Ulugalii Faamisiona: Faamanuiaga mai le Ositaulaga ma le Auauna Atu

O le fa tausaga talu ai, sa ou lauga ai i le konafesi e uiga i ulugalii o loo auauna atu faamisiona. Ou te tatalo ina “[ia] pai atu le Agaga Paia i loto, ma [o le a] genogeno lemu atu se tane po o se ava … i lana soa, ma o le a tupu ai le moni o lenei mea [—o se taimi o filifiliga].”¹ Mulimuli ane, sa tusi mai se tuafafine ia te au e uiga i lena aafiaga. Fai mai o ia, “Sa ma nofonofo lava i le saogalemu o le ma fale ma fiafia i le konafesi sa sau i le televise… . A o e saunoa, sa matuai ootia lava lo’u loto. Sa ou tilotilo atu i lo’u toalua ma sa tilotilo mai foi o ia ia te au. O le taimi lena na suia ai e faavavau lo’u olaga.”

Afai ua e oo pe toeitiiti e oo i le matua o le soifua o se tagata faamisiona matua, ou te oo atu ia te oe i lenei afiafi e molimauina faamanuiaga e mafai ona suia ai e faavavau lou olaga. O loo manaomia oe e lou Tama Faalelagi. O loo manaomia e Lana galuega, i lalo o le taitaiga a lo tatou Faaola o Iesu Keriso, le mea ua e lava saunia e tuuina atu. O aafiaga faafaifeautalai uma lava e manaomia ai le faatuatua, ositaulaga, ma le auauna atu, ma o nei mea uma e masani lava ona sosoo mai ai ma le liligiina mai o faamanuiaga.

A o tatou talanoaina nei faamanuiaga, o le a vave ona e mafaufau i mea ua ou ta’ua o “F’” e fa: fefe, popolega faaleaiga, faaavanoaina o le taimi tonu mo le misiona ma luitau faaletupe.² Sei ou toe faaopoopo atu i ai le isi F—faatuatua e sili atu ona taua ma mamana. E na o le faatuatua lava e mafai ai ona tatou amanaia le apoapoaiga a le Atua: “Ina filifili ia outou i le aso nei, po o ai tou te auauna i ai”³—“e auauna i le Alii le Atua, o le na faia outou.”⁴ Ma e na o le tofotofoina o lo tatou faatuatua e mafai ai ona tatou maua faamanuiaga faavavega o loo tatou sailia mo i tatou lava ma o tatou aiga: “Aua afai e leai se faatuatua i le fanauga a tagata, e le mafai e le Atua ona faia se vavega ia te i latou; o lea na ia le faaalia ai o ia lava ia te i latou ina seia muamua ona latou faatuatua.”⁵

Se i ou faasoa atu nisi o nei faamanuiaga faavavega mai tusi ma tala na ou maua i le fa tausaga ua mavae. Sa faatoilaloina e se ulugalii lotomaulalo mai Idaho le fefe e ala i le faatuatua, ina ua tofia i la’ua e le Alii i Rusia. Sa la tusia le tusi lenei e talia ai le valaauga: “E leai se tasi sa mafaufau e valaauina i ma’ua i lenei tofiga. Ma te le iloa pe faapefea ona ma aoaoina le gagana, ae pe mafai foi ona faia se auaunaga, e ui ina ma taliaina ma le popole tele, [ae] o le a faataunuuina lava i le faatuatua, ma te iloa ua silafia e le Alii ma Lana perofeta mea e tele nai lo i ma’ua, i le mea e tatau ona ma auauna atu ai.” O le sefulu o masina mulimuli ane, na faafeiloaia ai e le Malumalu o Stockholm i Suetena, le Au Paia e toa 30 mai se paranesi laitiiti i Rusia, sa taitaia mai e lenei ulugalii mai Idaho, lea e le’i leva ae amata ona iloa le gagana FaaRusia. Ua ta’u mai ia i tatou e tusitusiga paia, “Ua faapea ona faatuina e le Atua le ala, e mafai ai e le tagata ona fai vavega tetele i le faatuatua.”⁶ O lea, e faataunuuina ai le galuega a le Atua e Lana fanau: “Ina ia mafai ona faalauteleina foi le faatuatua i le lalolagi… . Ina ia mafai ona folafola atu le atoatoa o la’u talalelei, e e vaivai ma lotomaulalo, e oo i tuluiga o le lalolagi.”⁷

