Tamuhlwel ac Tahmtahel in Kraist

Kawuck sacohk luhk, toeni na wowo pa kuht wi mihsenge inge. Kuht puhla Nguhn luhn Leum ac luhngse Lal ke pweng wolacna sin mwet kol lasr inge. Nga puhla wo in sramsram nuh suwos oyekuh kaliyac toeni se inge. Nga pruhe tuh Nguhn luhn Leum in wi kuht na ke kuht aengani sie sin sie ekihn tamuhlwel ac tahmtahel pwacye in Kraist.

Mwet pahluh sacohk lasr, Russell M. Nelson, el tuh fahkwack: “Mihsenge nga pahng nuh sin mempucr wiyacsr yen nuhkwewa in kol ohiyac in sislah nuhnak ac mukwikwi luhn sruhnga. Nga kwacfe kowos in oruh wo nuh sin tuhlihk nuh kwewa nuhtin God.”¹ Ekihn Alu kapkapwack se fin facluh nohfohn, in ukwe suliyuck se inge sin mwet pahluh lasr yohk srihpac in muhsaheack tohkohsrahi luhn Mwet Lahngo ke muhtuhn facl nuhkwewa fin facluh.

Wosasuc luhn Jisus Kraist luti kuht lah kuht nuhkwewa wen ac acn in nguhn nuhtin pahpah ac ninac inkuhsrao suc luhngse kuht² ac tuh kuht moul oacna sucu se yurin God met liki kuht isuslac fin facluh. Wosasuc oacyacpac luti lah kuht nuhkwewa oreklac ke ohiyac ac luhman God.³ Pa oruh, kuht oacna El,⁴ tuh El “orala mutanfahl nukewa sin mwet sefanna.”⁵ Pwacnwacng, oasr yohrohsr ohiyac muhtahl, sucu, kuh muhtahl sefanna, ac “oasr God sefanna, su Papa tumun mwet nukewa, ac su leumi ma nukewa, ac El orekma in ma nukewa ac muta in [kuht] nukewa.”⁶

Oacna mwet suc fahsr tukun Kraist, kuht suliyuck in ahkyohkye luhlahlfongi lasr ke, ac luhngse lasr nuh sin, tamuhlwel ac tahmtahel in nguhn wiyacsr ke kuht ahkfototoye insiacsr tuhkweni in ma se ac luhngse se, tiac elyah ke ma tiac oacna sie inmahsrlosr, ohinge ahkyohkye kuh lasr in ahkfahsrye ahkfuhlwactye suhnak luhn wen ac acn nuhtin God nuhkwewa.⁷

Kuh tiac ma inge pa mwet luhn Nephi elos puhlakihn ke apkuhran yac lofoko tukun Kraist el muhtwacta yohrohlos?

“Ac pwacyena lah tiac kuh in oasr sie un mwet engan yohk liki inge inmahsrlon mwet nuhkwewa suc tuh oreklac ke poun God. …

“Tiac pac mwet Laman, kuh kuhtwena kain in un mwet; tuhsruhk elos ma sefanna, tuhlihk nuhtin Kraist, ac mwet in usrui tohkohsrahi luhn God.

“Ac fuhkah insewowoiyaclos!”⁸

Prestuhn Nelson el ahkweye tuh yohk srihpac kuht in ahkfahsrye suhnak ac kuhlwacng nuh sin mwet wiyacsr ke el fahk: “Pahpah Lucng El pahngon kuht nuhkwewa in fuhlwelah nuhnak luhn sruhnga nuh sin kuhtwena un tuhlihk nuhtin God. Fin oasr sie sesr suc sruhnga sie un mwet sahyac enenuh in auliyak! … Yohk srihpac nuh sesr in oruh kuhtwena ma kuht kuh in oruh ke moul lasr in karihngihn suhnak ac kuhlwacng inmahsrlon wen ac acn nuhkwewa nuhtin God.”⁹ Ma na pwacye, ahkfuhlwactye suhnak luhn kais sie enenuh in etuh met lah oasr ma siena inmahsrlosr.¹⁰

