O Le Uiga Lelei o le Agalelei

I le tele o tausaga ua mavae, ina ua valaauina au e avea ma se epikopo, sa ou manao i le au epikopo e asiasi atu ia i latou o e sa le toaaga i le Ekalesia ma vaai pe i ai lava se mea e mafai ona matou faia e aumaia ai faamanuiaga o le talalelei i o latou olaga.

I se tasi aso, sa matou asiasi atu ai i se alii ua 50 tausaga le matua ma o se inisinia e aloaia. Na ia ta’u mai ia te au na gata lona sau i le lotu a o laitiiti o ia. Sa i ai se mea na tupu i lena aso. Sa ulavale o ia i le latou vasega ma sa pisapisao nai lo le mea sa tatau ona i ai, ma o lea sa ita ai le latou faiaoga, ma ave o ia i fafo mai le vasega, ma fai i ai e aua ne’i toe sau.

E lei toe sau lava o ia.

O se mea na ou maofa ai ona o le mafai e se faaupuga e le agalelei ona i ai sona aafiaga tele i le silia ma le fasefulu tausaga mulimuli ane. Ae sa i ai. Ma o lea la, e lei toe foi mai ai lava lenei alii i le lotu. E faapena foi i lona toalua ma lana fanau.

Sa ou faatoese ia te ia ma faailoa atu i ai lo’u faanoanoa ona o le faia faapea o ia. Sa ou ta’uina atu i ai le leaga o se upu e tasi na faia ma le inoino, ae ua umi naua le aafiaga o le taofia o ia ma lona aiga mai faamanuiaga e maua mai i le malosi i le Ekalesia.

“Ina ua mavae le 40 tausaga,” sa ou ta’u atu ai ia te ia, “ua oo i le taimi e faasa’osa’o ai mea e le Ekalesia.”

Sa ou faia le mea sili e faia ai. Sa ou faamautinoa atu ia te ia le taliaina ma le manaomia o ia. Sa ou matua fiafia ina ua toe foi mai lenei alii ma lona aiga i le lotu ma avea ma ni tagata malolosi ma faamaoni. Ae o le mea e sili atu, na avea lenei uso ma se faiaoga malosi o aiga aua ua ia malamalama i taunuuga e mafai e se mea laitiiti e pei o se upu e le alofa ona oo i ai i le olaga atoa, ma atonu foi e sili atu.

O le agalelei o le uiga maoae lea o amioga masani a alii ma tamaitai e tauagafau ua ou iloa. O le agalelei o se tusifolau lea e tatalaina ai faitotoa ma maua ai faauoga. E faamaluluina ai loto ma foafoaina ai sootaga ia e mafai ona umi.

O upu agalelei e le gata e siitia ai o tatou agaga i le taimi e tuuina mai ai, ae mafai foi ona tumau ai pea ia i tatou i le tele o tausaga. I se tasi aso, a o o’u aoga i le kolisi, na faamalo mai ai se alii e fitu tausaga e matua ai ia te au i la’u taalo i se taaloga lakapi. E le gata sa ia faaviivii mai i le lelei o la’u taalo, ae na ia matauina foi lo’u taalo faatamatane. E ui o lenei talanoaga na tupu i le silia ma le 60 tausaga talu ai, e ui lava foi o le tagata na faamalo mai ia te au e le o i ai ma sona toe manatuaina o lenei talanoaga, ae ou te manatuaina pea upu agalelei na tuuina mai ia te au i lena aso e Gordon B. Hinckley, o le na avea mulimuli ane ma Peresitene o le Ekalesia.

O uiga o le manatunatu ma le agalelei e le mafai ona aveeseina mai ia Peresitene Hinckley. Ina ua maliu lo’u tama i le 1963, o Peresitene Hinckley le tagata muamua lava na alu atu i lo matou fale. O le a le galo ia te au lona agalelei. Na ia tuuina atu i lo’u tina se faamanuiaga, faatasi ai ma isi mea, ma folafola atu e tele mea e tulimatai atu i ai [lo’u tina] ma o le a manaia le olaga ia te ia. O na upu na maua ai e lo’u tina ma a’u le faamafanafanaga ma o le a le galo lava ia te au lena agalelei.