O le isi ulugalii na faafetaiaia popolega faaleaiga e ala i le faatuatua. Na tusia e se tuafafine faamaoni e faapea: “E le’i faigata le filifiliga e auauna atu i se misiona. Ae sa matuai atugalu lava lo’u tina ua 90 ona tausaga i lo ma o ese atu. Sa faamafanafanaina o ia ina ua ia faalogo o le a faamanuiaina o matou aiga a o ma auauna atu.” Sa faailoa mai foi e se uso faamaoni ni atugaluga faapena e uiga i le tuua o ona matua ua matutua, lea na tali mai ai lona tama, “Aua [e te] faaaogaina i ma’ua ma lou tina e fai ma ‘alofaga lua te le o ai ma lou toalua i le misiona. Ia e tatalo e uiga i ai ma mulimuli i le taitaiga a le Agaga.”

Sa tuuina mai e le Alii le faalaeiauga lenei i le uluai augatupulaga o faifeautalai na valaauina e tuua o latou aiga, “ma afai latou te faia lenei mea i le maulalo atoa o le loto, … O A’u, le Alii, ou te tuuina atu ia te i latou le folafolaga o le a ou tausia o latou aiga.”⁸

E moni lava, e i ai popolega faaleaiga, ma e le tatau ona [tatou] manatu mama i ai. Ae e le mafai ona tatou taulimaina o tatou luitau faaleaiga e aunoa ma faamanuiaga a le Alii; ma afai tatou te ositaulaga e auauna atu o ni ulugalii faamisiona, o le a tafe mai na faamanuiaga. Mo se faataitaiga, sa popole se tasi ulugalii i le tuua o lo la afafine laitiiti, sa le toe toaga i le Ekalesia. Na tusia e lona tama faamaoni: “Sa ma tatalo pea e le aunoa ma anapopogi soo mo ia. Ma, i le taimi o le konafesi aoao, sa musumusu mai le Agaga ia te au, ‘Afai o le a oulua auauna atu, o le a lua le toe popole lava i lo oulua afafine.’ O lea na matou talanoa ai ma le matou epikopo. O le vaiaso na sosoo ma le vaiaso na maua ai le ma valaauga, sa la ta’uina mai ai ma lana uo tama, ua uma ona fai le la faamau. Ae ma te lei tuuvaa atu i Aferika, sa faia sa matou faaipoipoga i le fale. [Ona ma faapotopotoina ai lea o lo matou aiga ma] faia se matou fono faaleaiga. … Sa ou tuuina atu la’u molimau e uiga i le Alii ma Iosefa Samita … ma fai atu ia te i latou, ou te fia tuuina atu ia i latou taitoatasi se faamanuiaga faatamā. Sa ou amata mai i lo’u atalii matua ma sosoo atu ai ma lona toalua ma faasolo atu ai lava i le uii … [e aofia ai ma lo’u atalii fou faaletulafono].”

A tatou manatunatu i le auaunaga faamisiona a ulugalii, e talafeagai lelei lava ona faaaofia ai ma o tatou aiga i le auala foi lea. I fonotaga a aufono faaleaiga, e mafai ona tatou tuuina atu le avanoa i a tatou fanau, e faaalia ai foi la latou lagolago, e tuuina mai se fesoasoani faapitoa tatou te ono manaomia, ma tuuina atu i ai faamanuiaga faaleperisitua e lagolagoina ai i latou, a o tatou toesea. Afai foi e talafeagai, e mafai foi ona tatou mauaina ni faamanuiaga faaleperisitua mai ia te i latou. A o faamanuia e le tama faatuatua i lenei tala ia tagata o lona aiga, sa lagonaina e lona atalii faaletulafono le uunaiga a le Agaga Paia. Sa tusia e le tamā: “E oo ifo i le faaiuga o le ma tausaga muamua, ua amata ona faamaluluina le loto o le ma atalii faaletulafono e uiga i le Ekalesia. Toeitiiti lava oo i le taimi ma te foi atu ai i le fale mai le ma misiona, ae o mai loa lo’u afafine [ma lona toalua] e asi i ma’ua. Sa i totonu o lana atopau se seti ofu lotu ma o le taimi muamua lea ua fai ai ni ofu lotu [o lea alii]. Sa matou o faatasi i le lotu, ma ina ua ma foi atu i le fale, sa papatisoina loa o ia. O le tausaga na sosoo ai, sa faamauina ai i la’ua i le malumalu.”⁹