In motko ke kuhpahsr muhtahl se ma kaprikuhti nuh sin God ekihn tuhlihk Nahtuhl, kolyuck luhn pahluh ma utuckuh nuh sesr sel Prestuhn Nelson el sie ip yohk in muhsaheack sohs in etacack liki na in sramteack pihsihnkac in sruhnga ac fohs inmahsrlosr.¹¹ Tuhsruhk, oacna ke Paul el sensenkihn mwet Ephesus, kuht enenuh in akihlen lah kuht fin ke kuhtanglah srihpac se inge, kampare luhn kais sie kuh u na fohn se enenuh in orek ke inse puhsisacl, efahl, ac mongfihsrwacsr nuh sie sin sie.¹²

Oasr puhpuhlyuck soko sin rabbi Jewish se suc luhngse liye takwack luhn faht ah wi kawuck luo lal. El siyuck selos, “Komtacl etuh fuhkah lah sahflah sie fong ac muhtacwacack sie lwen sasuc?”

Sie selos topuk, “Ke kom ngwetlah nuh kuhtuhlacp ac kuh in akihlen siena inmahsrlon nacni soko ac sip soko.”

Na mwet se sahyac ah topuk, “Ke kom ngwetlah liye horizon ac akihlen siena inmahsrlon sahk olive soko ac sahk fig soko.”

Na elos foracng nuh sin rabbi lahlmwetmwet sac ac siyuck sel kihsen siyuck se pacna. El motko ke kihtihn pacl, na topuk, “Ke kom ngwetlah nuh kuhtuhlacp ac liye muhtuhn muhtwacn se kuh muhtuhn mukul se ac kuh in fahk, ‘El pa tahmtahel wiyuck; el pa tamuhlwel wiyuck.’”¹³

Kawuck sacohk luhk, nga kuh in olwelah nuh suwos lah kahlwem ke sie lwen sasuc kahlmwelihk sahromrom nuh ke moul lasr ke kuht liye ac oruh nuh sin mwet wiyacsr ke suhnak ac kuhlwacng oacna tamuhlwel ac tahmtahel pwacye in Kraist.

Ke forfor luti fin facluh Lal, Jisus El pa mwe srihkasrak suwohs ke ip yohk se inge ke El “forfor oruh ma wo”¹⁴ nuh sin mwet nuhkwewa, solwaclos in tuhkuh nuh Yohrohl ac ipeis ke ma wo Lal, tiac elyah ke acn selos, luhpan mani lalos, kuh facsin lalos. El kuhlwacnsap, ahkkweye, ac lohacng nuh ke enenuh luhn mwet nuhkwewa, yohk nuh selos suc ma nuhnkuh muh siena, ahkkolukyeyuck, ac tiac acwac. Wacngihn mwet El lahfwekihn tuhsruhk oraclos in ma se fana ac ke luhngse, ke El liyaclos oacna tamuhlwel ac tahmtahel wiyacl, wen ac acn nuhtin Pahpah sefanna.¹⁵

Sie pacl ma yohk ahkkahlwemyeyacn ma sikyak se inge pa ke Mwet Lahngo El fahsr nuh Galilee, ac som ke inkacnek ma ahluhkwelah acn Samaria.¹⁶ Jisus El sulaclah in muhta monglac sisken unohn kof lal Jacob. We, sie muhtwacn Samaria el tuhkuh in ut kof. Ke etuh Lal, Jesus El pahnglol, ac fahk, “Ase nimuk kutu kof an.”¹⁷

Muhtwacn se inge lut lah mwet Jew se ngihsre muhtwacn Samaria se kahsruh ac el ahkahlwemye lut lal, fahk, “Kom sie mwet Jew, a nga mwet Samaria se — na fuka tuh kom ku in ngusr kof sik kom in nim? mwet Jew tia ku in orekmakin ahlu ma mwet Samaria orekmakin.”¹⁸

Tuhsruhk Jisus, El tiac orekmakihn facsin luhn sruhnga inmahsrlon mwet Samaria ac mwet Jew, ac luti ke luhngse nuh sin muhtwacn se inge, kahsrwel in kahlwem lah suc na pwacye El uh—suc pa, Messiah, suc ac fahk ma nuhkwewa ac tuhkuh Lal pa el tuhpan uh.¹⁹ Ma sikyak ke lutlut se inge oruh muhtwacn se inge kahsruhsr nuh siti ah ac fahkwack nuh sin mwet we ma sikyak, fahk, “Ya acnu tia el pa Christ?”²⁰

