O Le Mea ua Sili Ona Tulaga Ese ai i Tatou

E lata i le 70 tausaga talu ai, na tuuina atu ai e Peresitene Tavita O. MaKei, a o avea lena ma se fesoasoani i le Au Peresitene Sili o le Ekalesia, le fesili lenei i se aofia sa faapotopoto mo le konafesi aoao: “Afai e fesiligia [outou] uma taitoatasi i le taimi lenei e faaupu mai i se fuaiupu se tasi … le mea ua sili ona tulaga ese ai le Ekalesia a Iesu Keriso o le Au Paia o Aso e Gata Ai, o le a lau tali i ai?”

“O la’u tali,” na ia tali atu ai, “o le … pule paia lea mai faaaliga tuusao.”¹

O lena pule paia, o le perisitua paia lea.

Na faaopoopo atu e Peresitene Hinckley lana molimau ina ua ia saunoa, “[O le perisitua] o se faamatuuina mai lea o le pule faalelagi, e ese mai i isi mana ma pule uma o loo i le fogaeleele… . Ua na o le pau lea o le mana o i le lalolagi e au i talaatu o le veli o le oti… . A aunoa ma lea mana e mafai lava ona i ai se lotu ua na o se igoa, [o se lotu] e leai se pule e taitai ai mea a le Atua.”²

I le na o le fa vaiaso talu ai na saunoa atu ai Peresitene Faust i tamaiti aoga i le BYU i le latou faigalotu: “[O le perisitua] e faagaoioia ma pulea uma ai gaoioiga o le Ekalesia. A aunoa ma ki ma le pule o le perisitua, e leai foi se ekalesia.”³

Ou te amata i le afiafi nei i faamatalaga pupuu nei e tolu (lea e mafai ona faaopoopo atu i ai le tele o isi) ina ia matuai faamamafaina ai le manatu lava e tasi: o le perisitua a le Atua, ma ona ki, o ona sauniga, o lona faapogai paia ma le mafaia ona fusifusia i le lagi mea e fusifusia i le lalolagi e le mavavaeeseina i le Ekalesia moni a le Atua aua e tutasi lava ia, ma a na le seanoa lena, semanu e leai se Ekalesia a Iesu Keriso o le Au Paia o Aso e Gata Ai.

I lenei tausaga faamanatu lea tatou te faamanatuina ai le 200 tausaga o le fanau mai o le Perofeta o Iosefa Samita ma le 175 tausaga talu le faavaeina o le Ekalesia, ou te fia faaopoopo atu la’u molimau i ai—ma faailoa atu lo’u agaga faafetai—mo le toefuataiga o le perisitua paia, lenei aia tatau paia, lenei meaalofa silisili, ma le matafaioi o loo ia faia i o tatou olaga i itu uma o le veli.

O le galuega taua o le perisitua i le sosooina o le olaga nei ma le faavavau sa amataina lea e le Faaola ina ua Ia faavaeina Lana Ekalesia i le taimi o Lana misiona i le lalolagi. Na ia fetalai atu i Lana aposetolo sinia o Peteru, “Ou te avatu foi ia te oe ki o le malo o le lagi: o se mea foi e te fusifusia i le lalolagi, e fusifusia foi lea i le lagi: o se mea foi e te tala i le lalolagi, e tatalaina foi lea i le lagi.”⁴ I le ono aso mulimuli ane na Ia aveina ai Peteru, Iakopo, ma Ioane i le tumutumu o se mauga lea na liua ai o Ia i le mamalu i o latou luma. Ona oo mai ai lea o perofeta mai uluai tisipenisione, e aofia ai Mose, ma Elia,⁵ ma tuuina atu ki ma mana eseese na umia e i latou taitoatasi.

Ae paga lea e lei umi ae fasiotia uma na Aposetolo po o le aveina foi i le lagi ma sa latou aveina ai foi ma a latou ki o le perisitua, lea na mafua ai ona leai le perisitua ma lē toe i ai le pule paia i tagata i le silia ma le 1400 tausaga. Ae o se vaega o le vavega i ona po nei ma le talafaasolopito ofoofogia ua tatou faamanatuina i le afiafi nei o le toe foi mai lea o na uluai avefeau mai le lagi i o tatou aso ma toefuatai mai na lava mana e tasi sa latou umia mo le faamanuiaina o tagata uma.

