O Le Alofa Mutimutivale o le Alii

Talu mai Oketopa ua mavae, sa faatele ona ou mafaufau i le fasi fuaitau “o le alofa mutimutivale o le Alii.” O a’u lava suesuega, matau, manatunatu loloto, ma le tatalo, ua ou talitonu ai ua ou malamalama lelei, o le alofa mutimutivale o le Alii o ni faamanuiaga patino taitasi, o le malosi, puipuiga, mautinoa, taitaiga, alofa ma le agalelei, faamafanafanaga, lagolagosua, ma meaalofa faaleagaga tatou te maua mai i le Alii o Iesu Keriso, ma maua mai ona o ia, ma e ala mai foi ia te Ia. E moni, e pei ona loto i ai le Alii “e tusa ma lona alofa mutimutivale ma tulaga eseese o le fanau a tagata” (MFF 46:15).

Manatu i le auala na faatonuina ai e le Faaola Ana aposetolo, Na te le tuua lava i latou o matuaoti. E le gata o le a Ia auina mai “se tasi Fesoasoani” (Ioane 14:16), o le Agaga Paia, ae na fetalai foi le Faaola o le a i ai o Ia ia te i latou (tagai Ioane 14:18). Sei ou faamatalaina atu o se tasi o auala e afio mai ai le Faaola ia te i tatou taitoatasi, e auala mai lea i le tele o Lona alofa mutimutivale. Mo se faataitaiga, a o tatou feagai ma luitau ma tofotofoga i o tatou olaga, o le meaalofa o le faatuatua ma se lagona talafeagai o le mautinoa patino lea e sili mamao atu i lo tatou lava malosi, o ni faataitaiga na se lua o le alofa mutimutivale o le Alii. O le salamo ma le faamagaloga o agasala ma le filemu o le mafaufau, o faataitaiga na o le alofa mutimutivale o le Alii. Ma o le naunautai ma le lototele lea e mafai ai ona tatou fetuleni atu i luma ma le laufofoga fiafia e ui i ni toatuga faaletino ma ni faigata faaleagaga, o faataitaiga na o le alofa mutimutivale o le Alii.

I se konafesi faalesiteki talu ai nei, sa molimauina le alofa mutimutivale o le Alii i le molimau faamomoiloto a se tina talavou e toafa lana fanau, ma o lona toalua lea na fasiotia i Iraq ia Tesema i le 2003. Sa ta’ua e lenei tuafafine lototoa, ina ua uma ona logoina o ia i le oti o lona toalua, sa ia mauaina le faamanuiaga lenei o le Kerisimasi ma se savali. I le totonugalemu o se olaga ua matua ogaoga le suia faafuase’i, sa vave ona oo mai se faamanatu i lenei tuafafine lelei, e moni lava e mafai ona faavavau aiga. Ona ua ia faatagaina mai, o lea ou te faitauina atu ai lena faamanuiaga o le Kerisimasi:

“Mo le aiga silisili i le lalolagi! Ia outou maua faatasi se taimi sili, ma ia manatua le uiga moni o le Kerisimasi! Ua mafai i le Alii ona tatou toe mafuta e faavavau. Tusa lava la pe tatou te valavala, o le a faatasia pea i tatou o se aiga.

“Ia faamanuia atu le Atua ma puipuia outou uma ia saogalemu, ma ia avea lenei Kerisimasi tatou te alolofa atu ai ia te Ia i luga, e fai ma a tatou meaalofa!!!

“Alofa tele atu, Daddy ma lou toalua pele!”

E manino, o le ta’ua o le valavala e le tane i lana faamanuiaga o le Kerisimasi, o loo faasino i le valavala ona o lona tofiga i le militeli. Ae i lenei tuafafine, e pei o se leo mai le efuefu, mai se soa faavavau ma se tamā ua tuua, ua aumaia ai se faamautinoaga faaleagaga o loo matua moomia ma se molimau. E pei ona ou ta’ua muamua, e le tupu faafuasei le alofa mutimutivale o le Alii, pe ua na o se mea foi e te’i lava ua tupu. O le faatuatua, usiusitai, ma le lotomaulalo e aumaia ai le alofa mutimutivale i o tatou olaga, ma o le tele lava o le taimi a le Alii e mafai ai ona tatou iloa ma faapelepele i nei faamanuiaga taua.

I se taimi ua mavae, sa ma talanoa ai ma se taitai perisitua sa musuia na te taulotoina igoa uma o le autalavou mai le 13 i le 21 tausaga i lana siteki. Sa ia faaaogaina ni ata o alii ma tamaitai talavou, e faapipii i ni kata e aoao ai pe a faimalaga faapisinisi po o nisi foi taimi. Sa vave ona iloa e le taitai perisitua igoa o le autalavou uma.

