Me Salongalahu oh Ahl Me Kolahng Wasahn Kouson

E kahdankiher soai dehde ehu me me tohto inenen wehwehki.¹ Pwehki ah kawewehdier ni songesongen lokaia kid kei nan sampah, e kakete me nan pahr riekid samwalahro, ketipino sohte kin kirihla ma sohte soaiepen soai wet kin wiawi nan sampah.

Pein Sises Krais mahsaniher soai pwoatet, atail Sounkomour oh Soundor, me ketido sampah “pwe en kapitala irail akan me salongalahr.”² E tapikihda lepin kosoi mengei pwukat: “Mie ohl emen me nainekidahr pwutak riemen.”³

Nan ansouohte, kitail eseier duwen mwekid kansensuwed wet. Emen pwutak ko⁴ padahkiong ah pahpao me e itarikiher mour me e ahneki ni ihmwarail o. E men saledekla. E men kokolahsang arail tiahk oh padahk kan en ah pahpa oh nohno. E peki ah sohso sang rehra—ansouohte.⁵

Ke kak medewe songen pepehm da me ah pahpao ahneki ni ah rongada met? Ansou me e diarada me dahme nah pwutako keieu mwahuki iei en kokohla sang ah peneinei oh mwein sohte pahn pwuredo?

Pwutako men kehn duwen soailok oh ia kaperenih. Mwurin ansou reirei ehu, e kelehpw mweseldahr. Saledeksang mahsen oh kosonned akan en tiahk en ah pwulopwul o, e kakehr wiahda pein a pilipil me pahn sohte sang ah pahpa oh nohno. E solahr pahn ahneki pepehm me e dipada. E kakehr iang sohngen mwekid en saledek kan oh momour ki pein isene kan.

Ni ah lelehr nan wasa ehu me inenen doh, e pitipit te diarada kompokepah kei oh tapiadahr momouriki mour me e kin ouramaneki en ahneki. Aramas tohto me kin pereniki ih, pwehki e kin kihkiwei mwahl mwohni. Kompokepah me kapw kan—me insenamwahukiher nah sent kan—sohte kin kadeik ih. Irail kin kamadipw, kapikapinga, oh kin uhki ah pilipil kan koaros.⁶

Ma mie dipwisou en nan wehwe ansou pwuko, mwoainte, e pahn kak kihda kilel tohto en kompokepah kan arail kokouruhr nan nah page kan:#MomourikiPeinNgehi! #SohteKinPerenSangMet! #KonehngiehnWiaMetRahnteiko!

Ahpw kamadipwo sohte wiewiawihte—soahngen kamadipwo sohte kin mihmi kohkohlahte. Sohng riau wiawier: keieu, sohla nah mwohni, oh keriau, lehk oh duhpek laud lelohng sahpwo.⁷

Ansou me lehk oh duhpeko ah laudla, e pwunodada. Me kin sohte uhdi, wiahda aramas-kepwehpweo ansouet sohte kak pwainda ehu dahl en mwenge, oh pil wasa me en kouson ie. Ia mwomwen ah pahn momour?

E inenen kin mwahu ong kompokepah kan—re pahn kak sewese ih ansouet? I kak kilang ih met ah wie pekipeki sawas—ong ansouet—lahu e kak pwurehng apwalih pein ih.

Pwuhk sarawi masahniong kitail, “Sohte aramas emen sewesehda ih.”⁸

Sang ni ah men momour, e diarada ohl emen me ale ih pwe en wia nah soun kamwenge pwihk.⁹

Ni ah mih nan duhpek laud, solahr me kin mihmi reh oh e kelehpwlahr, pwutak menet mwein kin medemedewe ia mwomwen sohng koaros ah sohrasang ih, ah inenen sapwungala laud.

Kaidehnte ah duhpek o me e pwunodiki. Ahpw duhpek en pali ngehni. E inenen kopworopworikihla me alehda dipwisou oh peren en sampah pahn kiong ih peren, me kosonned akan pahn kedirapwahla ah peren. Met e wewehkier mwahu. Oh pil, ia wen pweipwei laud me e pwainehr pwe en kak alekihdi marain wet!¹⁰

Ni duhpek en paliwar oh palingehn ah laudlahr, ah madamadau pwuralahngehr ah pahpao. E pahn kak sewese ih, mwurin soahng koaros me wiawier? Nein ah pahpao lidu kan mie kanarail mwenge oh wasa me re pahn kak rokisang kisinieng de melimel ie.

