Ua Salalau i le Aualofa le Naunautai mo le Faatamaoaigaina

O le fausiaina o se usoga lotogatasi ma le faamalolosia o aiga —o le taulaiga lena o loo i tua mai o taiala fou mo gaoioiga o le faatamaoaigaina o aiga, auaiga ma le tagata lava ia, lea sa faapea ona faatinoina ia Ianuari ua tea, o le saunoaga lea a le au peresitene aoao o le Aualofa o Bonnie D. Parkin, Kathleen H. Hughes, ma Anne C. Pingree.

“O loo i ai se naunautaiga i le vaega a taitai faapea foi i na uso o loo auai ai, pe a latou malamalama o loo i ai se auala faasamasamanoa e mafai ai ona faapotopoto tamaitai ma fausia ni faauoga ma sailia ni auala e faamalolosia ai aiga,” na saunoa ai Sister Pingree, o le o loo taulimaina ia faatamaoaigaina o aiga, auaiga, ma le tagata lava ia. “A tupu lenei mea, e faamanuiaina uma olaga—o le tagata lava ia, o le aiga, ma le uarota.”

E faatatau atu i le tusi a le Au Peresitene Sili ia Aokuso 2005, lea na faasilasila mai ai taiala fou mo fonotaga ma gaoioiga o le faatamaoaigaina o aiga, auaiga, ma le tagata lava ia, na saunoa ai Sister Pingree, o loo vaaia e le au peresitene aoao i lipoti e maua mai le Ekalesia aoao, ua maua e uso “se vaaiga moni o le auala e mafai ona e faamalosia ai le aiga e ala i gaoioiga o le faatamaoaigaina o le aiga, auaiga, ma le tagata lava ia. Na tuuina mai foi [taiala fou] ina ia faateleina ai le fetuutuunai i tulaga i le lotoifale.”

I le fonotaga ma le Church News, faatasi ai ma sui o le aufono o Connie Cannon ma Helen Thiriot, na taua ai e Sister Pingree, e tatau i taitai o Aualofa i le lotoifale ona faia vaega nei e faatatau i gaoioiga o le faatamaoaigaina:

• Fuafua ma iloilo manaoga patino o uso i se uarota po o se paranesi.

• Ia taliaina manatu faaalia mai uso.

• Ia faaaofia ai taitai perisitua. O loo i ai i epikopo ma peresitene o paranesi se vaaiga sili o manaoga o tagata taitoatasi ma aiga.

• Ia fuafua ma se faamoemoega ma le agaga tatalo.

O le tele o faataitaiga e ta’u mai i taitai aoao o le Aualofa, ua faaalia ai o loo tupu lenei mea. Na faamatala e Gail McHardy, o le peresitene o le Aualofa a le Paranesi a Houston, Siteki a St. Robert Misuri, le oo mai o ni manatu a o tatalo faatasi ma ona fesoasoani. “Sa i ai moni iina le Agaga e fesoasoani ia i matou,” o lana tala lea i se talanoaga i le telefoni.

Faatasi ai ma le lagolagosua a le peresitene o le paranesi, sa ia tuuina atu loa ia manatu i uso o lana uarota. Sa faateia o ia ina ua faia se vasega o le Gagana Amerika Faafaailoga, o se gaoioiga sa sili ona manaomia i le paranesi. Ma o se uso o le paranesi sa aoga i le vasega o gagana faafaailoga, na malie mai na te aoaoina ia vasega.

“Na malie foi le peresitene o le paranesi ia latou saini foi mo le aufaipese i se taimi e le o toe mamao,” o le tala lea a Sister McHardy. Sa ia faapea mai, o se tasi o uso e le’i leva ona toe toaga mai i le Ekalesia, na auai ai i le vasega, “sa ia lagona ai lona aafia tele i le Aualofa.”

O Sue Gaskill, o le taitai o faatamaoaigaina i le Uarota Fa a Holladay, Siteki a Salt Lake Holladay South, sa saili atu mo se fesoasoani mai “tagata tomai faapitoa” i lana uarota. O le faaaogaina o tomai faakomepiuta a Sue Gygi ma Julie Rawlings, na amataina ai e le uarota se galuega faatino o talafaasolopito o aiga. Na oo atu Sister Gygi ma Sister Rawlings i fale o isi uso ma fesoasoani e faatulaga se polokalama faakomepiuta o talafaasolopito o aiga ma faaali atu le ala e amataina ai. O le aso 12 o Setema, 2006, na auai atu ai uso o le Aualofa o le uarota i le malumalu ma faia galuega pe a ma se toatasi se tuaa a le tagata.

Na taua e Sister Gaskill, sa fai foi a latou taumafataga o le aoauli ma tamaitai o loo nofofale. Sa ia faaopoopo mai, o le faia o ni gaoioiga malie ma anoa e taitaiina e le Agaga, ua fesoasoani ai i uso laiti ifo, e “iloa ai le malie tele o le Aualofa.”

O isi gaoioiga o loo faia i le Ekalesia aoao e aofia ai:

O se paranesi i Mekisiko na aoaoina tamaitai i le otiina o lauulu o tamaiti, kuka, ma suisuiga faigofie, e fesoasoani ai i le paketi a le aiga.

O se uarota i Blackfoot, Idaho, na ofoina atu se vasega i le suiina o ofu faigofie talafeagai mo le siva.

O se uarota i le Aai o Sate Leki, faatasi ai ma le toatele o ulugalii talavou, na ofoina atu ni vasega i le faamalolosia o faaipoipoga ma le ola ai i se paketi.

O se siteki i Arisona sa fesoasoani i le aoaoina o le Igilisi i tamaiti ma tina e tautatala faaSiapaniolo.

O se uarota mo le autalavou nofofua i le Aai o Sate Leki sa ofoina atu ni vasega e saili ai galuega.

Na saunoa Sister Pingree, “Ou te manatu, e ala atu i faauoga ma sini e faapea ona faamalolosia ma fausia ai uso ma faapea foi ona faamalolosia ai aiga, e mafai ai ona tatou lagona le faateleina o le alofa o le Alii i o tatou olaga taitoatasi faapea ma o tatou aiga.”

Sii mai le Church News, 19 Aokuso, 2006.