O Ponokarafi [tusi ma ata mataga]

O le taumafanafana na tea nei na ma toe taliu mai ai ma Sister Oaks mai le lua tausaga i Filipaina. Sa ma fiafia i le ma auaunaga iina, ma ua ma fiafia foi e toe foi mai i le aiga. A o ma toesea ai, sa ma vaai atu i mea o loo siomia ai i ma’ua i se vaaiga fou, faatasi ai ma le faateleina o le talisapaiaina ae o nisi taimi e i ai foi ma ni popolega fou.

Sa ma popole lava i le vaaia o osofaiga a ponokarafi sa faia i le Iunaite Setete a o ma toesea. Ua tele tausaga o lapatai mai taitai o le Ekalesia e tetee ai i tulaga matautia o ata ma upu e faamoemoe e faaosofia ai tuinanauga o feusuaiga. O lenei, o aafiaga leaga o ponokarafi, na gaosia ma faasalalauina e faatau atu e maua ai tupe, ua sosolo atu i lo tatou lalolagi atoa e pei o se lologa o mea leaga.

I le tatou konafesi talu ai, na tuuina atu ai e Peresitene Gordon B. Hinckley se lauga atoa lava e uiga i lenei mataupu, ma lapatai atu ai i ni upu manino “o se faafitauli sili ona matuia ia i tatou” (“Ua Feagai i Tatou ma se Mala Matautia,” Liahona, Nov. 2004, 59). O le toatele o epikopo matou te feiloai i konafesi a siteki ua lipotia mai nei ni popolega tele i lenei faafitauli.

O’u uso e o loo umia le Perisitua Mekisateko, e faapea foi i alii talavou, ou te fia tautala atu ia te outou i lenei aso e uiga i ponokarafi po o tusi ma ata mataga. Ou te iloa e toatele outou o e o loo aafia i ponokarafi ma e toatele foi nisi o outou ua faaleagaina ai.

I le taulai atu o la’u lauga i lenei mataupu ua ou lagona ai le pei o le perofeta o Iakopo, o le na ta’uina atu i alii o ona aso ua tigaina o ia, o lea ua faaalitino atu ai i luma o a latou ava ma fanau. Ae ui i le mamafa o le feau, ae ao ona ia tautala atu i tagata e tusa ma lenei mataupu aua ua poloaiina o ia e le Atua (tagai Iakopo 2:7–11). O le mafuaaga foi lea ou te faia ai.

I le mataupu e lua o le tusi o loo tauaveina ai lona igoa, na fetuuina ai e Iakopo alii ona o le “faitaaga” (f. 23, 28). Na ia ta’uina atu ia i latou ua latou “tuimomomoina loto o a [latou] ava agavaivai, ua mavae atu foi le faatuatua o a [latou] fanau ona o a [latou] faaaoao leaga i o latou luma” (f. 35).

O a nei “faitaaga” e matuai leaga? E le masalomia o nisi tagata ua uma ona faatinoina ni uiga leaga. Ae o le vaega autu o loo taulai atu i ai le lauga a Iakopo, e le o uiga leaga ua faataunuuina, ae o uiga leaga o loo mafaufauina.

Na amata e Iakopo lana lauga i le ta’uina atu lea i alii e faapea “aua e oo i nei ona po, [sa latou] usiusitai i le afioga a le Atua” (Iakopo 2:4). Ae peitai, sa ia ta’uina atu ia i latou ua ia iloa o latou manatu, o loo latou “amata ona galulue i le agasala, o le agasala lea ua inoino i ai … le Atua” (f. 5). “E tatau ona ou molimau atu ia te outou e uiga i le agasala a o outou loto” (f. 6), na ia faaopoopo atu ai. Sa saunoa atu Iakopo e pei lava o Iesu ina ua Ia fetalai atu, “Ai se vaai i le fafine ina ia manao i ai, ua uma ona mulilua ma ia i lona loto” (Mataio 5:28; tagai foi 3 Nifae 12:28; MFF 59:6; 63:16).

