Wehi en Kilohri Kan

Sang nan kaudiahl en rahn pwukat kitail ese me wasa kitail pahn lel ie ohng koaros me mihmi pohn sampah iei kaidehn sohitar en madamadau en nanleng ong me pwung kan oh weirek poatoapoat kan ong me luhwe kan. Sapwellimen Koht plahn ohng Sapwellime seri kan iangahki padahngkan sang atail Sounkomour, Jesus Christ: “Pere tohto mie nan tehnpesen Semei.”¹

Padahk kasansalada en Mwomwohdiso en Sises Krais en Souleng en Imwin-rahn akan me kopwurpwurdo wet kin padahngki met Sapwelimen Koht serihkan koros—pwehki ah sohte irar en ansou ih sohte pahn kapataieng—pahn udahn sohsohki ehu wehin kilohri siluho, pil me keieun tikitik me “laudsang dahme aramas kak wehwehki.”² Mwurin ansou ehu me me sapeik kan lokolongkiher diparail kan, lokolok ehu me pahn kaunop irail ong dahme pahn wiawi mwuhr, koaros pahn iasada oh douluhl lahng Keimwseklahn Kadeik en Kaun Sises Krais. Wasahu, atail Sounkomouro, me, kitail kaskuhlkihe, “kin kepikepinga Sahmo, oh doarehla soahng kan me eh wiadahrs,”³ oh pahn kadaredo sapwellimen Koht seri kan koaros ohng ehu ehu wein kilohri me doke arail ineng kan me irail piladahr nan mour wet.

Pil ehu padahk oh wiepe en Mwomwohdiso kopwurpwurdohu iei kosonned oh inou sarawi kan me kasansaladahr me kiheng sapwellimen Koht seri kan koaros pwukoah sarawi en warehng wehi keieu ileile nan kilohri en wein selesdiel. Wasa me keiou ileilehu—lapalapala nan wein selesdiel—iei me Souleng en Imwin rahn akan kin kilelahng,

Sang kaudiahl en rahn pwukat, Souleng en Imwin rahn akan ahneki wehwe kesempwal wet ong sapwellimen Koht koasoandi en popohl ong Sapwellime seri kan. Pilahn wet tepkihda atail mour ni atail wia ngehn kei mwohn atail ipwidi, oh e kasalehda karepehu oh irair kan en atail seiloak pilipildahro nan mouret oh wasa kitail men lel ie mwuri.

Kitail esehier me sang kaudiahl en rahn pwukat me “wehi kan koros mie arail kosoned”⁴ oh me wehin kilohri me kitail pahn alehdi ni Keimwseklahn Kopwungo iei kasalepen kosonned akan me kitail pilada idawehn nan atail seiloak en mouret. Nan pilahn en limpoako, mie wehi tohto—tehnpas tohto—pwe sapwellimen Koht seri kan koaros en sohsohki wehin kilohri ehu me kosonned akan irail kak “kapwaiada.”

Ni atail kasalehda mwohmw oh anahn akan en ehu ehu wehi siluh pwukat nan sapwellimen Sahmo pilahn, kitail tepkihda me keieu ileilehu, me keieun kesempwal ong kosonned oh tiahk sarawi kan me Koht ketin kasaledahr sang nan Mwomwohdiso en Sises Krais en Souleng en Imwin-Rahn Akan. Nan “celestial” glory⁵ mie dake siluh,⁶ me keieun ileile iei lapalapala nan wehin selesdiel. Wasa wet iei wasahn kousoan ong “irail kan me alehdahr sapwellime unsek, oh sapwellime glory,” ihme kahrehda, “irail wia koht ekei, pil Sapwellimen Koht pwutak [oh serepein] kan”⁷ oh “pahn mihmi rehn KOht oh Sapwelime Ieros kokolahte.”⁸ Sang kaudiahl, Koht ketin kasaledahr kosonned soutik kan, tiahk sarawi kan, oh inou sarawi kan me anahnepen idawehn pwehn kakairada momouren koht akan me anahn pwehn kilangada koahiek sarawi wet. Mwomwohdiso en Sises Krais en Souleng en Imwin Rahn Akan kin mehlelieng mehpwukat pwehki kahrepen Mwomwohdiso kopwurpwurdo wet iei en kaunopada sapwellimen Koht seri kan ong komourla nan wehi kilohri en selesdiel oh, me kesempwal sang, ong lapalapala nan wasa keieu ileile.