Ahpw en pwurala rehn ah pahpao?

Soh douluhl.

Padahkiong tohn ah wasa me e kanekehla mwahl ah sohsohu?

Sohte kak.

Tuhwong irail akan me padahkiong me e pahn kasohwawihala ah peneinei oh kawehla mongiong en ah pahpa oh nohno? Pwurala rehn kompokepah kan me e suweiki ong irail me e pahn saledeklahr o?

E sohte kakehng.

Ahpw uwen ah men mwenge, loaloid, ah nsensuwed sohte sohrahla—lao lel “ah pein kasawiada pein ih.”¹¹

E eseier dahme e anahne wia.

Met kitail pwuralahng rehn ah pahpao, ohl me ah mohngiongo-ohla me kin mihmi ni ihmwehu. Ia wehn awa epwiki kei, de kid kei, me e kin medemedewehki nah pwutako?

Pak depe me e kin kilekilengwohng ahl me nah pwutako aleier oh kin pwurehng tamanda rahn me nah pwutako kokohlasang o? Kapakap depe me e kin wia nihpwong kan koaros, pekipeki rehn Koht me nah pwutako en kak insenamwahu, oh en kak diarada me mehlelo, oh en kak pwuredo reh?

Eri ehu rahno. pahpao kilenglahng pohn ahlo—ahl en kolahng ni ihmwarailo—oh kilangada aramas men alialu kohdo reh.

Met kak wiawi?

Mendahte aramas menet ah inenen dohsang ih, pahpao ese nan ansouohte me iei ih nah pwutako mwo.

E tangala reh, pwolehdi ih, oh metik ih.¹²

“Ipa,” pwutako koasoia nan kosoi kei me e kin wie kapwukapwureiong pak kid kei. “I dipadahr nanleng oh pil rehmw. Ih solahr warohng ien wia noumw pwutak. Ih me ih peki ken ale ie oh wiahkila emen noumw lidu.”¹³

Ahpw pahpaho sohte mweidong en kanekehla ah kosoi ko. Ni pilen mese ah kerpene, e ruweseiehng nah lidu kan en: “Wahdo likou me keieu kaselel pwe nei pwutak en likawiada. Kiong rihng nin sendin peh kan, oh sohri ni paten neh kan. Wiahda mwenge pwe kitail pahn kamadipw. Nei pwutak pwuredohr!¹⁴

Nan ai ohpiso mie mahlen ehu langalang sang rehn Richard Burde olen German men. Ngehi oh Harriet kin kesempwaliki. E kasalehda ehu ansou mwomwen Sounkomour o nan karasaras ehu me inenen loal.

Kilel

Pwuredohn Pwutak me Salongalahu, sang Richard Burde.

Ansou me koaros wie perepereniki pwuredohn pwutako, emen sohte iang peren—iei rie pwutak me laudo.¹⁵

E weuwa toutou en insensuwed laud.

E mihmiki mwo ansou me rie pwutako padahkiong ah pahpao en kihong ah sohsohu. Ihme tepin kadehde toutou laud en insensuwed me ah pahpao alehdi.

Mwurin te rieo ah kokohlau, e kin songosong en kansenamwahuihla ah pahpao. Rahn koaros, e kin dodohk pwe en kak kamwahuihala insensuwed me mihmi rehn ah pahpao.

Ah met, seri weid menet pwuredohr, oh aramas akan sohte kak uhdisang arail pereniki rie me ketihwohu.

“Nan sounpar kan koaros.” e padahkiong ah pahpao. “Sohte pak ehu ih kin kasapwungehla dahme ke kin padahkiong ie. Ahpw, nan ansou ko koaros, ke sohte kin kamadipwe ie,”¹⁶

Pahpao eri kawewehiong, “Nei pwutak, soahng koaros me I ahneki ahmw! Met kaidehn mehn tenekih pweipwei de kamadipw kan. Met pidada duwen kamwahula. Ih ansou et me kitail wie kopworopworki nan pahr akan koaros. Riomw pwutako mehlar, oh e pwurohnger mourda! E salongalahr ahpw met e dierekier!¹⁷

Riei souleng kan koaros, kompokepahi kan, duwehte karasaras kan en Sounkomouro, met kaidehn te ongete aramas en mahs ko. E pidada komwi oh ngehi, rahnwet.