O le agalelei o se uiga moni o se olaga faaselesitila. O le agalelei o le auala lea e tausia ai e se tagata uiga faaKeriso isi tagata. O le agalelei e tatau ona sasala atu i a tatou upu uma ma galuega, i le aoga, ekalesia, aemaise lava i o tatou aiga.

O Iesu, lo tatou Faaola, o le uiga moni lava lea o le agalelei ma le agaalofa. Na Ia faamaloloina e mama’i. Na ia faaaluina le tele o Lona soifuaga e auauna atu ai i se tagata e toatasi po o le toatele. Sa Ia fetalai atu ma le agaalofa i le fafine Samaria o le sa vaai maualalo i ai le toatele. Na Ia aoaoina Ona soo ina ia tuu mai tamaiti e o mai ia te Ia. Sa Ia agalelei atu ia i latou uma o e sa agasala, ae fetuuina na o le agasala, ae le o le tagata agasala. Na Ia faatagaina ma le agalelei le fia afe o Sa Nifae e o atu ma tagotago i mea sa tutu’i ai fao i Ona lima ma vae. Peitai o lenei aga maoae o le agalelei na maua lea i Lana taulaga togiola, o lea ua tatou saoloto uma ai mai aafiaga o le oti, ma tagata uma mai aafiaga o le agasala, i tulaga o le salamo.

Na faataitai e le Perofeta o Iosefa Samita le agalelei i lona soifuaga i tagata uma o e matutua ma e laiti. Sa manatuaina e se tasi tamaitiiti sa faamanuiaina ona o le agalelei o le Perofeta:

“Sa ma o ma lo’u uso matua i le aoga, e latalata i le fale sa lauiloa o le fale piliki o Iosefa. Sa mamafa timuga i le aso ua tuanai, ma o lea na matuai palapala ai lava, aemaise lava i le auala lena. Na gotogoto o ma vae ma lo’u uso o Wallace i le palapala, ma na le mafai ona toe sei i luga, ma e pei lava ona masani ai tamaiti, sa amata ona ma fetagisi, aua na ma manatu o le a ma nonofo ai lava iina. Ae i le tepa a’e i luga, na vaaia ai le uo pele a tamaiti, o le Perofeta o Iosefa Samita, o loo agai mai ia i ma’ua. E lei pine ae ona aveina i ma’ua i le eleele matutu. Ona ia punou ifo lea i lalo ma soloese ia palapala mai o ma’ua seevae ua mamafa, ma tago aveane lona solosolo mai le taga o lona ofu, ma soloi ai o ma mata ua loimata uma. Na ia tautala mai i ni upu agalelei ma le faagaeetia ma auina atu i ma’ua i le aoga ma le fiafia.”¹

E leai se mea e suitulaga i le agalelei i totonu o le aiga. O lenei lesona sa ou aoaoina mai lo’u tama. E faalogo o ia i le fautua atu a lo’u tina. O lea na avea ai o ia ma se alii sili ona lelei, atamai ma agalelei.

Sa ou taumafai e mulimuli i le faataitaiga a lo’u tama ma faalogo i manatu o lo’u toalua. Ou te faatauaina ona manatu. Mo se faataitaiga, afai e amata e lo’u toalua se fuaiupu i upu nei, “Ou te manatu e tatau ona e …” E vave lava ona ou faalogo atu ma suesueina i lo’u mafaufau se mea sese na ou faia. E masani a o lei uma mai le fuaiupu a lo’u toalua, ae ua ou fuafuaina i lo’u mafaufau se faatoesega ofoofogia.

O le mea moni lava, o lo’u toalua o se faataitaiga o le agalelei, agamalu, ma le agaalofa. Ma o lona malamalama, fautuaga, ma le lagolago e taua tele ia te au. O ia ua avea ai foi au ma se tagata ua faaopoopo le atamai, ma le agalelei.