I le silia ma le 30 tausaga talu ai, sa ou uunaia ai tamaiti aoga o le BYU ina ia aloese mai “tusitusiga e faaosofia ai feusuaiga e le faatagaina” i mea latou te faitauina ma matamata i ai. Sa ou tuuina atu lenei faatusatusaga:

“O tala i tifaga ma ata leaga e sili atu ona leaga nai lo meaai palapala pe eleelea. O loo i ai i le tino ni elemene e puipuia ai le tino mai meaai e le mama. E i ai nisi tulaga e le lelei ai, o meaai leaga e na o le maua ai o oe i le ma’i ae le tumau ona faaleagaina ai le tino. I le faatusatusa atu i ai, o se tagata o loo fiafia i ata leaga ma tifaga leaga ma tusi leaga e faamaumauina na mea i le vaega ofoofogia e toe manatua ai ua tatou ta’ua o le fai’ai. E le mafai e le fai’ai ona toe luai mai i fafo le eleelea. O le taimi lava e faamaumauina ai, o le a tumau ai pea seia toe manatua ai, ma o le a faaali mai ai na vaaiga leaga i lou mafaufau ma aveesea ai oe mai tulaga lelei o le olaga.”¹

O lenei uso e, e tatau ona ou ta’uina atu ia te outou faapea ua matauina e o tatou epikopo ma o tatou faufautua faapolofesa se faatupulaia o le fuainumera o alii o loo aafia i ponokarafi, ma o le toatele o i latou na, o ni tagata malolosi o le Ekalesia. O nisi o loo aafia ai i ponokarafi e foliga mai ua tuuitiitia lona matuia ae faaauau pea ona faaaogaina le perisitua a le Atua aua ua latou manatu e leai se tasi o le a iloaina lo latou aafia ai. Ae o loo iloa lelei lava e le tagata o loo faaaogaina uso e, e faapena foi i le Alii.

Ua fautua mai nisi faapea e tatau ona avea le ponokarafi ma se fesili e ese mai ai i le faatalanoaga o le pepa faataga o le malumalu. Ua uma ona i ai. E le itiiti ifo ma le lima fesili eseese e tatau ona aumaia ai se ta’uta’u atu ma le talanoaina o lenei mataupu pe afai o le tagata o loo faatalanoaina e i ai se malamalama faaleagaga ma le faamaoni matou te faamoemoeina mai ia i latou o e tapuai ai i totonu o le fale o le Alii.

O se tasi o aoaoga sili ona manatuaina a le Faaola e faatatau lea i alii o loo matamata faalilolilo i ponokarafi.

“Oi talofa ia te outou tusiupu ma Faresaio, tagata pepelo! Ua outou faamama i le tua o le ipu ma le tanoa, a o totonu ua tutumu i mea ua faia ma le amio leaga.

“O oe na le fareasio tauaso, ia e muai faamama i totonu o le ipu ma le tanoa, ina ia mama atoa ma le tua” (Mataio 23:25–26; tagai foi Alema 60:23).

Na faaauauina e le Faaola Lona fetuuina o i latou o e taulimaina mea o loo mafai ona vaaia ae le amanaia mea e sili ona taua o le faamamaina lea o le tagata i totonu:

“Aua e tutusa outou ma tuugamau ua faasinasinaina, o loo matagofie i fafo, a o totonu ua tutumu i ivi o tagata oti ma mea leaga uma.

“E faapea foi outou, o fafo ua mataamiotonu i luma o tagata, a o totonu, ua tutumu outou i le pepelo ma le amioletonu” (Mataio 23:27–28).

O aafiaga faaleagaga e vave lava ona oo mai ona o le pepelo faapea e matuai matautia lava. O i latou o e saili ma faaaogaina ia ponokarafi ua le toe i ai le mana o lo latou perisitua. Na folafola mai e le Alii: “A e pe a tau ufiufi a tatou agasala … faauta, e punitia lava le lagi; e tiga le Agaga o le Alii; pe a aveeseina foi, Amene i le perisitua po o le pule a lena tagata” (MFF 121:37).

O e o loo aafia i le ponokarafi e le toe mauaina foi le mafutaga a le Agaga. O ponokarafi e faatupuina ai lagona ia e faaumatia ai le faaleagaga. “O le loto i la le tino o le oti lea”—le oti faaleagaga (Roma 8:6; tagai foi 2 Nifae 9:39).

