Mag-ululutod kay Cristo

Pinalangga kong kaabyanan, katahum sang mga sesyon sang komperensya naton karon. Nabatyagan naton tanan ang Espiritu sang Ginuo kag ang Iya pagpalangga paagi sa matahum nga mga mensahe sang aton mga lider. Pribelihiyo ko nga mangin pangtakop nga manughambal sining sesyon. Kabay nga ang Espiritu sang Ginuo magapadayon sa aton samtang nagakalipay kita bilang tunay nga mag-ululutod kay Cristo.

Si propetang Russell M. Nelson nagsiling: “Ginapanawagan ko sa aton mga miyembro sa bisan diin nga pangunahan ang pagsikway sang mga pamatasan kag mga buhat sang diskriminasyon. Nagapangabay ako sa inyo nga pasanyugon ang respeto sa tanan nga anak sang Dios.”¹ Bilang nagadako nga Simbahan, ang pagsunod sining imbitasyon sang aton propeta isa ka rekisito sa pagtukod sang ginharian sang Manluluwas sa tagsa ka nasyon.

Ang ebanghelyo ni Jesucristo nagatudlo sa aton nga kita tanan mga anak sang langitnon nga ginikanan nga nagapalangga gid sa aton² kag nagapuyo kita sadto bilang pamilya sa presensya sang Dios antes kita matawo sa duta. Ginatudlo man sang ebanghelyo nga tanan kita gintuga sa imahe kag dagway sang Dios.³ Gani, alalangay kita sa Iya,⁴ kay “gintuga [Niya] ang tanan nga mga rasa sang mga tawo.”⁵ Gani, tanan kita may diosnon nga kinaugali, palanublion, kag kapalaran kay “isa [ang] Dios kag Amay sang tanan nga mga katawhan, nga amo ang Ginoo sang tanan, nga nagapanghikot sa tanan, kag yara sa [aton] tanan.”⁶

Bilang mga disipulo ni Cristo, ginaagda kita nga padakuon ang aton pagtuo, kag pagpalangga para sa aton espirituhanon nga kauturan paagi sa pag-isa sa ila sa gugma, sa pihak sang aton mga kinalain, kag sa sina mapatubo ang aton ikasarang sa pagrespeto sang dignidad sang tanan nga anak sang Dios.⁷

Indi bala amo man sina ang kahimtangan sang katawhan ni Nefi sa halos duha ka siglo pagkatapos mag-alagad si Cristo sa ila?

“Kag pat-od gid nga wala na sing isa ka mas malipayon pa nga katawhan sa tunga sang tanan nga katawhan nga gintuga sang kamot sang Dios. …

“Wala man sing mga Lamanhon, ukon ano nga sari sang mga “hon” ukon mga “non”; kundi nagakaisa sila, ang mga anak ni Cristo, kag mga manunubli sang ginharian sang Dios.

“Kag daw ano kabulahan sa ila!”⁸

Si Pangulong Nelson nagsulit sang importansya sang pagpalapnag sang dignidad kag respeto sa aton isigkatawo sang magsiling sia: “Ang Tagtuga nagapanawagan sa tagsa sa aton nga isikway ang diskriminasyon sa bisan ano nga grupo sang mga anak sang Dios. Ang bisan sin-o sa aton nga may diskriminasyon sa iban nga rasa kinahanglan maghinulsol! … Dapat himuon sang kada isa ang aton masarangan sa aton nasakupan nga amligan ang dignidad kag respeto sa tagsa ka anak sang Dios.”⁹ Ang matuod, ang dignidad sang tawo nagapangayo anay sang respeto para sa aton mga kinalain.¹⁰

Nga ginapanumdom ang sagrado nga relasyon nga nagaisa sa aton sa Dios bilang Iya mga anak, ining laygay ni Pangulong Nelson wala sing duda una nga tikang sa pagpahamtang sang paghangop imbes sang diskriminasyon kag pagbinahinbahin sa aton.¹¹ Pero, sa ginpaandam ni Pablo sa mga taga-Efeso, dapat kilalahon naton nga para malab-ot ini nga tuyo, kinahanglan naton maghimo sang indibidwal kag tingob nga pagpaninguha nga mangin mapainubuson, mahinangpanon, kag pasensyoso sa kada isa.¹²

May istorya parte sa Judio nga rabbi nga nagatan-aw sang pagsubang sang adlaw upod ang duha niya ka abyan. Namangkot sia sa ila, “Paano ninyo mahibal-an nga tapos na ang gab-i kag nagsugod na ang bag-o nga adlaw?”

Nagsabat ang isa sa ila, “Kon magtulok ka sa sidlangan kag makilala mo na ang karnero sa kanding.”

Dayon nagsabat ang isa, “Kon magtulok ka sa unhan kag makilala mo na ang olivo sa higuera.”

