Kilala kag Palangga Kamo sang Dios

Ang kabuhi mabudlay. Madamo ang nagabatyag nga ginabudlayan, nagaisahanon, ukon ginakapoy. Kon mabudlay ang kabuhi, pamatyag naton nga nagtalang kita ukon nabayaan. Ang paghibalo nga kita tanan mga anak sang Dios kag miyembro sang Iya wala katapusan nga panimalay makahatag sa aton sang balatyagon nga may upod kag katuyuan.²

Si Pangulong M. Russell Ballard nagsiling: “May isa ka importante nga pagkatawo nga ara sa aton tanan sa karon kag sa gihapon. … Nga ang ikaw sa karon kag halin sadto isa ka anak sang Dios. … Ang pag-intiendi sining kamatuoran—matuodtuod nga pag-intiendi kag pagpangabuhi sini—makapabag-o sang kabuhi.”³

Indi paghangpa sing lain ukon pakanuboa kon daw ano kamo kaimportante sa inyo Amay sa Langit Indi kamo aksidente nga resulta sang kinaugali, ilo sang uniberso, ukon resulta sang bagay kag oras kag tsamba. Kon may disenyo, may nagdisenyo.

Ang inyo kabuhi may kahulugan kag tuyo. Ang nagapadayon nga Pagpanumbalik sang ebanghelyo ni Jesucristo nagahatag kasanagan kag paghangop parte sa inyo diosnon nga pagkatawo. Pinalangga kamo nga anak sang Amay nga Langitnon. Parte sa inyo atong tanan nga paanggid kag pinanudlo. Palangga gid Niya kamo gani ginpadala Niya ang Iya Anak para ayuhon, salbaron, kag tubuson kamo.⁴

Ginkilala ni Jesucristo ang diosnon nga kinaiya kag wala katapusan nga bili sang tagsa ka tawo.⁵ Ginpaathag Niya kon paano ang kasugoan nga higugmaon ang Dios kag higugmaon ang aton isigkatawo nangin pundasyon sang tanan nga kasuguan sang Dios.⁶ Isa sang aton diosnon nga mga responsibilidad ang pagtatap sang mga nagakinahanglan.⁷ Amo kon ngaa bilang mga disipulo ni Jesucristo kita “nagapas-an sang palas-anon sang isa kag isa, … magpangasubo upod sadtong mga nagapangasubo … , kag magpaumpaw sadtong mga nagakinahanglan sang kaumpawan.”⁸

Ang relihiyon indi lamang parte sa aton relasyon sa Dios; parte man ini sa aton relasyon sa kada isa. Si Elder Jeffrey R. Holland nagpaathag nga ang Ingles nga tinaga nga religionnaghalin sa Latin nga religarebuot silingon “ihigot” ukon, mas literal, “ihigot liwat.” Gani, ang “matuod nga relihiyon [amo] ang higot nga nagabugkos sa aton sa Dios kag sa kada isa.”⁹

Importante ang pagtrato naton sa kada isa. Ginatudlo ni Pangulong Russell M. Nelson, “Ang mensahe sang Manluluwas maathag: Ang tunayNiya nga mga disipulo nagapabakod, nagapataas, nagapaisog, nagakumbinsi, kag nagapapagsik.”¹⁰ Mas importante pa gid ini kon ang aton isigkatawo nagabatyag nga nagtalang, nagaisahanon, nalimtan, ukon ginpabay-an.

Indi naton kinahanglan nga magtulok sa malayo para makakita sang mga ginabudlayan. Pwede kita magsugod sa pagbulig sang miyembro sang aton mismo pamilya, kongregasyon, ukon lokal nga komunidad. Pwede man naton buligan ang pag-antos sang 700 milyon katawo nga nagapangabuhi sa sobra nga kaimulon¹¹ ukon sang 100 milyon katawo nga nawad-an sang matineran tungod sang pagpamigos, kagamo, kag kapintas tungod sa ila pagkatawo.¹² Si Jesucristo ang perpekto nga ehemplo sang pag-atipan sang mga nagakinahanglan—sang ginagutom, sang estranghero, sang nagamasakit, sang imol, sang napriso. Ang Iya buluhaton, aton buluhaton.

Gintudlo ni Elder Gerrit W. Gong nga “ang aton pagpanglakaton padulong sa Dios masami may kaupod.”¹³ Gani, ang aton mga ward dapat mangin palasilungan sang tanan nga anak sang Dios. Pasapayan bala kita nga nagasimba ukon aktibo nga nagtuga sang mga komunidad nga ang tuyo amo ang magsimba, magdumdom kay Cristo, kag mag-alagad sa kada isa?¹⁴ Pwede naton sundon ang laygay ni Pangulong Nelson nga likawan ang maghusga, mas magpalangga pa, kag magpalab-ot sang tunay nga gugma ni Jesucristo paagi sa aton mga pulong kag aksyon.¹⁵

Ang Pagbayad-Sala ni Jesucristo ang pinakamataas nga pagpahayag sang aton Amay nga Langitnon sang pagpalangga sa Iya mga anak.¹⁶ Ang tinaga nga pagbayad-sala nagalaragway sang “pagpakig-uli” sa mga nahilayo ukon naseparar.

Ang misyon sang aton Manluluwas amo ang magbutang sang paagi nga makabalik sa Amay nga Langitnon kag bulig sa pagpanglakaton. Nahibal-an sang Manluluwas paagi sa Iya eksperiyensya kon paano kita suportahan sa mga hangkat sang kabuhi.¹⁷ Tandai: si Cristo ang aton manugsalbar kag manugpaayo sang aton mga kalag.