Sapwellimen Koht pilahno, me poahsoanda pohn mehlel soutik, anahne me lapalapala kakete alahldi sang mehlelieng inou sarawi kan en pwopwoud soutik nan pwungen ohl emen oh lih emen nan tehnpas sarawi,⁹ pwopwoud ehu me mie ong koaros me pwoson. Iei ih kahrepen atail kin padahngki me “lih oh ohl wia mehkot kesempwal ong emen emen litail nan mour mwohn mouret, nan mouret, oh kitail oh atail pwukoah soutik.”¹⁰

Ehu padahk tohtor kesempwal me kin sewese kitail en kaunopada ohng lapalapala iei kalohk ehu onhg peneinei kan sang pahr 1995.¹¹ Ah kaweid kan kasalehda anahn akan me pahn kaunop kitailehng kousoanla rehn Koht Sahm oh Sapwellime Iehros, Sises Krais. Koaros me sohte nohn wehwehki sapwellimen Sahmo pilahn en limpoak ong Sapwelime seri kan pahn kak alehda kalohk en peneinei wet duwehte kosonned teikan me kin kak wekidekla. Me wekisang, kitail kamehlele me kalohk en peneinei wet, me poahsoanda pohn padahk sohte kak wekidekla kei, kawewehda me ehupene en peneinei nan mouret iei wasa me atail keirda keieu kesempwal ong mour soutik pahn wiawi ie.

Wahnpoaron Paul koasoaiehda dake en kilohri siluh wet, ni ah karasahieng irail ong marain en ketipin, maram, oh usu kan. ¹³ E kiheng eden me keieu ileilehu “celestial” oh me keriauo “terrestrial.”¹³ E sohte kiheng eden me keieu pah, ahpw kaudiahl ehu me kohieng Joseph Smith me kapatahieng ede: “telestial.”¹⁴ Pil ehu kaudiahl kin kawehwe duwen soahngen aramas me pahn alehdi wehin kilohri siluh kat. Irail akan me sohte pilada “en peikieng kosoned en nan wein celestial”¹⁵ pahn sohsohki ehu wehin kilohri, me tikitik sang celestial ahpw pwungehng kosonned akan me irail piladahr oh kak “mihmiheng.” Lepin lokaiahumihmiheng{, me dir nan pwuhk sarawi kan, wehwehki koasoanehdi wasa teng.¹⁷ Ni karasepe, irail kan nan wehin terrestrial—duwehte me tohto wehwehki duwen nanleng—“iei irail kan me kamehlele sapwellime Iehroso, ahpw kaidehn Sahmo ni unsek”¹⁷ Irail wia “ohl wahun kei pohn sampah, me rotorokihla koahiek mwersuwed akan en aramas,”¹⁸ ahpw “sohte kehlail nan kadehdehpen Sises.”¹⁹

Me sansalehr me irail kan me kileledieng wehin glory me keieu pah, nan telestial, iei “aramas me sohte kak kolokol … arail terrestrial glory.”²⁰ Mwo kasalehda irail kan me soikala Sounkomouro oh sohte kesempwaliki mehkot sarawi ong arail wiewia kan. Met iei wehio wasa me me sakanakan kan mihmieng ie, mwurin arail lokolongkiher diparail kan. Mepwukat saladahr nan kaudiahl en rahn pwukat me “irail me sohte alehda rongamwahu en Krais, de pil kadehdepen Jesus. …

“Mepwukat iei irail akan me soun likamw, oh soun wunahni, oh soun kamwahl, oh lien netiki palinwararail, oh sohte lipilipil me kin mwahuki oh wiahda likamw.”²¹

Padapadahngki wehi siluh en kilohri sang ni ah kokohp, , President Russell M. Nelson intingiedi me: “Mouren sampah wia ahnsou inenin mwotomwot ehu karasahieng mour soutuk. Ahpw soangen kesempwal en ahnsou inenin mwotomwot ieu met! Medemedewe ni keneinei ia mwomwen ah kin doadoahk: Nan mouret ke kak pilada mehnia kosonned akan ke men peikieng—kosonned akan en wehin selesdiel, de deresdriel, de delesdiel—oh, eri, nan mehnia wehi en kilohri ke pahn mihmi ie kohkohlahte. Pilahn ieu met! E wia pilahn ehu me kauawih ni unsek atail mehn pilipil.”²²

Wahnpoaron Paul padahngkiher me sapwellimen Koht padahk oh kosonned akan kohieng kitail pwe kitail koaros en kak alehda “ni idin deilahn unsek pen Krais.”²³ Wiepeo anahne laudsang alehdi marain. E sohte itar en kamehlelehte rongamwahu wet; kitail anahne wia oh medewe pwe kitail en weliakapwala pwehki rongamwahu. Me wekisang ekei padahk, me kin kaskuhlih kin kitail en esehla mehkot, rongamwahu en Sises Krais kin kangoangei kitail en wiahla mehkot.