Oasr luhngse yohk luhk nuh sin elos suc ahkkolukyeyuck, ahksrihkyeyuck, kuh isruhnyuck sin mwet koluk ac suhnuhnkuh, ke srihpen, ke moul luhk, nga liye ke muhtuhk sifacna kweok ma mwet wo puhla ke elos nuhnuhnkweyuck kuh lahfwekihnyuck ke srihpen siena kahs, atac, ac muhta lalos uh. Insiyuck puhla ahsor na pwacye kaclos suc nuhnak la lohsrlah, ngwet la fototo, ac kwekweiyacn insiaclos ke srihpen elos luhlahlfongi muh mwet suc siena luhkwelos tiac wo oacna elos. Fototoiyacn ngwet lalos nuh sin mwet sahyac oruh tuh elos tiac kuh in liyaclos oacna tuhlihk nuhtin God.

Oacna palyeiyuck sin mwet pahluh mahtuh, kuht moul ke lwen sensen ma fototoyang nuh ke Tuhkuh Ahkluo luhn Mwet Lahngo.²¹ Facluh nohfohn srweyucki ke kain in kuh, pa nuh ke tuhnin kolo, nuhnak luhn kafucrmacn, ac ohiyacn mani. Ohiyac inge kuhtuh pacl uh ahkkolukye nuhnak ac mukwikwi luhn mwet nuh sin mwet wiyaclos. Ke srihpac inge, tena suhpah in liye mwet uh ke atacn nuhnak, mukwikwi, ac sramsram ke facsin sahyac, tuhnin kolo, kuh in suhfal mwet sahyac, orekmakihn nuhnak stuhuh, tahfonglac, ac ahksruhksruhk, oruh ma ahkkoluk, suhnuhnkuh, tiac suhnak, ac finne koase mwet inge. Kain nuhnak inge tuhkuh ke inse fuhlwact, sok, ac lwemta, ip ke ma luhn facluh,²² ma tiac fahsr fal nuh ke ohiyacn Kraist. Mukwikwi inge tiac fal nuh selos suc srihke in ekihn mwet tuhma lutlut Lal.²³ Pwacye, tamuhlwel ac tahmtahel sacohk wiyuck, tiac wo in oasr kain nuhnak kuh mukwikwi koluk sin u luhn Mwet Luhlahlfongi.

Ekihn wen ac acn ke olwelah, kuht kuh in kahsruh tulokihnyac mukwikwi suhfal inge ke kuht liye ma siena inmahsrlosr oacna Mwet Lahngo El liye²⁴ ac ma ma oacna sie inmahsrlosr—ohiyac ac kuhpahsr muhtahl lasr. Yohk liki na, kuht kuh in srihke in liye kuht sifacna ke mwemwe, finsrak, kweok, ac ngal luhn mwet tuhlan lasr. Kuht nohfohn mwet fuhfahsryucsr ekihn tuhlihk nuhtin God, kuht oacna sie ke suhfaliyacsr ac kuh lasr in kapkapwack. Kuht suilyuck in tuhkweni fahsr, ke mihs, insiacsr in sesseslah ke luhngse nuh sin God ac mwet nuhkwewa—kuh, oacna Abraham Lincoln el fahk, “in wacngihn sruhnga lasr sin mwet; ke luhngse nuh sin mwet nuhkwewa.”²⁵

Kuh oasr pacl kom nuhnkuh ke ip yohk se ke suhnak nuh sin mwet nuhkwewa ac in oacna sie ma ahkfahsryeyuck ke ohiyen nuknuk lasr lin lohm sin Leum? Kuht nuhkwewa tuhkuh nuh tempuhl fahsrweni ke srihpac sefanna ac sesseslah ke kena in nwacsnwacs ac muhtahl ye Muhtahl. Nuknuk fasrfasryang, kuht nuhkwewa paingyuck sin Leum Sifacna ekihn tuhlihk sacohk Nahtuhl, mukul ac muhtwacn luhn God, tuhlihk nuhtin Kraist.²⁶ Wo nuh sesr in oruh akwuck sepacna, olwelah se pacna, kihsackihnkuhtlac in moul suwohs ac fuhlwact liki met, ac eis olwelah ma pahtpaht sepacna. Tuhkweni ke srihpac, kuh liye sie sin sie ke muhta sasuc, ac in ma sefanna, kuht ahkfuhlwactye ma siena sesr ekihn tuhlihk muhtahl luhn God.

