Ana Riboti Ana Tabo Te Ekaretia n Tuoa Te Mwane
Nakon te Moan Beretitenti n Ana Ekaretia Iesu Kristo Ibukiia Aika Itiaki Ni Bong Aika Kaitira
Taari aika Tangiraki: Ana Ekaretia Iesu Kristo Ibukiia Aika Itiaki Ni Bong Aika Kaitira e kateimatoa te tabo n tuoa n te mwane are e kaota ana mwakuri ni inaomata man aia tabo Ekaretia ake tabeua ao aron butiia. Te manatia n tarekita n Ana Tabo Te Ekaretia n Tuoa Te Mwane e ribootinna n te tai ae katawe ao ni katoa tai nakon te Moan Beretitentii. Taan mwakuri n Ana Tabo Te Ekaretia n Tuoa te Mwane e kaainaki irouia naaka a kakoauaki n te botanaomata bwa iai rabakauia ni kawakinan te mwane, taan tuoa te mwane aika a kakoauaki inanon ana botaki te Ekaretia, ao tabeman riki ake a konabwai, naake a kinaaki bwa a mwaatai n te mwakuri.
I aan ana kairiiri te Moan Beretitentii, Ana Tabo Te Ekaretia n Tuoa te Mwane e a tia ni kariaiakaki n tuoi mwaane ni katoai ana taabo ni mwakuri nako te Ekaretia ma aron aia waaki ni kabutaa te aonnaba. Ana Tabo te Ekaretia n tuoa te mwane e a tia ni konaa n taui mwiin bwai nikabane, aroia taan mwakuri, bwaai nako, ao waaki nako ake a kainnanoa tuoan aia kabwaka mwane nakon te Ekaretia, kabanemwane, ao kaubwaiia. Te mwakuri ni kabua bon te moani bwai ae riai n rinanoaki n raonaki n te rinerine ao te kaotioti n tuoan te mwane.
Kabane mwane ni kabane man Ana mwane te Ekaretia ni 2001 a tia ni kariaiakaki man te Kauntira ibukin Tauan Mwiin Kabwianibwai. Te kauntira e kaainaki man te Moan Beretitentii, Kooram n te Tengaun ma Uoman, ao te Bitiobiriki are e Tararua, n aron are e kaotaki man te kaotioti. Taian kabane mwane a bon tararuaaki rinanon te Katau mwane ao Taabo ni Mwane i aan ana kaetieti te Komete ibukin te Manga Kataumwane. Tararuaan kataumwane are e a tia ni kabwaataki e tuoaki ao e ribootinaki.
Man mwiin aia mwakuri ara taan tuoa te mwane, Ana Tabo Ekaretia n Tuoa Te Mwane iai ana koaua bwa, inanon bwaai ni mwakuri ake a tabeakinaki, birimwane ake a rereke ao mwaane ake a kaakabaneaki inanon tokin te ririki n 31 Ritembwa 2001 a tia n tararuaaki ni kaineti ma tuua ao kawai n ana kaetieti ao katean ana kataumwane te Ekaretia are e a tia n kabwaataki.
Mwakuri ni kabane ake a kabane mwane n ana boobotaki te Ekaretia, ake a waakinaki ni kaokoroaki man te Ekaretia, a aki tuoaki iroun Ana Tabo Te Ekaretia n Tuoa Te Mwane n 2001. Taian bootaki aikai a ikotaki ma ana Tararua ni Iwaawaki te Teetiereti ao mwaangana nako ao ana reirei ae rietaata ae te Buringam Iang ao reirei riki tabeua aika a ririeta. Ma e ngae n anne, mwakurin te mwane inanon bootaki aikai a tuutuoaki man ana akaunti te rabwata ae inaomata te botannaomata. Ni ikaotaki ma aei, ana Tabo n Tutuo N te Mwane Te Ekaretia e kakoaua bwa ribooti ake a uotakirakeaki mai imwiin taian tutuo aikai a bon raonaki ma ana tutuo te komete ibukin bootaki nako n tatabermaniia.
Uotiarake ma te karinerine,
ANA TABO N TUOA TE MWANE
Uereti L. Tounti
Manatia n Tarekita
1 Eberi 2002