Ua ta’u soo mai e tusitusiga paia e faapea e le nofo le Agaga o le Alii i ni malumalu eleelea. A o tatou fetagofi atu ma le agavaa i le faamanatuga, ua folafola mai ia i tatou o le a tatou “maua pea lona Agaga e faatasi ma i[tatou]. “Ina ia agavaa ai mo lena folafolaga ua tatou osi feagaiga ai o le a tatou “manatua pea o ia” (MFF 20:77). O i latou o e sailia ma faaaogaina ia ponokarafi po o tusi ma ata mataga mo le faaosofia ai o feusuaiga, e manino lava le solia ai o lena feagaiga. Ua latou solia foi se feagaiga paia ina ia aloese mai faiga le paia ma le le mama. E le mafai ona latou maua le Agaga o le Alii e faatasi ma i latou. O i latou uma e moomia ona faalogo atu i le augani a le Aposetolo o Peteru: “Ia e salamo i lou nei leaga, ma e faatoga atu i le Atua, pe mafai ona faamagaloina le manatu o lou loto” (Galuega 8:22).

Uso e, ua outou matauina ou te le o talanoaina ia aafiaga o le ponokarafi i le maloloina o le mafaufau po o amioga faasolitulafono. O lea ou te talanoaina ona aafiaga i le faaleagaga—i lo tatou malosi e maua ai le mafutaga a le Agaga o le Alii ma lo tatou malosi e faaaoga ai le mana o le perisitua.

E faatupu foi e le ponokarafi ia manu’anu’a faaletino i a tatou mafutaga taua ma faapelepele. I lana saunoaga i alii o le perisitua ia Oketopa na mavae atu na faitau atu ai e Peresitene Hinckley le tusi a se tamaitai o le na talosaga atu ia te ia ina ia lapataia tagata o le Ekalesia, o ponokarafi “o loo i ai ni aafiaga e faataumaoiina ai loto ma agaga i le mea e gata ai, e faatamaia ai mafutaga” (Liahona, Nov. 2004, 59).

I se konafesi faalesiteki talu ai nei na tauaao mai ai ia te au e se tamaitai se tusi faapena. Sa auauna atu lana tane i tofiga taua o le Ekalesia mo le tele o tausaga a o avea ponokarafi ma ona mausa. Sa ia faamatalaina le faigata tele ona uunai ia taitai perisitua ina ia matuai taulimaina lenei faafitauli o ponokarafi. “Sa ou maua ituaiga tali eseese e pei—o lo’u le to’a po o le faapea mai o a’u ua sese. O lo matou epikopo o loo i ai nei e lelei tele. Ma o lenei ina ua mavae le 15 tausaga, o loo taumafai pea lo’u toalua e taulimaina le mea ua fai ma ona mausa, ae o lenei ua 15 tausaga ua matuai faigata lava ia te ia ona tuu ma e le mafaatusalia mea ua aafia ai.”

O ponokarafi e faaleagaina ai le malosi o se tasi e fiafia ai i se mafutaga masani faalelagona, alofa, ma le faaleagaga ma se tagata o le isi itupa. E faifaimalie lava ona soloia ia papuipui o amioga ia e tetee atu i amioga le talafeagai, mataga, pe faasolitulafono. A o faasolo ina mou atu le malamalama mama, o i latou e aafia i ponokarafi o le a taitaiina atu e faatinoina mea na latou molimauina, e tusa lava po o a ia aafiaga i o latou olaga po o olaga o isi.

O ponokarafi e avea foi ma mausa. E faaleagaina ai le mafaia ona fai ia faaiuga ma e “noatia” ai i latou e faaaogaina, e faaosofia ai i latou ina ia saili pea mo nisi mea se tele. O se alii sa avea ma ona mausa ia ponokarafi faapea fualaau oona na tusi maia ia te au le faatusatusaga lenei: “I la’u vaai i ai o le kokeini e leai ma se faatusatusaga i le mea lenei. Sa ou faia uma mea e lua… . E oo lava i le tuueseina o le fualaau sili ona oona e le faatusalia lea i le [taumafai e tuuese ia ponokarafi]”(tusi o le aso 20 Mati, 2005).

