, sruhkyuckyak ke luhlahlfongi lalos lah God El luhngselos, lah wosasuc fohlohkihnyuckyak uh pwacye, ac lah Leum El kol ac pwen Mwet Lili in som nuh met.”²

El kaliyac pweng se lal ah ke mwe fahk se inge: “Nuh sin nguhna puhsisacl inge, yohk luhlahlfongi, yohk orekma wo, yohk moul suwohs, luhmahlah wo usru sacohklacna lasr, nga fahk ke puhsisacl ke luhngse luhk, suhnak luhk, ac ahkfuhlwact ohi luhk.”³

Ke 1990, Prestuhn Howard W. Hunter, in pacl sac el Prestuhn ke U luhn Mwet Sap Singucul Luo, el use pweng se ke mwe sang yohk luhn mempuhr pucspucs ke Alu uh suc insacnweacng ac oaru in kuhlwacnsap ac arulacna srihk ma elos eis kac kuh [elos] tiac akihlenyuck kuh ahkfuhlwactyeyuck.

Prestuhn Hunter el ahkuhtweyac:

“Fwack kacl [Captain Moroni suc fuhsr ac puhlaik]:

“‘Fin mwet nuhkwewa oruh in oacna, ac oacna tari, ac ac fah oacna, in oacna Moroni, liye, kuh luhn hell ac usrusryak ne tok ma pahtpaht; ahok, ac fah wacngihn kuh luhn devil nuh ke insiacn tuhlihk nuhtin mwet.’ (Alma 48:17).

“Kahs na wowo nuh sin sie mukul eye ac fokoko. … Fuhs luo tok an pa sie pohloh kahs kacl Helaman ac mwet lili lal, suc oruh ip [lalos] tiac yohk oacna Moroni, ma rit fahk:

“‘Inge liye, Helaman ac mwet wiyacl elos kuhlwacnsap tiac srihk nuh sin mwet uh luhkwel na Moroni.’ (Alma 48:19).”

Prestuhn Hunter el tahfwelah in fahk lah, “Ke kahs sahyac, finne Helaman el tiac akihlenyuck kuh eye oacna Moroni, el oacyacpac kuhlwacnsap tiac srihk; kalmac pa, el kahsruh kuh orekmakihnyuck oacna Moroni.”⁴

Na Prestuhn Hunter el luti kuht nohfohn in kuhlwacnsap tiac srihk. El fahk lah: “Kom fin puhlakihn muh inkaiyen ma kom oruh ke yac se inge kuh ke yac ekahsr fahsruh uh ac tiac oruh kom eye, ahkkweye [kom]. Inkaiyen mwet wo emet suc tuh moul elos tiac arulacna eye. Kuhlwacnsap ac kapkapwack, ke oaru ac in mihslac.”⁵

Nga srui nuh sin mempuhr million ke Alu uh suc misenge elos tuhkuh nuh yurun Mwet Lahngo⁶ ac fungyang fahsr nuh met ke inkacnek in wuhlweacng ke wagon sahflah ke tahk loeloes ke wagon lasr uh—ac pwacyena [elos] suc kuhlwacnsap tiac srihk. Luhlahlfongi kuh lom sel Pahpah Lucng ac Leum Jisus Kraist ac moul fihsrwacsr, muhtahl lowos an mokleyuc in eklac sie mukul mwet tuhma lutlut wolac liki met ah.

Nga luhngse kom. Nga fwefwelac sum. Nga kuloh nuh sum. Ac nga kaksakihn kom.

Sie pohloh kahs ke Puk luhn Mormon sel Samuel mwet Laman se ahkuhtweyac wo ma nga puhlakihn keiwos.

“Liye lah inkaiyaclos oasr ke inkacnek in kunohkohn lalos, ac elos fahsr suwohswohs ye muhtuhn God, ac elos karuhnguhnwacng in liyacacng masap Lal ac mwe sap Lal ac nuhnuhnkuh Lal. …

“Ahok, nga fahk nuh suwos, inkaiyaclos oruh ma se inge, ac elos srihke ke oaru yohk tuh elos in kuh in use mwet luhlah sin mwet wiyaclos nuh ke etwacack luhn ma pwacye.”⁷

Nga luhlahlfongi ke pohloh kahs se “ke inkacnek in kunohkohn lalos” ahkuhtweyac wo tamuhlwel ac tahmtahel suc suk ac muhta sisken mwet suc muhkwena muhta ke alu ah ac ke kain in toeni sahyac. Elos srihke pacl nuh kwewa in “ahkenganyaclos suc enenuh in ahkenganyeyuck,”⁸ ac tiac tuhpan fohlohkihnyacn akihlen kuh kaksak.

