Pag-amlig sang Panaksihon sang Katawhan sang Kasugtanan sa Ulihing-Tubo

Isa sa pinakamatalandog nga tinion sa Libro ni Mormon amo ang pagbisita sang Manluluwas sa mga tawo sa templo sa duta nga Bugana. Pagkatapos sang bilog nga adlaw nga pagtudlo, pagpang-ayo, kag pagpabakod sang pagtuo, ginpatalupangod ni Jesus sa katawhan ang ulihing tubo: “nagsugo sia nga dalhon nila palapit ang ila magagmay nga mga kabataan.”¹ Ginpangamuyuan Niya sila kag ginbendisyunan sing tinag-isaisa. Ang eksperiyensia tama ka makatalandog nga ang Manluluwas Mismo naghibi sing makapila.

Dayon, nga nagahambal sa kadam-an, si Jesus nagsiling,

“Tan-awa ang inyo magagmay nga kabataan.”

“Kag samtang nagatulok sila … , nakita nila nga ang kalangitan nabuksan, kag nakita nila ang mga anghel nga nagapanaog gikan sa langit” kag nag-alagad sa ila kabataan.²

Pirme ko ginapanumdum ining eksperiyensya. Siguro, nagtandog ini sang balatyagon sang tagsa ka tawo! Nakita nila ang Manluluwas. Ginhikap nila Sia. Nakilala nila Sia. Gintudloan Niya sila. Ginbendisyunan Niya sila. Kag ginpalangga Niya sila. Indi katingalahan nga pagkatapos sining sagrado nga hitabo, ining kabataan nagdalagku agud magbulig pasad sang sosyedad sang paghidaet, pag-uswag kag Cristohanon nga gugma nga nagdugay sa madamo nga henerasyon.³

Indi bala manami kon ang aton kabataan may amo man sina nga mga eksperiyensya upod kay Jesucristo—butang nga magaangot sang ila tagipusuon sa Iya! Ginaagda Niya kita, pareho nga gin-agda Niya atong mga ginikanan sa Libro ni Mormon, nga dal-on ang aton magagmay nga kabataan sa Iya. Mabuligan naton sila nga kilalahon ang ila Manluluwas kag Manunubos pareho sining kabataan. Mapakita naton sa ila kon paano pangitaon ang Manluluwas sa balaan nga mga kasulatan kag ipasad ang ila pundasyon sa Iya.⁴

Sang sini lang, isa ka abyan ang nagtudlo sa akon sang butang nga wala ko napiyaran sadto parte sa paanggid sang maalam nga tawo nga nagpatindog sang iya balay sa bato. Suno sa pagsaysay ni Lucas, sang ang maalam nga tawo nagpahamtang sang pundasyon sang iya balay, “nagkutkot sia sing madalom.”⁵ Indi ato pasapayan ukon simple lang nga buluhaton—nagpangayo ato sang pagpangabudlay!

Agud mapasad ang aton kabuhi sa Bato sang aton Manunubos nga si Jesucristo, kinahanglan naton magkutkot sing madalom. Ginakakas naton ang tanan nga mahuyang kag indi importante sa aton kabuhi. Padayon kita nga nagakutkot asta makita naton Sia. Kag ginatudloan naton ang aton kabataan nga iangot ang ila mga kaugalingon sa Iya paagi sa sagrado nga mga ordinansa kag mga kasugtanan, agud paglaslas sang bagyo kag baha nga sigurado magaabot, diutay lang ang epekto sini sa ila “tungod sang bato nga sa diin [sila] napasad.”⁶

Ini nga klase sang kabakod ginapangabudlayan. Wala ini ginapasa sa madason nga henerasyon nga daw espirituhanon nga palanublion. Ang kada tawo dapat magkutkot sing madalom agud makita ang Bato.