O nisi ua saili e faamaonia lo latou faaloloto e ala lea i le finau mai faapea o loo latou matamata i ni ata “mama” ae le “mamafa.” Na ta’ua e se epikopo atamai lenei mea o le musu lea e vaai atu i se mea leaga e leaga. Na ia faamatalaina ia alii o e o loo saili e faamaonia mea ua latou filifili e matamata ai e ala lea i le faatusatusaina e faapei o le “e le leaga tele” po o le “ua na o sina vaaiga leaga lava se tasi.” Ae o le tofotofoina o le mea e leaga e le o lona tele ae o ona aafiaga. Afai e umi ona faafiafiaina e tagata mafaufauga leaga ina ia aluese ai le Agaga, ua le toe maua lo latou puipuiga faaleagaga ma o le a oo atu i latou i le mana ma le taitaiga a le tiapolo. Afai latou te faaaogaina le initoneti po o isi ponokarafi mo le mea e pei ona taua e lenei epikopo ina ia ”faaosofia ai lagona pe a manaomia,” (tusi o Mati 13, 2005), ua matuai lopalaina lava i latou e le agasala.

O le lauga maoae a le Tupu o Peniamina o loo faamatalaina ai taunuuga matautia. Afai tatou te o ese mai le Agaga o le Alii, o le a avea i tatou ma fili o le amiotonu, e oo ia i tatou se lagona o lo tatou ta’usalaina, ma tatou te “ne ai i luma o le Atua” (tagai Mosaea 2:36–38). “E le toe i ai se alofa mo lena tagata,” na ia faaiuina ai, “o lea o lana sala mulimuli lava ia i ai o ia i le tiga e le uma” (f. 39).

Mafaufau i le faataitaiga matautia a le Tupu o Tavita. E ui lava o se tagata e maoae le faaleagaga i totonu o Isaraelu, ae na ia faatagaina o ia lava e vaai atu i se mea sa le tatau ona ia vaai atu i ai (tagai 2 Samuelu 11). Ina ua faaosoosoina i le mea na ia vaai i ai, na ia solia ai le lua o Tulafono e Sefulu, na amataina i le “Aua e te mulilua” (Esoto 20:14). O le auala lenei na pa’u ese ai se perofeta-tupu mai lona faaeaga (tagai MFF 132:39).

Ae o le tala fiafia o le leai lea o se tasi e moomia ona mulimuli atu i le ala e tau atu i le tiga. O tagata uma lava ua maua i luga o lena auala matautia o loo i ai le ki e suia ai lona auala. E mafai ona ia solaese. E mafai ona ia mama e ala i le salamo.

Na faamatalaina e Alema le Itiiti:

“Ioe, sa ou manatua au agasala uma, ma au amioletonu, e i ai ona tigaina au i puapuaga o seoli… .

“… O le manatu o le a alu atu au i luma o le Atua ua tigaina ai lo’u agaga i le mata’u tele e le mafaamatalaina… .

“Ua oo foi ina o faapea ona tigaina au i le puapuaga, ina o atuatuvale au i le manatu i au agasala e tele, faauta, sa ou manatua, na ou faalogo i lo’u tama ua vavalo i le nuu e uiga i le afio mai o le toatasi, o Iesu Keriso, o le Alo o le Atua, e togiola agasala a le lalolagi.

“Ina o taofi atu e lo’u loto i lenei manatu, sa ou tagi ifo i lo’u loto, Iesu e, le Alo o le Atua, ia e alofa mai ia te au, o loo i le au oona, ma ua noanoatia i filifili o le oti faavavau.

“O lenei foi, faauta, ina o o’u manatu i lenei mea, ua le toe mafai ona ou manatua o’u tiga; ioe, ua ou le toe atuatuvale i le manatu i au agasala.

“Ioe, ua maeu lava le olioli, ma le malamalama ofoofogia na au vaaia; ioe, sa faatumuina lo’u agaga i le olioli matua tele, e tusa ma le tele o lo’u tiga!” (Alema 36:13–14, 17–20).

O’u uso e o e ua maua i lenei mausa po o fesouaiina i lenei faaosoosoga, e i ai se auala.