Pohloh kahs se “inkacnek in kunohkohn lalos” ahkuhtweyac muhtwacn kiyac kuh mukul tuhmwa ac tuhlihk nahtuh suc ahkkweye kais sie, ninac pahpah, kuh tuhlihk se suc kuhlacnsap ekihn mwet kol ke Alu fohlohkihnyuckyak luhn Leum. Mokleyuck wo, mihs, ac kahsruh ma elos oruh tiac akihlenyuck inge mwe insewowo luhn kais sie mwet ac sucu puhkantwen ke ohiyac ma ac fah etweyuck muhkwena ne tok ma pahtpaht.

Pohloh kahs se “inkacnek in kunohkohn lalos“ ahkuhtweyac kais sie mwet ma, forlah liki God, [elos] puhsisacl ac sifilpac fohlohk nuh Yohrohl,⁹ in auliyak ke ma koluk lalos, ac suk kuh luhn ahknwacsnwacsyeyucklac ac unweyucklac ke Iwaclah luhn Mwet Lahngo. Tuhkuh nuh yurin Kraist¹⁰ ke fohlohklac nuh ke inkacnek wuhlweacng liki kihrucruc koluk nuh ke “inkacnek sruhngwacyuck”¹¹ uh yohk srihpac nuh ke nguhnnguhn ac suwohswohs. Ke elos fungyang nuh met ke luhlahlfongi ac tiac tohtohlah in oruh wo, elos akiyac pwelucng ke orekma yohk ke kais sie moul lalos,¹² “nuh sin fihl nuh kwewa ac ne tok ma pahtpaht.”¹³

Pohloh kahs se “ke inkacnek in kunohkohn lalos” ahkuhtweyac kais sie mwet suwohswohs suc lohng in yukiyac srenenuh lalos nuh sin Mwet Lahngo ke wuhlweacng kuh ac akwuck ke wosasuc Lal—tuhsruhk sahp kohsrkohsrlah ke ma suc [elos] tiac kuh in kutong. Nga uli nuh suwos lah ma kweok lowos an ac fah wacngihnlac ac ahkostwen ac oaru lowos in eiskowosyang nuh sin God ac fah eis me sang ke “pacl pakpucki sin Leum.”¹⁴ “Sahp ac oasr tung ke fong, tusruktu engan fah sikyak ke lotutang.”¹⁵

Pohloh kahs se “ke inkacnek in kunohkohn lalos” ahkuhtweyac mwet lweng ac tuhtahf mokleyuck fin facluh suc kuhlwacnsapuh Leum ke [elos] kahsruh mwet kawuck ac mempucr an in porongo fohnlah luhn wosasuc ke loh [lalos] sifacna ac kahs [lalos] sifacna.¹⁶ Puhsrwaclos, sign language, ac ma lwenglah lalos an ahkkahlwemye ma pwacye ma pahtpaht, tuhsruhk suhpuhs sesr etuh inelos kuh ahkkahlwemye tarilacna [lasr]. Ke mwe sang luhn loh ma elos ahkinsewowoyeyuck kac, mwet lweng ac tuhtahf an oaru in kuhlwacnsap, tiac nuhnkuh kaclos sifacna, ac inkaiyacn pacl uh, tiac etweyuck ke [elos] kahsruh mwet in eis mwe sang luhn nguhn ke luhlahlfongi in riti ac lohng kahs luhn God.¹⁷

Pohloh kahs se “ke inkacnek in kunohkohn lalos” ahkuhtweyac mukul ac muhtwacn macruht oaru suc ahkfuhlwactye wuhlweacng kunaclos in isus fahko ac nwacklah facluh, ac suc ahkinsewowoyeyuck ke kuh ac muhtweng in karihngihn tuhlihk nahtuhlos ke toeni in kuhfa luhn Leum. Ke facluh lihksreni na fohsack ke ongaiyac ac nuhkanlah lah meac yohk srihpac uh, nguhna puhlaik inge tiac lohacng nuh ke puhsra ma kaksakihn mwet se in lohacng nuh sel sifacna; elos ahkfuhlwactye muhtahliyacn ac yohk srihpaciyacn moul ke plwacn luhn Pahpah Lucng ke engan luhn tuhlihk Nahtuhl.