Matun-an naton ining leksyon halin sa isa pa gid ka panaysayon sa Libro ni Mormon. Sa katapusan nga paghambal ni Haring Benjamin sa iya katawhan, nagtipon sila bilang mga pamilya agud mamati sa iya mga pulong.⁷ Si Haring Benjamin naghatag sing mabaskog nga panaksihon parte kay Jesucristo, kag ang katawhan natandog gid sang iya testimonya. Siling nila:

“Ang Espiritu … naghikot sang isa ka dako nga pagbag-o sa amon, ukon sa amon mga tagipusuon. …

Kag nakahanda kami sa pagsulod sa isa ka kasugtanan upod sa amon Dios sa paghimo sang iya kabubut-on … sa bug-os nga nabilin namon nga mga adlaw.”⁸

Ayhan ginapaabot nga ang magagmay nga kabataan sang mga ginikanan nga madalom ang pagkahaylo sa ulihi mangin hinaylo man kag magahimo man sang mga kasugtanan. Pero, sa pila ka rason nga wala namitlang sa kasulatan, ang kasugtanan nga ginhimo sang mga ginikanan wala sa bungog sang pila sang ila kabataan. Pagligad sang pila ka tuig, “madamo sa ulihing-tubo ang indi makahangop sang mga pulong ni haring Benjamin, sanglit diutay nga mga kabataan pa sa tion nga naghambal sia sa iya katawhan; kag wala sila nagapati sa tradisyon sang ila mga katigulangan.

“Wala sila nagapati sa kon ano ang ginhambal nahanungod sa pagkabanhaw sang mga minatay, ukon wala man sila nagapati nahanungod sa pagkari ni Cristo. …

“Kag indi sila magpabunyag; ukon indi man sila magbuylog sa simbahan. Kag isa sila ka napain nga katawhan suno sa ila pagtuo.”⁹

Daw ano kaserioso nga butang! Para sa ulihing-tubo, indi bastante nga ang pagtuo kay Jesucristo mangin isa lang ka “tradisyon sang ila mga katigulangan.” Kinahanglan nila mag-angkon sang pagtuo kay Cristo para sa ila kaugalingon. Bilang katawhan sang kasugtanan sang Dios, paano naton matanom sa tagipusuon sang aton kabataan ang handum nga maghimo kag magtuman sang mga kasugtanan upod sa Iya?

Makasugod kita paagi sa pagsunod sang ehemplo ni Nefi: “Nagahambal kita (parte) kay Cristo, nagakasadya kita kay Cristo, nagawali kita (parte) kay Cristo, nagapanagna kita (parte) kay Cristo, kag nagasulat kita suno sa aton mga panagna, agud nga mahibal-an sang aton mga kaanakan kon sa ano nga ginhalinan sila mahimo nga magpaabot para sa kapatawaran sang ila mga sala.”¹⁰ Ang mga pulong ni Nefi nagapahangop sing sige-sige, nagapadayon nga pagtinguha nga tudloan ang aton kabataan parte kay Cristo. Segurohon naton nga ang panaksihon sang katawhan sang kasugtanan ginapaambit sa ulihing-tubo adlaw-adlaw kag indi lang kon Dominggo.¹¹

Ang panaksihon sang katawhan sang kasugtanan mabatian sa aton mga testimonya. Mabatian ini sa mga pulong sang buhi nga mga propeta. Gamhanan ini nga gin-amligan sa balaan nga mga kasulatan. Dira sina makilala sang aton kabataan si Jesus kag makakita sang sabat sa ila mga pamangkot. Dira sina matun-an nila para sa ila mga kaugalingon ang doktrina ni Cristo. Dira sina nila makit-an ang paglaum. Magahanda ini sa ila para sa bilog-kabuhi nga pagpangita sang kamatuoran kag pagpangbuhi sa dalan sang kasugtanan.

Nanamian ako sining laygay ni Pangulong Russell M. Nelson:

“Sa diin kita mahimo magkadto agud magpamati sa Iya?

“Makakadto kita sa balaan nga mga kasulatan. Nagatudlo ang mga ini sa aton parte kay Jesucristo kag sa Iya ebanghelyo, sang kasangkad sang Iya Pagbayad-Sala, kag sang dako nga plano sang kalipayan kag pagtubos sang aton Amay. Ang adlaw-adlaw nga pagpaayaw sa pulong sang Dios importante para sa espirituhanon nga pagkabuhi, ilabi na sa sining panahon sang nagadako nga kabudlayan. Samtang nagapaayaw kita sa mga pulong ni Cristo adlaw-adlaw, ang mga pulong ni Cristo magahambal sa aton kon paano aktuhan ang mga kabudlayan nga wala naton ginahunahuna nga atubangon.”¹²

Gani paano naton mahibal-an kon nagapaayaw kita sa mga pulong ni Cristo kag mabatian Sia? Kon ano ang pinakaepektibo para sa inyo! Ayhan ini amo ang pagtipon upod sa inyo pamilya agud hambalan ang mga gintudlo sang Balaan nga Espiritu sa inyo pagtuon sang balaan nga mga kasulatan gamit ang Dali, Magsunod sa Akon. Ini mahimo man ang pagtipon kada adlaw upod sa inyo kabataan agud magbasa sang pila ka dinalan sa balaan nga mga kasulatan kag dayon magpangita sang mga oportunidad nga hambalan ang inyo natun-an kon nagaululupod kamo. Hibal-a kon ano ang pwede sa inyo pamilya kag tinguhai nga mag-uswag kada adlaw.

