Mo na Kalougata Kina

E na so na gauna sa oti, au a ciqoma kina e dua na ivola ka sega ni kilai o koya a vola, mai vua e dua na tina ka rui mosi vakalevu sara na yalona ka vakamacalataka tiko kina na rarawa kei na mosi me baleta e dua na luvena tagane, ka a vakayacora e so na ivalavala ca bibi, ka vakamavoataki ira sara vakaca e so na daulomani tawacala.

Mai na gauna ni nona ivola tawakilai mai vei au, kei na vakilai ni nona rarawa, a tu vei au e dua na gagadre levu me’u vakamacalataka kina na noqu lomani koya kei ira na tani, ka tautauvata na veika e a yaco vei ira e na kena tovolei me soli e so na vakacegu kei na nuinui vei ira era sega ni vinakata me ra kilai, ka ra colata tu vakaira na icolacola bibi, ka dauwasoma me ra kila ga vakaira kei na Tamada dauloloma mai Lomalagi.

Au kilai Sisita Tawakilai, ni ka au tukuna e na sega walega ni ka ni veivakavotui, ia e dua talega na ivakadinadina ki na veika ko sa kila tu.

E na gauna e a sotava kina na veika rarawa na Parofita o Josefa Simici, e a dua beka na nona gauna butobuto sara ni a sogo tu e na valeniveivesu na Liberty Jail, ka a tagi “O ikemuni na Kalou, ko ni sa tiko evei?” (V&V 121:1), na Turaga a vakacegui koya e na veivosa oqo, “Mo kila sara, na luvequ, ni ko na kalougata vakalevu, kevaka ko sa vosota rawa na veika kece oqo” (V&V 122:7). E na dredre beka ka rui vulagi sara na kena mosi me kune na vinaka mai na noda rarawa kei na leqa rerevaki eda sotava vakaikeda. E na sega beka ni na taucoko tikoga na veivosa oqo “mo na kalougata kina” me vaka na kena dodonu.

Ia, na kilai ni ituvatuva i Karisito ni veisorovaki e na vukea na kena biu vata kece na veirarawa oqori me vakavotukana. E na noda bula taumada e a vakaraitaka kina na Tamada Vakalomalagi na Nona ituvatuva ni bula vakavuravura, o koya ka vakamacalataka ko Alama me “ituvatuva ni mamarau” (Alama 42:8). Au vakabauta ni da sa kila kece sara ni noda lako mai ki vuravura, eda na vakaraitaki ki na veika kece eda sotava e na bula vakavuravura, oka kina na ka e-sega-ni vinaka e na veivakatovolei ni mosi, rarawa, sega na inuinui, ivalavala ca kei na mate. E na tiko na veibasai kei na veivakatovolei. Kevaka me sa ikoya kece oqori eda kila me baleta na ituvatuva, au vakabekataka kevaka e dua vei keda e na ciqoma, ka marautaka. “Sa ikoya sara ga oqori, na ka au dau gadreva tu—mosi, rarawa, sega na inuinui, ivalavala ca, kei na mate.” Ia na inaki ni veivakabulai sa yaco kece me vakavotukana, ka sa ciqomi, ka sa gadrevi sara, e na gauna e tu yani kina ki liu na Tuakada ka lomasoli ni na lako sobu mai me mai vakadodonutaka kece. Mai na mosi kei na rarawa e na kauta mai ko Koya na vakacegu. Mai na sega na inuinui e na kauta mai ko Koya na inuinui. Mai na ivalavala ca e na kauta mai ko koya na veivutuni kei na veivosoti. Mai na mate, e na kauta mai ko Koya na tucake tale mai ni bula. Ia e na ivakamacala kei na lomasoli cecere ko ya, o ikeda kece sara vakayadudua eda sa vakacavara, “Au na kitaka oqori. E rui rerevaki sara ka sega na betena me tauri.” Ia, eda sa digitaka.