Puhkantwen siyacnyacn macruht pac ma luhlahlfongi in God ke kena suwohswohs luhn insiaclos tiac akihlen lah fuhkah kuh ngac elos ac finsrakkihn ac mwemwe kac. Elos “filiya lulalfongi [lalos] in Leum”¹⁸ ac tiac sapkihn nuh Sel in oraclah finsrak lalos ke moul suhkawihl. Tuh ac ke na muhtwacwacackiyacn facluh yac mwet uh tiac porongo ke insrwac, kuh liye ke muhta, O God, Sahyom, ke wolacna luhn ma suc Kom ahkolah nuh [selos] suc sane Kom.¹⁹

Pohloh kahs se “ke inkacnek in kunohkohn lalos” ahkuhtweyac tausin ac tausin sin mwet kol ke u luhn ahwowo ac mwet luti ke u luhn tuhlihk srihsrihk suc luhngse ac luti tuhlihk ke Alu uh ke kais sie Lwen Sahpuht.

Motko ke ma an ma pahtpaht ke kuhlwacnsap utuckuh sin mwet tuhma lutlut oaru inge—ac mwe insewowo yohk ma uliyuck nuh selos suc luti tuhlihk srihsrihk.

“Na el eis sie tulik srisrik ac sap elan tuyak ye mutalos nukewa, na el koasulma ac fahk,

“Kutena mwet su eis sie sin tulik srisrik ouinge inek, el eisyuc; ac el suc eisyu el tia eisyu mukena, a el eisal pac su supweyume.”²⁰

Pohloh kahs se “ke inkacnek in kunohkohn lalos“ ahkuhtweyac tuhlihk karuhnguhnwacng in wo ninac pahpah mahtuh uh, sie ninac ullac suhkwac mutul suc ahkkweye tuhlihk sahngweng se ke el topang oacna sie lion muhtwacn ke motonoac ke lohm sel,²¹ mempuhr ke Alu suc sa na tuhkuh in tahkuhnlah siyah ac muhta paht in oracni siyah, ac kais sie mwet mokleyuck suc suli sucu, kawuck ac mwet lili in tuhkuh ac liye, tuhkuh ac kahsruh, ac tuhkuh ac muhta.²²

Nga ahkuhtweyac kuhtuhsrihk na mwe srihkasrak ke liyacacng wuhlweacng ac mwet tuhma lutlut oaru luhn Jisus Kraist oacna kowos suc fungyang nuh met “ke inkacnek in kunohkohn [lom].” Million ke mwe srihkasrak luhn Mwet Luhlahlfongi ke Lwen-sahflah suc sang “nguhn[alos] nohfohn”²³ nuh sin God sukokyak ke lohm ma siiyac na Kraist ac ke un Alu fin facluh nohfohn.

Kom luhngse ac kuhlwacnsap, lohng ac lutlut, karihngihn ac ahkkweye, ac luti ac fahkwack ke kuh luhn Nguhn Muhtahl. Kom lalo ac pruhe pacl nuh kwewa, ac fokokoi na fokokoi ke inse puhsisacl, ac fokokoi na fokokoi ke luhlahlfongi ke Kraist, “nuh ke nwacnwaclah luhn [nguhnum] ke kaksak ac engan, ahok, finne ke ahknwacsnwacsyeyucklac ac ahkmuhtahlyeyucklac luhn [insiom], ma ahkmuhtahlyeyucklac uh tuhkuh ke srihpen [kom] sang [insiom] nuh sin God.”²⁴

Elos suc wi wagon sahflah sac, nohfohn suc kuhlwacnsap tiac srihk, ac misenge kom suc fungyang nuh met ke inkacnek in kuhlwacnsap lom pa kuh luhn Alu fohlohkihnyuckyak luhn Mwet Lahngo. Ac oacna ke Leum El olwelah lah tron ac acn nuh kwewa, mura ac kuh nuh kwewa, ac fah ahkkahlwemyeyuck ac akwucki kaclos nuh kwewa suc oaru in muhtweng ke wosasuc luhn Jisus Kraist.²⁵

Nga engan in loh kac lah Pahpah Lucng ac Wen Kuloh Nahtuhl moul, ac olwelah Lalos an pwacye, ke ine muhtahl luhn Leum Jisus Kraist, amen.