O Me o le 1829 a o faaliliuina le Tusi a Mamona, na tau ai Iosefa Samita i se mau e faatatau i le papatisoga. Sa la talanoaina ma lana tusiupu o Oliva Kaotui le mataupu, ma o lea sa matuai ole atu ai i la’ua i le Alii e tusa ai ma lea mataupu. Na ia tusia: “Na tatala atu o ma agaga i le tatalo faamaoni—ina ia iloa pe faapefea ona ma mauaina ia faamanuiaga o le papatisoga ma le Agaga Paia… . Sa ma saili ma le maelega … mo le pule o le perisitua paia, ma le mana e taitai ai faapea.”⁶

I le tali mai i lena “tatalo silisili” na oo mai ai Ioane le Papatiso, e toefuatai mai ki ma mana o le Perisitua Arona lea ua tuuina atu i o tatou alii talavou ua aofaga potopoto i lenei afiafi. I nai vaiaso mulimuli ane na toe foi mai ai Peteru, Iakopo, ma Ioane e toefuatai mai ki ma mana o le Perisitua Mekisateko e aofia ai ia ki o le tofi faaaposetolo. Ina ua fausia se malumalu lea e mafai ona oo mai i ai isi avefeau faalelagi, na faaalia mai ai iina i le aso 3 o Aperila, 1836 se vaega o ona po nei e tutusa ma le mea na tupu muamua i le Mauga o Liua, o se vaega o le mea na ta’ua e Peresitene Hinckley i se tasi taimi o “uaga o faaaliga i Katelani” lea na faaali mai ai le Faaola lava Ia i Lona mamalu, na toe faaali mai ai foi ma Mose, Elia, ma Elaia i le Perofeta o Iosefa Samita ma Oliva Kaotui, ma tuuina atu ki ma mana mai o latou tisipenisione i luga o nei tamalii. O lena asiasiga na faaiuina i lenei folafolaga ofoofogia: “O lea, o ki o lenei augatupulaga ua tuuina atu ia te oulua.”⁷

E lei i ai se manatu o le a faaaofia ai e le Perofeta o Iosefa i totonu o na Mataupu Faavae pupuu ma le mamana o [lo tatou] Faatuatua, “Matou te talitonu e ao ina valaauina le tagata e le Atua, i le valoaga, ma le faaee atu o lima, o e o i ai le pule, e talai atu ai le Talalelei ma faia sauniga o i ai.”⁸ E manino lava o le galue i le pule faalelagi e sili atu mea e moomia ai nai lo se maliliega faalauaitele. E le mafai ona faagaoioia i aoaoga faafaifeau po o se poloaiga mai le faapotopotoga. E leai, i le galuega faatagaina a le Atua e ao ona i ai le mana e sili atu nai lo lea ua umiaina e tagata o le faapotopotoga, po o feoai i auala, po o seminare—o se mea moni lea na silafia e le toatele o tagata na sailiili faamaoni i mataupu faalelotu ma faalauiloaina mai faalauaitele mo le tele o tupulaga lea na oo atu ai lava i le Toefuataiga.

E moni sa i ai nisi i na aso e lei mananao i a latou faifeau e faapea ua faapaiaina faapitoa i latou e ala i le pule faalelagi, ae toatele tagata sa mananao mo le faamaoniga faaperisitua a le Atua, ma sa popole po o fea e mafai ona latou maua ai se mea faapea.⁹ I lena agaga, o le toe foi mai o le pule o le perisitua e ala i se faaaliga ia Iosefa Samita sa tatau ona faafaigofieina ai le tele o senituri o tiga ia i latou, o e na lagonaina le mea na lototele le alii lauiloa o Sale Uesele e ta’u atu. O le feeseeseai ma lona uso sa sili atu ona lauiloa o Sione, ona o le faaiuga a Sione ina ia faauuina e aunoa ma le pule e faia ai, sa tusia ai ma le ataata e Sale upu nei:

I le tali atu i lena fesili faigata, e mafai e i tatou o loo i totonu o le Ekalesia toefuataiina a Iesu Keriso ona sailia ma mauaina le laina o le pule o le perisitua o loo faatinoina e le tiakono sili ona fou i totonu o le uarota, o le epikopo o loo pulefaamalumalu ia te ia, ma le perofeta o loo pulefaamalumalu ia i tatou uma lava. O lena laina e tau atu lava i tua i se laina e le motusia i agelu avefeau o e na omai mai le Alo o le Atua lava Ia e tuuina mai lenei meaalofa e le mafaatusalia mai le lagi.

Ma e maeu lava lo tatou moomiaina o ona faamanuiaga—i le avea ai ma se Ekalesia, ma le avea ai ma ni tagata taitoatasi ma aiga i totonu o le Ekalesia. E tasi lava se faataitaiga:

Sa ou ta’ua muamua le vaitaimi i Katelani i le talafaasolopito o le Ekalesia. O le tausaga e 1836 ma le 1837 sa matuai faigata lava a o feagai ai lena Ekalesia fou ma faigata i mea tau tupe, tulaga faaupufai, ma totonu lava o le Ekalesia ia. I le totonugalemu o lena faigata na maua ai e Iosefa Samita le musumusuga faavaloaga maoae ina ia auina atu nisi o ana alii malolosi (na iu ina aofia uma ai le Korama a Aposetolo e Toasefululua) i ni misiona. O se faiga mausali, ma musuia, lea e faasaoina ai le Ekalesia i le faaiuga mai faafitauli o na vaitaimi, ae i se manatu lata mai o se avega mamafatu i le Au Paia, e tiga mo i latou o e na o ese atu ma atonu sa sili atu ona tiga ia i latou o e na faamuli i le fale.