Nga tuhfahna kahsruh pwen mwet luhlahp ac mwet kol luhn kafucrmacn in liye Tempuhl Brasília Brazil met liki kihsac la. Nga tui ke acn in ayaol nuknuk ah wi vice prestuhn luhn Brazil, ac kuht sruhmuhn nuknuk fasrfasr ma mwet nuhkwewa nukum lin tempuhl. Nga ahkuhtweyac nuh sel lah orekmakihnyacn nuknuk fasrfasr kalmac pa kuht nuhkwewa oacna sie nuh sin God ac na, lun tempuhl, kuht tiac vice prestuhn luhn muhtuhn facl se kuh mwet kol luhn alu se tuh atacsr ma pahtphat pa wen nuhtihn Pahpah luhngse Inkuhsrao.

Petsac

Kof Puhtat Iguaçú

Infacl Iguaçú fahsr nuh rohtoh Brazil ac puhtati ke finohl se ma oraclah kof puhtat kahto puhs ma pahngonyuck facluh nohfohn oacna Kof Puhtat Iguaçú—sie sin ma kahto ac wolacna emet ma God El oraclah facluh, nuhnkweyuck muh sie sin ma usrnguck itkohsr fin facluh. Kof na puhkantwen fahsrweni nuh ke infacl soko na fahsrwelihk, suc oraclah kof puhtat ahluhkwelah ma siofok. In srihkasrak se, kof puhtat puhkantwen inge oacna sucu luhn God fin facluh, tuh kuht akacsruhi ohiyac in nguhn sefanna, ma tuhkuh ke ohiyac ac kuhpahsr muhtahl lasr. Tuhsruhk, kais sie sesr fahsr nuh ke kain in facsin, tuhnin kolo, ac muhtuhn facl, ke kain in nuhnak, etuh, ac puhla. Finne ohinge, kuht fahsr nuh met oacna tuhlihk nuhtin God ac tamuhlwel ac tahmtahel sin Kraist, ac tiac fuhlwelah kuhpahsr muhtahl lasr, ma oruh kuht mwet sulweyucklac se ac un mwet sacohk.²⁷

Tamuhlwel ac tahmtahel sacohk wiyuck, lwelah kuht in ahksuwohsye insiacsr ac nuhnak lasr nuh ke etatwen ac luhlahlfongi lah kuht nuh kwewa oacna sie inmahsrlon God, lah kuht eis fohnlahiyacn mwe sang muhtahl ke finsrak ac usru ma pahtpaht. Lwelah kuht in engankihn kuhpahsr in nguhn ma oasr inmahsrlosr ac sacohkkihn ma siena sesr ac mwe sang ma oasr lasr. Kuht fin oruh, nga olwelah nuh suwos tuh kom ac fahsr ke ohiyac lasr sifacna, oacna kof ke Kof Puhtat Iguaçú, ac tiac fuhlwelah kuhpahsr muhtahl se ma ahkkahlwemye lah kuht mwet suleyucklac, “tuhlihk nuhtin Kraist, ac mwet in usrui tohkohsrahi luhn God.”²⁸

Nga fahkwack nuh suwos lah ke kuht kampare in fahsr ke ohiyac se inge ke moul lasr, sie lwen sasuc e muhtwacwacack ke sie kahlwem sasuc ma ac tohlwack moul lasr ac ahkkahlwemye ma wolacna puhs in esam, ac ahkinsewowoyeyuck yohk, ke ma siena ma oreklac sin God nuh sin tuhlihk Nahtuhl.²⁹ Kuht e fah eklac kuhfa in mwe mweun ke kihfihn Pahol in oraclah luhngse ac suhnak inmahsrlon tamuhlwel ac tahmtahel Nahtuhl nuhkwewa. God El moul. Jisus Kraist pa Mwet Lahngo luhn facluh. Prestuhn Nelson el pa mwet pahluh luhn God ke lwen lasr. Nga ahklohye ma pwacye inge ke ine muhtahl luhn Jisus Kraist, amen.