E ui o faamatalaga o lenei tala atonu e tulaga ese, ae e moni lava le mataupu faavae mo i latou uma o e fai atu i le Alii “Ou te alu i mea e te tofia.”¹⁰ Ou te molimau atu, a o tuuina atu lo tatou faatuatua i le Alii, o le a Ia sailia le avanoa tonu mo a tatou misiona. E pei ona ia fetalai mai, “A fia auauna mai se tasi ia te au … ona viia lea o ia e le Tama.”¹¹

I le iloiloina o avanoa faafaifeautalai, e toatele ulugalii i le lalolagi atoa o loo i ai se naunautaiga tele e auauna atu, ae le lava se tamaoaiga. Afai o le tulaga lea o loo e i ai, ia manatua, o se valaauga tonu faamisiona, atonu e le o se atunuu mamao e ese lona igoa. O le valaauga tonu lava mo oe, atonu o totonu lava o lau siteki po o le eria. “Ua silafia e lo outou Tama o i le Lagi, e aoga ia mea uma ia te outou.”¹² Talanoa ma lou aiga lautele ma lou epikopo po o le peresitene o le paranesi. A silafia e auauna a le Alii ou manaoga faaletino, o le a mafai ona e maua faamanuiaga e faavavau o le galuega faafaifeautalai.

Afai e le mafai ona e auauna atu ona o ni tulaga ogaoga faapitoa, pe mafai la ona e mafaufau e faia se saofaga tautupe e fesoasoani ai ia i latou e mafai [ona auauna atu faamisiona]? O le ositaulaga lelei o mea ua e maua, e le gata ina o le a faamanuia ai isi faifeautalai ma i latou o loo auauna atu i ai; ae o le a faamanuiaina ai foi oe ma lou aiga.

Ia, mo i latou o e le’i mafai ona auauna atu i se misiona a o talavou, sei ou talanoa tonu atu ia te outou. Atonu sa lofituina outou i aluga o tausaga i lagona o le salamo, pe lagonaina foi le le atoatoa o le fiafia ona e te le’i maua se avanoa faafaifeautalai e auauna atu ma tuputupu ae ai a o outou laiti. O la’u fautuaga ia te outou: ia vaai i luma, ae le o tua. Amata nei ona e tapena mo lau misiona o se ulugalii sinia! Ia faaputuputu sina tupe i masina taitasi. Suesue i tusitusiga paia. Talia tofiga o le Ekalesia. Tatalo ina ia [e] lagonaina le alofa o le Alii mo isi ma maua mai Lona alofa ma [Lona] faatuatuaina o oe. O le a i ai se aso e mafai ai ona e mauaina uma faamanuiaga o le galuega faafaifeautalai!

Ma o ni faamanuiaga ofoofogia tele! I le mavae ai o le 51 tausaga talu ona ou faaipoipo, sa fesiligia au, “O le a se vaega o le olaga e te manao e te toe oo i ai?” Ou te le’i faatali i le tali atu, “O le taimi sa ma galulue faatasi ai ma lo’u toalua i le galuega maoae faafaifeautalai a le Alii.” E tutusa lava lagona o se tasi ulugalii faamisiona ma o ma’ua lagona ma lo’u toalua: “O le ma filifiliga e o atu i se misiona ua aumaia ai se fiafiaga fou, lagona fou, uo fou, nofoaga fou, ma ni luitau fou. Ua ma vavalalata atili ai o se tane ma se ava; sa tutusa sa ma’ua sini sa i ai ma se paaga moni. Ae o le mea e sili ai, na aumaia ai se aga’i i luma fou faaleagaga, nai lo le litaea faaleagaga.” Uso e ma tuafafine, ia aua nei o tatou oo atu i le litaea faaleagaga.

