“O Le Fonotaga Faavae o le Ekalesia a Keriso,” O Autu o le Talafaasolopito o le Ekalesia
“O Le Fonotaga Faavae o le Ekalesia a Keriso ”
O Le Fonotaga Faavae o le Ekalesia a Keriso
I le Aso Lua, 6 Aperila, 1830, sa potopoto ai Iosefa Samita, Oliva Kaotui ma isi e faatulaga le Ekalesia a Keriso. Sa latou tulimatai atu i lenei fonotaga talu mai le taumafanafana o le 1829, ina ua faatonuina i faaaliga ia Iosefa ma Oliva e faatuina se ekalesia i le taimi lava e mafai ai ona lolomi le Tusi a Mamona ma mafai ona faapotopoto le au talitonu.1 Sa leai ni minute na maua o le fonotaga, ae sa i ai ni nai punavai, e aofia ai ma se faaaliga na maua i lena taimi, na ta’u mai ai nisi o mea na tutupu. Sa amataina le fonotaga i se tatalo, ma sa lagolagoina e le potopotoga ia Iosefa ma Oliva o ni toeaina ma aoao i le Ekalesia. Ona faauuina ai lea e Iosefa ma Oliva le tasi ma le isi o ni toeaina o le Ekalesia, sa taumamafa i latou sa auai i le fonotaga i le faamanatuga o le Talisuaga a le Alii, sa faaee e Iosefa ma Oliva ia o la lima i luga o ulu o i latou sa papatisoina talu ai, e avatu ia i latou le meaalofa o le Agaga Paia ma faamauina i latou o ni tagata o le Ekalesia, ma sa maua mai ai e Iosefa le faaaliga ua maua nei i le Mataupu Faavae ma Feagaiga 21.
O se fale laau i le mea na i ai le faatoaga a Pita Uitimera Matua i Faiete, Niu Ioka.
I le va o Aperila 6 ma Iuni 9, ina ua faia le uluai konafesi a le Ekalesia, sa faatulaga ai e Iosefa ma Oliva ia paranesi i Faiete, Maniseta, ma Kolesavile, Niu Ioka. O ni nai uluai tala na faaluafesasi ai ia nofoaga o nei sauniga po o fonotaga, e ta’u mai ai o le aso 6 o Aperila o le fonotaga faalefaatulagaga na faia i Maniseta ae le o Faiete. O se tusitusiga muamua o le kopi o le Mataupu Faavae ma Feagaiga 21 e aofia ai se faamatalaga e foliga mai ai na tuuina mai le faaaliga i Maniseta. Sa faaaoga e William W. Phelps lenei faamatalga ina ua ia saunia le faaaliga mo le lomiga i le 1833 o le Tusi o Poloaiga. O isi talafaamaumau e fesootai ia Phelps ma Osona Palate---e leai se tasi o i la’ua na i ai i le fonotaga faalefaatulagaga---o loo ta’ua foi Maniseta o le nofoaga o le fonotaga i le aso 6 Aperila. Peitai, e tele ia tusitusiga na muamua na aumaia e Iosefa ma Oliva, faatasi ai ma lomiga mulimuli ane o le Mataupu Faavae ma Feagaiga, a le o le ta’u mai faapea na faia le fonotaga i Faiete po o le le ta’ua o Maniseta. E tusa ai ma lea, o le tele o le au tusitalafaasolopito na ioe faatasi ai ma le au matau autu ma ta’ua ai o le fonotaga faavae na faia i Faiete.
Autu e Fesootai I Ai: Palmyra and Manchester