Na vakaitamera ka rabailevu ni loloma i Karisito kei na Nona Veisorovaki e vakamacalataka ko Amuleki e na ikatolusagavulu kava ni iwase ni Alama e na iVola i Momani. E vakamacalataka ko Amuleki ni dodonu me dua na “ilutua ka iotioti ni isoro” (Alama 34:10). Ni oti a qai vakamatatataka ni oqo e na sega ni vakacabori kina na manumanu yava iva, se dua na manumanu vuka me vakatauvatani kei koya era sa kila tu na tamata. Sa dodonu me isoro va-Kalou-ko Jisu Karisito. Ni oqo sa dodonu me isoro tawamudu. Ia a sa caka na isoro, kei na vakabauta eda sa kunei keda kina ni da lako tiko e na ilakolako eda vakatoka me bula vakayago. E na veika e yaco, e luluvu na lomada e nona yali e dua na gone ka sega ni rawa ni vakamacalataki, se na tauvimate sega ni namaki se na ituvaki vakaca ni yago ni dua e daulomani. Na nodra gu na itubutubu le yadua me ra solia na veitaqomaki vakailavo kei na veivakadeitaki ni veivakauqeti ni kosipeli e na nodra vuvale. Ia na dredre beka ni veika kece sa ikoya na mosi eda sotava ni da raica wale tu ga na rarawa e sotava e dua eda daulomana baleta na ivalavala ca kei na talaidredre.

E tiko e vica vei keda, kevaka e so, sai ira era sa vaka na nona bukawaqa na dausava koula ni rarawa kei na taqaya, ka dau vakilai vei ira na tani e na so na gauna; ia vei ira e lewe levu sara era dau vunitaka galugalu ka dau vosota vakadede voli ga vakaiira. E vuqa sara na yalobibi, mosi kei na rarawa eda na sega ni na qai digitaka nikua. Ia, eda sa digitaka. Eda digitaka e na gauna eda sa raica kina na taucoko ni ituvatuva. Eda digitaka e na gauna e sa makare vinaka kina noda raica nona vakabulai keda na iVakabula. Ia, kevaka me makare vinaka tu na noda vakabauta kei na noda kila nikua me vaka e na imatai ni gauna eda a digidigi kina, au vakabauta ni da na digidigi tale.

O koya gona, na bolebole sai koya me tiko vei keda na mataqali vakabauta e na gauna ni dredre me da vakayagataka kina me vaka eda a digidigi e na imatai ni gauna. Na mataqali vakabauta vakaoqo e dauvuki me loma tarotaro ka vaka me veivakacudrui ki na vakadonui ni kaukauwa, veivakalougatataki, kei na inuinui ka na rawa walega ni lako mai Vua o koya na vu ni kaukauwa kecega, veivakalougatataki , kei na inuinui. Na mataqali vakabauta vakaoqo e kauta mai na kila kei na veivakadeitaki ni veika kece eda sotava e tiki tiko ni ituvatuva ni kosipeli ka me nodra na yalododonu, na ka kece e rairai cala era na yaco me ra na vakadodonutaki. Na vakacegu kei na kila oqo me vosota vakadede e na itovo vakaturaga ka macala vinaka tu ni inaki e rawa ni isau kamikamica duadua. Na mataqali vakabauta vakaoqo e rawa ni vukei keda me da raica na vinaka, kevaka sara mada ga e sinai ka veitaqataqai na noda sala ni bula e na veika vakavotona, seni soni, kei na veivatu sukusukura.

E na gauna eratou lako sivita kina ko Jisu kei iratou na Nona tisaipeli e dua na tamata ka sucu mataboko, eratou a tarogi koya na nona tisaipeli, “Vakavuvuli, ko cei sa ivalavala ca, a tamata oqo, se tamana kei tinana, sa sucu mataboko kina ko koya?

“Sa kaya ko Jisu, Sa sega ni valavala ca ko koya oqo, se tamana se tinana, me vakatakilai ga na cakacaka ni Kalou e na vukuna” (Joni 9:2–3).

Au sega ni vakabauta ni vakavuna na Tamada Vakalomalagi na veileqa bibi kei na yalobibi eda sotava e na noda bula. Ia me vaka ga na “cakacaka ni Kalou” ka vakatakilai e na nona vakabulai na tamata mataboko, sa vakakina na sala eda sotava e na noda vakatovolei vakaikeda e na vakatakilai e na “cakacaka ni Kalou.”