Kon magtuo kita, buligan Niya kita nga mag-abante sa tunga sang mga kabudlayan. Padayon Sia nga nagatanyag sang Iya mapinalanggaon kag maluluy-on nga imbitasyon.

“Kari sa akon, tanan kamo nga ginabudlayan kag ginabug-atan, kag papahuwayon ko kamo.

“Itakod ang akon gota sa inyo, kag magtuon kamo sa akon; … kag makakita kamo sang kapahuwayan sa inyo mga kalag.”¹⁸

Ang paanggid sang gota mabaskog. Ginpaathag ni Pangulong Howard W. Hunter: “Ang gota isa ka gamit … nga nagaangot sang kusog sang ikaduha nga sapat sa kusog sang primero nga sapat, nagatimbang kag nagapamag-an sang kabug-at sang [buluhaton]. Ang kalargahon nga daw mabug-at gid ukon daw imposible nga dalahon sang isa ka tawo pwede matimbangan kag maalsa sang duha nga naangot sang pareho nga gota.”¹⁹

Gintudlo ni Pangulong Nelson: “Nagakari kamo kay Cristo para magotahan upod sa Iya kag sa Iya gahum, para indi kamo isahanon sa pagguyod sang palas-anon sang kabuhi. Ginaguyod ninyo ang palas-anon sang kabuhi upod ang Manluluwas kag Manunubos sang kalibutan.”²⁰

Paano naton ginagotahan ukon ginahigot ang aton kaugalingon sa Manluluwas? Si Elder David A. Bednar nagapaathag:

“Ang paghimo kag pagtuman sang sagrado nga mga kasugtanan nagahigot sa aton kay Ginuong Jesucristo. Buot silingon, ang Manluluwas nagatawag sa aton nga magsalig kag mag-upod sa Iya sa pagbutong. …

“Wala kita kag indi gid kita magaisahanon.”²¹

Sa bisan sin-o nga nabudlayan, nagtalang, naligban: Indi ninyo kinahanglan mag-isahanon.²² Paagi sa Pagbayad-Sala ni Jesucristo kag sa Iya mga ordinansa, pwede ka magotahan ukon mahigot sa Iya. Mapinalanggaon ka Niya nga hatagan sang kusog kag pagpaayo nga kinahanglan mo sa pagpanglakaton. Sia gihapon ang palasilungan naton sa mga unos.²³

Ang matuod, si Jasper palalahog, mapinalanggaon, maalam, kag masabad. Pero ang punto sining istorya amo nga akon sia. Bata ko sia, kag palangga ko gid sia sangsa nahibal-an niya. Kon ang indi perpekto, dutan-on nga amay amo sini ang nabatyagan sa iya bata, mahunahuna bala ninyo kon ano ang balatyagon sang perpekto, ginhimaya, mapinalanggaon nga Amay nga Langitnon para sa inyo?

Sa pinalangga kong kaabyanan nga mga ulihing-tubo, Gen Z kag Gen Alpha: Hibaloa nga ang pagtuo nagapangayo sang pagpaninguha.²⁴ Nagapangabuhi kita sa panahon, nga “nagatuo lang sa makita.” Ang pagtuo mabudlay kag nagakinahanglan sang pagpili. Pero ang mga pangamuyo may sabat.²⁵ Kag ang mga sabat mabatyagan.²⁶ Ang iban sa pinakamatuod nga butang sa kabuhi indi makita; kundi mabatyagan, maintiendihan, kag maeksperiyensyahan. Matuod man ang mga ini.

Gusto ni Jesucristo nga hibal-on ninyo kag magpahamtang sang relasyon sa inyo Amay sa Langit.²⁷ Gintudlo Niya, “Si sin-o bala sa inyo, nga may anak, kag ara sia sa gwa nagatindog, kag nagasiling, Tatay, buksi ang imo balay para makasulod ako kag magkaon upod sa imo, nga indi magsiling, Sulod ka, anak ko; kay ang akon imo, kag ang imo akon?”²⁸ May mas personal, mapinalanggaon pa bala nga imahe sang Dios nga Wala Katapusan nga Amay?

Anak ka Niya. Kon daw nagtalang ka, kon may mga pamangkot ukon nagkulang sang kaalam, kon ginabudlayan sa imo kahimtangan ukon ginabudlayan sa pagsunod, magpalapit sa Iya. Magpangamuyo sa Iya para sa kaumpawan, pagpalangga, mga sabat, kag direksyon. Kon ano ang inyo kinahanglan kag bisan diin kamo, ibuhos ang inyo tagipusuon sa inyo Amay nga Langitnon. Sa iban, basi gusto ninyo nga sundon ang imbitasyon ni Pangulong Nelson kag magpamangkot “kon yara matuod Sia para sa inyo—kon kilala Niya kamo. Pamangkuta Sia kon ano ang Iya balatyagon tuhoy sa inyo. Kag dayon magpamati.”²⁹

Pinalangga nga mga kauturan:

• Kilalaha ang inyo Amay sa Langit. Perpekto Sia kag mapinalanggaon.

• Kilalaha kon sin-o si Jesucristo.³⁰ Sia ang aton Manluluwas kag Manunubos. Ihigot ang inyo kaugalingon kag ang inyo mga pinalangga sa Iya.

• Kag kilalaha kon sin-o kamo. Kilalaha ang inyo tunay nga diosnon nga pagkatawo. Ang plano sang kalipayan sang Dios parte gid sa inyo. Kamo ang Iya malahalon nga anak kag dako ang bili. Kilala kag palangga Niya kamo.

Nagapamatuod ako sa sining simple pero pundasyon nga mga kamatuoran sa ngalan ni Jesucristo, amen.