Kaksakihn Mukul Sac

Tamuhlwel ac tahmtahel sacohk wiyuck, nga engan in wi kowos ke lututacng se inge. Nga pruhe tuh God Elan ahkinsewowoyeyuc.

Ahtron muhtuhk tiac wo oacna met. Ke nga som ac muhtwacta yurun taktuh in ahtron muhta, ac nga fahk, “Nga tiac kuh in liye teleprompter ah.”

Ac el fahk, “Ahok, ahtron muhtom arlac mahtuhlah. Ac tiac kuh in wolac.”

Na nga ac oruh wo emet luhk.

Nga luhngse in akacsruhi kuhtuh ma yurum ma oasr in nuhnak luhk. Mwet Pahluh Joseph Smith el kwacna oasr in nuhnak luhk ke mahlwem ekahsr inge. Nga tuh muhta ac liye kunohkohn wolacna lal in ekihn mwet pahluh luhn fihl se inge, fihl luhn fohnlahiyacn pacl uh.

Nga nuhnkuh luhpan kuloh lasr mempucr ke Alu luhn Jisus Kraist luhn Mwet Luhlahlfongi ke Lwen-Sahflah lah Joseph Smith, mukul fuhsr se suc kena in etuh ma el enenuh in oruh in eis nuhnak muhnahs liki ma koluk lal, el konwacack puhlaik in som nuh imac in sahk se sisken lohm sel ke Palmyra, New York, ac sikuck muhtuhnte ac—ke kahs lal sifacna—pruhe lihksreni ke pacl se met (liye Joseph Smith—History 1:14).

Ke pacl sacn, ke Joseph el sikuck muhtuhn te ke ma kuht pahngpahng Imac Muhtahl, inkuhsrao ikacklah. Mwet luo, suc kahlwem la kahlwem liki faht ah luhn lwen, sikyang nuh sel. Sie selos sramsram nuh sel ac fahk, “[Joseph,] pa inge Wen Kuloh Nuhtihk. Lohngohl!” (liye Joseph Smith—History 1:17). Pa inge muhtwacwacack luhn Fohlohkihnyuckyak ke fohnlah luhn wosasuc ma pahtpaht luhn Jisus Kraist

Ke srihpen Jisus, Mwet Lahngo lasr ac Mwet in Molwelah lasr, El sramsram nuh sin mukul fuhsr Joseph ac ikacslah fihl in pacl se inge ma kuht moul kac, kuht onkihn, “Kaksakihn mukul se suc sramsram nuh sin Jehovah!” (“Praise to the Man,” Hymns, no. 27). Kuht sang kuloh nuh sin Leum sel Joseph Smith ac ke puhlaik lal in som nuh innimac in sahk sacn ke yac 1820, fototo nuh lohm sel fin acn Palmyra, New York.

Nga nuhnkuh ke ma wolacna pucs ma kuht etuh ac ma wo puhkantwen lasr. Tamuhlwel ac tahmtahel sacohk, luhlahlfongi luhk nuh suwos olutu pa mwe insewowo pucs lasr kuht in etuh ma nuhkwewa kuht etuh ke srihpacl Joseph Smith, mwet pahluh ke fihlin pacl sahflah se inge.

Kuht kahlwem ke srihpen moul uh, ohiyac pwacye lasr.

Kuht etuh ohiyacn God; kuht etuh ohiyacn Mwet Lahngo, ke srihpacl Joseph, suc som nuh innimac in sahk ke el mukul fuhsr se, ac suk nuhnak muhnahs liki ma koluk lal.

Nga muh ma se inge inmahsrlon ma wolacna ac kahto emet lah mwet suc fin facluh kuh in etuh—lah Pahpah tuhmasr Inkuhsrao ac Leum Jisus Kraist Elos ahkkahlwemyaclos sifacna ke lwen sahflah inge ac lah Joseph el kolyucklac in fohlohkohnwack fohnlah luhn wosasuc ma pahtpaht luhn Jisus Kraist.

Oasr yohrohsr Puk luhn Mormon. Puk luhn Mormon el mwe sang wolacna se nuh sin mempucr ke Alu uh. El pa sie pac mwe loh, siepac wuhlweacng tuh Jisus pa Kraist. Oasr yohrohsr ke srihpen Joseph el suwohs in eis puhlwet ah, mokleyuck inkuhsrao in luhngaslah sin kuh ac mwe sang luhn God ac sang puk se inge nuh fin facluh.

