O Se Tasi Taitai Faapitoa

O le a ou manatua pea ma le agaga faafetai se tasi taitai faapitoa o le na suia lou olaga mo le lelei. Ina ua ou feiloai ia te ia, sa tau leai ni au uo. Sa ou le tautala soo ma ou te le ataata i tagata. Ou te le’i auai i le seminare ma isi gaoioiga. O le mea moni, sa na o lou alu lava i le lotu i Aso Sa. Ae oo foi i lena, e feosofai solo ou mafaufauga i le vasega a Tamaitai Talavou. Na taumafai nisi o teineiti e faaaofia au, ae na ou taofia lava a’u mai ia i latou.

O le taimi muamua lava na taumafai ai lenei taitai e faalatalata mai ia te au, sa le’i tele sona faamanuiaina. O le taimi muamua, ou te le’i iloa lona igoa. Ona ia tuu mai lea o se galuega ou te faia ma amata ona faalagolago mai ia te au. Na pau le mafuaaga na ou talia ai le matafaioi ona sa ou le iloa pe faapefea ona ou fai atu i ai e leai. Ou te le’i iloaina lava, ae na amata ona avea o ia ma au uo. Na ou taumafai malosi lava e faataunuu lo’u valaauga, ma amata ona ou faalogo i totonu o le vasega. Sa amata foi ona ou auai i le seminare ma isi gaoioiga a le Ekalesia. Na ou faauo atu foi i isi tagata talavou o lau uarota. E le’i umi, ae avea le talalelei ma mea aupito sili ona taua i lo’u olaga.

O ai na amataina nei suiga uma i lo’u olaga? O lo’u taitai. O aso nei, a ou vaai i ona fofoga, ou te lagona le alofa tele ma le agaga faafetai. Ou te faafetai i le Tama Faalelagi mo le avanoa o le maua o se taitai faapitoa faapena. Ou te faafetai ia te ia mo le sauniaina o au ma lona i ai faatasi ma au i le aso na ou maua ai ou faaeega paia i le Malumalu o Sāo Paulo Pasila. Ou te faafetai mo ana faataitaiga o le alofa, o se alofa ou te taumafai e faatino i lo’u lava olaga.

O lenei la ua avea au ma taitai o Tamaitai Talavou i la’u uarota, ou te faamoemoe e mafai ona ou faia mo au tamaitai talavou, tusa lava pe na o se vaega o le mea na ia faia mo au.