Mai na noda rarawa eda na vakasaqara beka na kamikamica kei na vinaka ka dauwasoma na kena veimaliwai kei na ka e duatani sara ki na noda bolebole. E rawa me da vakasaqara na veika ka tiki ni gauna e ivakananumi ka dau vakavuqa me vunitaka tu na mosi kei na yaluma. E rawa ni da kunea na vakacegu e na noda dodoki keda yani vei ira na tani, e na noda vakayagataka na veika eda a sotava sara ga vakaikeda me solia kina na inuinui kei na veivakacegui. Ia eda rawa ni nanumi ira e na vakarokoroko dina kei na vakavinavinakataki nei Koya e vosota me vakadodonutaka na veika kece me baleti keda. Ni vakayacori oqo, eda sa vakaukauwataki tiko kina me da colata na noda icolacola e na vakacegu. Ia ni oti o ya, sa na qai vakatakilai na “cakacaka ni Kalou.”

Ni tukuni tiko na Veisorovaki i Karisito, au taleitaka na ivakamacala ni “tawa yalani” kei na “tawamudu” e na ivola ni vosa baleta ni’u vakabauta ni sa vakamacalataka sara tikoga vakamatata na ka e vakaibalebaletaka tiko na Kalou. Tawa yalani: “e sega ni vakaiyalyala se yalani.” Ia na ivakamacala ni tawamudu: “e sega na kena itekitekivu se icavacava” (The American Heritage Dictionary of the English Language, 4th ed. [2000], “infinite,” “eternal,” 898, 611).

Ko sa raica beka Sisita Tawakilai, e kena ibalebale na Veisorovaki e a baleti kemuni kei na nomuni rarawa. E nomuni sara ga vakaikemuni, me vaka ni kilai kemuni tu o Koya kei na nomuni vakatovolei kei na yaluma, ni sa rarawataka oti o Koya. E kena ibalebale ni sa rawa ni tikoga e dua na itekitekivu vou me baleti keda vakayadudua; o koya sara mada ga na luvemuni tagane ka a vakayacora e so na ivalavala ca bibi sara. E kena ibalebale me vaka ni da toso ki liu e na veivakatovolei ni bula kei na rarawa,e vakaicolacola e na veika me baleta na sega ni inuinui, ka da sega ni rai vakatabakidua e na vanua eda a tiko mai kina, ia e na vanua ga eda sa lako tiko kina. Eda sega ni rai vakatabakidua e na veika sa oti yani, ia e na veika ga e na yaco mai.

Vakatusa, ni vuqa vei keda e na daumaka me na vulica na veilesoni dredre ni bula e na rawati ni vakacegu e na kalasi ni Wilivola ni Sigatabu se na marautaki ni katakata ni buka mai na matadravu e na gauna ni lotu vakamatavuvale. Ia, me’u tukuna, mai na kudukuduwa ni tutu butobuto ni Liberty Jail e a lako mai kina e so na vosanikalou e rui totoka ka veivakacegui dina ka soli ki na tamata ka vakacavari e na veivosa oqo, “mo kila sara na luvequ ni ko na kalougata vakalevu, kevaka ko sa vosota rawa na veika oqo” (V&V 122:7). Sa vakakina, mai na noda rarawa eda na vakasaqara na noda qaqa levu, ka na lako mai na siga mai na noda bolebole me da na kila na veivosa kilai vinaka, “mo na kalougata kina.”

Mai na ivolanikalou eda vulica kina ni e na gauna a lako yani ki na were ko Kecisimani me la’ki sauma kina na itinitini ni isau ni noda ivalavala ca kei na rarawa, a bunotaka na dra mai na yagona (raica V&V 19). Au vakabauta, Sisita Tawakilai, e na Nona vakararawataki, e a dave kina e dua na tiri ni Nona dra me baleti iko. E a dave e dua na tiri ni Nona dra me baleta na luvemuni tagane, ka dave e dua na tiri ni Nona dra me baleti au.

Au vakabauta na masumasu. Au vakabauta na vakabauta. Au vakabauta na veivutuni. Au vakabauta na kaukauwa ni Veivueti. Io, Sister Tawakilai, au vakabauti kemuni , ka vakakina na Tamada dauloloma mai Lomalagi. E na yaca i Jisu Karisito, emeni.