Sang padahk pwukat kitail ese me Kaimwseklahn Kadeiko sohte kasawihte atail wiewia mwahu oh suwed koaros—ahpw dahme kitail wiadahr. Pwe iei kadehdepen dahme atail wiewia oh madamadau kan eledahr—dahme kitail wialahr. Kitail kak alehdi mour soutik sang wiepen weliakapwala. Ni ah doadoahk wasaht, lepin lokaia wet me tohto wehwe kasalehda lapalahn wekila ehu. E sohte itar ong aramas sohte lipilipil men en iangete mwekmwekid seli. Kosonned akan, tiahk sarawi akan, oh inou sarawi kan en mwomwohdiso wet sohte wia koasoandi kei me kitail en wiahte pwe en kileldi nanleng. Rongamwahu en Sises Krais iei pilahn me pahn kasalehong kitail ia mwomwen atail pahn wiahla dahme Samatail Nanleng kupwuriki kitail en wiahla.²⁴

Pwehki Sises Krais oh Sapwellime Tomwpen dihp, ahnsou kitail pwupwidi nan mouret, kitail kak koluhla oh pwuralahng pohn elen inouo me pahn wai kitaillahng dahme Samatail Nanleng kupwurki ong kitail.

Pwuhk en Mormon padahngki me “nan mour wet iei ahnsou me [kitail] anahne kaunopada tuhwong Koht.”²⁵ Ahpw kahpwal en keinapwihdi wet ong “nan mour wet” alehdier irair koapwoaroapwoar ehu (me pahn kak mwahu ong ekei aramas) sang dahme Kauno kasalehiengehr President Joseph F. Smith, me kileledier nan Doctrine and Covenants section 138. “I kilangehr,” soukohpo ah intingihedier, “me elder pwoson akan en nan ansou wet, ni ahnsou me irail kohkohsang mouret, pahn kadokehla arail doadoahk kan nan kalohki rongamwahu en koluhla oh doarehla, sang tohnmetei en Sapwellime Koht Iehroso, nan pwungen irail kan me mihmi nan rotorot oh pahn kalidu en dihp nan sapwen ngehn en me melahr akan.

“Me melahr akan me koluhla pahn komourla, sang ni arail peikiong tiahk sarawi kan en tehnpas en Koht,

“Oh mwurin arail alehier kalokepen diparail kan, oh mwakelekeldahr, irail pahn ale ketingpen arail doadoahng kan, pwe irail pahn sohsohki komour”²⁷

Pil kapatahieng, kitail ese me milenium, sounpar kid me pahn kohdo mwurin ketdo keriau en Sounkomouro, pahn wia ahnsou en wiahda tiahk sarawi kan me anahn ong irail kan me saikinte alehdi nan arail momour pohn sampah.²⁷

Soahng tohto kitail sehse me pid ahnsou kesempwal siluh nan pilahn en komouro: (1) mour mwohn mouret nan sapwen ngehn, (2) mouret, oh (3) mour teio. Ahpw kitail ese mehlel soutik pwukat: “Komourla wia pwukoah en emen emen, ahpw lapalapala wia pwukoah en ehu ehu peneinei.”²⁸ Mie Samatail Nanleng limpoak men me pahn tehk me kitail alehdi kapai oh paiamwahu koaros me pein atail ineng oh pilipil kan mweidada. Kitail pil ese me E sohte pahn ketin idingehng emen ong nan ehupene katengteng ehu me uhweng ah pilipil. Kapai kan en ehupene ehu me katengtengpene udahn pahn kohieng irail kan me kolokol arail inou sarawi kan ahpw sohte ehu ahnsou e pahn itoitehng emen aramas en katengtengdi nan ehupene ehu ma e sohte warehng de sohte men wia.

Riei koampoakepahi kan, I kadehdehki mehlelpen mehpwukat. I kadehdehki atail Kaun Sises Krais, “me tapi oh imwin atail pwoson,”²⁹ me sapwellime Tomwpen dihp, me sang pilahn en Samatail Nanleng, elehda soahng koaros en pweida, ni mwaren Sises Krais, ahmen.