Pe mafai lava ona ou faasafua atu se lu’i i epikopo ma peresitene o paranesi i le lalolagi atoa? I le isi ono masina o le a sosoo mai, faamata e mafai ona outou fautuaina mai ni ulugalii faamisiona se toatasi pe sili atu foi, e ese mai ia i latou ua fuafua i le taimi nei e auauna atu? O lau punaoa sili i le ausiaina o lenei lu’i, o tagata matutua o lau uarota ua uma ona faia ni misiona. I la’u lava uarota, na valaauina ai e se epikopo musuia se fonotaga faapitoa o ulugalii faamisiona faamoemoeina ma i latou ua maea mai misiona. A o matou tuuina atu a matou molimau e uiga i le ositaulaga ma le auauna atu, na molimau mai le Agaga ia i matou uma lava, o se valaauga ina ia auauna atu, e moni lava o se tofiga e “[iloa ai] manuia [a le Alii].”¹³

Sa ou faalogo e uiga i se peresitene o se siteki, o le na fuafuaina se vasega mo ulugalii faamisiona ina ia musuia ai ulugalii faamisiona faamoemoeina ma fesoasoani ia i latou e saunia ai e auauna atu. Taitai perisitua—a o outou saili atu ma le agaga tatalo ina ia uunaia le galuega faamisiona—ia manatua, a valaauina loa se ulugalii, ua le gata ina la fesoasoani e faataunuuina le galuega a le Alii i le lalolagi atoa, ae ua la totoina foi se fatu o le auauna atu i totonu o o latou aiga, o le a tuputupu ae i augatupulaga o le a oo mai. E faaauau pea ona ou faafetai mo le aafiaga a o’u matua o e na auauna atu o se ulugalii faamisiona i Egelani, ma faia ai se faataitaiga mo le la fanau.

O outou na ulugalii ua tatau ona o e faamisiona, faamolemole aua tou te faatali sei iloga tou te talanoa ma le epikopo e uiga i le faia o se misiona! O i ai. Ia faasoa atu o outou lagona. A oo loa i le galuega faafaifeautalai, ua faamoemoe mai le Alii ia i tatou ina ia faailoa atu o tatou faanaunauga. Afai tatou te faia, e mafai foi ona tatou faalagolago i lena lava Agaga e musuia i tatou ina ia saili atu mo se valaauga faamisiona, o le a musuia ai se perofeta ina ia valaauina i tatou i le tofiga sa’o.

Ma e matuai tele lava valaauga! O loo i ai valaauga e aoao atu le talalelei ia i latou o e o loo fia mauaina le upumoni, e aofia ai le autalavou i le Ofisa o Aoga a le Ekalesia; o valaauga ina ia galulue i polokalama o le uelefea ma fesoasoaniga alofa, i totonu o malumalu, i nofoaga autu mo talafaasolopito o aiga, ofisa o misiona, ma nofoaga o talafaasolopito [o le Ekalesia]; o valaauga ina ia “faia ai mea e sili ona lelei i ou uso a tagata, ma … faateleina ai le mamalu o lou Alii.”¹⁴

Mafaufau i faataitaiga nei: Sa tofia se ulugalii i Initia e fesoasoani i se aoga mo tamaiti tauaso, e fausia ni fale mama ma avatu i ai ni masini lomitusi e faaaoga e tauaso [braille]. Sa faafaileleina e se ulugalii i Hawaii se paranesi laitiiti sa 20 ona tagata [ae ua] oo i le 200 ma saunia nisi e toa 70 o le au paia e ulu atu i le malumalu. Sa faamaoopopo e se ulugalii i Peru ni vailaau ma meataalo o le Kerisimasi mo tamaiti e 550 i se nofoaga o tamaiti ua leai ni matua. Sa faiaoga se ulugalii i Cambodia i vasega o le inisititiuti, ma tuuina atu i ai se taitaiga i se paranesi lea ina ua mavae le 10 masina, ae oo atu i le 180. Sa fesoasoani atu se ulugalii i Rusia i tagata faifaatoaga i le lotoifale e faateleina a latou seleselega o pateta e faasefulutasi [11] e tele ai nai lo faatoaga a le malo, a o se ulugalii i Filipaina sa fesoasoani i le toeitiiti atoa le 700 o aiga e leai ni meaai, e fafaga ni lapiti ma fai faatoaga togalaau aina. Sa fesoasoani atu se ulugalii i Pennsylvania i ni tagata se toa 60, o le afa o i latou o ni tagata o isi ekalesia, i le saunia o a latou faamaumauga o gafa faaleaiga. Sa fesoasoani se ulugaii i Ghana e viliina ma toe fai faalelei ia vaieli, ma auina atu ai le suavai i tagata e 190,000 i alalafaga ma tolauapiga a tagata sulufai.