Muamua, ia iloa le mea leaga. Aua e te puipuia po o le taumafai e ta’umamaina oe lava ia. E le itiiti ifo ma le kuata senituri na aioi mai ai o tatou taitai i alii, e faapea foi i tamaitai ma tamaiti, ina ia aloese mai lenei mea leaga.² O a tatou mekasini o loo i ai nei a le Ekalesia o loo tumu i lapataiga, faamatalaga, ma fesoasoaniga i lenei mataupu—e silia ma le luasefulu ia tala na lomiaina pe o le a lomiaina i le tausaga lenei ma le tausaga ua mavae.³

Lua, saili le fesoasoani a le Alii ma Ana auauna. Faalogo ma usitai i afioga a Peresitene Hinckley:

“Ole atu i le Alii mai le taele o lou agaga ina ia aveeseina e Ia mai ia te oe le mea ua fai ma au masani lea ua faapologaina ai oe. Ma ia e maua le lototele e saili ai le taitaiga alofa a lau epikopo, afai e talafeagai ai, ni fautuaga a ni tagata atamamai e alolofa” (Liahona, Nov. 2004, 59).

Tolu, ia e faia mea uma e te mafaia e aloese ai mai ponokarafi. Afai e te iloa ua e aafia ai—lea e mafai ona oo i soo se tasi i le lalolagi o loo tatou nonofo ai—mulimuli i le faataitaiga a Iosefa o Aikupito. Ina ua tago atu le faaosoosoga i lona ofu, sa ia tuua le faaosoosoga “ma ua sola i fafo” (Kenese 39:12).

Aua lava nei faatagaina soo se tulaga o le faaosoosoga. Ia teena le agasala ma aloese i le taulimaina o ona faatafunaga ua iloaina. O lea, ia tape loa! Pupula ese! Aloese mai ai tusa lava pe o le a le tau. Ia taula’i atu ou mafaufauga i ala e lelei. Ia manatua au feagaiga ma ia faamaoni i lou auai atu pea i ai. O le epikopo atamai lea na ou ta’ua muamua na lipotia maia “o se tasi e umia le perisitua ua maua faaeega paia na pa’u atu i ponokarafi, e lei tupu lava i taimi na alu soo ai i le malumalu; na tupu ina ua faatalale i lona alu i le malumalu” (tusi o Mati 13, 2005).

E tatau foi ona tatou galulue e puipuia i latou o e tatou te alolofa i ai. E faapipii e matua ni faailoilo e lapatai ai pe a faamata’uina lo latou aiga e le asu po o se kasa oona. E tatau foi ona tatou faapipiiina ni faailoilo e puipuia ai mai faamata’u faaleagaga, o puipuiga e pei o faamama i fesootaiga i le Initoneti, ma le tuuina o masini ina ia mafai ona vaai atu i ai isi i le mea o loo matamata ai. Ma e tatau foi ona tatou fausia le malosiaga faaleagaga o o tatou aiga e ala i sootaga fealofani, tatalo faaleaiga, ma le suesueina o tusitusiga paia.

O le vaega mulimuli, aua e te lagolagoina ia ponokarafi. Aua e te faaaogaina le mana e faatau ai, e lagolago ai le toilalo o uiga mama. Tamaitai talavou, faamolemole ia malamalama afai e le talafeagai lelei ou laei, o loo e faalauteleina lenei faafitauli e ala lea i le avea ma se vaaiga faatosina i nisi o alii e vaai atu ia te oe.

Faamolemole ia usitaia nei lapataiga. Ia tatou faaleleia a tatou lava amioga ma ia faaluaina a tatou taumafaiga e puipuia i latou o e pele ia i tatou ma lo tatou siosiomaga mai osofaiga matautia a ponokarafi lea e faamata’uina ai lo tatou faaleagaga, o a tatou faaipoipoga, ma a tatou fanau.

Ou te molimau atu o le mea lenei e tatau ona tatou faia ina ia olioli ai i faamanuiaga a Ia o loo tatou tapuai i ai. Ou te molimau atu ia Iesu Keriso, o le Malamalama ma le Ola o le lalolagi, o Lana Ekalesia lenei, i le suafa o Iesu Keriso, amene.