Na Veivakalougatataki ni Koniferedi Raraba

E sa dua na itavi vakalou na vosa vei kemuni ena soqoni raraba ni matabete oqo. Au dau vakanamata tu e veigauna meu tiko ena veisoqoni ni matabete vakaoqo vata kei ira na luvequ tagane. E kauta lesu mai na vakanananu cecere ena noqu dau dabe vata kei ira na luvequ tagane ena neitou iteki me keimami vakarorogo ki na nodra veivakavulici na Vakaitutu Raraba. Na veisoqoni vakaoqo e dau veisautaka na noqu bula ena gauna au se gonetagane kina ka tomani tikoga na veisau ni noqu bula ena gauna oqo. Au kila ni sa dua na veivakayarayarataki vei ira na luvequ tagane kei na milioni na vakaitutu ena Matabete i Eroni e vuravura raraba.

Ena bogi edaidai au vosa tiko kivei kemuni na vakaitutu ena Matabete i Eroni. Eda bula tiko ena dua na gauna ni veivakayavalati ka veivakurabuitaki. Na taucoko ni kosipeli e sa vakalesui mai ka sa tete yani ki vuravura. Na idola ni matabete era sa tu e vuravura kei na cakacaka tabu ni veivakabulai era sa vakarautaki tu kivei ira era kilikili kaya. E udolu vakaudolu na tamata vinaka ena vuravura era sasaga tiko me ra vakayacora na ka e dodonu ena nodra bula kei na nodra matavuvale kei na nodra itikotiko.

Na gauna veivakurabuitaki ka da bula tiko kina oqo e sa vakasinaiti tale tu ga ena veika rerevaki. Ko ni bula tiko ena veigauna ni bolebole ka vuqa sara na veitemaki kei na veika rerevaki era waraki kemuni tu. Ko ni sa sotava oti e vuqa na veitemaki kei na veika rerevaki vakaoqori. Ko ni sa rairai raica oti talega e vuqa na tamata ka vakacacani na nodra bula mai na nodra soro ena so na ivalavala ca ka sa dau yaco raraba e vuravura.

E rawa vakacava vei kemuni, me vaka e dua na vakaitutu ni Matabete i Eroni, mo ni taqomaki tu ena veigauna ni bolebole vakaoqo me rawa kina vei kemuni mo ni cakava na nomuni itavi ena cakacaka cecere oqo ka kunea kina na marau vakaidina ena bula oqo kei na bula sa bera mai?

E sega ni veivakidacalataki ni da sotava na ivalavala ca levu kei na veitemaki ka laivi keda tu na Turaga me da vakasaqara na noda dui gaunisala. Na kena dina, e sa sega ni wili rawa na veidusimaki e vakarautaki tu kivei keda vakayadua kevaka eda na vakarorogo. Ko ni sa ciqoma oti na isolisoli ni Yalo Tabu me veiliutaki ka vakauqeti kemuni. E sa tu vei kemuni na veivolanikalou, na itubutubu, na iliuliu ni Lotu kei na qasenivuli. E sa tu talega vei kemuni na nodra vosa na veiparofita, daurairai ka dauvakatakila ka ra bula tu ena noda gauna oqo. Era sa tu e vuqa sara na veidusimaki kei na veiliutaki era vakarautaki tu ka sega kina ni rawa mo ni vakayacora eso na vakacalaka lelevu ena nomuni bula vakavo walega kevaka o ni nakita mo ni vakanadakuya na veidusimaki o ni sa ciqoma.

Au gadreva ena bogi edaidai meu vakanamata ena dua vei ira na ivurevure ni veidusimaki oqo—o ira na parofita bula, daurairai kei na dauvakatakila ka da dau tokoni ira edaidai. O koya gona, au gadreva meu vakanamata ena dua vei ira na kena gaunisala tudei me da rawata kina na veidusimaki mai vei ira—na koniferedi raraba.

Na veikoniferedi raraba era sa tiki tu ni Lotu me vakatekivu sara mai ena itekivu ni itabagauna oqo. E a vakayacori na imatai ni koniferedi ni oti ga e rua na vula na kena tauyavutaki na lotu. Keimami dau sota vakarua ena dua na yabaki ka tuberi mai vei ira na Vakaitutu Raraba kei ira na vakailesilesi raraba ni Lotu. Na veika e dau vakayacori ena veikoniferedi raraba vakaoqo era dau vakarautaki tu mai na veivurevure ruarua me tabaki ka vakalivalivataki.