O mea e te tautala atu ai, o le ituaiga leo e te faaaogaina, o le ita po o le mālū o au upu—o mea na e manatuaina e lau fanau ma isi. Latou te vaai ma aoao mai mea lelei ma upu agalelei ma upu foi ma mea agaleaga tatou te faia. E leai se mea e sili atu ona faaali atu ai o tatou tagata moni nai lo mea tatou te faia i isi i le aiga.

E masani ona ou manatu pe aisea e manatu ai nisi e tatau ona latou faitioina isi. Ou te matea e sosolo i o latou toto, ma ua fai ma a latou masani, e masani ona latou le manatu i ai. Latou te faitio lava i soo se tagata—o le auala e taitai ai e Pai ia musika, o le auala e aoao atu ai e Lafai se lesona pe fai ai sona togalaau.

E tusa lava pe tatou te manatu e leai se leaga o a tatou faitioga, ae masani lava ona mulimuli mai o latou taunuuga. Ua faamanatu mai ai ia te au se tamaitiiti na tuuina atu se teutusi o se foai i lana epikopo ma fai atu i ai e mo ia. Na faaaoga e le epikopo le taimi lea e aoao atu ai, ma faamalamalama atu ai i le tamaitiiti e tatau ona ia faailogaina i luga o le lisiti foai pe o se sefuluai, taulaga anapogi, po o se isi mea. Ae na tausisi lava le tamaitiiti o le tupe e mo le epikopo lava ia. Ina ua fesili le epikopo pe aisea ae na tali le tamaitiiti, “Na fai mai lo’u tama ona o oe o se tasi o matou epikopo e sili ona mativa.”

O le Ekalesia e le o se nofoaga e faapotopoto ai tagata ua atoatoa ma talanoa i mea atoatoa, i ai mafaufauga atoatoa, ma i ai faalogona atoatoa. O le Ekalesia o se nofoaga mo tagata e le o atoatoa e faapotopoto i ai ina ia maua ai le faamalosiauga, lagolago, ma le auauna atu i isi a o tatou fetuleni atu i luma i la tatou malaga e toe foi atu ai i lo tatou Tama Faalelagi.

E tofu lava i tatou ma le auala e faimalaga ai i lenei olaga. E eseese foi le saoasaoa tatou te alualu ai i luma. O faaosoosoga e faaletonu ai lou uso atonu o le a le avea ma lu’i ia te oe. O mea e te malosi ai, atonu e le mafaia e isi.

Aua le vaai maualalo ia i latou o e foliga mai e le atoatoa atu nai lo oe. Aua e te le fiafia ona e le lelei le su’isu’i a le isi e pei o oe, e le mafai ona lelei lana togi e pei o oe, e le mafai ona taualo pe eli e pei o oe.

O i tatou uma o fanau a lo tatou Tama Faalelagi. Ma o loo tatou i ai iinei ma se faamoemoega e tasi: ia aoao ma alolofa ia te Ia ma o tatou loto, agaga, mafaufau, ma le malosi atoa, ma alolofa atu i o tatou tuaoi e pei ona tatou alolofa ia i tatou lava.²

O le tasi auala e mafai ona e fuaina ai lou taua i le malo o le Atua o le fesili lea, “O le a se lelei o loo o’u i ai i le fesoasoani atu i isi ia ausia lo latou malosi? Pe o o’u lagolagoina ea isi i totonu o le Ekalesia, pe o o’u faitioina i latou?”

Afai e te faitioina isi, ua e faavaivaia le Ekalesia. Afai o loo e atiina ae ia isi, o loo e atiina ae le Malo o le Atua. E pei ona agalelei mai o le Tama Faalelagi, e tatau foi ia i tatou ona agalelei atu i isi.

O Elder James E. Talmage, o se tagata e manatuaina i ana aoaoga faavae, na faaalia le agalelei tele i se aiga tuaoi sa mapuitiga. Latou te matuai le masani lava. A o lei avea o ia ma se Aposetolo, a o avea ma se tama talavou, na malamalama o ia i le mafatiaga tele sa feagai ma se aiga tuaoi o e sa matuai aafia lava i le faama’i o le lipi. E lei popole o ia pe o ni tagata o le Ekalesia pe leai, o lona agalelei ma lona alofa na uunai ai o ia e faia se galuega i ai. Sa matuai naunau lava le Aualofa e saili nisi e fesoasoani i ai, ae sa leai se tasi ona o le natura o le faama’i pipisi.

