Na Marau Dina: E Dua na Lewa Matau

“E vinaka na bula, kevaka eda bula ena dua na kena ivalavala me rawa ni yaco vakakina.” Na veika oqo a tiki ni dua na itukutuku veivakauqeti au a wilika ena vuqa na yabaki sa oti. Na itukutuku oqo, “na bula vinaka” e baleta na ivakarau ni noda cakava na veika eso, ena vosa eda digitaka me da cavuta, kei na veika sara mada ga eda dau vakasamataka.

E sega ni dodonu me dua e galili ena ilakolako ni bula, ni da sa sureti kece me da lako yani vei Karisito ka vakataucokotaki Vua. Na inaki ni kosipeli sai koya na marau ka inaki talega ni Veisorovaki veivueti me baleta na tamata kecega.

Na itukutuku ena ivola i Ilamani e vakamacalataka vakalekaleka: “Ia sa rawa me da kila eke ni sa yalololoma na Turaga vei ira kece, sa masuta na yacana tabu ena yalodra dina.

“Ia eda sa kila ni sa tadola tu na matamata ki lomalagi vei ira kecega, io vei ira era na vakabauta na yaca i Jisu Karisito, na Luve ni Kalou.

“Io, eda sa kila ni ko koya yadua sa lomana, sa rawa me ciqoma na vosa ni Kalou sa mana ka kaukauwa sara … ia sa tuberi ira na tamata i Karisito ki na sala qiqo ka rabailailai …

“Ka vakatikori ira, io, ko ira era sa vakabulai ena liga imatau ni Kalou ena matanitu vakalomalagi.”¹

Kemuni na taciqu kei na ganequ, e dodonu me da kila ni “vinakata me” sai koya na kaukauwa e vakavuna me da ciqoma na vosa ni Kalou ka marau. Na dei tikoga ni nomu digidigi dodonu sai koya na ka ena kauti keda yani ki na marau.

E basika na marau ena noda talairawarawa kei na noda yaloqaqa me da vakayacora tikoga na loma ni Kalou, ena veigauna dredre sara mada ga. Ena gauna e vakasalataki ira kina na lewei Jerusalemi ko Liai na parofita, era a vakalialiai koya, ia, me vaka na veika era a vakayacora vei ira na parofita ni gauna makawa, era a segata sara me ra kauta tani na nona bula. Au cavuta na vosa ni parofita o Nifai: “Au … na vakatakila vei kemudou ni sa yalololoma na Turaga vei ira kecega sa digitaka ko koya, ena vuku ni nodra vakabauta, a sa vakaukauwataki ira me ra bula kina.”²

Niu kaulotu tiko ena vualiku kei Mexico, ni oti e vica na siga mai na gauna a vakayacori kina na lotu ni papitaiso vei iratou na matavuvale na Valdez, keitou a ciqoma e dua na qiri mai vei Baraca Valdez ka kerei keitou mai me keitou lako mada yani ki na nona vale. E via taroga vei keitou e dua na taro bibi. Ni sa mai kila na loma ni Kalou me baleta na Vosa ni Vuku, e dina ga ni na dredre vua me na kunea tale e dua na nona cakacaka, e taroga kevaka e dodonu me na cakacaka tikoga ena kabani ni tavako ka sa cakacaka tu mai kina vakabalavu. Ni oti ga e vica na siga a kerei keitou tale ko Baraca Valdez me keitou lako tale mada yani ki sikovi koya. Sa lewa me sa biuta na nona cakacaka ni sega ni vinakata me vorata na veika sa beitaki koya tiko. Ena matadredredre, kei na domo ni luluvu, e qai kaya vei keitou ena siga vata ga e biuta kina na nona cakacaka, eratou a qiriti koya yani e dua tale na kabani me ratou solia vua e dua na itutu vakacakacaka vinaka cake.