E dau taleitaka na marama tinaqu na koniferedi raraba.Vakawasoma na nona dau vakarogolevutaka tu na retio kei na retioyaloyalo ka sa dau dredre kina me kunei e vale e dua na vanua me sega ni rogoci kina na koniferedi. E vinakati ira na luvena me ra dau vakarorogo ki na veivosa ka vagauna na nona dau taroga se cava keitou nanuma rawa. E vagauna na noqu dau curu ki tautuba vata kei na dua na taciqu tagane me keirau laki veicaqe ena gauna ni soqoni ni koniferedi ena dua na Vakarauwai. Keitou na kauta tiko e dua na retio baleta ni keitou kila ni na mai tarogi keitou e muri o tinai keitou. Keitou na veicaqe ka vagauna keitou na vakacegu me keitou vakarorogo vakavinaka sara me rawa ni keitou mai tukutuku vei Nau. Au vakatitiqataka ni dau vakalialiai o tinaqu ena gauna keirau dau nanuma ruarua kina e dua vata ga na ka mai na dua taucoko na soqoni.

E sega ni o koya oqori na gaunisala vinaka ni vakarorogo ki na koniferedi. Au sa veivutunitaka. Sa tubu cake tikoga na noqu dau taleitaka na koniferedi raraba, au vakadeitaka ni vuna vakatikina na nona dau taleitaka na marama tinaqu na nodra vosa na veiparofita bula. Au nanuma sara na noqu a vakarorogo tiko ki na dua na soqoni ni dua na koniferedi kilaitani ena dua na vale o au duadua sara ga ena noqu a se tiko voli kina ena koliji. E vakadinadinataka e yaloqu ni o Harold B. Lee, na Peresitedi ni Lotu ena gauna o ya, e a dua na parofita dina ni Kalou. E a yaco na ka oqo ni se bera na noqu lako ki na buturara ni kaulotu kau sa malaude niu vakadinadinataka e dua na parofita bula baleta niu sa kila vakataki au. E a sa tu vei au na ivakadinadina vata ga me baleti ira vakayadudua na veiparofita me tekivu mai na gauna ko ya.

Ena noqu a se tu ena buturara ni kaulotu, e a se bera ni tu ena Lotu na iyaya ni setilaiti kei na vanua au a veiqaravi tiko kina e sega kina na kakaburaki ni koniferedi raraba. E a vakauta yani vei au na marama tinaqu na tepi ni vidio ni veisoqoni kau dau vakarogoca tu vakawasoma. E sa tubu cake na noqu taleitaka na domodra kei na nodra vosa na veiparofita kei na veiapositolo.

Au a qai wilika wale tikoga oqo na ivolaniveisiga nei koya na tukaqu vakarua, o Nathaniel Hodges, ka a kacivi ena dua na kaulotu ki Igiladi ena yabaki 1883. E kaya na nona a lako mai ki Salt Lake City me mai vakatikori ena nona kaulotu kei na nona tiko ena koniferedi ena nona a tiko voli e kea. Rogoca na nona ivakamacala ena koniferedi o ya, “Au lako ki na veisoqoni ni Valecavu levu ena siga taucoko. Era sa totoka na veivakaro ka ra soli. E sa kaukauwa dina sara ga na vosa nei Joseph F Smith kei George Q Cannon kei Peresitedi John Taylor. Au rogoca na ka era tukuna eso na qase ka ra vakaitikotiko e kea ni se bera vakadua me ra donumaka e dua na Koniferedi Vakayalo ka kaukauwa vakalevu cake sara.”¹

Au vakasamataka ni o ira na lewe ni Lotu e tautauvata na veika era vakila me baleta na veikoniferedi raraba yadua. E kena irairai ni o ira vakayadudua era kaukauwa ka vakayalo cake sara vakalevu mai na kena sa oti.

Me rawa kina ni veisautaka na noda bula na veitukutuku ni koniferedi raraba e gadrevi me da yalorawarawa ka muria na ivakasala eda rogoca. E vakamacalataka na Turaga ena dua na ivakatakila kivua na Parofita o Josefa Simici “au sa vakaroti kemudou, mo dou veivakauqeti ka veivakavulici vaka ikemudou ni dou sa soqoni vata; io mo dou kila kina na noqu ilesilesi kei na ivakaro”² Ia na kilai ni “kena icakacaka” e sega ni rauta. E kaya na Turaga ena tikina ka tarava, “Raica mo dou yavalata sara ni dou na caka dodonu tiko ga e mataqu.”³ Na yalorawarawa vakaoqo me da vakayacora kina na veika eda sa vulica ena dolava sara ga na katuba ni veivakalougatataki e veivakurabuitaki.