Dayon nagbalikid sila sa maalam nga rabbi kag ginpamangkot man sia sadto. Pagkatapos sang pagpanumdom, nagsabat sia, “Kon magtulok ka sa sidlangan kag makita ang nawong sang babayi ukon lalaki kag makasiling, ‘Utod ko sia.’”¹³

Pinalangga kong kauturan, ang kasanag sang bag-ong adlaw mas magasilak sa aton kabuhi kon kilalahon naton kag tratuhon ang aton isigkatawo nga may respeto kag dignidad kag bilang matuod nga mga utod kay Cristo.

Sang nag-alagad Sia sa duta, ginpakita ni Jesus ang perpekto nga ehemplo sining prinsipyo sang “nagkadto Sia sa tanan nga mga lugar nga nagahimo sang maayo”¹⁴ sa tanan nga tawo, nga nagaagda sa ila nga magpalapit sa Iya kag magbaton sang Iya kaayo, wala sapayan sang ila ginhalinan, estado sa kabuhi, ukon kultura. Nag-alagad Sia, nagpang-ayo, kag sensitibo sa panginahanglan sang tanan, labi na gid sang mga ginkabig nga lain, ginpakanubo, ukon ginpain. Wala Sia sang ginsikway kundi gintrato sila nga alalangay kag may pagpalangga, kay ginkabig Niya sila nga mga utod, mga anak sang pareho nga Amay.¹⁵

Isa sa pinakabantog nga hitabo sini amo ang pagkadto sang Manluluwas sa Galilea, nga hungod nga nag-agi sa Samaria.¹⁶ Nagdesisyon si Jesus nga magpahuway sa tupad sang bubon ni Jacob. Sang didto Sia, nagpalapit ang Samariahanon nga babayi para magsag-ob sang tubig. Nga may ihibalo sang tanan, ginbugno sia ni Jesus, nga nagasiling, “Hatagi ako sang mainom.”¹⁷

Nakibot ining babayi kay isa ka Judio ang nangayo sa isa ka Samariahanon sang bulig kag nagsiling, “Ikaw Judio kag ako Samariahanon, ngaa bala nga nagapangayo ka sa akon nga paimnon ko ikaw?” kay ang mga Judio kag mga Samariahanon wala nagaayuhay.”¹⁸

Pero si Jesus,nga nagpahigad sang malawig na nga tradisyon sang dumot sa tunga sang mga Samariahanon kag Judio, mapinalanggaon nga nag-alagad sa sining babayi, ginbuligan sia nga makilala kon sin-o gid Sia—ang Mesias nga magahambal sang tanan kag ang iya ginahulat nga maabot.¹⁹ Ang epekto sining mapinalanggaon nga pag-alagad nagtulod sining babayi nga magdalagan pa-siyudad para ipahibalo ang natabo, nga nagasiling, “Amo na ayhan ini ang Cristo?”²⁰

Dako ang kaluoy ko sa mga ginmaltrato, ginpakanubo, ukon ginpigos sang mga wala kasingkasing kag pag-ulikid nga mga tawo, tungod nakita ko mismo ang pag-antos sang maayo nga mga tawo tungod ginhusgaran ukon ginsikway kay lain ang ila panghambal, hitsura, ukon pagpangabuhi. Ginasubuan man ako sa mga nadulman sang hunahuna, sa mga indi makakita, kag sa mga matig-a sang balatyagon sa pagpati nga ang lain sa ila, manubo nga klase sang mga tinuga. Ang ila limitado nga panan-awan sa iban nagapugong sa ila nga makita sila bilang mga anak sang Dios.

Sa ginhambal sadto sang mga propeta, nagapangabuhi kita sa peligroso nga inadlaw padulong sa Ika-duhang Pagkari sang Manluluwas.²¹ Ang kalibutan natunga sa mabaskog nga mga grupo nga nagaseparar sang rasa, pulitika, kag estado sang pangabuhi. Ang amo sini nga pagbinahinbahin kon kaisa nagaimpluwensya sang panghunahuna kag aksyon sang mga tawo sa ila isigkatawo. Tungod sini, indi na bag-o nga makakita ka sang mga tawo nga nagapamensar, nagaakto, kag nagakabig sang iban nga kultura, rasa, kag ginhalinan nga manubo, nga nagagamit sang sayop kag masami sarkastiko nga mga ideya, nga nagapukaw sang kaakig, pagpawala, pagtamay, kag diskriminasyon sa ila. Ini nga gawi nagasugod sa bugal, pagkaarogante, kahisa, kag kaimon, mga kinaiya sang tawhanon nga kinaugali,²² nga baliskad gid sa Cristohanon nga pamatasan. Ini nga pamatasan indi bagay sa mga nagatinguha nga mangin matuod Niya nga mga disipulo.²³ Ang matuod, wala sang lugar ang diskriminasyon sa panghunahuna ukon aksyon sa komunidad sang mga Santos.