Ihs rehtail me saikinte salongasang ahl sarawio, medemedewe me kitail kak diar peren ni atail-pein kin ale ehu ahl torohr?

Ihs rehtail me sohte karakarahkala, ahneki mongiong-ohla, oh men alehdi mahk oh kalahngan?

Mwein ekei kitail kin medewe, “Kitail pahn kak pwurala? Ih sou pahn kileldier kokolahte, sohte me pahn perenikin ie, oh sohte me pahn men ehu ong ie? E mwahu ma ih pahn salongala te? Dahme Koht pahn ketin wia ma ih pahn pwurala?”

Karasaras wet kiong kitail pasapeng o.

Samatail Nanleng pahn tangedo rehtail, Sapwelime mongiong pahn audaudki limpok oh mahk. E pahn pwoleikitaildi, kiong kitail likou puhp, rihng pohn sendin pehtail kan, sohri ni paten nehtail kan, oh kalohkida, “Rahnwet kitail kamadipw! Ong nei seri, me melahr, oh e pwurehng mourdahr!”

Nanleng pahn pereniki atail pwuredo.

Ih kak ahneki ansou mwahu wet oh kosoiong emen emen ?

Sohte katepen dahme wiawier rahnteio, ih pahn pwurehng kalokihda kosoi koaros sang kompokepahi men oh Wahnparon Elder Jeffrey R. Holland: “Ke sohte kak rokisang marain en tomwpen Kraiso ni ansou me e kin dakada.”¹⁸

Mendahte mehn pilipil kan ah kin waiukalasang Sounkomouro oh Sapwelime Mwomwodiso, Kaun en Kamwahu o ketiket nan ahl en kohlang wasahn kousono, luke luke iuk. Eri kitail tohn Mwomwodiso en Sises Krais kin idahwen Sapwelime karasaras oh wiahkila kowe riat, oh pil kompokepaht kei. Kitail peren oh kitail kamadipw.

Ahmw pwuredo sohte pahn katikala kapai en mehteikan. Pwe sapwelimen Sahmo kapai sohte imwi, oh dahme pahn kolahng emen sohte pahn katikala dahme mehteio udahn dokedoke.¹⁹

Ih sohte kak inda me pwuredo wia mehkot mengei ehu. Ih kak kadehde ki met. E kak, ni mehlel, wie mehn pilipil keieu apwal me ke pahn wiahda.

Ahpw ih pahn kadehdeki me nan ansou me ke medewehda kehn pwuredo oh alu nan sapwelimen Sounkomouro oh Soundoro Ahl, Sapwelime manaman pahn pwuredo nan ahmw mour oh ke pahn wekila.²⁰

Tohnleng en nanleng kan pahn peren.

Oh pil kiht, amw peneinei en Krais. Mwurin sohng koaros, kitail eseier duwen salongala. Kitail koaros kin kehliki manaman en tomwpen Krais o. Kitail eseier ahlo, oh se pahn iang uhk alu loale.

Soh, kaidehn kitail sohte pahn alehda toutou, pahtou, de insensuwed. Ahpw kitail lelehr wasaht “sang ni mahsen en Krais oh pwoson ih, koapwoaroapwoarki soahng kan sang reh me kin komourehla.” Oh kitail koaros pahn “nantihla mwowe tengedi rehn Krais, ahneki marain en kopworopwor unsek, oh limpok en Koht oh koaros [aramas].”²¹ Koaros, kitail pahn “pereniki peren me kitail sohte kak kosoia oh audaudki lingan,”²² pwe Sises Krais me wia atail kehl!²³

Ih kapakapki me emen emen kitail pahn rong, nan karasaras wet, ngilen Sahmo ah liklikwerih kitail en pedelong nan ahl me kolahng reh—pwe kitail en kak ahneki kehlail en koluhla, alehdi mahk, oh idahwen ahl me pwuralahng rehn atail Koht me mahk oh limpoak. Oh met I kadehde oh kihdiong kumwail ahi kapai ni mwaren Sises Krais, ahmen.