Ina ua taunuu o ia, na maua atu e James le isi pepe ua maliu, ma isi tamaiti laiti e toalua o loo matuai tigaina lava i le ma’i. Sa faavave loa ona galue o ia, ma faamama le fale ua gasu uma, ma saunia le tino oti mo le tanuina, faamama ma tausi isi tamaiti mama’i, na alu ai le aso atoa o faia. Na toe foi mai o ia i le taeao na sosoo ai ma iloa ai na maliu i le po le isi tamaitiiti. Sa i ai le isi tamaitiiti lona tolu sa tigaina foi. Na ia tusia i lana tusi talaaga: “Sa ia fusi mau lo’u ua, o nisi taimi e tale mai ai ia [siama] i o’u foliga ma o’u ofu … ae peitai ou te lei tuueseina o ia mai ia te au. I le toe afa itula ae uma lona ola, sa ou savalivali solo ai lava ma sii lenei teineitiiti i o’u lima. Na maliu o ia i le 10 i le taeao.” Ua toatolu tamaiti ua maliliu i totonu o le 24 itula. Ona ia fesoasoani lea i le aiga mo le fuafuaina o falelauasiga ma sa ia saunoa ai i sauniga i o latou tuugamau.³ O lenei mea sa ia faia uma i se aiga e le masani ai. Oka se faataitaiga maoae o le agalelei faaKeriso!

Afai e faatumulia i tatou i le agalelei, tatou te le faamasino atu. Na aoao mai le Faaola, “Aua tou te faamasino atu, ona le faamasinoina mai ai lea o outou; aua tou te faasala, ona le faasalaina mai ai lea o outou; ia outou faamagalo atu, e faamagaloina mai ai outou.”⁴ Na ia aoao mai foi, “aua o le faamasinoga tou te faamasinoina atu ai, e faamasinoina ai outou: o le fua foi tou te fuaina atu, e toe fuaina mai ai ia te outou.”⁵

“Ae,” e te fesili atu i ai, “e faapefea pe afai e amio mataga ia tagata?”

Alofa ia i latou.

“Pe afai e matuai le mafaufau lava?”

Alofa ia i latou.

“Ae faapefea pe afai e faaonoono? Pe ua le tatau ea ona ou faia i ai se mea?”

Alofa ia i latou.

“Le usiusitai?”

O le tali lava e tasi. Ia agalelei. Alofa ia i latou.

Aisea? Na aoao mai Iuta i tusitusiga paia, “Ia outou alofa atu i nisi ma ia faatatau.”⁶

O ai e mafai ona ta’uina mai le mamao o aafiaga e mafai ona tatou maua pe afai e na o lo tatou agalelei atu lava?

O’u uso e ma tuafafine, o le talalelei a Iesu Keriso e sopo i luga atu o le olaga faaletino. O la tatou galuega iinei ua na o se ata lafoia o mea e le mafaatusalia e oo mai.

Na tatalaina le lagi i le Perofeta o Iosefa Samita. Na ia vaai i le Atua Soifua ma Lona Alo, o Iesu Keriso.

I o tatou aso, o loo i ai se perofeta, o Peresitene Gordon B. Hinckley, o loo femalagaa’i i le lalolagi ma tuuina mai le taitaiga mo o tatou vaitaimi.

E pei ona alofa mai lo tatou Tama Faalelagi ia i tatou, e tatau foi ona tatou alolofa atu i Ana fanau.

Ia avea i tatou ma faataitaiga o le agalelei. Ia tatou ola e tusa ai ma afioga a le Faaola: “O le mea lea e iloa ai e tagata uma lava o o’u soo outou, pe afai ua outou fealofani.”⁷ Ou te molimau atu ai i nei upumoni i le suafa paia o Iesu Keriso, amene.