Io, eda na kune marau ena loma ni kena vakatovolei na noda vakabauta. Sa vakatakilai Koya ki vei keda na Turaga ena Nona yalololoma eda dau kunea ena gaunisala ni marau. Ena matata cake tikoga na noda raica na Ligana ena noda bula.

Na marau e dua na ituvaki ni yalo. Na marau oqori e vakatau ena noda bula dodonu.³

Ena vica na yabaki sa oti niu a veiqaravi tiko vaka-peresitedi ni daukaulotu, e a vakadinadinataka ko Evelia na watiqu, e dua na gauna ni marau ena nona raica na nodratou curuma yani na valenilotu e dua na matavuvale yalodina. Eratou a taubale mai na nodratou vale dravudravua ki valenilotu na tina oqo kei rau na luvena lalai, ena katakata levu ni siga ko ya. Eratou sega vakadua ni bau vakasamataka ni ratou na raici Elder Cruz, na daukaulotu gugumatua ka a wasea vei iratou na itukutuku ni kosipeli vakalesui mai, ena yabaki yani sa oti. Na veivakidacalataki vakasakiti oqo e idola ni nodratou kunea na marau cecere e kauta mai ki na nodratou bula na kosipeli. Erau cici yani na gone me rau mokoti koya, ka drodrova sobu na balui Elder Cruz na wainimata ni marau, e taura na ligana na tinadrau, ka vakavinavinaka vua ena vuku ni veika kece sa vakayacora me vakalougatataka kina na nona matavuvale. Eratou sa raica vakaidina na marau sa vakarautaki ka maroroi tu me baleti ira na Yalododonu.⁴

E kaya na Parofita o Josefa: “Na marau e iusutu ka inaki talega ni noda bula; ka na kena icavacava talega, kevaka eda na vakasaqara na sala ena kauti keda kina; na sala oqori sai koya na savasava, bula dodonu, yalodina, yalosavasava, ka maroroya na ivakaro kecega ni Kalou.”⁵

Ni oti na dredre ni ilakolako balavu ki na vanua yalataki ka sa oti e tolusagavulu na yabaki ni sasaga ena yalodina ena kena muri na ivakaro ni Kalou,⁶ e vakamacalataka umauma kina na parofita gugumatua ni iVola i Momani o Nifai na kedra itukutuku na nona tamata ena nona kaya, “Keimami sa tiko marau.”⁷

E vakamacalataki ena iVola i Momani na marau, mai vei Penijamini na parofita ka tui talega me “kedra ituvaki kalougata ka mamarau ko ira era sa muria na vunau ni Kalou. Raica era sa vakalougatataki ena veika vakayago kei na veika vakayalo.”⁸

Io, kemuni na taciqu kei na ganequ, e vinaka na bula, kevaka eda bula ena dua na kena ivalavala me rawa ni yaco vakakina. Na vakabauta, lewa, kei na digidigi dodonu era ivalavala rawarawa ka na rawa kina na marau e vakalevutaki kei na veivakadeitaki e loma ka levu cake ena bula oqo.

Me da nanuma tiko ni se kacivi keda tikoga na Turaga sara ga Vakataki Koya ka kaya, “Dou lako mai vei au, koi kemudou vakayadua ga sa oca ka colata na icolacola bibi, ia kau na vakacegui kemudou.”⁹ Au kila ni bula tiko o Koya ka sa tukituki tikoga ena noda katuba. Sa vakalesuya oti mai na Nona Lotu kei na taucoko ni kosipeli mai vua na Parofita o Josefa Simici kei na kena tadu mai na iVola i Momani. Ena gauna sara mada ga oqo e se liutaka tikoga na Nona Lotu kei na nona matanitu mai vua na noda parofita lomani ko Peresitedi Gordon B. Hinckley.

Au sa laiva vei kemuni na noqu loloma kei na noqu ivakadinadina malumalumu ena yaca ni Turaga ko Jisu Karisito, emeni.