Ena yabaki sa oti ena soqoni ni matabete ni koniferedi e a vosa kina o Peresitedi Hinckley me baleta na rerevaki ni iyaloyalo vakasisila. Au se qai rogoca vakadua e dua na ivakasala vakaparofita ka vakadodonutaki sara tu ga kivei ira na lewe ni matabete. Oi kemuni na taciqu gonetagane o ni a rogoca ka vakarorogo tiko ena nona vosa o ni sa vakalougatataki oti ka o ni na vakalougatataki vakalevu cake sara mai na nomuni rawa ni kila ena gauna oqo. Na nomuni matavuvale ena gauna sa bera mai era na ciqoma na veivakalougatataki cecere baleta na nomuni talairawarawa. Ni raitayaloyalotaka mada na kena na vakayarayarataki na vuravura kevaka me ra kauta laivi mai ena nodra bula na iyaloyalo vakasisila o ira vakayadudua na vakaitutu ena matabete me saumi lesu kina na nona ivakasala na parofita.

Ena veigauna taucoko eda talairawarawa kina ki na vosa ni parofita kei ira na iapositolo eda tauca na kena veivakalougatataki. Eda sa ciqoma e levu cake sara na veivakalougatataki mai na kena e rawa me da kila ena kena gauna ka tomani tikoga na noda ciqoma na veivakalougatataki ena dua na gauna balavu ni oti na noda tauyavutaka na noda vakatulewa me da dau talairawarawa.

Ena siga e a tauyavutaki kina na Lotu e a ciqoma o Josefa Simici e dua na ivakatakila ka okati kina e dua na ivakavuvuli bibi me baleti ira kece na lewe ni Lotu. Ena nona vosa tiko ki na Lotu me baleti Josefa Simici na Turaga e kaya, “Sa kilikili sara mo dou muria na lewe ni lotu na vosa kei na ivakaro kecega sa vakatakilai vua me tukuna vei kemudou. Ia mo dou vakabauta ka muria na ka sa tukuna, me vaka ga au sa tukuna vei kemudou.”⁴

Mo ni rogoca mada ena gauna oqo na veivakalougatataki kivei ira era dau vakarorogo: “Ia kevaka dou sa kitaka vakakina, ena sega ni rawai kemudou na matamata ki etesi; ia ena vakamalumalumutaka na Turaga na Kalou na kaukauwa ni tevoro; raica ena yavavala ko lomalagi ena vukumudou me vakacaucautaki kina na yacana.”⁵

Sai ira oqori na yalayala kaukauwa levu ka rawa me taqomaki keda ena gauna rerevaki oqo. Eda gadreva vakakina ka na soli ira mai na Turaga kivei keda vakayadudua kece sara kevaka eda yalorawarawa me da vakamuri ira na veiparofita, daurairai ka dauvakatakila.

Vakatulewataka ena gauna oqo mo cakava me dua na ka e liu taumada ena nomu bula na koniferedi raraba. Vakatulewataka mo vakarorogo vakavinaka ka vakamuria na veivakavuvuli era soli mai. Vakarorogo se wilika wasoma na veivosa mo kila vakavinaka cake kina ka vakamauria na ivakasala. Ia kevaka dou sa kitaka vakakina ena sega ni rawai kemudou na matamata ki eli, ena yali mai vei kemudou na kaukauwa ni butobuto ka na yavala ko lomalagi ena vukumudou.

Au kila ni Tamada Vakalomalagi e lomani keda ka sa tu na nona inaki uasivi me baleti ira na Luvena. Au kila ni o Jisu sa ikoya na Karisito ka bula tiko. Au vakadinadinataka ni kosipeli i Jisu Karisito e sa vakalesui mai ki vuravura. Era tu o ira na noda veiparofita dina, daurairai ka dauvakatakila e vuravura edaidai ka tu vei ira na “vosa ni bula tawamudu.”⁶ Au vakadinadinataka oqo ena yaca i Jisu Karisito, emeni.