E tusa lava pe matuai iloga i le vaaiga o mata ia taunuuga o misiona uma pe leai foi, ae o i latou uma o e auauna atu, latou te faia se sao iloga i le silafaga a le Alii, aua o i latou uma “[na] alofa atu, e maua ai le eseesega.”¹⁵ O ulugalii faamisiona o ni tagata autu ma ni faataitaiga o le malosi i faifeautalai faamisiona faapea ma taitai perisitua ma ausilali i le lalolagi atoa. E faailoa atu lo’u agaga faafetai mo i latou uma nei ma le faitau afe o isi o loo auauna atu i le tele o tulaga, ua tuuina atu ai le fia miliona o itula o auaunaga i o latou uso a tagata.

Ou uso e ma tuafafine, afai ua outou lagonaina musumusuga a le Agaga, ina ia faia lenei galuega, e tusa lava pe o le a le itiiti o na lagona, ia aua nei faatuai le aso o lau auaunaga. O le taimi lenei e sauniuni ai, o le taimi lenei e valaauina ai, o le taimi lenei e ositaulaga ai. O le taimi lenei e faasoa atu ai au meaalofa ma taleni, ma o le taimi foi lenei e maua ai faamanuiaga a le Atua mo oe ma lou aiga. Ua saunoa mai Peresitene Gordon B. Hinckley, “O loo i ai pea lava pea le tulaga manaomia o ni ulugalii faamisiona se toatele.”¹⁶ A o agai pea i luma lenei galuega, ua faateleina ai foi le manaomia [o ulugalii faamisiona]. Ia tatou tula’i i le vaitau ua sili ona tatou tamaoaiga ai i le poto masani, ua ‘oa le tofa, atamai, aemaise ai lava, o lo tatou faatuatua, ina ia taulimaina lena manaoga ona ua na o i tatou lava e mafaia.

O i tatou, e faapitoa lava, ua i ai se mafuaaga patino e faia ai. Mai aafiaga o o tatou olaga, e mafai ona tatou toe tepa i tua ma iloa ai le agalelei o lo tatou Tama oi le Lagi ma Lona Alo o Iesu Keriso ia i tatou ma o tatou aiga. E pei ona faamatala mai e se tasi uso faamaoni, “Ma te mananao lava ma lo’u toalua ia ma faia ni misiona se lima—tai tasi mo le fanau matagofie e toalima ua faamanuiaina ai i ma’ua e le Atua!” Po o a lava faamanuiaga ua tofu maua e i tatou taitoatasi, ou te molimau atu ua tatou mauaina uma lava le faamanuiaga silisili o faamanuiaga uma: “Aua ua faapea lava ona alofa mai o le Atua [o lo tatou Tama Faalelagi] i le lalolagi, ua ia aumai ai lona Atalii e toatasi,”¹⁷ ma o Lona Alo o Iesu Keriso, “e alofa [o ia] i le lalolagi, e oo ina tuuina atu lona lava soifua.”¹⁸ E tuuina atu la’u molimau faapitoa, o Lana taulaga togiola o le ata sili lea o lena alofa.

I le avea ai ma tagata o le Ekalesia a Iesu Keriso o le Au Paia o Aso e Gata Ai, o le tatou faamanuiaga sili o le toe faafoi atu o Lona alofa e ala i le ositaulaga ma le auauna atu, ma maua ai Lana folafolaga paia: “Ai foi sē faamaumau lona ola ona o a’u, ma lo’u igoa, na te toe maua lava, o le ola faavavau lava.”¹⁹ Tau ina ia tatou faia faapea, o la’u tatalo faamaoni lea i le suafa o Iesu Keriso, amene.