I se tasi po sa fai ai se miti a le taitai perisitua e uiga i se tasi o alii talavou, lea sa na o le ata na te iloa ai o ia. I le miti sa ia vaai ai i le alii talavou o ofu sona ofutino paepae ma o loo i ai ma se pine o lona igoa faafaifeautalai. O loo aoao e ia se aiga, a o nofo ai sana soa i ona tafatafa. Sa uu e le alii talavou le Tusi a Mamona, ma e foliga mai o loo molimau atu i le moni o le tusi. Ona ala ai lea o le taitai perisitua mai lana miti.

I se faapotopotoga a le perisitua na sosoo ai, sa savali atu le taitai i le taulealea sa ia vaai i ai i lana miti, ma fai atu i ai la te talanoa mo sina minute. Ina ua la feiloai, sa ta’u atu e le taitai le igoa o le taulealea ma faapea atu, “E le o a’u o se faimiti. E lei i ai lava sa’u miti e uiga i se tagata e toatasi o lenei siteki, sei vagana ai oe. O le a ou faamatala atu ia te oe la’u miti, a uma ou te manao e te fesoasoani mai ia ou malamalama i lona uiga.”

Sa faamatala atu e le taitai perisitua le miti ma sa fesili atu i le taulealea i lona uiga. Sa tau mole i le tagi le taulealea ma sa na ona ia faapea atu, “O lona uiga e silafia e le Atua lo’u tagata.” Sa sili ona ‘anoa le talanoaga a lenei taulealea ma lona taitai perisitua, ma sa tonu ai o le a la feiloai mai lea taimi i lea taimi i masina na sosoo ai, la te talatalanoa.

Sa maua e lena taulealea le alofa mutimutivale o le Alii e ala i se taitai perisitua musuia. Ou te toe fai atu, e le soona tupu le alofa mutimutivale o le Alii pe te’i foi ua tupu. O le faatuatua, ma le usiusitai e mafai ai ona tatou maua nei meaalofa taua, ma, e tele taimi, e fesoasoani ai le taimi a le Alii tatou te taliaina ai.

E le tatau ona tatou manatu faatauvaa pe le amanaiaina le mana o le alofa mutimutivale o le Alii. O le faigofie, ma le lelei, ma le faamaoni o le alofa mutimutivale o le Alii, o le a matua aoga e faamalolosia ma puipuia ai i tatou i nei taimi faigata ua tatou ola ai ma o le a ola ai foi. A le mafai e upu ona maua ai le mafanafana tatou te manaomia pe faaali atu ai le olioli tatou te lagonaina, a le manuia le taumafai atu e faamatala se mea e le mafaamatalaina, a le mafai ona lava le malamalama e maua e le faavasegaga ma le mafuaaga e uiga i le le tonu o faamasinoga ma le tutusa o le olaga, a le lava le poto masani ma le iloiloga a le lalolagi e maua mai ai le taunuuga o loo naunau i ai, ma afai foi e foliga mai ua matua tuulafoaiina lava i tatou, e moni e faamanuiaina i tatou i le alofa mutimutivale o le Alii, ma e faamalolosi ai i tatou e oo lava i le mana o le faaolaina (tagai 1 Nifae 1:20).

O le upu filifilia i le 1 Nifae 1:20, e taulai i le malamalama i le konasepi [concept] o le alofa mutimutivale o le Alii. O loo ta’u mai i le lomifefiloi o le filifilia e iloa ai se tagata ua filifilia, ua ave i ai le faamuamua, pe ua pikiina foi. E mafai foi ona faaaoga e faasino ai i lē ua filifilia e le Atua (Oxford English Dictionary Online, second ed. [1989], “Chosen”).

O nisi tagata ua faalogo pe faitau sese foi i lenei savali, e ono le maua i o latou olaga le alofa tunoa o le Alii ona ua talitonu “E le i filifilia a’u ma o le a le filifilia lava.” Tatou te ono mafaufau sese foi o na faamanuiaga ma meaalofa ua teuina mo isi tagata e sili atu ona amiotonu, pe auauna atu foi i ni valaauga taualoa o le Ekalesia. Ou te molimau atu o loo avanoa le alofa mutimutivale o le Alii mo i tatou uma, ma o loo naunau foi le Faaola o Isaraelu e faaee mai na meaalofa i o tatou luga.

O le avea ma tagata filifilia, e le o se mea faapea e na o i tatou ua faaee mai i ai. Ae, o outou lava ma a’u e fuafuaina pe filifilia i tatou. Faamolemole ia matau le faaaogaina o le upu “filifilia” i fuaiupu ia o le Mataupu Faavae ma Feagaiga:

“Faauta, e toatele e ua valaauina, a e toaitiiti e ua filifilia. E le filifilia foi i latou i se a?

“Aua ua faapea ona manumanu o latou loto i mea o lenei lalolagi, ma manao i viiga mai tagata” (MFF 121:34–35; faamamafa faaopoopo).

Ou te talitonu o loo tuusa’o mai lava le faatatauga o nei fuaiupu. E leai se lisi a le Atua o ni tagata e fiafia i ai, lea faapea tatou te faamoemoe e i ai se aso e faaopoopo atu i ai o tatou igoa. E le o fuapauina “le au filifilia” na o nai tagata. Ae, o o tatou loto ma o lo tatou usitai e iloa lelei ai pe o faitaulia i tatou o ni tagata filifilia o le Atua.