Bilang mga anak sang kasugtanan, makabulig kita dula sining pamatasan paagi sa pagtulok sa mga kinalain sa tunga naton gamit ang mga mata sang Manluluwas²⁴ kag base sa kon ano ang pareho sa aton—ang aton diosnon nga pagkatawo kag pag-ululutod. Pwede naton tinguhaan nga lantawon ang aton kaugalingon sa mga damgo, handum, kasubo, kg kasakit sang aton isigkatawo. Palareho kita nga nagapanglakaton bilang mga anak sang Dios, palareho nga indi perpekto sa estado kag sa aton ikasarang sa pagtubo. Imbitado kita nga maglakat sing ululupod, nga may kalinong, nga ang aton tagipusuon puno sang gugma sa Dios kag sa tanan nga tawo—ukon, sa ginhambal ni Abraham Lincoln, “nga wala sang dumot kay bisan sin-o kag may pagpalangga sa tanan nga tawo.”²⁵

Nabinagbinag mo bala kon paano ginapakita ang prinsipyo sang respeto sa tawhanon nga dignidad kag pag-alalangay sa simple nga pamiste naton sa balay sang Ginuo? Tanan kita nagakadto sa templo nga isa sa tuyo kag puno sang handum nga mangin matinlo kag balaan sa Iya balaan nga presensya. Nagabayo sang puti, tanan kita ginabaton sang Ginuo Mismo bilang pinalangga Niya nga mga anak, mga lalaki kag babayi sang Dios, mga kaliwat ni Cristo.²⁶ May pribelihiyo kita nga maghikot sang palareho nga ordinansa, maghimo sang palareho nga kasugtanan, magpangako nga magpangabuhi sing mas mataas kag mas balaan, kag magbaton sang amo man nga wala katapusan nga mga promisa. Nagaisa sa katuyuan, ginatulok naton ang kada isa sa bag-o nga panan-awan, kag sa aton pag-isa, ginaselebrar naton ang aton mga kinalain bilang mga anak sang Dios.

Sang nagligad lang nagbulig ako sa paggiya sang mga bisita kag opisyales sang gobyerno sa open house sang Brasília Brazil Temple. Nagdulog ako sa ilislan upod ang bise-presidente sang Brazil, kag ginhambalan namon ang puti nga bayo nga ginasuksok sang kada isa sa sulod sang templo. Ginpaathag ko sa iya nga ining pangkabilogan nga paggamit sang puti nga bayo nagasimbolo nga tanan kita alalangay sa Dios kag sa templo, indi kita bise-presidente sang pungsod ukon lider sang simbahan kundi mga anak sang mapinalanggaon nga Amay nga Langitnon.

Litrato

Iguaçú Falls.

Ang Iguaçú River nagailig sa sur sang Brazil kag nagatipon sa mataas nga patag nga nagaporma sang mga busay nga ginakilala nga Iguaçú Falls—isa sa pinakamatahum nga gintuga sang Dios sa duta, ginakabig isa sa pito ka katingalahan sa kalibutan. Ang makusog nga tubod sang tubig nagatipon sa isa ka suba kag dayon nagaseparar, nga nagaporma sang ginatos nga mga busay. Kon ipaanggid mo, ining dalayawon nga mga busay daw salamin sang pamilya sang Dios sa duta, kay isa lang ang aton espirituhanon nga ginhalinan, halin sa aton diosnon nga pagkatawo kag relasyon. Ugaling, ang kada isa may lainlain nga kultura, ginhalinan, kag nasyunalidad, may lainlain nga opinyon, inagihan, kag balatyagon. Wala sapayan sini, nagaabante kita bilang mga anak sang Dios kag bilang mag-ulutod kay Cristo, nga wala nagakadula ang aton diosnon nga koneksyon, amo nga pinasahi kita nga mga tawo kag pinalangga nga komunidad.²⁷

Kabay nga tadlungon naton ang aton mga tagipusuon kag kaisipan sa ihibalo kag testimonya nga kita tanan alalangay sa atubang sang Dios, nga kita tanan palareho ang mga potensyal kag palanublion. Kabay nga mas maangkon naton ang espirituhanon nga kasuod sa tunga naton kag hatagan bili ang lainlain nga kinaiya kag ikasarang nga ara sa aton tanan. Kon himuon naton ini, ginapromisa ko sa inyo nga magailig kita sa aton alagyan, pareho sang tubig sang Iguaçú Falls, nga may diosnon nga koneksyon nga tatak naton bilang pinasahi nga katawhan, “mga anak ni Cristo kag mga manunubli sang ginharian sang Dios.”²⁸

Nagapamatuod ako nga samtang nagapadayon kita sa pag-ilig sa sining paagi sa mortal naton nga kabuhi, magasugod ang bag-o nga adlaw nga may bag-o nga kasanag nga magapasadya sang aton kabuhi kag magaiwag sa matahum nga mga oportunidad para hatagan sang bili, kag mas mabugayan sang kinalain nga gintuga sang Dios sa Iya mga anak.²⁹ Mangin matuod kita nga mga galamiton sa Iya mga kamot sa pagsulong sang respeto kag dignidad sa tanan Niya nga mga anak. Buhi ang Dios. Si Jesus ang Manluluwas sang kalibutan. Si Pangulong Nelson ang propeta sang Dios sa aton panahon. Ako nagapamatuod sa sining mga kamatuoran sa sagradong ngalan ni Jesucristo, amen.