Ou te aumaia se upusii a Elder Robert B. Thompson:

“Ua oo mai le aso atofaina e tuuvaa atu ai Toeaina i Egelani, sa ou [afe] i le fale o Uso [Heber C.] Kimball ina ia mautinoa ai po o afea e amata ai [lana malaga], aua sa ou faamoemoe ma te o ma ia i le lua pe tolu maila, ma ou galue ai i Kanata i lena vaitau.

“Na faava laitiiti le faitotoa, ma sa ou ulufale i totonu ma taia ai o’u mata i se mea na ou vaaia. Na semanu ou te toe foi, i le manatu faapea o au o se tagata leaga, ae na le mafai ona ou toe gaoioi. Sa tatala atu e le tama lona agaga i le … Atua, ma [aioi atu], ia te … Ia o lē ‘faitaulia ia manu iti, ma fagaina oreva laiti pe a fetagisi’ ina ia taulimaina manaoga o lona toalua ma lana fanau a o toesea o ia. Ona ia faia lea e pei o peteriaka, e ala i le pule o lona tofi, sa faaee atu ai ona lima i luga o o latou ulu taitoatasi, ma tuuina atu se faamanuiaga faaletama i o latou luga, … ma tuuina atu i latou i le tausiga ma le puipuiga a le Atua, a o ia auai i le talaiina atu o le Talalelei i se atunuu ese. A o ia [tuuina atu na faamanuiaga] sa toetoe a le lagona lona leo i le masusu o i latou sa siomia o [ia] o e [sa latou taumafai i o latou uiga faatalavou ina ia malolosi, ae sa matuai faigata lava ona fai.] … Sa faagasolo ana faamanuiaga, ae ua matuai ootia lava lona loto pe a fai faasosoo… . O lea sa fai ai ma malolo o ia, a o … tafe ifo loimata i ona alafau, o se faailoga o lagona o loo malosi i lona loto. Sa le lava le malosi o lo’u loto e taofiofi ai,” o le tala lea a Uso Thompson. “E oo lava foi ia te au sa ou tagi, ma sa matou fetagisi faatasi uma ai. O le taimi foi lena sa ou faafetai ai mo le avanoa ua ou molimauina ai se vaaiga faapea.”¹¹

E faafiaafe ona faatinoina lena vaaiga i soo se auala, o le faafiaselau afe taimi, i totonu O Le Ekalesia a Iesu Keriso o le Au Paia o Aso e Gata Ai—o se popolega, o se manaoga, o se valaauga, o se tulaga matautia, o se ma’i, o se faalavelave, o se oti. Sa ou auai i taimi faapena. Sa ou vaaia le faaali mai o le mana o le Atua i lo’u aiga ma lo’u valaauga. Sa ou vaaia le tuliesea o le tiapolo ma le puleaina o elemene. Ua ou iloa le uiga o le faatoilaloina o ni faafitauli se tele ma le vaeluaina o Sami Ulaula. Ua ou iloa le uiga o le “laaloa ia i latou” o le agelu o le faafanoga.¹² O le mauaina o le pule ma le faaaogaina o le mana o le “Perisitua Paia, e tusa ai ma le Faatulagaga a le Alo o le Atua,”¹³ o se faamanuiaga tele lea mo au ma lo’u aiga e mafai ona ou faamoemoe i ai i lenei lalolagi. O lea la, o le uiga o le perisitua i faaupuga uma lava—e le mafaatusalia, e le uma, e gafataulima ona faamanuia atu pea.

Faatasi ai ma le loto faafetai mo faamanuiaga faapenei, ou te auai faatasi ma outou ma se aufaipese o e o soifua ma e ua maliliu i le usuina i lenei tausaga faamanatu o le, “Viia Le na Fetaiai ma Ieova!”¹⁴ ma fetaiai ma Atamu; Kaperielu; Mose ma Moronae; Elia; Elaia; Peteru; Iakopo ma Ioane; Ioane le Papatiso; ma le anoano o isi.¹⁵ E moni lava na “faauuina e Iesu lena Perofeta ma le Tagatavaai.”¹⁶ Ia tatou faapelepele e i tatou o ē talavou ma matutua, o tama ma taulelea, o tamā ma atalii, le perisitua lea na toefuatai mai e ala mai ia te ia [Iosefa Samita], o ki ma sauniga o le perisitua lea e na o le pau lea o le auala e faaalia mai ai le mana o le amioatua, ma a aunoa ma lea e le mafai ona faaalia mai.¹⁷ Ou te molimau atu i le toefuataiga o le perisitua ma le “tulaga maoti” e le mavavaeeseina o le Ekalesia moni a le Atua lea sa i ai pea lava, i le suafa o Ia e ana le perisitua, le Alii o Iesu Keriso, amene.