Finne pweng luhk olutu fihsrwacsr, srwackna loal, ac sesseslah ke luhngse nuh sin Mwet Pahluh Joseph Smith ac nuh sin elos nuh kwewa, tamuhlwel ac tahmtahel wiyuck, suc ahkkweiyacl ac kena in ahkkweiyacl ke pacl fuhsr lal.

Nga ke akihlen olutu ninac kiyacl. Nga nuhnkuh tuh arlac wo lah ke pacl se Joseph el fohlohk ke ma el puhlakihn ke Innimac Muhtahl ac fahk nuh sin ninac kiyacl ma tuh siyuck, Lucy Mack Smith el luhlahlfongel.

Nga kuloh nuh sin pahpah tuhmwacl ac mwet wiyacl ac sucu lal, suc ahkkweiyacl ke kunohkohn yohk ma Leum El sang nuh sel in ekihn mwet pahluh in sifilpac fohlohkohnwack wosasuc ma pahtpaht luhn Jisus Kraist nuh facluh.

Luhlahlfongi luhk olutu pa nga etuh tuh Jisus Kraist El Mwet Lahngo ac Mwet in Molwelah luhn facluh. Nga oacyacpac etuh tuh Pahpah tuhmasr Inkuhsrao ac Leum Jisus Kraist Elos sikyang nuh sel Joseph ac ahkkweiyacl in eklac nuh ke mwet pahluh.

Nga lut ke, ac nga puhla tuh pucs suwohs pac, luhpan mwe insewowo lasr tuh kuht etuh srihpen moul lasr, efuh kuht oasr inge, ac ma kuht enenuh srihke in oruh ac kuhtanglah ke moul lasr lwen nuh kwewa. Kuht oasr ke orekma in ahkoekuhtlac sifacna, lwen nuh ke lwen, kais kuhtuh in wo liki met, kuhlwacng liki met, in ahkolah liki met nuh ke lwen se, ma ac fah tuhkuh, ke kuht in fohlohk nuh sin Pahpah tuhmasr Inkuhsrao ac Leum Jisus Kraist.

Pacl sacn muhtwacwacack in fototo keik. Nga apkuhran matwac 95. Kuhtuh pacl tuhlihk nuhtihk fahk nuh sihk lah elos nuhnkuh muh sahp nga luhmahn mahtuh liki matwac se inge, tuh wo na. Nga oruh wo emet luhk.

Tuh ke apkuhran yac 50, tamuhlwel ac tahmtahel, nga eis pacl wowo in som nuh facluh nohfohn ke kunohkohn luhk ekihn Mwet Kol Luhlahp luhn Alu uh. Mwe insewowo yohk nuh sihk. Nga muh nga som fototo tari nuh ke ac nuh kwewa fin facluh. Nga ohsun mempucr luhn Alu uh fin facluh nohfohn.

Ahok, nga luhngse kowos. Arulacna wolacna nuh sihk—in liye muhtowos, muhtwacta yuruwos, ac puhla luhngse lowos nuh sin Leum ac nuh sin Fohlohkyak ke wosasuc luhn Jisus Kraist.

Lwelah Pahpah tuhmasr Inkuhsrao liye kuhtyang ingena ac ahkinsewowoye kuht ke fahsriyacn toeni luhlahp se inge. Ac lwelah Nguhn luhn Leum ahkyohkyelihk insiacsr, ac lwelah luhngse lasr nuh sin wosasuc luhn Jisus Kraist—Mwet Lahngo Lasr, Leum Jisus Kraist—yohkwelihk ke kuht inseseacng in kuhlwacnsap El ac karihngihn masap Lal ac eklac in oacna El ke srihpacn kuh wi toeni luhlahp. Kuhtwena acn ma kom oasr we, lwelah God Elan ahkinsewowoye kom. Lwelah Nguhn luhn Leum in oasr yohrohsr. Lwelah kuh in puhla kuh luhn inkuhsrao ke kuht ahkfuhlwact tuhkweni ke toeni se inge.

Nga fihliyac loh ac luhlahlfongi luhk tuh nga etuh Jisus pa Kraist. El pa Mwet Lahngo lasr ac Mwet in Molwelah lasr. El kawuck pwacye se emet lasr. Ke ine muhtahl luhn Jisus Kraist, amen.