Sa aoaoina Enoka e le Alii i le vaega tonu lea o le aoaoga faavae. Faamolemole ia matau le faaaogaina o le upu filifilia i fuaiupu nei: “Faauta i ou uso nei; o i latou o galuega a o’u lava lima, ma na ou tuuina atu ia i latou lo latou poto i le aso na ou foafoaina ai i latou; ma o le Faatoaga foi o Etena, na ou tuuina atu ai i le tagata lona saolotoga;

“Ma sa ou fai atu i ou uso, ma poloaiina foi i latou, ia tatou fealofani, ma e ao ina latou filifilia au, lo latou Tama;” (Mose 7:32–33; faamamafa faaopoopo).

E pei ona tatou aoao mai i nei mau, o faamoemoega autu lava o le meaalofa o le saolotoga, o le alofa o le fealofani ma ia filifili le Atua. O le mea lea, ua avea i tatou ma tagata filifilia o le Atua ma valaauina ai Lona alofa mutimutivale a o tatou faaaogaina lo tatou saolotoga e filifili ai le Atua.

O se tasi o fuaitau ua lauiloa ma e masani foi ona ta’ua, o loo maua lea i le Mose 1:39. O lenei fuaiupu o loo ma’oti ma manino mai ai le faamatalaina o le galuega a le Tama Faavavau. “Aua faauta, o la’u galuega ma lo’u mamalu lenei—ia faataunuu le faaofuina o le tagata i le tino ola pea ma le ola faavavau” (faamamafa faaopoopo).

O loo maua foi se soāmau i le Mataupu Faavae ma Feagaiga, e tutusa lelei le manino ma le ma’oti o loo faamatala mai ai le tatou galuega autu o ni atalii ma afafine O Le Tama Faavavau. E mālie ona o lenei mau e foliga mai e le lauiloa ma e le ta’ua soo foi. “Faauta, o lau galuega lenei, o le tausi o a’u poloaiga, ioe, ma lou loto atoa, lou manatu atoa, ma lou malosi atoa” (MFF 11:20; faamamafa faaopoopo).

O lea, o le galuega a le Tama o le faataunuuina lea o le faaofuina o Lana fanau i le tino ola pea ma le ola e faavavau. O la tatou galuega, o le tausi o Ana poloaiga ma o tatou loto atoa, mafaufau atoa, ma le malosi atoa—ona avea ai lea o i tatou ma tagata filifilia, ma tatou maua ai ma taliaina le alofa mutimutivale o le Alii i o tatou olaga i aso taitasi, e ala i le Agaga Paia.

O le konafesi o loo tatou auai i le faaiuga o lenei foi vaiaso, o se tasi lea o faataitaiga o le alofa mutimutivale o le Alii. Ua faamanuiaina i tatou i le mauaina o fautuaga musuia mai taitai o le Ekalesia a le Faaola—ua fetaui lelei fautuaga ma o tatou vaitau ma o tatou tulaga ma lu’itau. Ua aoaoina i tatou, ua faagaeetia, ma ua faamalamalamaina, ua fautuaina ia salamo, ma ia faamalolosia. Ua faamalosia lo tatou faatuatua i le agaga o lenei konafesi, ma ua uunaia ai lo tatou manao ia salamo, ia usiusitai, ia faaleleia atili, ma auauna atu. E pei foi o outou, ua ou naunau e faaaoga mea ua faamanatu mai, o fautuaga, ma musumusuga patino ua faamanuiaina ai i tatou i lenei konafesi. E le o toe mamao, ona tatou mauaina lea o le alofa mutimutivale o le Alii a o tatou faalogologo atu i le saunoaga faaiu ma le molimau a Peresitene Gordon B. Hinckley. E moni lava, “o loo agalelei Ieova i mea uma, o lona alofa mutimutivale foi ua i ana mea uma na fai” (Salamo 145:9).

Ou te faafetai lava mo le Toefuataiga o le talalelei a Iesu Keriso e ala mai i le Perofeta o Iosefa Samita, ma le malamalama ua tatou maua nei e uiga i le alofa mutimutivale o le Alii. O o tatou mana’oga, faatuatua, ma le usiusitai e valaaulia ai i tatou ma fesoasoani tatou te iloatino ai Lona alofa mutimutivale i o tatou olaga. I le avea ai o a’u ma se tasi o Ana auauna, ou te tautino atu ai la’u molimau, o Iesu o le Keriso, o lo tatou Togiola ma le Faaola. Ou te iloa o loo soifua o Ia, ma o loo avanoa Lona alofa mutimutivale mo i tatou. E mafai e i tatou taitoatasi ona i ai mata e vaai manino ai, ma taliga e lagona tonu ai le alofa mutimutivale o le Alii, a o faamalolosia ma fesoasoani ia i tatou i nei aso e gata ai. Ia tutumu e le aunoa o tatou loto i le faafetai mo le tele o Lona alofa mutimutivale. I le suafa paia o Iesu Keriso, amene.