Elder William R. Walker
Mai na Vitusagavulu

Ni se gonetagane lailai voli ena itikotiko ni Yalododonu Edaidai e Raymond, Alberta, Canada, e dau veisiko vakalevu ki na nodrau itikotiko o tukana kei buna o William Walker. E dau lili toka ena nodrau lalaga ni vale e dua na kedratou itaba na Mataveiliutaki Taumada. “Au se dau nanuma tiko ga na iyaloyalo oya. E dau tarai au sara vakalevu ena veiyabaki taumada oya. Au a tubu cake ka dau lomani ira na iliuliu ni Lotu,” e kaya.

A sucu o Elder William R. Walker ena i ka 25 ni Me 1944 kivei rau o J. Harris kei Beth Russell Walker. Ni oti na nona kaulotu ki Japani, a curu ki na Brigham Young University, ka rau la’ki sota kina kei na watina, o Vicki Van Wagenen. Erau a vakamau ena Valetabu e Salt Lake ena i ka 10 ni June 1968 ka lima na luvedrau.

Ni oti na nona tauri ivola , erau a toki ki Vancouver British Columbia, Canada, na vuvale na Walker, ka la’ki tekivutaka kina na nona cakacaka ena bisinisi ni qitotaki ilavo vakadauvolitaki seya. Erau a vakaitikotiko na Walker e Salt Lake City; Concord, California; Dunwoody, Georgia; kei Kenilworth, Illinois, ni bera ni rau lesu tale mai ki Utah ena 1988. A peresitedi o koya ni dua na taba ni kabani na American Express ka qai taura e muri eso na itutu vakaveiliutaki ena rua na baqe rogolevu e vuravura, na Citibank kei na Barclays.

E dau taleitaka o Elder Walker me vakabulabulataka na veiloga ni senikau kei na veivunikau ena nona lomanibai. Sa dau levu talega na veigauna vinaka vua kei na watina me rau cakacaka kina ena nona iteitei na Turaga. Erau a kacivi me rau la’ki liutaka na Tabana ni Daukaulotu na Japan Tokyo South ena 1990, ka a peresitedi talega ni iteki na Sandy Utah Cottonwood Creek ena gauna a kacivi kina ki na iKarua ni Kuoramu ni Vitusagavulu. Sa bisovi oti vakarua o koya, lewe ni matabose e cake, ka itini ni welefea ena yasana.

“E dua na tiki ni noqu bula levu sa i koya na noqu kaulotu ni’u se cauravou,” e kaya o Elder Walker. “A veisiko yani vakatolu ki Japani o Peresitedi Hinckley ena noqu tiko mai kea. Ena dua na nona veisiko yani ki na vale ni peresitedi ni daukaulotu, a tukuna kina vei au kei na noqu itokani me keirau vakarautaki keirau me keirau na bisopi ka peresitedi ni iteki. A vakidacalataki keirau sara na vosa oqo. Ia au sa kalougata vakalevu me’u raica na kena sa vakataucokotaki na veivakayaloqaqataki oqori ni dua na parofita ni Kalou.”