Binagbinaga ining panan-aw halin sa Pagtudlo sa Paagi sang Manluluwas: “Kon tinag-isaisa, ang isa ka home evening, sesyon sa pagtuon sang balaan nga kasulatan, ukon diskusyon parte sa ebanghelyo daw wala kaayo sang epekto. Pero ang nasupot nga ginagmay, simple nga mga pagtinguha, nga sige-sige nga ginasulit sa kadugayon, sarang nga mangin mas mabaskog kag makapabakod sangsa panalagsa nga dalagko nga tinion ukon importante kaayo nga leksyon. … Gani indi magpangampo, kag indi pagkabalak-i ang pagtigayon sang dalagko nga mga butang sa tagsa ka tion. Magmangin tayuyon lang sa imo mga pagpaninguha.”¹³

Isa sang aton pinakasagrado nga responsibilidad amo ang buligan ang aton kabataan nga mahibal-an sing tudok kag pat-od nga si Jesus ang Cristo, ang Anak sang Buhi nga Dios, ang ila personal nga Manluluwas kag Manunubos, nga nagapanguna sa Iya Simbahan! Indi naton matugotan ang tingug sang aton panaksihon nga maghinay ukon maghipos kon parte na sa Iya.

Ayhan nagabatyag kamo nga daw indi makasarang sining papel, pero indi kamo dapat magbatyag nga isahanon. Halimbawa, ang mga ward council awtorisado nga mag-organisa sang teacher council meeting para sa mga ginikanan. Sa sining mga miting kada tatlo ka bulan, ang mga ginikanan makatipon agud magtuon halin sa mga eksperiyensya sang kada isa, hambalan kon paano nila ginapabakod ang ila mga pamilya, kag magtuon sang importante nga mga prinsipyo sang Cristohanon nga pagtudlo. Ini nga miting dapat hiwaton sa ika-duha nga oras sang pagsimba.¹⁴ Ginapangunahan ini sang miyembro sang ward nga ginpili sang bishop kag ginasunod ang pormat sang kinaandan nga teacher council meeting, gamit ang Pagtudlo sa Paagi sang Manluluwas bilang tig-una nga kuluhaan.¹⁵ Mga bishop, kon ang inyo ward wala sa karon nagahiwat sang mga teacher council meeting para sa mga ginikanan, maghikot upod sa inyo Sunday School president kag ward council agud iorganisa ang inyo mga kaugalingon.¹⁶

Mahal kong mga abyan kay Cristo, mas maayo ang inyo ginahimo sangsa inyo ginahunahuna. Padayona lang. Ang inyo kabataan nagabantay, nagapamati kag nagatuon. Sa inyo pagtudlo sa ila, mahibal-an nila ang ila matuod nga kinaiya bilang pinalangga nga mga anak sang Dios. Mahimo nga malimtan nila ang Manluluwas sing makadali, pero ginapromisa ko sa inyo, indi gid Sia malipat sa ila! Inang mga tinion nga ang Balaan nga Espiritu nagahambal sa ila magapabilin sa ila mga tagipusuon kag mga hunahuna. Kag pila ka adlaw ang inyo kabataan magasulit sang testimonya ni Enos: “Kilala ko ang akon ginikanan nga matarong sila nga mga tawo—kay gintudluan nila ako sa disiplina kag pagtudlo sang Ginuo—kag bulahan ang ngalan sang akon Dios tungod sini.”¹⁷

Batonon naton ang pangagda sang Manluluwas kag dal-on ang aton kabataan sa Iya. Kon himuon naton ini, makita nila Sia. Mahikap nila Sia. Makilala nila Sia. Tudloan Niya sila. Pakamaayohon Niya sila. Kag, palanggaon Niya sila sing tuman. O, palangga ko gid Sia. Sa Iya sagrado nga ngalan, nga si Jesucristo, amen.